കച്ചവട ചേരുവകളും താരപ്പൊലിമയുമില്ലാത്ത സിനിമകള്‍ക്കും ഇവിടെ ഇടമുണ്ടെന്ന് മനസ്സിലായി. ഇത്തരം സിനിമകള്‍ കാണാന്‍ ഒരു വിഭാഗം കാണികള്‍ ഇപ്പൊഴും അവശേഷിക്കുന്നുണ്ട്. ക്രൈം നമ്പറിന്റെയും അസ്തമയം വരെയുടെയും കാര്യത്തില്‍ ഏറെ പ്രതീക്ഷയുണര്‍ത്തുന്ന പ്രതികരണമാണ് തീയറ്ററില്‍ നിന്നുണ്ടായത്. ഇനിയും ഇതുപോലുള്ള സിനിമകളെടുക്കാന്‍ ധൈര്യം തരുന്നു ഈ വിജയം.
-സുദേവന്‍
സിനിമ കണ്ട് സിനിമയെടുത്ത ഒരാളാണ് ഞാന്‍. എന്നെ സംവിധായകനാക്കിയതും എന്റെ സിനിമ ശ്രദ്ധിക്കപ്പെട്ടതും ചലച്ചിത്ര മേളകളിലാണ്.
ആ ശ്രദ്ധ തീയറ്ററിലും ലഭിച്ചത് വലിയ അംഗീകാരമായി കാണുന്നു. 'അസ്തമയം വരെ' റിലീസ് ചെയ്യാത്ത പല സ്ഥലങ്ങളില്‍ നിന്നും സിനിമ കാണാന്‍ ആഗ്രഹം പ്രകടിപ്പിക്കുന്നവരുണ്ടെന്നതാണ് സന്തോഷം തരുന്ന മറ്റൊരു കാര്യം.
-സജിന്‍ബാബു
കച്ചവട സിനിമകള്‍ മാത്രം കണ്ടു ശീലിച്ചവര്‍ക്ക് ഈ പേരുകള്‍ അത്ര പരിചയമുണ്ടായിരിക്കില്ല. അല്ലാത്തൊരു വിഭാഗം കാണികള്‍ ഇപ്പോള്‍ ഏറ്റവുമധികം ചര്‍ച്ച ചെയ്യുന്ന രണ്ടു പേരുകളാണ് സുദേവന്റെയും സജിന്‍ബാബുവിന്റെയും. ചലച്ചിത്ര മേളകള്‍ക്ക് പുറത്തുകടന്ന് തീയറ്ററിലും സിനിമ കാണാന്‍ ആളുകളെത്തിയപ്പൊഴാണ് ഇവരുടെ പരിശ്രമത്തിന് കൂടുതല്‍ സാധ്യത കൈവരുന്നത്.
പരീക്ഷണങ്ങളും പുതുമകളും അത്രകണ്ട് ഏറ്റെടുക്കുന്ന ഒരു ആസ്വാദക വിഭാഗമല്ല മലയാളികള്‍. സിനിമയ്ക്കകത്തു നില്‍ക്കുന്നവര്‍ സ്വയംസുരക്ഷയ്ക്കുവേണ്ടി പുതുമകളെ ഏറ്റെടുക്കുന്നവരാണ് മലയാളി പ്രേക്ഷകരെന്ന് അവരവരുടെ ഓരോ സിനിമാകാലത്തും അവകാശവാദം ഉന്നയിക്കാറുണ്ടെങ്കിലും അതത്ര സത്യസന്ധമായ പറച്ചില്‍ അല്ല. ഇവിടെ വിഖ്യാത വിജയങ്ങളായ സിനിമളില്‍ ഏറിയ പങ്കും ആസ്വാദകന്റെ അഭിരുചികളെ തിരിച്ചറിഞ്ഞ് വാര്‍ത്തെടുക്കപ്പെട്ടവയാണ്. അതല്ലാതെ വരുന്നവയ്ക്ക് മുഖം തിരിഞ്ഞ് നില്‍ക്കുകയാണ് പതിവ്. എന്നിട്ട് നല്ല സിനിമകള്‍ ഉണ്ടാകുന്നില്ല എന്നൊരു പല്ലവിയും എടുത്തുചേര്‍ക്കും.
സജിന്‍ബാബുവിന്റെ അസ്തമയം വരെയും സുദേവന്റെ സി ആര്‍ നമ്പര്‍ 89 ഉം കഴിഞ്ഞ മാസം അഞ്ചിനാണ് കേരളത്തില്‍ റിലീസ് ചെയ്തത്. ഈ ചിത്രങ്ങള്‍ മൂന്നാഴ്ചയിലേറെ തീയറ്ററില്‍ നിന്നുവെന്നതാണ് ഏറെ പ്രത്യേകതയുള്ള കാര്യം. ഈ രണ്ടു ചിത്രങ്ങളും പ്രദര്‍ശിപ്പിക്കാന്‍ തീയറ്റര്‍ അനുവദിച്ച കെ എസ് എഫ് ഡി സിക്കും പുതുമയുള്ള സിനിമയെ തിരിച്ചറിഞ്ഞ ആ തിരിച്ചറിവുള്ള കാണികള്‍ക്കും കൂടി അവകാശപ്പെട്ടതായിരുന്നു ഇവയുടെ വിജയം. ആഖ്യാനത്തിലെ മാറ്റങ്ങളും പുതുമയും തിരിച്ചറിയുന്ന ഒരു പറ്റം ചെറുപ്പക്കാരാണ് തീയറ്ററില്‍ ഈ സിനിമകളുടെ രാശി മാറ്റിയതെന്നു പറയാം.
ട്രീസറുകള്‍ സിനിമകളുടെ ഗതി നിര്‍ണ്ണയിക്കുന്നൊരു കാലം, അതിലും പുതുമ കണ്ടെത്തിയാണ് സുദേവന്‍ തന്റെ സിനിമ പുറത്തുവിട്ടത്. ചലച്ചിത്ര മേളകളും സംസ്ഥാന സര്‍ക്കാറും ശ്രദ്ധിച്ച സി ആര്‍ നമ്പര്‍ തീയറ്ററില്‍ എങ്ങനെ നിലനില്‍ക്കും എന്ന ചോദ്യമാണ് സുദേവന്‍ സഹപ്രവര്‍ത്തകരോടും തന്നോടുതന്നെയും ചോദിച്ചത്. ആ ചോദ്യമാണ് ഏറെ പുതുമയുള്ള ട്രീസര്‍ രൂപത്തില്‍ വന്നതും. സര്‍ഗ്ഗാത്മകമായ ഒരു മനസ്സില്‍ നിന്നു മാത്രം പുറത്തുവരാനിടയുള്ള ആ ശ്രമം സോഷ്യല്‍ മീഡിയയില്‍ ശ്രദ്ധിക്കപ്പെട്ടു. എന്നും വംശനാശം സംഭവിച്ച് തുടരുന്ന ഒരുകൂട്ടം നല്ല സിനിമകളുടെ സ്‌നേഹികളായ ചെറുപ്പക്കാര്‍ ഷെയര്‍ ചെയ്ത ട്രീസറുകളായിരുന്നു സിനിമയെ മൂന്നാഴ്ച വരെ തീയറ്ററില്‍ നിലനിര്‍ത്താന്‍ അടിത്തറയിട്ടത്.
നിലനില്‍ക്കുന്ന സമ്പ്രദായത്തില്‍ ആയിരിക്കരുത് തന്റെ സിനിമ എന്ന നിര്‍ബന്ധം സജിന് ആദ്യം മുതല്‍ക്കേ ഉണ്ടായിരുന്നു. ഹ്രസ്വചിത്രങ്ങള്‍ മുതല്‍ പുലര്‍ത്തിപ്പോന്ന ഈ നിബന്ധന ഫീച്ചര്‍ ഫിലിമില്‍ എത്തിയപ്പോഴും കൈവെടിഞ്ഞില്ല. അതാണ് അസ്തമയം വരെയുടെ അംഗീകാരങ്ങളിലും എത്തിച്ചത്. മലയാള സിനിമ ഇതുവരെ പറഞ്ഞുശീലിച്ചിട്ടില്ലാത്തതും പരിചിതമല്ലാത്തതുമായ ശൈലിയാണ് സജിന്റേത്. കേരളത്തിലെ കാഴ്ചക്കാരെ മാത്രം ലക്ഷ്യം വെച്ചുള്ളതല്ല തന്റെ സിനിമയെന്ന് സജിന് അവകാശപ്പെടുന്നുമുണ്ട്. -'സ്വന്തമായി ഒരു ദൃശ്യഭാഷ ഉണ്ടാക്കണമെന്നാണ് എന്റെ ആഗ്രഹം. കഥ പലരും മുമ്പു പറഞ്ഞിട്ടുണ്ടാകും. എന്റെ ചിത്രത്തിന്റെ കഥയിലും അത്ര പുതുമയുണ്ടെന്നു അവകാശപ്പെടുന്നില്ല. ആഖ്യാനത്തിലാണ് മാറ്റമുണ്ടാകേണ്ടത്. ഓഡിയോ വിഷ്വല്‍ ലാംഗ്വേജ് ആണ് സിനിമ എന്നാണ് ഞാന്‍ വിചാരിക്കുന്നത്. സിനിമയ്ക്കപ്പുറം ചിന്തിക്കാന്‍ പറ്റുന്നതാകണം സിനിമ.'സജിന് പറയുന്നു. ഈ വേറിട്ട ആഖ്യാനമാണ് ഇപ്പോള്‍ സ്വീകരിക്കപ്പെട്ടതും.
ട്രീ ഓഫ് ലൈഫ് എന്ന സിനിമയാണ് പ്രകൃതിയും മനുഷ്യനും തമ്മിലുള്ള ബന്ധമെന്ന പ്രമേയം സജിന്റെ മനസ്സില്‍ വരുന്നതും അസ്തമയം വരെയുടെ ആശയത്തിലേക്ക് എത്തിക്കുന്നതും. കാലമോ സ്ഥലമോ ഇല്ലാത്ത ഈ ചിത്രത്തില്‍ കഥാപാത്രങ്ങള്‍ക്ക് പേരുമില്ല. ദൃശ്യത്തിന്റെ ഭാഷ തന്നെയാണ് സിനിമ എന്ന ആശയത്തില്‍ വിശ്വസിക്കുന്ന സജിന് അതുകൊണ്ടുതന്നെ ഊന്നിപ്പറയുന്നു- 'സിനിമ മലയാളത്തില്‍ മാത്രം ഒതുക്കുകയല്ല എന്റെ ലക്ഷ്യം. ലോകത്തെ മുഴുവന്‍ പ്രേക്ഷകരെയാണ് ഞാന്‍ ലക്ഷ്യമിടുന്നത്. സിനിമയ്ക്കു ഒരു ഭാഷയേയുള്ളൂ. അത് ദൃശ്യഭാഷ ആണ'്.
മലയാള സിനിമയുടെ ശുഭസൂചകമായ മാറ്റത്തെയാണ് ഈ സിനിമകളുടെ പ്രദര്‍ശനവിജയം സൂചിപ്പിക്കുന്നത്. ഓരോ വര്‍ഷവും തെരഞ്ഞെടുക്കപ്പെട്ട മികച്ച സിനിമകള്‍ക്ക് കെ എസ് എഫ് ഡി സിയുടെ കീഴിലുള്ള തീയറ്ററുകള്‍ ലഭ്യമാക്കണമെന്ന് അടൂര്‍ ഗോപാലകൃഷ്ണന്റെ നേതൃത്വത്തിലുള്ള സമിതി കഴിഞ്ഞ വര്‍ഷം സര്‍ക്കാറിനു സമര്‍പ്പിച്ച നിര്‍ദ്ദേശങ്ങളില്‍ പ്രധാനപ്പെട്ട ഒന്നായിരുന്നു. ഐ എഫ് എഫ് കെയില്‍ ശ്രദ്ധിക്കപ്പെട്ട എന്‍ കെ മുഹമ്മദ് കോയയുടെ അലിഫും കെ എസ് എഫ് ഡി സി പ്രദര്‍ശനത്തിനെത്തിച്ചിരുന്നു. പരിമിതമായ വിഭവ സാമഗ്രികളില്‍ നിന്ന് സ്വതന്ത്ര സിനിമകളെടുക്കുന്ന ചലച്ചിത്രകാരന്മാര്‍ക്ക് കേരളത്തില്‍ വര്‍ഷങ്ങളായി അടഞ്ഞുകിടക്കുന്ന വാതിലാണ് ഇതോടെ തുറക്കപ്പെടുന്നത്. ഫിലിം ഫെസ്റ്റിവലുകള്‍ക്ക് പുറത്തെ ലോകം അപ്രാപ്യമായിരുന്ന ഇത്തരം സിനിമകള്‍ക്ക് ഇടം കൊടുക്കുകയും വിജയിപ്പിക്കുകയും ചെയ്തതോടെ കലാസമൂഹത്തിനോട് മലയാളികളുടെ ഉത്തരവാദിത്തം നിറവേറ്റല്‍ കൂടിയായും ഇത് മാറുന്നു.
കൂട്ടിച്ചേര്‍പ്പ്:
ഇപ്പോഴിരുവരും
-ഉടനെയൊരു ഫീച്ചര്‍ ഫിലിം ഉദ്ദേശമില്ലാത്ത സുദേവന്‍ പുതിയ രണ്ട് ഷോര്‍ട്ട് ഫിലിമുകളുടെ പണിപ്പുരയിലാണ്. രണ്ടു സിനിമകളാണ് സജിന്റെ മനസ്സിലുള്ളത്. ഇതില്‍ ആദ്യത്തേത് 'ഹോളി ഓര്‍ഫന്‍' (വിശുദ്ധനായ അനാഥന്‍) സെപ്തംബറില്‍ ചിത്രീകരണം ആരംഭിക്കും.
സ്ത്രീശബ്ദം, ജൂലൈ
No comments:
Post a Comment