മലയാള സിനിമയിലെ പുതിയ മാറ്റങ്ങളെ അംഗീകരിക്കുന്നതായിരുന്നു 49ാമത് കേരള സംസ്ഥാന ചലച്ചിത്ര പുരസ്‌കാര പ്രഖ്യാപനം. കഴിവുറ്റ തുടക്കക്കാർക്ക് പുരസ്‌കാര പട്ടികയിൽ ഇടം കിട്ടിയപ്പോൾ പരിചയസമ്പന്നർക്കും പ്രാതിനിധ്യം ഉറപ്പിക്കാനായി. വലിയ പരാതിക്കും വിവാദങ്ങൾക്കും ഇടനൽകാതെയായിരുന്നു പ്രഗത്ഭ സംവിധായകൻ കുമാർ സാഹ്നി അദ്ധ്യക്ഷനായ ജൂറിയുടെ അവാർഡ് നിർണയം.
പ്രകൃതിയുടെ ഹരിതകാന്തി വീണ്ടെടുക്കാനുള്ള ആത്മസമർപ്പണത്തിന്റെയും ആദിവാസികൾ നേരിടുന്ന അവഗണനയുടെയും ആവിഷ്‌കാരമായ സി.ഷെരീഫിന്റെ 'കാന്തൻ ദി ലവർ ഓഫ് കളർ' മികച്ച കഥാചിത്രമായി. ശ്യാമപ്രസാദിന്റെ 'ഒരു ഞായറാഴ്ച'യാണ് രണ്ടാമത്തെ കഥാചിത്രം. കഥാപാത്രങ്ങളുടെ അതിസൂക്ഷ്മമായ മാനസികാപഗ്രഥനം മിഴിവോടെ അവതരിപ്പിച്ച ചലച്ചിത്രഭാഷയുടെ മികവിന് ഇതേ ചിത്രത്തിലൂടെ ശ്യാമപ്രസാദ് മികച്ച സംവിധായകനുമായി.
ഏറ്റവും ശ്രദ്ധേയമായ മികച്ച നടൻ, നടി വിഭാഗം പുരസ്‌കാര നിർണയം പ്രേക്ഷകർ കൂടി ഉറപ്പിച്ച അവാർഡുകളായിരുന്നു. ഞാൻ മേരിക്കുട്ടി, ക്യാ്ര്രപൻ എന്നീ സിനിമകളിലൂടെ ജയസൂര്യയും സുഡാനി ഫ്രം നൈജീരിയയിലൂടെ സൗബിൻ ഷാഹിറും മികച്ച നടന്മാർക്കുള്ള പുരസ്‌കാരം പങ്കിപ്പോൾ ചോല, ഒരു കുപ്രസിദ്ധ പയ്യൻ എന്നീ സിനിമകളിലെ പ്രകടനത്തിന് നിമിഷ സജയൻ മികച്ച നടിയായി. പ്രശസ്തനായ ഇന്ത്യൻ ഫുട്‌ബോളർ വി.പി സത്യനെയും ഒരു ട്രാൻസ്‌ജെൻഡറിനെയും വ്യത്യസ്തമായ ശരീരഭാഷയിൽ പകർത്തുന്ന അത്ഭുതാവഹമായ അഭിനയപാടവമാണ് ജയസൂര്യയെ പുരസ്‌കാരത്തിന് അർഹനാക്കിയത്. സ്വാഭാവികതയുടെ നൈസർഗിക സൗന്ദര്യമാണ് സൗബിൻ ഷാഹിറിന്റെ അഭിനയ സവിശേഷത. ഇരയാക്കപ്പെടുന്ന പെൺകുട്ടിയായും തുടക്കക്കാരിയുടെ പതർച്ചകളുള്ള അഭിഭാഷകയായുമുള്ള വേറിട്ട ഭാവപ്പകർച്ചകളാണ് നിമിഷയെ മികച്ച നടിയായി തിരഞ്ഞെടുക്കാൻ ജൂറിയെ പ്രേരിപ്പിച്ചത്. ചോലയിലെയും ജോസഫിലെയും വ്യത്യസ്ത പ്രകടനത്തിന് ജോജു ജോർജ് മികച്ച രണ്ടാമത്തെ നടനും, സുഡാനി ഫ്രം നൈജീരിയയിലെ നാട്ടിൻപുറത്തെ ഉമ്മമാരുടെ ജീവിതത്തനിമയാർന്ന ഭാവാവിഷ്‌കാരത്തിന് സരസ ബാലുശ്ശേരിയും സാവിത്രി ശ്രീധരനും മികച്ച രണ്ടാമത്തെ നടിയുടെ പുരസ്‌കാരവും പങ്കിട്ടു.
അപ്പുവിന്റെ സത്യാന്വേഷണം എന്ന ചിത്രത്തിലെ അഭിനയത്തിന് മാസ്റ്റർ റിഥുനും, പന്ത് എന്ന സിനിമയിലെ പ്രകടനത്തിന് അബനി ആദിയും മികച്ച മികച്ച ബാലതാരങ്ങളായപ്പോൾ കേരളീയ സമൂഹത്തിലെ കപട സദാചാര ബോധത്തിന്റെ മറനീക്കിക്കാട്ടുന്ന കഥനമികവിന് അങ്കിളിലൂടെ ജോയ് മാത്യു മികച്ച കഥാകൃത്തായി. വന്യവും നിഗൂഢവുമായ വനാന്തരീക്ഷത്തെ സമർത്ഥമായി പകർത്തിയ ഛായാഗ്രാഹണ വൈഭവത്തിന് കാർബണിലൂടെ കെ.യു മോഹനൻ മികച്ച ക്യാമറാമാനും, സുഡാനി ഫ്രം നൈജീരിയയിലൂടെ അതിർത്തികൾപ്പുറത്തുള്ള വിശാല മാനവികതയ്ക്കു വേണ്ടി ശബ്ദിക്കുന്ന തിരക്കഥയൊരുക്കിയ സക്കറിയയും മുഹ്‌സിൻ പരാരിയും മികച്ച തിരക്കഥാകൃത്തുക്കളുമായി തെരഞ്ഞെടുക്കപ്പെട്ടു. പോയ വർഷത്തെ ജനപ്രീതിയും കലാമേന്മയുമുള്ള ചിത്രത്തിനുള്ള പുരസ്‌കാരവും സുഡാനി ഫ്രം നൈജീരിയക്കാണ്. ഇതേ ചിത്രത്തിലൂടെ സക്കറിയ മികച്ച നവാഗത സംവിധായകനുമായി.
തീവണ്ടിയിലെയും ജോസഫിലെയും പാട്ടുകളെഴുതി ബി.കെ ഹരിനാരായണൻ മികച്ച ഗാനരചയിതാവും കാർബണിലെ പാട്ടുകളൊരുക്കി വിശാൽ ഭരദ്വാജ് മികച്ച സംഗീതസംവിധായകനുമായി. വിജയ് യേശുദാസും ശ്രേയാ ഘോഷാലുമാണ് മികച്ച ഗായകർ.
എം.ജയരാജിന്റെ 'മലയാള സിനിമ പിന്നിട്ട വഴികൾ'ആണ് മികച്ച സിനിമാ ഗ്രന്ഥം.
2018ൽ പുറത്തിറങ്ങിയ 158 മലയാള ചിത്രങ്ങളിൽ കുട്ടികളുടെ നാലു ചിത്രങ്ങൾ ഉൾപ്പെടെ 104 ചിത്രങ്ങളാണ് അവാർഡ് കമ്മിറ്റിയുടെ പരിഗണനയ്ക്കായി എത്തിയത്. ഇതിൽ 57 ചിത്രങ്ങൾ പുതുമുഖങ്ങളുടേതായിരുന്നു. മൂന്നു സ്ത്രീ സംവിധായകരുടെ ചിത്രങ്ങളും അവാർഡ് പരിഗണനയ്‌ക്കെത്തി.
ബഹുഭൂരിപക്ഷം ചിത്രങ്ങളും സിനിമ എന്ന മാധ്യമത്തിന്റെ സർഗാത്മകമായ സാധ്യതകളെ ഉപയോഗപ്പെടുത്താതെ അലസമായ സമീപനം പുലർത്തുന്നവയായിരുന്നു എന്ന് ജൂറി ചൂണ്ടിക്കാട്ടി. സാങ്കേതിക മികവ് പുലർത്തിയ ചിത്രങ്ങൾ ഉള്ളടക്കത്തിന്റെയും പ്രമേയ പരിചരണത്തിന്റെയും കാര്യത്തിൽ ഗുണനിലവാരം പുലർത്തിയില്ലെന്നും ജൂറി അഭിപ്രായപ്പെട്ടു.ആമിയിലൂടെ പശ്ചാത്തല സംഗീതത്തിന് ബിജിബാലും ശ്യാമപ്രസാദിന്റെ ഒരു ഞായറാഴ്ചയുടെ എഡിറ്റിംഗ് മികവിന് അരവിന്ദ് മന്മഥനും പുരസ്‌കാരങ്ങൾ നേടി. വ്യത്യസ്ത കാലഘട്ടങ്ങളെയും വിഭിന്ന ഭൂഭാഗങ്ങളെയും അവതരിപ്പിച്ച കമ്മാരസംഭവത്തിന്റെ പശ്ചാത്തലമൊരുക്കിയ മികവിന് വിനേഷ് ബംഗ്ലാൻ മികച്ച കലാസംവിധായകനായി. മികച്ച സിങ്ക് സൗണ്ട്, ശബ്ദമിശ്രണ, സൗണ്ട് ഡിസൈൻ, ലബോറട്ടറി പുരസ്‌കാരങ്ങൾ കാർബണിനാണ്. അനിൽ രാധാകൃഷ്ണനും സിനോയ് ജോസഫും സി.ജദേവനും പ്രൈം ഫോക്കസുമാണ് ഈ വിഭാഗത്തിൽ അവാർഡുകൾ നേടിയത്. ജയസൂര്യയെ അസ്വാഭാവികയില്ലാതെ ട്രാൻസ്‌ജെൻഡർ കഥാപാത്രത്തിലേക്ക് രൂപമാറ്റം വരുത്തിയ റോണക്‌സ് സേവ്യർ മികച്ച മേക്കപ്പ് മാനാപ്പോൾ കമ്മാരസംഭവത്തിലൂടെ സമീറ സനീഷ് മികച്ച വസ്ത്രാലങ്കാരകയായി. ഒടിയനിൽ പ്രകാശ് രാജിന് ശബ്ദം നൽകി ഷമ്മി തിലകനും ലില്ലിയിൽ സംയുക്ത മേനോന് ശബ്ദം നൽകി എം.സ്‌നേഹയും ഡബ്ബിംഗ് ആർട്ടിസ്റ്റുമാർക്കുള്ള പുരസ്‌കാരത്തിന് അർഹരായി. അരവിന്ദന്റെ അതിഥികളിലൂടെ പ്രസന്ന സുജിത്ത് മികച്ച നൃത്തസംവിധായകനായി.
പനി, ആന്റ് ദി ഓസ്‌കാർ ഗോസ് റ്റു എന്നീ ചിത്രങ്ങളിലെ വൈവിധ്യമാർന്ന ദൃശ്യപരിചരണത്തിന് മധു അമ്പാട്ട് പ്രത്യേക ജൂറി പുരസ്‌കാരം നേടി.
ജോഷി മാത്യുവിന്റെ 'അങ്ങ് ദൂരെ ഒരു ദേശത്ത്' ആണ് മികച്ച കുട്ടികളുടെ ചിത്രം. പനിയിലൂടെ സന്തോഷ് മണ്ടൂരും ചോലയിലൂടെ സനൽകുമാർ ശശിധരനും മികച്ച സംവിധായകർക്കുള്ള ജൂറി പരാമർശങ്ങൾ നേടി. സനൽകുമാർ ശശിധരന് ചോലയുടെ സൗണ്ട് ഡിസൈനിലും ജൂറി പരാമർശം നേടാനായി. ജയരാജിന്റെ രൗദ്രത്തിലെ അഭിനയത്തിന് കെ.പി.എ.സി ലീല ജൂറിയുടെ പരാമർശം നേടി.
വെള്ളിത്തിരയിലെ അവരും നമ്മളും തമ്മിലെന്ത് എന്ന ലേഖനത്തിലൂടെ ബ്ലെയ്‌സ് ജോണി മികച്ച ചലച്ചിത്ര ലേഖന പുരസ്‌കാരത്തിന് അർഹനാപ്പോൾ സുനിൽ സി.ഇ, രാജേഷ് എരുമേലി എന്നിവർ ഈ വിഭാഗത്തിൽ ജൂറി പരാമർശം നേടി. കന്യകയുടെ ദുർനടപ്പുകൾ എന്ന ചലച്ചിത്ര ഗ്രന്ഥത്തിലൂടെ എൻ.വി മുഹമ്മദ് റാഫിയും ജൂറി പരാമർശത്തിന് അർഹനായി.
ആകാശവാണി വാർത്താവീക്ഷണം, 2019 മാർച്ച് 11
