യഥാര്‍ഥ കൈത്തറിക്ക് കീര്‍ത്തികേട്ട ബാലരാമപുരം കൈത്തറി ഗ്രാമത്തില്‍ നിന്നാണ് കസവുകടയുടെ പിറവി. വേരുകള്‍ സിലോണില്‍ നിന്നും. ഒരു നൂറ്റാണ്ടിനു മുമ്പാണ് സിലോണില്‍ നിന്നുള്ള നെയ്ത്തുകാരുടെ കുടുംബം തിരുവനന്തപുരം പെരിങ്ങമ്മല ഗ്രാമത്തില്‍ എത്തിയത്. സിലോണ്‍ നെയ്ത്തുകാരുടെ പാരമ്പര്യം പിന്നീട് അഞ്ച് തലമുറകളിലേക്കു പടര്‍ന്നു. കൈത്തറിയുടെയും കസവിന്റെയും അത്ഭുതങ്ങള്‍ പിറന്ന ദേശമായി പെരിങ്ങമ്മലയും സത്യസന്ധമായ നെയ്ത്തിന്റെയും അസ്സല്‍ കസവിന്റെയും അവസാന പേരായി കസവുകടയും മാറി.
ഗുണനിലവാരവും സത്യസന്ധതയും നിലനിര്‍ത്തിയാല്‍ പരാജയപ്പെടില്ല എന്നതാണ് കസവുകടയുടെ വിജയരഹസ്യം. തലമുറകളായി കൈമാറിവന്ന നെയ്ത്തു പാരമ്പര്യം അവര്‍ അതേപടി നിലനിര്‍ത്തിപ്പോരുന്നു. സ്വന്തം കൈത്തറി യൂണിറ്റുകളില്‍ നിന്നാണ് കസവുകടയിലേക്കുള്ള വസ്ത്രങ്ങള്‍ ഉത്പാദിപ്പിക്കുന്നത്. അതിലൂടെ പതിറ്റാണ്ടുകളായി നൂറുകണക്കിന് തൊഴിലാളികള്‍ക്ക് തൊഴില്‍ നല്‍കിപ്പോരുന്നു. തൊഴിലാളികളോടുള്ള ഇഴയടുപ്പം ഉപഭോക്താക്കളോടും പുലര്‍ത്തുന്നിടത്താണ് വിപണിയില്‍ കസവുകടയ്ക്ക് വ്യത്യസ്തയും വിശ്വാസ്യതയുമേറുന്നത്. യഥാര്‍ഥ കസവും കൈത്തറിയും കിട്ടുന്ന സ്ഥാപനം എന്ന പേര് കസവുകടയ്ക്ക് ഉപഭോക്താക്കള്‍ നല്‍കി. ആ വിശ്വാസ്യത ഇന്നും കൈവിടാതെ കാക്കുന്നു.
ഉപഭോക്താക്കളുമായി ഒരു കുടുംബ ബന്ധം സൂക്ഷിക്കുന്നതാണ് കസവുകടയുടെ പ്രത്യേകത. വെറുമൊരു ടെക്‌സ്റ്റൈല്‍സ് കച്ചവട രീതി അല്ല. ഉപഭോക്താവിന്റെ താത്പര്യമനുസരിച്ചുള്ള വസ്ത്രങ്ങള്‍ തയ്യാറാക്കി നല്‍കുന്നിടത്ത് തുടങ്ങുന്ന ബന്ധം എക്കാലത്തേക്കുമുള്ള ഈടുവയ്പായി മാറുന്നു. തുണിയെടുത്തു കടവിട്ടിറങ്ങുന്നതോടെ ബന്ധം അവസാനിക്കുന്നില്ല. ഇങ്ങനെ പല തലമുറകളിലേക്കു നീളുന്ന ബന്ധങ്ങള്‍ തന്നെയാണ് കസവുകടയുടെ കരുത്ത്. കസവിന് ലൈം ടൈം വാലിഡിറ്റി ഉറപ്പുനല്‍കുമ്പോള്‍ തന്നെ ഉപഭോക്താവുമായുള്ള ബന്ധത്തിലേക്കു കൂടി അതു വളരുന്നു.
മുഹൂര്‍ത്ത സാരിയും സെറ്റ് മുണ്ടും പുടവയും യഥാര്‍ഥ കസവില്‍ നെയ്‌തെടുക്കുന്നതാണ് കസവുകടയുടെ പാരമ്പര്യം. ഗുണനിലവാരത്തില്‍ യാതൊരു വിട്ടുവീഴ്ചയും വരുത്തില്ലെന്നത് കസവുകട ധൈര്യസമേതം ഉപഭോക്താക്കള്‍ക്ക് നല്‍കുന്ന ഒരു ഉറപ്പാണ്.
സ്വന്തം തറികളില്‍ കരവിരുതോടെ നെയ്‌തെടുത്ത് സ്വന്തം കുടുംബത്തിനെന്ന പോലെ തയ്യാറാക്കുന്നതാണ് കസവുകടയുടെ ഓരോ വസ്ത്രവും. മൃഗക്കൊഴുപ്പും കൃത്രിമക്കൊഴുപ്പും ചേര്‍ക്കില്ല. പരുത്തിനൂലില്‍ കഞ്ഞിപ്പശയും വെളിച്ചെണ്ണയും ഉപയോഗിച്ചാണ് പാവുകള്‍ ഉണ്ടാക്കുന്നത്. പ്രകൃതിയുമായി ഇഴചേര്‍ത്ത് നെയ്‌തെടുക്കുന്ന കൂട്ടുകള്‍. പുലര്‍ച്ചെ അഞ്ചു മുതല്‍ പത്തു വരെയുള്ള ഇളംവെയിലിലാണ് പാവ് ഉണക്കിയെടുക്കുന്നത്. അതുകൊണ്ട് വസ്ത്രങ്ങളുടെ തനത് നിറം മങ്ങാതെ സൂക്ഷിക്കാനാകുന്നു. കസവ് വസ്ത്രങ്ങള്‍ക്ക് നിറം പകരാനായി പച്ചിലകളും കായ്കനികളും ചേര്‍ത്തുണ്ടാക്കുന്ന ജൈവിക നിറങ്ങളാണ് ഉപയോഗിക്കുന്നത്. അങ്ങനെ നൂറു ശതമാനം പ്രകൃതിയോട് ഇണങ്ങുന്ന വസ്ത്രങ്ങളാണ് ഇവിടെ രൂപമെടുക്കുന്നത്.
കൈത്തറി നിര്‍മ്മാണത്തില്‍ 100 വര്‍ഷത്തെയും വിപണനത്തില്‍ 50 വര്‍ഷത്തെയും പാരമ്പര്യവുമായാണ് കസവുകടയുടെ ആദ്യ ഷോറും 1993ല്‍ എറണാകുളം ചര്‍ച്ച് ലാന്റ് റോഡില്‍ ആരംഭിക്കുന്നത്. കസവുമായുള്ള മലയാളിയുടെ ബന്ധത്തിന് വര്‍ഷങ്ങളുടെ പഴക്കമുണ്ടെങ്കിലും യഥാര്‍ഥ കസവിന് കേരളത്തില്‍ വിപണി ഇല്ലായിരുന്നു. ആ ഇടത്തിലേക്കാണ് കസവുകടയെത്തുന്നത്. തുടക്കത്തില്‍ കച്ചവടമില്ലാതെ ഏറെ പ്രതിസന്ധിയിലൂടെയാണ് കടന്നുപോയത്. ഒരു വര്‍ഷത്തിനു ശേഷം കാര്യങ്ങള്‍ നേരെയായി. കസവുകടയെ തേടി ആളുകള്‍ എത്തിത്തുടങ്ങി. കൈത്തറിയുടെ യഥാര്‍ഥ സ്വഭാവം ആളുകളില്‍ എത്തിച്ചതായിരുന്നു കസവുകടയുടെ വിജയം. യഥാര്‍ഥ കസവും കൈത്തറിയും കിട്ടുന്ന കടയെ ജനങ്ങള്‍ തിരിച്ചറിഞ്ഞു. കസവുകടയെക്കുറിച്ച് ആളുകള്‍ പരസ്പരം നല്ല അഭിപ്രായം പറഞ്ഞുതുടങ്ങി. കേട്ടറിഞ്ഞവര്‍ ചര്‍ച്ച് ലാന്റ് റോഡിലെ സ്ഥാപനത്തിലേക്ക് വന്നു. ഈ ജനകീയത ആത്മവിശ്വാസമേകി.
എറണാകുളത്തെ വിജയത്തെ തുടര്‍ന്ന് കസവുകട കോഴിക്കോട്ട് തുടങ്ങി. പിന്നാലെ കോട്ടയം, തലശ്ശേരി, തൃശ്ശൂര്‍, തിരുവനന്തപുരം, ആലപ്പുഴ, തിരുവല്ല, കോട്ടക്കല്‍ എന്നിവിടങ്ങളിലായി 11 ഷോറൂമുകള്‍ കസവുകടയുടേതായി ഉപഭോക്താക്കളിലേക്കെത്തി. 11 കടകള്‍ക്കു പുറമേ പെരിങ്ങമ്മലയില്‍ നവീകരിച്ച വിശാലമായ കൈത്തറി നിര്‍മ്മാണ യൂണിറ്റും വില്പശനശാലയും കുഴിത്തറി ഉള്‍പ്പെടെയുള്ള പഴയ നിര്‍മ്മാണ ശാലയുമുണ്ട്.
കസവും കൈത്തറിയും മധ്യവയസ്സ് പിന്നിട്ടവര്‍ക്കുള്ളതാണെന്ന സങ്കല്പം കസവുകട മാറ്റുകയായിരുന്നു. കൈത്തറിയുടെ മാഹാത്മ്യം പുതിയ തലമുറയ്ക്കും ചേരും എന്ന ആശയം അവര്‍ക്കിണങ്ങളുന്ന വസ്ത്രങ്ങള്‍ ലഭ്യമാക്കിയതിലൂടെ കസവുകട തെളിയിച്ചു. കസവ് ചുരിദാര്‍ മെറ്റീരിയലുകള്‍ വൈ ടു കെ എന്ന പേരില്‍ ആദ്യമായി പരിചയപ്പെടുത്തി. 2000ല്‍ ആയിരുന്നു ഇത്. ഇപ്പോള്‍ ഏറ്റവും പുതിയ ഫാഷന്‍ എന്ന നിലയിലേക്ക് കൈത്തറി വസ്ത്രങ്ങള്‍ മാറി. ഓണ്‍ലൈന്‍ ഷോപ്പിംഗിലൂടെ ലോകത്ത് എവിടെ നിന്നും കസവുകടയിലെ വസ്ത്രങ്ങള്‍ ഓര്‍ഡര്‍ ചെയ്യാമെന്നതും പുതുതലമുറയെ ആകര്‍ഷിക്കുന്നു.
ഉപഭോക്താക്കളുടെ അഭിരുചിക്കനുസരിച്ച് വസ്ത്രങ്ങള്‍ രൂപകല്പന ചെയ്ത് നല്‍കുന്നതിനു തുടക്കമിട്ടതും കസവുകടയാണ്. വിവാഹത്തിനായി വരന്റെയും വധുവിന്റെയും ഇഷ്ടമനുസരിച്ചുള്ള പുടവയും സാരിയും സില്‍ക്ക് സാരിയും സെറ്റ് മുണ്ടും ഡബിള്‍ മുണ്ടും മാച്ചിംഗ് ഷര്‍ട്ടുമെല്ലാം മുന്‍കൂട്ടി ഓര്‍ഡര്‍ നല്‍കി വാങ്ങാനുള്ള സൗകര്യവും കസവുകടയുടെ സവിശേഷതയാണ്. കൈത്തറിക്കു വേണ്ടി മാത്രമുള്ള പരസ്യങ്ങള്‍ക്കു തുടക്കമിട്ടതും കസവുകടയാണ്. ഇതിനെ തുടര്‍ന്നാണ് സര്‍ക്കാര്‍ പോലും കൈത്തറിയെ പ്രോത്സാഹിപ്പിക്കുന്നതിനായി മുന്നിട്ടിറങ്ങുന്നത്.
ഒട്ടേറെ പരമ്പരാഗത നെയ്ത്തുതൊഴിലാളികള്‍ വീടുകളിലിരുന്ന് കസവുകടയ്ക്കു വേണ്ടി വസ്ത്രങ്ങള്‍ നെയ്‌തെടുക്കുന്നു. ഇവരാണ് കസവുകടയെ മുന്നോട്ടുനയിക്കുന്ന ശക്തിയെന്ന് സ്ഥാപനത്തിന്റെ ചുമതലക്കാരായ എസ്.സുശീലനും ഭാര്യ വനജ സുശീലനും പറയുന്നു. മക്കളായ നന്ദുവും ചന്തുവും അച്ഛനും അമ്മയ്ക്കുമൊപ്പം കസവുകടയുടെ നടത്തിപ്പുകാരായി സജീവമാണ്. കസവുകടയെ ആശ്രയിച്ച് കഴിയുന്ന നൂറുകണക്കിന് പരമ്പരാഗത തൊഴിലാളി കുടുംബങ്ങളുണ്ട്. ഇവര്‍ക്ക് തൊഴില്‍ നല്‍കുന്നതു തന്നെയാണ് ഏറ്റവും വലിയ ചാരിതാര്‍ഥ്യമെന്ന് സുശീലനും വനജയും കരുതുന്നു. അതുകൊണ്ടുതന്നെ മക്കള്‍ മറ്റൊരു തൊഴില്‍ മേഖലയിലേക്ക് പോകാതെ കസവുകടയുടെ നടത്തിപ്പുകാരായി ഉണ്ടാകണമെന്നതും അവരുടെ തീരുമാനമായിരുന്നു.
നെയ്ത്തിന് ഭാവിയില്ല എന്ന് കാലങ്ങളായി പറഞ്ഞുകേള്‍ക്കുന്ന കാര്യമാണ്. എന്നാല്‍ ഇതില്‍ വാസ്തവമില്ലെന്ന് സുശീലന്‍ പറയുന്നു. പാരമ്പര്യത്തിന്റെ അടിത്തറയുള്ള സത്യമുള്ള തൊഴിലാണിത്. ഒരിക്കലും നശിക്കില്ല. ഈ തൊഴിലാളികളെ നിലനിര്‍ത്തുന്നത് കസവുകടയെ പോലെ പാരമ്പര്യമുള്ള സ്വകാര്യ സംരംഭങ്ങളാണ്. എന്നാല്‍ നെയ്ത്തുതൊഴിലിനും തൊഴിലാളിക്കും സമൂഹത്തില്‍ കൂടുതല്‍ മാന്യത ലഭിക്കുവാന്‍ സര്‍ക്കാര്‍ തലത്തിലും ഉദ്യോഗസ്ഥ തലത്തിലും കൂടി അര്‍ഹമായ പരിഗണന കിട്ടേണ്ടത് ആവശ്യമാണെന്ന് അദ്ദേഹം ചൂണ്ടിക്കാട്ടുന്നു. നെയ്ത്തിനെ തൊഴിലധിഷ്ഠിത കോഴ്‌സ് ആയി പാഠ്യപദ്ധതിയില്‍ ഉള്‍പ്പെടുത്തുക വഴി അര്‍ഹമായ സ്ഥാനം സമൂഹത്തില്‍ ലഭിച്ചേക്കുമെന്നും കൈത്തറി പരിശീനത്തിനായി ഒരു ഇന്‍സ്റ്റിറ്റ്യൂട്ട് എന്ന സ്വപ്‌നം മനസ്സില്‍ സൂക്ഷിക്കുന്ന സുശീലന്‍ പറയുന്നു.
ഗൃഹലക്ഷ്മി, 2021 ഓഗസ്റ്റ് 1-15
