സഹയാത്രിക

 നടന്ന്‌ നടന്ന്‌
 കയറിക്കഴിഞ്ഞപ്പോഴാണ്‌
 നിന്നെക്കുറിച്ചോര്‍ത്തത്‌; 
നീയപ്പോഴും 
തുടങ്ങിയിട്ടേയുണ്ടായിരുന്നുള്ളൂ..

വാഴയില

മരിച്ചയാള്‍ക്ക്‌ 
കിടക്കുവാനുള്ള
 ഇല 
എന്റെ കൈവശമായിരുന്നു; 
ഇതില്‍ത്തന്നെയല്ലേ 
തൊട്ടുനാള്‍മുമ്പ്‌ 
ഞങ്ങളൊരുമിച്ച്‌ 
ഇലസദ്യ 
വിളമ്പിയത്‌!

പുതപ്പ്‌ 

മുഷിഞ്ഞാലും 
പിഞ്ഞിയാലും
 ചേര്‍ത്തണയ്‌ക്കുന്ന 
കടപ്പാടിന്റെ
 തീരാകൗതുകം.

പ്രണയം

എടുത്തു ചാടുമ്പോള്‍ 
പറഞ്ഞതല്ലേ 
ആഴമുണ്ടെന്ന്‌;
എന്നിട്ടിങ്ങനെ 
കൈകാലിട്ടടിച്ചാല്‍ 
എന്തു ചെയ്യാനാകും.

നെല്ലിക്ക
 
ഒരിറ്റു വെളളം
 കടമ്പ കടന്നു 
മധുരമെങ്കിലും 
കയ്‌പുവഴിയില്‍ 
കാല്‍ കഴയ്‌ക്കും.

അല്‍ഷിമേഴ്‌സ്‌
 
മറവിയുടെ 
കരിമ്പടത്തിന്‌ 
ചെറിയൊരു 
തുളയുണ്ട്‌;
ഓര്‍മ്മയുടെ.

വളപ്പൊട്ടുകള്‍
 
എനിക്ക്‌ പൂരം വേണ്ട
ആളും ആരവവും ഒഴിഞ്ഞ
പറമ്പുമതി;
പെറുക്കിയെടുക്കാന്‍
ഇത്തിരി വളപ്പൊട്ടുകളും..