ആക്ഷന്‍ ഹീറോ സുരേഷ്

'മുത്തേ, പൊന്നേ പിണങ്ങല്ലേ... എന്തേ കുറ്റം ചെയ്തു ഞാന്‍...” പോലീസ് സ്‌റ്റേഷനില്‍ എസ്.ഐ ബിജു പൗലോസിനു മുമ്പിലിരുന്ന് മേശമേല്‍ കൈകൊണ്ട് താളമിട്ട് സുരേഷ് പാടിയ പാട്ടാണ് ഇപ്പോഴത്തെ ഹിറ്റ്. ഈ പാട്ടും മുന്‍വരിയില്‍ പല്ലില്ലാത്ത മോണകാട്ടിയുള്ള സുരേഷിന്റെ ചിരിയും ഒരുപോലെ വൈറല്‍. നിവിന്‍പോളി നായകനായ 'ആക്ഷന്‍ ഹീറോ ബിജു'വില്‍ പാട്ടുപാടി അഭിനയിച്ചതോടെയാണ് തമ്പാനൂര്‍ അരിസ്റ്റോ ജങ്ഷനിലെ ചുമട്ടുകാരന്‍ നാട്ടിലും സോഷ്യല്‍ മീഡിയയിലും താരമായത്. കുറേ വര്‍ഷം പാടിനടന്ന സ്വന്തം പാട്ട് മലയാളികള്‍ ഏറ്റുപാടുന്നതിന്റെ ത്രില്ലിലാണ് സുരേഷ്.
തിരുവനന്തപുരം കണ്ണേറ്റുമുക്ക് സ്വദേശിയാണ് അരിസ്‌റ്റോ സുരേഷ് എന്നറിയപ്പെടുന്ന സുരേഷ്. കുട്ടിക്കാലം മുതല്‍ക്കേ പാട്ട് ഇഷ്ടമായിരുന്നു. മേശമേല്‍ താളമിട്ട് പാടിയിരുന്ന പതിവ് സുരേഷിന് അന്നുതൊട്ടേ ഉണ്ടായിരുന്നു. താളമിട്ട് പാട്ടുംപാടി എട്ടാംക്ലാസ്സില്‍ മൂന്നുവട്ടമിരുന്നപ്പോള്‍ പഠനത്തോട് റ്റാറ്റാപറഞ്ഞു. എസ്.എം.വി സ്‌കൂളില്‍നിന്ന് ഇറങ്ങുമ്പോള്‍ മനസ്സ് നിറയെ പാട്ടും സിനിമയുമായിരുന്നു. പിന്നീട് തൊഴിലിനിടയിലും കിട്ടുന്ന സമയത്തുമെല്ലാം പാട്ടെഴുത്ത് തുടര്‍ന്നു. ഇതിനോടകം അഞ്ഞൂറിലേറെ പാട്ടുകളെഴുതി താളമിട്ടിട്ടുണ്ട്. അതിലൊന്നാണ് ഇപ്പോള്‍ സുരേഷിന്റെ തലവര മാറ്റിയ 'മുത്തേ പൊന്നേ പിണങ്ങല്ലേ' എന്ന പാട്ട്.

അച്ഛന്‍ കുട്ടിക്കാലത്തു തന്നെ ഉപേക്ഷിച്ചുപോയ സുരേഷിനെ വളര്‍ത്തിയതും പഠിപ്പിച്ചതും രണ്ടാനച്ഛനായിരുന്നു. പഠനം മുടങ്ങിയതോടെ അമ്മയ്ക്കും അഞ്ചു പെങ്ങന്മാര്‍ക്കും വേണ്ടി സുരേഷിന് ചുമട്ടുതൊഴിലാളിയായി ജീവിതം ആരംഭിക്കേണ്ടിവന്നു. ഇന്ദിരാമ്മയുടെ ആറു മക്കളില്‍ രണ്ടാമനാണ്‌ സുരേഷ്. പിന്നീടിത്രയുംകാലം ജീവിച്ചതു മുഴുവന്‍ കുടുംബത്തിനുവേണ്ടി. അപ്പൊഴും സിനിമാമോഹം വിട്ടില്ല. ഇതിനിടയില്‍ സിനിമയിലേക്കു വരാനുള്ള ചെറിയ ശ്രമങ്ങളും നടത്തി.
ഇന്‍സ്‌പെക്ടര്‍ ബല്‍റാമിന്റെ ഷൂട്ടിങ്് നടക്കുമ്പോള്‍ സംവിധാനം പഠിപ്പിച്ചുകൊടുക്കാമെന്ന് ഐ.വി.ശശി സുരേഷിന് വാക്കുനല്‍കി. അന്ന് തിരുവനന്തപുരം മണ്ഡലത്തില്‍ ഉപതെരഞ്ഞെടുപ്പ് നടക്കുന്ന സമയം. കോണ്‍ഗ്രസ്സിന്റെ സജീവപ്രവര്‍ത്തകനായ സുരേഷിന് വി.എസ്.ശിവകുമാറിനുവേണ്ടി പ്രചരണത്തിനിറങ്ങേണ്ടിവന്നു. അങ്ങനെ ആദ്യമായി സിനിമയിലേക്ക് കിട്ടിയ അവസരം നഷ്ടമായി. സിനിമാജീവിതം അവിടെ അവസാനിച്ചെന്നു കരുതി. എങ്കിലും സുരേഷ് പരിശ്രമം തുടര്‍ന്നു. കുറേ തിരക്കഥകളെഴുതി. കഥകള്‍ സിനിമയാക്കണമെന്ന മോഹത്താല്‍ പലര്‍ക്കുമുന്നിലും കഥ പറഞ്ഞു.

ബംഗളൂരുവിലുള്ള സുഹൃത്ത് ശ്രീജിത് വഴിയാണ് സിനിമയിലേക്ക് അവസരം കിട്ടിയത്. സുരേഷ് പാടിയ പാട്ട് സംവിധായകന്‍ ഏബ്രിഡ് ഷൈനിനെ കേള്‍പ്പിച്ചതോടെയാണ് വഴി തെളിഞ്ഞത്. ഏബ്രിഡ് ഷൈന്‍ വിളിപ്പിച്ചപ്പോള്‍ പാടാനായിരിക്കുമെന്നാണ് കരുതിയത്. എന്നാല്‍ പാട്ടു മാത്രമല്ല പാട്ടിനൊപ്പം നല്ലൊരു വേഷം കൂടി കാത്തിരിപ്പുണ്ടായിരുന്നെന്ന് പിന്നീടാണറിഞ്ഞത്.
ആക്ഷന്‍ ഹീറോ ബിജുവിന്റെ പ്രമോഷനും മറ്റുമായി കുറെ ദിവസം സുരേഷ് തിരക്കിലായിരുന്നു. സിനിമ മികച്ച അഭിപ്രായം കേള്‍പ്പിച്ച് തീയറ്ററില്‍ ഓടുന്നതില്‍ വലിയ സന്തോഷം. നല്ല കഥാപാത്രങ്ങള്‍ തേടിയെത്തിയാല്‍ ഇനിയും അഭിനയിക്കും.
'കൂട്ടുകാരാണ് എന്റെ ഏറ്റവും വലിയ പിന്തുണ. ഞാന്‍ എന്തെഴുതിയാലും ആദ്യം കാണിക്കുന്നതും അഭിപ്രായം പറയുന്നതും അവരാണ്. സിനിമയില്‍നിന്ന് ഇപ്പോള്‍ ഓഫറുകള്‍ വരുന്നുണ്ട്. എല്ലാം അഭിനയിക്കാനാണ്. നടനാകുക എന്നതിനെക്കാള്‍ തിരക്കഥാകൃത്താകുകയാണ് ലക്ഷ്യം.'സുരേഷ് പറയുന്നു. സിനിമയില്‍ അഭിനയിച്ചെന്നുവച്ച് ചുമട്ടുജോലി കളയാന്‍ സുരേഷ് ഒരുക്കമല്ല. തിരക്കൊഴിഞ്ഞാല്‍ പഴയ ചുമട്ടുകാരനായി താന്‍ അരിസ്‌റ്റോ ജങ്ഷനില്‍ തന്നെയുണ്ടാവുമെന്ന് പറയാനും സുരേഷ് മറക്കുന്നില്ല.

ചിത്രഭൂമി, 2016 ഫെബ്രുവരി 27, 2016

ചരിത്രം കല്ലിലെഴുതി വിഴിഞ്ഞം ഗുഹാക്ഷേത്രം

നൂറ്റാണ്ടുകളുടെ ചരിത്രം കല്ലിലെഴുതി രാജഭരണകാലത്തോളം പഴക്കമുള്ള പട്ടണത്തിന്റെ ഓര്‍മ്മകള്‍ അവശേഷിപ്പിച്ച് നിലകൊള്ളുകയാണ് വിഴിഞ്ഞത്തെ ഗുഹാക്ഷേത്രം. കാലമേറെ ചെന്നെങ്കിലും പ്രൗഢിക്കും തലയെടുപ്പിനും മങ്ങലേല്‍ക്കാത്ത ക്ഷേത്രം ചരിത്രാന്വേഷികളെയും സഞ്ചാരികളെയും തേടുന്നു. വിഴിഞ്ഞം തീരത്തുനിന്ന് ഏറെ അകലെയല്ലാതെയാണ് പുരാവസ്തു വകുപ്പിന്റെ സംരക്ഷണയിലുള്ള ഈ ക്ഷേത്രം.
ഒറ്റക്കല്ലിലാണ് വിഴിഞ്ഞം ഗുഹാക്ഷേത്രം പണിതീര്‍ത്തിട്ടുള്ളത്. ലളിതമായ രീതിയില്‍ നിര്‍മിച്ചിട്ടുള്ള ക്ഷേത്രത്തിന് പാറ തുറന്നുണ്ടാക്കിയ ശ്രീകോവില്‍ മാത്രമാണുള്ളത്. മറ്റു ഗുഹാക്ഷേത്രങ്ങളെ അപേക്ഷിച്ച് വലുപ്പത്തില്‍ ചെറുതാണിത്. കൂറ്റന്‍ പാറയിലെ വിശാലമായ ഉള്ളറകളുള്ള ഗുഹാക്ഷേത്ര നിര്‍മാണരീതി ഇവിടെ കാണാനാകില്ല. ആകെയുള്ളത് ഒറ്റക്കല്ലും അതിലെ കൊത്തുപണികളും മാത്രമാണ്. എട്ടാം നൂറ്റാണ്ടില്‍ നിര്‍മിക്കപ്പെട്ടതെന്ന്  കരുതുന്ന വീണാധര ദക്ഷിണാമൂര്‍ത്തിയുടെ ശില്‍പ്പം ഇവിടെ കാണാനാകും. പ്രവേശന കവാടത്തിന്റെ ഇരുവശങ്ങളിലുമായി പൂര്‍ത്തിയാകാത്ത ത്രിപുരാന്തക മൂര്‍ത്തിയുടെയും നടരാജമൂര്‍ത്തിയുടെയും പാര്‍വ്വതിദേവിയുടെയും രൂപങ്ങളുമുണ്ട്. ഇരുകൈകളിലും അമ്പും വില്ലുമേന്തിനില്‍ക്കുന്ന ത്രിപുരാന്തക മൂര്‍ത്തിയുടെ ശില്‍പ്പം എട്ടാം നൂറ്റാണ്ടിലെ ചോള ശില്‍പ്പമാതൃകയിലുള്ളതാണെന്ന് ചരിത്രരേഖകള്‍ പറയുന്നു.
രാജഭരണത്തിന് പരിസമാപ്തിയായതോടെ ഗുഹാക്ഷേത്രത്തിനു മങ്ങലേറ്റു. കാടുപിടിച്ചു കിടന്ന ക്ഷേത്രത്തില്‍ ചിലര്‍ വിളക്കുകത്തിച്ച് പരിപാലിച്ചിരുന്നതായി പഴമക്കാര്‍ പറയുന്നു. ഏറെക്കാലത്തെ അവഗണനക്കൊടുവില്‍ കേന്ദ്രപുരാവസ്തു വകുപ്പിന്റെ സംരക്ഷണയിലായതോടെയാണ് സ്മാരകത്തിന് പുതുജീവന്‍ വച്ചത്. ഇപ്പോള്‍ ചുറ്റുമതില്‍ കെട്ടി മികച്ച രീതിയില്‍ സംരക്ഷിച്ചുവരുന്ന ക്ഷേത്രത്തിന്റെ പ്രവേശനകവാടം മുതല്‍ കല്ലുപതിച്ചും ഇരുവശങ്ങളിലും ചെടികള്‍ വച്ചുപിടിപ്പിച്ചും മനോഹരമാക്കിയിട്ടുണ്ട്. ഫലവൃക്ഷങ്ങളാല്‍ സമൃദ്ധവും സദാസമയം തണലും തണുപ്പുമുള്ളതുമാണ് ഇവിടത്തെ അന്തരീക്ഷം.
ആയ് രാജവംശകാലത്തെ പ്രധാന വ്യാപാരകേന്ദ്രമായി അറിയപ്പെടുന്ന വിഴിഞ്ഞത്തിന്റെ ചരിത്രപ്രാധാന്യത്തിലേക്ക് വെളിച്ചം വീശുന്നതാണ് ഈ ഗുഹാക്ഷേത്രവും ചരിത്രരേഖകളും. കേരള സര്‍വ്വകലാശാല പുരാവസ്തുവകുപ്പ് വിദ്യാര്‍ഥികളും അധ്യാപകരും വിഴിഞ്ഞത്തിന്റെ ചരിത്രപാരമ്പര്യം
പഠനവിഷയമാക്കിയിരുന്നു.
വിഴിഞ്ഞം ജങ്ഷനില്‍ നിന്ന് 50 മീറ്റര്‍ മാറി ഹാര്‍ബര്‍ റോഡിലാണ് ക്ഷേത്രം സ്ഥിതിചെയ്യുന്നത്. ലോക ടൂറിസം ഭുപടത്തിലും ഇടം തേടിയ ഈ ഗുഹാക്ഷേത്രം കോവളം വിനോദ സഞ്ചാരകേന്ദ്രവും വിഴിഞ്ഞം അന്താരാഷ്ട്ര തുറമുഖ നിര്‍മാണവും കണ്ടുമടങ്ങുന്ന സഞ്ചാരികള്‍ക്ക് കേവലം കാഴ്ചയുടെ ഇടം മാത്രമല്ല, ചരിത്രത്തിന്റെ ഒകൈയ്യൊപ്പു കൂടിയാണ് പകര്‍ന്നുനല്‍കുന്നത്.

മാതൃഭൂമി, ഫെബ്രുവരി 16, 2016

വേറിട്ട ആഖ്യാനവഴിയില്‍ മണ്‍സൂണ്‍ മാംഗോസ്


വേറിട്ട സിനിമകള്‍ വരുമ്പോള്‍ മുഖംതിരിക്കുന്ന മലയാളത്തിന്റെ പതിവു കാഴ്ചശീലത്തിലേക്ക് എഴുതിച്ചേര്‍ക്കാവുന്ന പുതിയ പേരാണ് മണ്‍സൂണ്‍ മാംഗോസ്. ഇടവേളയ്ക്കുശേഷം ഫഹദ് ഫാസിന്റെതായി റിലീസ് ചെയ്ത ചിത്രത്തിന് ആദ്യനാള്‍ മുതല്‍ തീയറ്ററില്‍ ആളുണ്ടായിരുന്നില്ല. ആദ്യ ആഴ്ച കഴിഞ്ഞതോടെ സിനിമ തീയറ്റര്‍ വിടുകയും ചെയ്തു. തനിക്ക് സൂപ്പര്‍താരമാകേണ്ട, നല്ല സിനിമകളുടെ ഭാഗമായാല്‍ മതിയെന്ന് ഫഹദ് മുമ്പേ പറഞ്ഞതാണ്. എന്നാല്‍ നല്ല സിനിമയുടെ ഭാഗമാകുമ്പോള്‍ ആ സിനിമകളെയും നടനെയും പ്രേക്ഷകര്‍ കൈവിടുകയാണ്.
പ്രേക്ഷകരെ രസിപ്പിക്കുന്ന സിനിമയല്ല, മണ്‍സൂണ്‍ മാംഗോസ്. അവര്‍ പ്രതീക്ഷിക്കുന്ന രസങ്ങളൊന്നും ഈ സിനിമ കൊടുക്കുന്നില്ലെന്നു പറയാം. ആഖ്യാനത്തിലും അവതരണത്തിലുമാണ് മണ്‍സൂണ്‍ മാംഗോസ് പുതുമ തരുന്നത്. അതുകൊണ്ടുതന്നെ പതിവു കഥാമുഹൂര്‍ത്തങ്ങളും സംഭവവികാസങ്ങളും പ്രതീക്ഷിച്ച് സമീപിക്കുന്നവരെ ചിത്രം നിരാശപ്പെടുത്തും. എന്നാല്‍ ഇത്തരം ചിത്രങ്ങളില്‍ അഭിനയിക്കാന്‍ ധൈര്യം കാണിക്കുന്നു എന്നതു തന്നെയാണ് ഫഹദ് ഫാസില്‍ എന്ന നടനെ വേറിട്ടുനിര്‍ത്തുന്നത്.
മലയാള സിനിമയുടെ മുന്‍നിരയില്‍ പുതിയ തലമുറ നിലയുറപ്പിച്ചു കഴിഞ്ഞെങ്കിലും പതിവുചേരുവകളില്‍നിന്ന് വിട്ടുസഞ്ചരിക്കാന്‍ അവരും തയ്യാറാവുന്നില്ലെന്ന് വിജയചിത്രങ്ങളുടെ പട്ടിക നോക്കിയാലറിയാം. യുവത്വത്തിന്റെ പ്രസരിപ്പ് ഈ ചിത്രങ്ങള്‍ക്ക് അവകാശപ്പെടാനാകുമെങ്കിലും സുരക്ഷിതമായ വഴികളിലൂടെയാണ് അവയെല്ലാം സഞ്ചരിക്കുന്നത്; അങ്ങനെയാണ് വിജയം നേടുന്നതും. മറുവശത്ത് ഫഹദ് ഫാസിലെന്ന യുവതാരമാട്ടെ, പതിവുവിജയരീതികളെ പാടേ അവഗണിച്ച് പുതിയതായി എന്തെങ്കിലും പ്രേക്ഷകന് നല്‍കുക എന്ന വഴിയാണ് തെരഞ്ഞെടുത്തിട്ടുള്ളത്. ഫഹദ് എന്ന താരത്തേക്കാളുപരി നടനായ അഭിനേതാവിനും അതാണ് നല്ലത്.

ഫെയ്‌സ്ബുക്കില്‍ ഫഹദിന്റെ ഫാന്‍ പേജില്‍ വന്ന ഒരഭിപ്രായം ഇവിടെ കൂട്ടിവായിക്കുന്നത് നന്നായിരിക്കും. 'നിങ്ങള്‍ ആഗ്രഹിക്കുന്ന പടമല്ല ഫഹദ് ചെയ്യുന്നത്. ഒരു പക്ഷെ കാലങ്ങള്‍ക്കു ശേഷം ഫഹദിന്റെ പടങ്ങള്‍ നിങ്ങള്‍ ഇഷ്ടപ്പെട്ടേക്കും. ഇഷ്ടപ്പെടും. കാരണം അദ്ദേഹത്തിന്റെ പടത്തിന് ഒരു മാസ്മരികത ഉണ്ട്.' -ഇതുതന്നെയാണ് ഫഹദ് ചിത്രങ്ങള്‍ക്ക് കിട്ടേണ്ടുന്ന വലിയ തിരിച്ചറിവും അംഗീകാരവും.
രണ്ട് പതിറ്റാണ്ട് മുമ്പത്തെ അമേരിക്കന്‍ പശ്ചാത്തലത്തില്‍ കഥപറഞ്ഞുപോകുന്ന മണ്‍സൂണ്‍ മാംഗോസില്‍ സ്വാഭാവിക വികാസങ്ങള്‍ മാത്രമേയുള്ളൂ. അപ്രതീക്ഷിത സംഭവങ്ങളോ പരിണാമങ്ങളോ ചിത്രത്തില്‍ സംഭവിക്കുന്നില്ല. ഡി.പി.പള്ളിക്കല്‍ എന്ന കഥാപാത്രത്തിന്റെ മാനസികഘടനയ്‌ക്കൊപ്പം സഞ്ചരിച്ചാല്‍ സിനിമ ആസ്വദിക്കാവുന്ന ഒന്നായിമാറും.
അമേരിക്കയില്‍ ജനിച്ചുവളര്‍ന്ന പള്ളിക്കലിന്റെ ആരാധനപാത്രങ്ങള്‍ സത്യജിത് റേയും, പത്മരാജനുമൊക്കെയാണ്. അമേരിക്കയില്‍വച്ച് ഒരു മലയാള സിനിമ ചെയ്യണമെന്നാണ് അയാളുടെ ആഗ്രഹം. കഥയുടെ കാര്യത്തില്‍ ഡി.പി പഴഞ്ചനാണ്. പണ്ടേതോ ഹിന്ദി സിനിമയില്‍ നായകനായെത്തി ഒന്നുമാകാതെ പോയ പ്രേംകുമാറിനെ നായകനാക്കി  മണ്‍സൂണ്‍ മാംഗോസ് എന്ന ചിത്രം പൂര്‍ത്തീകരിക്കാന്‍ ശ്രമിക്കുന്നു. കഴിഞ്ഞവര്‍ഷം പുറത്തിറങ്ങിയ സിനിമാവാല എന്ന ബംഗാളി ചിത്രമുള്‍പ്പടെ ഒട്ടേറെ സിനിമകള്‍ക്ക് വിഷയമായ സിനിമയെടുക്കാന്‍ ആഗ്രഹിച്ച് ഒന്നുമാകാതെ പോകുന്ന മനുഷ്യന്റെ കഥയാണ് മണ്‍സൂണ്‍ മാംഗോസിലുമെങ്കിലും വേറിട്ട പശ്ചാത്തലവും കഥാപരിസരവും ചിത്രത്തിന് പുതുമ പകരുന്നു. അങ്ങനെയുള്ളൊരു മനുഷ്യന്റെ മനോവികാരം പ്രകടമാക്കുന്ന ചിത്രത്തിന്റെ ക്ലൈമാക്‌സ് അഭിനന്ദനമര്‍ഹിക്കുന്നു.
ഫഹദിന്റെ അനായാസമായ അഭിനയശൈലി തന്നെയാണ് മണ്‍സൂണ്‍ മാംഗോസിന്റെ പ്രധാന ആകര്‍ഷണം. മറ്റു കഥാപാത്രങ്ങളായി വരുന്ന വിനയ്‌ഫോര്‍ട്ട്, വിജയ് റാസ്, അലന്‍സിയര്‍, തമ്പി ആന്റണി എന്നിവരുടെ പ്രകടനവും എടുത്തുപറയേണ്ടതാണ്. അമേരിക്കന്‍ ജീവിതം ഹാസ്യാത്മകമായി അവതരിപ്പിച്ച അക്കരക്കാഴ്ചകളുടെ സംവിധായകന്‍ അബി വര്‍ഗീസാണ് മണ്‍സൂണ്‍ മാംഗോസ് ഒരുക്കിയിരിക്കുന്നത്. ആദ്യ സിനിമയിലൂടെ വേറിട്ട വഴി തുറന്ന അബിയിലൂടെ മലയാളത്തിന് പ്രതീക്ഷ വയ്ക്കാവുന്ന ഒരു സംവിധായകനെയാണ് ലഭിച്ചിരിക്കുന്നത്.

സ്ത്രീശബ്ദം, ഫെബ്രുവരി 2016

കേരള രാജ്യാന്തര ചലച്ചിത്രമേള അവലോകനം

സിനിമ മുന്നില്‍നിന്ന മേള


ഒരാഴ്ചക്കാലം സിനിമ മാത്രം സംസാരിച്ച നഗരം ഒരു വര്‍ഷത്തെ കാത്തിരിപ്പിലേക്ക് കടന്നു. ലോകസിനിമകളെ അടുത്തറിഞ്ഞ് സിനിമയില്‍ ജീവിച്ച ദിവസങ്ങള്‍ ഇനി അയവിറക്കാം. ഇരുപതാമത് കേരള രാജ്യാന്തര ചലച്ചിത്രമേളയ്ക്ക് ഡിസംബര്‍ 12ന് തിരശ്ശീല വീണപ്പോള്‍ സിനിമ മാത്രം മുന്നില്‍നിന്ന എട്ട് ദിവസങ്ങള്‍ക്കുകൂടിയാണ് വിരാമമായത്.
പരാതികളും സംഘര്‍ഷങ്ങളും കുറഞ്ഞ് എല്ലാവര്‍ക്കും സിനിമ കാണാന്‍ അവസരം ലഭിച്ച മേളയായിരുന്നു ഇത്തവണത്തേത്. നിശാഗന്ധിയും ടാഗോറും മേളയില്‍ ഉള്‍പ്പെടുത്തിയതോടെ രണ്ടായിരത്തിലേറെ സീറ്റുകളാണ് അധികമായി ലഭിച്ചത്. ആവശ്യത്തിന് സീറ്റുകളായതോടെ റിസര്‍വേഷന്‍ ചെയ്യാതെയും സിനിമ കാണാന്‍ ഡെലിഗേറ്റുകള്‍ക്ക് അവസരം ലഭിച്ചു. ശാന്തരായി ക്യൂ നിന്ന് തിേയറ്ററിനകത്ത് കയറി സിനിമ കാണുന്ന ഡെലിഗേറ്റുകള്‍ എല്ലാ തിയറ്റററില്‍നിന്നുമുള്ള കാഴ്ചയായിരുന്നു. സംഘാടനത്തെക്കുറിച്ചും ആര്‍ക്കും കാര്യമായ പരാതികളില്ല. എന്നാല്‍, പട്ടാളക്കാരെ തിയറ്റര്‍ പരിസരത്ത് വിന്യസിച്ചതില്‍ ഡെലിഗേറ്റുകള്‍ക്കിടയില്‍ ചെറിയ മുറുമുറുപ്പ് ഉയര്‍ന്നിരുന്നു. സിനിമ കാണാന്‍ എത്തുന്നവരെ അപകടകാരികളായി കാണേണ്ടതില്ലെന്നായിരുന്നു ഇവരുടെ പക്ഷം.

കൈരളിപ്പടവുകളില്‍നിന്ന് ടാഗോര്‍ മുറ്റത്തേക്ക്
കൈരളി തീയറ്ററില്‍നിന്ന് ടാഗോറിലേക്കും നിശാഗന്ധിയിലേക്കും ചലച്ചിത്രമേള വളര്‍ന്നതാണ് ഇത്തവണത്തെ പ്രധാന മാറ്റം. മീഡിയ സെല്ലും മീറ്റ് ദ ഡയറക്ടറുമുള്‍പ്പടെയുള്ള പരിപാടികളും സിനിമാ സംഘടനകളുടെ കൗണ്ടറുകളും ഇക്കുറി പൂര്‍ണ്ണമായും ടാഗോറിലായിരുന്നു. ഇതോടെ കൈരളിയിലെ തിരക്ക് കുറഞ്ഞു. മികച്ച സിനിമകള്‍ പ്രദര്‍ശിപ്പിക്കുന്ന വേളകളില്‍ മാത്രമാണ് കൈരളി കോംപ്ലക്‌സും പരിസരവും സജീവമായത്. കൈരളിപ്പടവുകള്‍ ചിത്രത്തില്‍നിന്ന് പതിയെ മായുകയും ടാഗോര്‍ തിേയറ്റര്‍ പരിസരം മേളയുടെ പ്രധാന സാംസ്‌കാരിക ഇടമായി മാറുകയും ചെയ്തു. മേളയുടെ ഭാഗമായുള്ള കലാപരിപാടികള്‍ അരങ്ങേറിയതും ടാഗോര്‍ മുറ്റത്താണ്. ടാഗോര്‍ പരിസരത്ത് ഒരുക്കിയ ഗതകാലസ്മരണ ഉണര്‍ത്തുന്ന ചായക്കട ഈ മേളയില്‍ സിനിമാപ്രേമികളുടെ പ്രിയപ്പെട്ട ഓര്‍മ്മയായി. മലയാള സിനിമാചരിത്രവുമായി ബന്ധപ്പെട്ട സെറ്റുകളും വിവരണങ്ങളും ആകര്‍ഷകമായിരുന്നു.

അതിശയിപ്പിക്കുന്ന സിനിമകളില്ല
അതിശയിപ്പിക്കുന്ന സിനിമകളേക്കാള്‍ ശരാശരി നിലവാരമുള്ള സിനിമകളെക്കൊണ്ട് സമ്പന്നമായിരുന്നു മേള. കണ്ട് അത്ഭുതം കൂറാനുള്ള സിനിമകള്‍ കുറഞ്ഞ മേളയില്‍ 64 രാജ്യങ്ങളില്‍നിന്നും 180 ചിത്രങ്ങളാണ് പ്രദര്‍ശിപ്പിച്ചത്. ഇതില്‍ 50 ചിത്രങ്ങളുടെ ആദ്യപ്രദര്‍ശനമായിരുന്നു. മേളയില്‍ പങ്കെടുക്കാനെത്തിയ വിദേശ സംവിധായകര്‍ ഐ.എഫ്.എഫ്.കെ.യിലെ ജനപങ്കാളിത്തത്തെയും സംഘാടനത്തെയുംപറ്റി മതിപ്പ് പ്രകടിപ്പിച്ചതും ശ്രദ്ധേയമായി. മിക്ക സംവിധായകരും അവരുടെ സിനിമയുടെ ആദ്യപ്രദര്‍ശനം നടത്താന്‍ ആഗ്രഹിക്കുന്ന വേദിയാണ് ഐ.എഫ്.എഫ്.കെ. എന്ന് അഭിപ്രായപ്പെടുകയുണ്ടായി.
രാജ്യാന്തര മത്സരവിഭാഗം, 2014-15ല്‍ പുറത്തിറങ്ങിയ സിനിമകള്‍ ഉള്‍ക്കൊള്ളുന്ന ലോക സിനിമ, ത്രിഡി എക്‌സ്പീരിയന്‍സ,്  ജൂറി ഫിലിംസ്, മലയാളം സിനിമ ഇന്ന്, ഫസ്റ്റ് ലുക്ക്, കൊറിയന്‍ പനോരമ, റിസ്‌റ്റോര്‍ഡ് ഇന്ത്യന്‍ ക്ലാസ്സിക്‌സ്, ഇന്ത്യന്‍ സിനിമ നൗ, വിമെന്‍ പവര്‍, കണ്ടംപററി മാസ്റ്റര്‍ ഇന്‍ ഫോക്കസ്, റിട്രോസ്‌പെക്ടീവ്, കണ്‍ട്രി ഫോക്കസ്, ബെയ്‌സ്ഡ് ഓണ് ട്രൂ സ്‌റ്റോറി വിഭാഗങ്ങളിലായിട്ടായിരുന്നു ഇത്തവണത്തെ പ്രദര്‍ശനം.

കാഴ്ചക്കാര്‍ ലോകസിനിമകള്‍ക്ക്
ലോകസിനിമാ വിഭാഗത്തിലായിരുന്നു ഇത്തവണ പ്രേക്ഷകപ്രീതി നേടിയ ചിത്രങ്ങള്‍. ധീപന്‍, ഡീഗ്രേഡ്, എംബ്രേസ് ഓഫ് ദ സര്‍പന്റ്, ടാക്‌സി, നഹീദ്, വൂള്‍ഫ് ടോട്ടം, ദ ഐഡല്‍, ദ അസാസിന്‍, ഫോഴ്‌സ് ഓഫ് ഡസ്റ്റിനി, മുസ്താങ്, ഫാത്തിമ, സ്റ്റോപ്പ്, മൂര്‍, ലൗ, വിക്ടോറിയ, സെക്കന്റ് മദര്‍ തുടങ്ങി ഒട്ടേറെ ചിത്രങ്ങള്‍ ആസ്വാദകശ്രദ്ധയില്‍ മുന്നിലെത്തി.    
കാന്‍, ബെര്‍ലിന്‍, വെനീസ്, മോസ്‌കോ, ഷാങ്ഹായ്, ടൊറന്റോ മേളകളില്‍ അന്താരാഷ്ട്ര ചലച്ചിത്രലോകത്തിന്റെ അംഗീകാരം നേടി ഐഎഫ്എഫ്‌കെയിലെത്തിയ ചിത്രങ്ങളില്‍ പലതും ശ്രദ്ധിക്കപ്പെട്ടു.
വിഖ്യാത സംവിധായകന്‍ ജാക്വസ് ഓഡിയാഡിന്റെ ധീപന്‍ ശ്രീലങ്കയില്‍ നിന്ന് ഫ്രാന്‍സിലേക്കു പലായനം ചെയ്ത മൂന്ന് തമിഴ് അഭയാര്‍ഥികളുടെ കഥ പറയുന്നു. കാന്‍ ചലച്ചിത്രമേളയില്‍ പാം ഡീ ഓര്‍ പുരസ്‌കാരം നേടിയ ഈ ചിത്രം വലിയ പ്രേക്ഷകപ്രീതിയാണ് ഐ.എഫ്.എഫ്.കെയില്‍ നേടിയത്.
     ഇറാനിയന്‍ സംവിധായകന്‍ ജാഫര്‍ പനാഹിയുടെ ഏറ്റവും പുതിയ ചിത്രമായ ടാക്‌സി 65-ാമത് ബെര്‍ലിന്‍ അന്താരാഷ്ട്ര ചലച്ചിത്രമേളയില്‍ ഗോള്‍ഡന്‍ ബിയറും ഫിപ്രസി പുരസ്‌കാരവും നേടിയാണ് കേരളത്തില്‍ എത്തിയത്. 'ആധുനിക ടെഹ്‌രാന്റെ ചിത്രം' എന്നു വിശേഷിപ്പിക്കപ്പെട്ട ടാക്‌സി പൂര്‍ണമായും കാറിന്റെ ഡാഷ്‌ബോര്‍ഡ് ക്യാമറ ഉപയോഗിച്ചാണ് ചിത്രീകരിച്ചിരിക്കുന്നത്. 2010 മുതല്‍ 20 വര്‍ഷത്തേക്ക് സിനിമ നിര്‍മ്മിക്കുന്നതില്‍ നിന്നും സഞ്ചരിക്കുന്നതിനും ഇറാന്‍ ഭരണകൂടം പനാഹിയെ വിലക്കിയിട്ടുണ്ട്. ജാഫര്‍ പനാഹിയെ ചലച്ചിത്രകാരന്‍ ടാക്‌സിഡ്രൈവറായി ഒതുക്കപ്പെടുന്നതിന്റെ പശ്ചാത്തലത്തിലാണ് ചിത്രം നിര്‍മ്മിച്ചിരിക്കുന്നത്. പനാഹിക്ക് ഏറെ ആരാധകരുള്ള കേരള രാജ്യാന്തര ചലച്ചിത്ര മേളയില്‍ നിറഞ്ഞ കൈയ്യടികളോടെയായിരുന്നു ചിത്രം സ്വീകരിക്കപ്പെട്ടത്.
     സ്ത്രീകളുടെ സ്വാതന്ത്ര്യത്തിനുവേണ്ടി സംസാരിക്കുന്ന ചിത്രമാണ് മുസ്താങ്. ഡെനിസ് ഗാംസെ എര്‍ഗുവന്‍ സംവിധാനം ചെയ്ത ഈ ടര്‍ക്കിഷ് ചിത്രം സ്വതന്ത്രരാകാന്‍ ആഗ്രഹിക്കുന്ന പെണ്‍കുട്ടികളെക്കൊണ്ട് സദാചാരത്തെ ചോദ്യം ചെയ്യുന്നു.
കേരള രാജ്യാന്തര ചലച്ചിത്രമേളയുടെ പ്രിയപ്പെട്ട സംവിധായകരില്‍ ഒരാളായ ഹനി അബുള്‍ ആസാദിന്റെ പുതിയ ചിത്രമാണ് 'ദ ഐഡല്‍'. 2013ലെ അറബ് ഐഡള്‍ പട്ടം നേടിയ ഗാസാ മുനമ്പില്‍ നിന്നുള്ള മുഹമ്മദ് അസഫ് എന്ന പലസ്തീന്‍ യുവാവിന്റെ അവിശ്വസനീയമായ കഥ പറയുകയാണ് ദ ഐഡല്‍.

ഹോ ഹസിയോ ഹസീന്‍ സംവിധാനം ചെയ്ത 'അസാസിന്‍' തായ് വാന്‍ഹോങ്കോങ്ഫ്രാന്‍സ് സംയുക്ത സംരംഭമാണ്. മാന്‍ഡറിന്‍ ഭാഷ സംസാരിക്കുന്ന ചിത്രം ആയോധനകലയില്‍ പ്രാവീണ്യം നേടിയ നീ ഇന്ന്യാങ്ങിന്റെ പോരാട്ടവും ചെറുത്തുനില്‍പ്പും വിഷയമാക്കുന്നു. ശരിക്കുവേണ്ടി നിലകൊണ്ട് പോരാടുന്ന ഇന്ന്യാങ്ങിന്റെ ജീവിത സംഘര്‍ഷങ്ങളിലൂടെ മുന്നോട്ടുപോകുന്ന അസാസിന്‍ കാന്‍ ഫെസ്റ്റിവലില്‍ മികച്ച സംവിധായകന്‍, കാന്‍സ് സൗണ്ട്ട്രാക്ക് എന്നീ വിഭാഗങ്ങളില്‍ പുരസ്‌കാരം നേടിയിരുന്നു.
പ്രസിദ്ധ ദക്ഷിണ കൊറിയന്‍ സംവിധായകന്‍ ഹോങ് സാങ് സൂവിന്റെ റൊമാന്റിക് കോമഡി ചിത്രം റൈറ്റ് നൗ റോങ്ങ് ദെന്‍ കഥയിലെ സൂക്ഷ്മാംശങ്ങളാലാണ് പ്രേക്ഷകപ്രീതി നേടിയത്. ഫ്രഞ്ച് സംവിധായകന്‍ പിയറി ജോലിവെറ്റിന്റെ ദി നൈറ്റ് വാച്ച്മാന്‍ ഒരു ഷോപ്പിംഗ് മാളിലെ രാത്രികാവല്‍ക്കാരന്റെ ജീവിതത്തിലെ അപ്രതീക്ഷിത സംഭവങ്ങളെക്കുറിച്ചാണ് പറയുന്നത്. പതിനെട്ടാമത് ഷാങ്ഹായ് മേളയില്‍ മികച്ച ചിത്രത്തിനുള്ള ഗോള്‍ഡന്‍ ഗോട്ടെറ്റ് നേടി. ഒലിവര്‍ ഗൗര്‍മെറ്റ്, വലെറി ബോണെറ്റോ, മാര്‍ക്ക് സിന്‍ഗ തുടങ്ങിയവരാണ് ചിത്രത്തില്‍ അഭിനയിച്ചിരിക്കുന്നത്.
ടൊറൊന്റോ മേളയില്‍ ജനപ്രിയചിത്രമായ പ്രൈസ് ഓഫ് ലൗ എതോപ്യന്‍ തലസ്ഥാനനഗരമായ ആഡിസ് അബാബയിലെ ടാക്‌സിഡ്രൈവറും വേശ്യയും തമ്മിലുള്ള പ്രണയം പറഞ്ഞ ചിത്രം ആഡിസ് അബാബ എന്ന നഗരത്തിന്റെ അപ്രകാശിത കോണുകളിലേക്ക് വെളിച്ചംവീശുന്നു.
വിവാഹബന്ധം വേര്‍പ്പെടുത്തിയ അമ്മ തന്റെ മക്കളുടെ സംരക്ഷാവകാശനുവേണ്ടി നടത്തുന്ന പോരാട്ടങ്ങള്‍ ചിത്രീകരിക്കുന്ന ഇദാ പനഹാന്‍ദേയുടെ നഹീദ് എന്ന ചിത്രം മേളയില്‍ ഏറെ ചര്‍ച്ച ചെയ്യപ്പെട്ടു. കാന്‍ ചലച്ചിത്രമേളയില്‍ പ്രോമിസിംഗ് ഫ്യൂച്ചര്‍ പുരസ്‌കാരം നേടിയ ചിത്രം 2011ല്‍ ഓസ്‌കാര്‍ നേടിയ എ സെപറേഷന്‍ എന്ന ചിത്രത്തിനു സമാനമായാണ് നാഹിദ് വിലയിരുത്തപ്പെടുത്. ഇറാനിലെ നിയമവ്യവസ്ഥിതിയെ ചോദ്യം ചെയ്യുതിനോടൊപ്പം വിവാഹബന്ധം വേര്‍പ്പെടുത്തുതും പുനര്‍വിവാഹവും സംബന്ധിച്ച് സമൂഹത്തില്‍ നിലനില്‍ക്കുന്ന പൊതുധാരണകളെയും ചിത്രം വിമര്‍ശിക്കുന്നു.
ലോകസിനിമാ വിഭാഗത്തില്‍ പ്രദര്‍ശിപ്പിച്ച പട്ടോ ലറൈന്റെ ചിലിയന്‍ ചിത്രം ദ ക്ലബ് , ഡാലിബോര്‍ മറ്റാനിക്കിന്റെ ദ ഹൈ സണ്‍, ഗ്രിമര്‍ ഹാകൊനാര്‍സെന്റെ റാംസ്,  ജംഷേദ് മഹ്മുദ് റാസയുടെ മൂര്‍ , സെബാസ്റ്റിയന്‍ ഷിപ്പറിന്റെ വിക്ടോറിയ, മസഹാറു ടാക്കേയുടെ 100 യെന്‍ ലൗ, ഷൗക്കത്ത് അമീന്‍ കോര്‍ക്കിയുടെ മെമ്മറീസ് ഓണ്‍ സ്‌റ്റോണ്‍ എന്നിവ ഓസ്‌കാറിനായി നോമിനേറ്റ് ചെയ്യുന്ന ചിത്രങ്ങളുടെ പട്ടികയില്‍ ഇടം നേടിയവയാണ്.

യഥാര്‍ത്ഥജീവിതത്തില്‍ നിന്നുള്ള സംഭവങ്ങളെയും അനുഭവങ്ങളെയും അടിസ്ഥാനമാക്കി നിര്‍മ്മിച്ച ഏഴു ചിത്രങ്ങള്‍ മേളയില്‍ ഉണ്ടായിരുന്നു. ആന്റന്‍ ചെക്കോവ് 1890, ബ്രിഡ്‌ജെന്‍ഡ്, കാര്‍ട്ട് ബ്ലാന്‍ഷ്, ടാന്ന, ദി ഡാര്‍ക്ക് ഹോഴ്‌സ്, ദി ട്രൂത്ത്, ദി വുള്‍ഫ് പാക്ക് എന്നീ ചിത്രങ്ങളാണ് ഈ വിഭാഗത്തില്‍ ലോകത്തിന്റെ നേര്‍ക്കാഴ്ച സമ്മാനിച്ചത്.
നവാഗത സംവിധായകരുടെ ഏഴ് ചിത്രങ്ങള്‍ പ്രദര്‍ശനത്തിനെത്തി. ചൈന, യൂറോപ്പ്, തെക്കെ അമേരിക്ക, ആഫ്രിക്ക എന്നിവിടങ്ങളില്‍ നിര്‍മ്മിച്ചതും നിരവധി മേളകളില്‍ സാന്നിധ്യം അറിയിച്ചതും പുരസ്‌കാരങ്ങള്‍ നേടിയിട്ടുള്ളതുമായ മൈ സ്‌കിന്നി സിസ്റ്റര്‍, കൈലി ബ്ലൂസ്, ദ തിന്‍ യെലോ ലൈന്‍, ലാന്‍ഡ് ആന്‍ഡ് ഷെയ്ഡ്, ലാംപ്, ഹോപ്ഫുള്‍സ്, 600 മൈല്‍സ് എന്നിവ ഫസ്റ്റ് ലുക്ക് ഫിലിംസ് വിഭാഗത്തില്‍ പ്രദര്‍ശിപ്പിച്ചു.

ഒറ്റാലും ബോപവും 
ബോപവും ഒറ്റാലുമാണ് മത്സരവിഭാഗത്തില്‍ ഡെലിഗേറ്റുകളുടെ പ്രിയചിത്രങ്ങള്‍. ജയരാജ് സംവിധാനം ചെയ്ത ഒറ്റാല്‍ ഈ വിഭാഗത്തില്‍ മികച്ച പുരസ്‌കാര നേട്ടമാണ് കൊയ്തത്. ഒറ്റാലിന്റെ മൂന്ന പ്രദര്‍ശനങ്ങളിലും വലിയ ജനക്കൂട്ടമാണ് എത്തിയത്. പ്രേക്ഷകര്‍ തെരഞ്ഞെടുത്തതും ഒറ്റാല്‍ ആയിരുന്നുവെന്നത് ചിത്രത്തിന്റെ ജനപ്രീതി വെളിപ്പെടുത്തുന്നു. സതീഷ്, സന്തോഷ് ബാബുസേനന്‍ എന്നിവര്‍ സംവിധാനം ചെയ്ത ചായം പൂശിയ വീടാണ് മത്സരവിഭാഗത്തിലെ മറ്റൊരു  മലയാള ചിത്രം.

ഷാനാ ഇസബയ്യേവ സംവിധാനം ചെയ്ത കസാക്കിസ്താന്‍ ചിത്രം ബോപം 14കാരനായ റയാന്റെ അതിജീവനത്തിന്റെയും പോരാട്ടത്തിന്റെയും കഥയാണ്. ഇറാനിയന്‍ സംവിധായകന്‍ ഹാദി മൊഹദേഗിന്റെ ഇമ്മോര്‍ട്ടല്‍ ശക്തമായ ദൃശ്യഭാഷ നിരൂപക പ്രശംസ നേടി. ആവര്‍ത്തിച്ച് ആത്മഹത്യാ ശ്രമങ്ങള്‍ നടത്തുന്ന ഏകാന്തനായ ഒരു വൃദ്ധന്റെ പാപബോധത്തെക്കുറിച്ചാണ് ചിത്രം പറയുന്നത്. അബുഷാഹിദ് ഇമോണിന്റെ ബംഗാളി സിനിമ ജലാല്‍സ് സ്‌റ്റോറി, ഹെയ്തി ഫിലിമായ റാഉല്‍ പീക്കിന്റെ മര്‍ഡര്‍ ഇന്‍ പാക്കോട്ട്, ശ്രീജിത് മുഖര്‍ജിയുടെ ബംഗാളി ചിത്രം നോ വുമന്‍സ് ലാന്റ്, ജൂണ്‍ റോബ്ലസ് ലാനയുടെ ഫിലിപ്പൈന്‍സ് ചിത്രം ഷാഡോ ബിഹൈന്‍ഡ് ദ മൂണ്‍, മിന്‍ ബഹാദൂര്‍ ബാമിന്റെ ദി ബ്ലാക്ക് ഹെന്‍,  ഭൗദായന്‍ മുക്കര്‍ജിയുടെ ഹിന്ദി ചിത്രം വയലിന്‍ പ്‌ളെയര്‍, നിര്‍ ബെര്‍ഗ്മാന്‍ സംവിധാനം ചെയ്ത ഇസ്രായേല്‍ ചിത്രം യോന തുടങ്ങിയ ചിത്രങ്ങളും മത്തരവിഭാഗത്തില്‍ ഡെലിഗേറ്റുകള്‍ ചര്‍ച്ച ചെയ്തവയാണ്.

ത്രീഡിയില്‍ വൂള്‍ഫ് ടോട്ടവു ലൗവും
ഈ മേളയിലെ പുതുമയായ ത്രീഡി ചിത്രങ്ങളുടെ പ്രദര്‍ശനത്തിനും ഏറെ കാഴ്ചക്കാരെത്തി. ചൈനീസ് ചിത്രം വൂള്‍ഫ് ടോട്ടം, ഫ്രഞ്ച്‌ബെല്‍ജിയം ചിത്രം ലൗ, അമേരിക്കന്‍ ചിത്രം പാന്‍ എന്നിവ കാണാനായിരുന്നു ഈ ഗണത്തില്‍ കൂടുതല്‍ ആളുകള്‍ എത്തിയത്.
പരുക്കനും വന്യവുമായ പ്രകൃതിയുടെ നിഗൂഢതയും സ്വാതന്ത്ര്യവും കടന്നുവരുന്ന ജീന്‍ ഴാക്ക് അന്നൗഡിന്റെ വൂള്‍ഫ് ടോട്ടമാണ് ത്രീഡി ചിത്രങ്ങളില്‍ ആസ്വാദകശ്രദ്ധനേടിയത്. സിനിമയില്‍ വന്യത അതിന്റെ രൗദ്രതയില്‍ ആവിഷ്‌ക്കരിക്കപ്പെടുന്നു. പ്രകൃതിയുടെ മാസ്മരികത ത്രീഡി വിസ്മയത്തില്‍ കാഴ്ചക്കാരില്‍ എത്തിച്ചാണ് ഈ ചിത്രം ശ്രദ്ധ നേടിയത്. ബീജിങില്‍ നിന്നുളള വിദ്യാര്‍ഥിയായ ചെന്‍ ഷെന്‍ ഗോത്രവര്‍ഗ ആട്ടിടയന്മാരുടെ ജീവിതം പഠിക്കുന്നതിനായാണ് മംഗോളിയയില്‍ എത്തുന്നത്. ചെന്നായ്ക്കളും ഇടയന്മാരും തമ്മിലുള്ള നിഗൂഢബന്ധത്താല്‍ വശീകരിക്കപ്പെടുന്ന ചെന്‍ ഒരു ചെന്നായ്ക്കുട്ടിയെ മെരുക്കാന്‍ ശ്രമിക്കുന്നു. സര്‍ക്കാറിന്റെ ഇടപെടലോടെ പ്രതിസന്ധിയിലാകുന്ന പ്രകൃതിയും മനുഷ്യനും തമ്മിലുള്ള ബന്ധം സിനിമ വരച്ചുകാട്ടുന്നു. ആട്ടിടയ സമൂഹത്തിന്റെ ജീവിതം, സ്വാതന്ത്ര്യം, ഉത്തരവാദിത്വവും അവരുടെ ഏറ്റവും വലിയ ശത്രുവായ പുല്‍മേട്ടിലെ ചെന്നായയുടെ വന്യതയുമെല്ലാം സിനിമയുടെ പശ്ചാത്തലമായി വരുന്നു. മനുഷ്യനും പ്രകൃതിയും തമ്മിലുളള ബന്ധവും അതിന്റെ സങ്കീര്‍ണ്ണതകളും ചിത്രത്തിന് രാഷ്ട്രീയമായ നിറവും നല്‍കുന്നു. ചൈനയിലെ ഭരണകൂടത്തിന്റെ ഏകാധിപത്യ പ്രവണതകള്‍ക്കെതിരെ ജീന്‍ ഴാക്ക് എടുത്തിട്ടുളള സെവന്‍  ഇയേഴ്‌സ് ഇന്‍ തിബറ്റ്, ദ ബെയര്‍ ആന്റ് ടു ബ്രദേഴ്‌സ് എന്നീ ചിത്രങ്ങള്‍ ഏറെ നിരൂപണ പ്രശംസ പിടിച്ചു പറ്റിയിട്ടുണ്ട്.

കേരള രാജ്യാന്തര ചലച്ചിത്ര മേളയില്‍ ആദ്യമായി പ്രദര്‍ശിപ്പിക്കുന്ന ത്രീഡി സിനിമ എന്ന നിലയില്‍ ഏറെ കൗതുകത്തോടെയാണ് ഡെലിഗേറ്റുകള്‍ ചിത്രത്തെ കണ്ടത്. വൂള്‍ഫ് ടോട്ടത്തിനുപുറമെ ആറു ത്രിഡി ചലച്ചിത്രങ്ങളാണ് മേളയില്‍ പ്രദര്‍ശിപ്പിച്ചത്. വ്യത്യസ്തമായ സംസ്‌കാരങ്ങളില്‍ ജീവിച്ച രണ്ട് വ്യക്തികളുടെ പ്രണയം ത്രിഡിയിലൂടെ കാണിച്ചുതരുന്ന ലവ് എന്ന ഫ്രഞ്ച് ചിത്രം മേളയില്‍ ഏറ്റവുമധികം ആളുകള്‍ കണ്ട ചിത്രങ്ങളിലൊന്നാണ്. ഇലക്ട്ര എന്ന യുവതിയും മര്‍ഫി എന്ന യുവാവുമായുളള ഭ്രാന്തമായ പ്രണയത്തിന്റെ കഥ പറയുന്ന ചിത്രം കാന്‍, ടൊറൊന്റോ, മെല്‍ബണ്‍, ഗോവ ചലച്ചിത്രമേളകളില്‍ ശ്രദ്ധ പിടിച്ചുപറ്റിയിരുന്നു. ഈ മേളകളിലെ അഭിപ്രായവും വിവാദങ്ങളും ലവിനുപിന്നാലെ പായാന്‍ കേരള രാജ്യാന്തര മേളയിലെ ഡെലിഗേറ്റുകളെ പ്രേരിപ്പിച്ചു.

നാനു അവനല്ല അവളു, കുറ്റം ദണ്ഡനെ
ഇന്ത്യന്‍ സിനിമ ഇന്ന് വിഭാഗത്തില്‍ ഏറ്റവുമധികം ശ്രദ്ധ നേടിയ രണ്ടുചിത്രങ്ങളാണ് നാനു അവനല്ല അവളു (കന്നട), കുറ്റം ദണ്ഡനെ (തമിഴ്) എന്നിവ. ഭിന്നലിംഗക്കാരുടെ കഥപറഞ്ഞ 'നാനു അവനല്ല അവളു' അവരുടെ പ്രശ്‌നങ്ങളിലേക്ക് കടന്നുചെന്ന് ഭരണകൂടത്തിന്റെയും നമ്മുടെയും നിലപാടുകളെ ചോദ്യംചെയ്യുന്നു.
കുറ്റം ചെയ്യുന്നപോലെ തന്നെ തെറ്റാണ് അത് മൂടിവെയ്ക്കുന്നതും. മൂല്യങ്ങളുടെയും സത്യത്തിന്റെയും സംരക്ഷണവും ജീവിതത്തിലെ പരുഷവശങ്ങളും തമ്മിലുള്ള സംഘര്‍ഷമാണ് തമിഴ് ചിത്രം കുറ്റം ദണ്ഡനെ പങ്കുവെയ്ക്കുന്നത്. മൂന്നു ബംഗാളി ചിത്രങ്ങളാണ് ഇന്ത്യന്‍ വിഭാഗത്തില്‍ ഇടം പിടിച്ചത്. ദേബേഷ്  ചാറ്റര്‍ജിയുടെ നടോക്കര്‍ മോട്ടോ, ശതരൂപ സന്യാലിന്റെ ഓണ്‍യോ ഒപ്പാല, കൗഷിക് ഗാംഗുലിയുടെ സിനിമാവാല എന്നിവയാണ് ബംഗാളി ചിത്രങ്ങള്‍. ഒഡിയയില്‍ നിന്നും അമര്‍ത്യാഭട്ടാചാര്യയുടെ ക്യാപ്പിറ്റല്‍,  മഞ്ചുബോറ സംവിധാനം ചെയ്ത ആസാമീസ് ചിത്രം ദാവു ഹുഡിനി മേത്തായ് എന്നിവയാണ് മറ്റു ചിത്രങ്ങള്‍.
പ്രശസ്ത മലയാള സംവിധായകനും ഛായാഗ്രാഹകനുമായിരുന്ന വിന്‍സന്റ് മാസ്റ്ററോടുള്ള ആദരസൂചകമായി അദ്ദേഹത്തിന്റെ ചിത്രങ്ങളായ ഭാര്‍ഗവീനിലയവും മുറപ്പെണ്ണും മേളയില്‍ പ്രദര്‍ശിപ്പിച്ചു. പ്രമേയം, ആഖ്യാനം, ആവിഷ്‌കാരം എന്നിവകൊണ്ട് ചലച്ചിത്ര ചരിത്രത്തില്‍ ഇന്ത്യയുടെ പരിച്ഛേദമായിമാറിയ ജോണ്‍ എബ്രഹാമിന്റെ അമ്മ അറിയാന്‍, മൃണാള്‍ സെന്നിന്റെ ഒകോ ഊരി കഥ, അടൂര്‍ ഗോപാലകൃഷ്ണന്റെ മതിലുകള്‍, ജബ്ബാര്‍ പട്ടേലിന്റെ ജെയ്ത് രേ ജെയ്ത് , ഗുരു ദത്തിന്റെ കാഗസ് കേ ഫൂല്‍ എന്നിവയും ഇന്ത്യന്‍ റിസ്‌റ്റോര്‍ഡ് ക്ലാസിക് വിഭാഗത്തില്‍ വിരുന്നൊരുക്കി.

ശ്രദ്ധേയമായി മലയാള സിനിമകള്‍
സനല്‍കുമാര്‍ ശശിധരന്‍ സംവിധാനം ചെയ്ത ഒഴിവുദിവസത്തെ കളി, ഡോ: ബിജുവിന്റെ വലിയചിറകുള്ള പക്ഷികള്‍, വി കെ പ്രകാശിന്റെ നിര്‍ണായകം, സലിംഅഹമ്മദിന്റെ പത്തേമാരി, സിദ്ധാര്‍ഥ് ശിവയുടെ ഐന്‍, ഹരികുമാറിന്റെ കാറ്റും മഴയും, മനു പി എസ്സിന്റെ മണ്‍ട്രോ തുരുത്ത് എന്നിവയാണ് മലയാള സിനിമ ഇന്ന് വിഭാഗത്തില്‍ പ്രദര്‍ശിപ്പിച്ചത്. മികച്ച മലയാള ചിത്രമായി തെരഞ്ഞെടുക്കപ്പെട്ട ഒഴിവുദിവസത്തെ കളി ആദ്യപ്രദര്‍ശനം മുതല്‍ ശ്രദ്ധിക്കപ്പെട്ടു. സനല്‍കുമാര്‍ ശശിധരന്റെ ആദ്യചിത്രമായ 'ഒരാള്‍പ്പൊക്ക'ത്തിന് കഴിഞ്ഞ മേളയില്‍ ലഭിച്ച സ്വീകാര്യത ഇത്തവണയും നിലനിര്‍ത്താനും കഴിഞ്ഞു. മനു പി എസ്സിന്റെ 'മണ്‍ട്രോ തുരുത്ത്' ആണ് നിലപാടുകള്‍കൊണ്ട് മേളയില്‍ ചര്‍ച്ച ചെയ്യപ്പെട്ട മറ്റൊരു മലയാള ചിത്രം. കാസര്‍ഗോട്ടെ എന്‍ഡോസള്‍ഫാന്‍ ദുരന്തം ഒരു ഫോട്ടോഗ്രാഫറുടെ കണ്ണുകളില്‍ക്കൂടി കാണുന്ന ഡോ.ബിജു ചിത്രം വലിയചിറകുള്ള പക്ഷികള്‍ വിഷയസ്വീകാര്യതയിലെ ധൈര്യം കൊണ്ടാണ് ആസ്വാദപ്രീതി നേടിയത്. ദേശീയതലത്തില്‍ അംഗീകരിക്കപ്പെട്ട സിദ്ധാര്‍ഥ് ശിവയുടെ 'ഐന്‍' കൈയ്യടി നേടി.

ഡെലിഗേറ്റുകളില്‍ പകുതിയോളവും യുവപ്രേക്ഷകരായി മാറിയെന്നതാണ് മേളയിലെ വലിയ മാറ്റം. സിനിമയെ ഗൗരവമായി കാണുന്ന മുതിര്‍ന്ന ആളുകളുടേതായിരുന്നു കേരള രാജ്യാന്തര മേളയുടെ ആദ്യ എഡിഷനുകള്‍. അടുത്ത കാലത്തായി മലയാള സിനിമയിലേക്ക് കടന്നുവരുന്ന യുവാക്കളുടെ എണ്ണം വര്‍ധിക്കുന്നതിന്റെ പ്രതിഫലനം മേളയിലും പ്രകടമാകുന്നുണ്ട്. ലോകസിനിമയിലെ മാറ്റങ്ങളും പരീക്ഷണങ്ങളും സസൂക്ഷ്മം വീക്ഷിക്കുന്ന ഒരു തലമുറ രൂപപ്പെടുന്നത് ഏറെ ആശാവഹമായ കാര്യമാണ്. വരുംവര്‍ഷങ്ങളിലും ഇതിന്റെ തുടര്‍ച്ചയായിരിക്കും മേളയില്‍ കാണാനാകുക.

സ്ത്രീശബ്ദം, ജനുവരി, 2016