ചരട്‌  

ഓരോ 
പെണ്ണിന്റെ 
വിരല്‍ത്തുമ്പിലും 
പോറിയിട്ടുണ്ട്‌
 ഒരു കാണാച്ചരട്‌. 

കൈവട്ടം 
കറക്കുമ്പോഴും 
കൂത്തുപാവയിലേക്ക്‌ 
എറിഞ്ഞിട്ടുണ്ടാകും 
ഒരു പാവകളിക്കാരന്റെ നോട്ടം.

നേര്‍ച്ചപ്പെട്ടി
 
കുരുടനും 
കൂനനും 
ചട്ടുകാലനുമൊക്കെയുള്ള 
അരവയറിന്മേലാണ്‌ 
ഈ മഹാപാപിയുടെ 
ഏമ്പക്കമത്രയും!

നീരുറവകള്‍ പൂക്കുന്നത്‌

ഒരഗ്നിപര്‍വ്വതമുണ്ട്‌ 
സുഷുപ്‌തിയിലാണ്ട്‌ 

എപ്പൊഴുമാവാം 
അതിന്റെയാ 
അടക്കം പറച്ചില്‍. 

ചീറ്റിയടുക്കുമ്പോള്‍ 
വലിയ വായിലെ 
ചുടുപ്രവാഹത്തിലൊന്നു 
കൈ കഴുകണം. 

ആശ്വാസത്തിന്റെ 
മുഖം തുടയ്‌ക്കണം. 

നിര്‍വൃതിയിലാണ്ട്‌ 
നിശ്വാസമുതിര്‍ക്കണം. 

പറ്റിയാലൊന്നു
 മുങ്ങിക്കുളിക്കണം, 
അടിത്തട്ടു കാണണം. 

കര കയറിയാലുടനെ 
തല തുടച്ചുതന്ന്‌ 
കൈത്തലമൊന്നു ചേര്‍ക്കാന്‍ 
കാത്തുനില്‍പ്പുണ്ടാവും 
കൂട്ടുവെച്ചുപോയൊരു ജീവന്‍..

പുറത്തു മഴ പെയ്യുന്നുണ്ട്‌


മഴത്തുളളികള്‍ 
ഒത്തുകൂടി. 

കുഞ്ഞുങ്ങളെ 
ഒക്കത്തുവെച്ച്‌ 
അമ്മമഴകള്‍ 
ചവിട്ടിയരച്ചുപോയ 
വണ്ടിക്കാലുകളെയും 
തെരുവിലിറക്കിയ 
ഫ്‌ളാറ്റുകൂമ്പാരത്തെയും 
അളന്നെടുത്തു. 

കാനയില്‍ 
കൂട്ടംകൂടി 
തട്ടിയും തെറുത്തുവീഴ്‌ത്തിയും 
തിങ്ങിയൊഴുകി. 

തള്ളിമാറ്റപ്പെട്ടവര്‍ 
വില്ലകള്‍ തഴച്ചുവളരുന്ന 
പാടവരമ്പുവഴി 
തോടുകളില്‍ ചാടി 
ആത്മഹത്യചെയ്‌തു. 

നിരോധിക്കപ്പെട്ട 
പ്ലാസ്റ്റിക്ക്‌ കവറുകളോടും 
ഇറച്ചി മാലിന്യങ്ങളോടും 
 വര്‍ത്തമാനം പറഞ്ഞ്‌ 
തിരസ്‌കൃത വിഭാഗത്തിന്റെ ലഹള 
പുഴയിടത്തിലേക്ക്‌ 
മാര്‍ച്ചുചെയ്‌തു. 

കറുത്ത ചെളിമണ്ണുമാറ്റി 
കൈകള്‍ കൂട്ടിപ്പിടിച്ച്‌ 
മഴയും പുഴയും 
ഒന്നിച്ചുകരഞ്ഞു. 

കടലുകാണാന്‍ പോകുമ്പോള്‍ 
നഷ്ടങ്ങളില്‍പെട്ട്‌ 
അവര്‍, 
വാതോരാതെ 
പെയ്‌തുകൊണ്ടിരുന്നു..

മാങ്ങ പെറുക്കാന്‍ പോയ ഒരുണ്ണിയും തിരികെയെത്തിയില്ല..


ഇടവഴിയിലെ 
വേലിപ്പൊത്തിലൂടെ നൂഴ്‌ന്ന്‌ 
പാതി കൊത്തിയ 
മൂവാണ്ടന്‍ മാങ്ങ എടുക്കും. 

കൈത്തണ്ടയിലുള്ള 
വല്ലാത്ത നീറ്റലോ ചൊറിച്ചിലോ 
രസികന്‍ 
മധുരത്തിനു മുന്‍പില്‍ 
അലിഞ്ഞില്ലാതാകും. 

ഇന്നലെയും 
ഒരുണ്ണി 
മാങ്ങ പെറുക്കാന്‍ 
പോയിരുന്നു; 
ഇതുവരേയും മടങ്ങിവന്നില്ല. 

ചുണ്ടില്‍ 
പടര്‍ന്നുപറ്റിയ മാഞ്ചുന 
ഇപ്പോള്‍ 
വല്ലാതെ ഭീതിപ്പെടുത്തുന്നുണ്ടാവണം! 

നാളെ, 
ഒറ്റക്കോളത്തിലൊതുങ്ങി 
നാമാവശേഷമാകും മുമ്പ്‌ 
ഞങ്ങള്‍ 
നിന്നെയൊന്ന്‌ 
തിരയുന്നുണ്ട്‌; 
അതേ മാഞ്ചോട്ടില്‍ 
പുഴനിലാവത്തെ 
രാത്രിമണലില്‍ 
മാന്തിച്ചുവപ്പിച്ച
കുന്നിന്റെ വയറില്‍.. 

എവിടെ നിന്നാകും 
മണ്ണോ മണലോ പറ്റി 
നിന്റെ ഉമിനീര്‍മാങ്ങ 
കണ്ടെടുക്കാനാകുക!

ഇലമുറിവുകള്‍ പെയ്യുന്നു


നീ വിളിച്ചപ്പോള്‍ 
ഒരു വേനല്‍ക്കാലവുമായാണ്‌ 
വന്നുകയറിയത്‌. 

നാട്ടുചുനയുള്ള മാമ്പഴവും 
ചുക്കുവെള്ളവും 
തിടുക്കവും. 
നിന്റെയുള്ളിലും 
മറ്റൊരു വേനലായിരുന്നോ? 

എനിക്കോര്‍മ്മയുണ്ട്‌ 
നീ തീരെ ചിരിച്ചിരുന്നില്ല, 
പിന്നീടെപ്പൊഴോ 
കരയാതെയായത്‌. 

നിന്റെ ഭ്രാന്തന്‍ ചുരുളുകള്‍ 
അഴിക്കുവാന്‍ ശ്രമിച്ചത്‌. 
ഒടുവില്‍ ചുരുളുകള്‍ 
എന്നിലേക്കു പടര്‍ത്തിയത്‌. 

പുഴയായിരുന്നുവെന്നും 
കൂട്ടൊഴുകാന്‍ വന്നതെന്തിന്‌? 
നിറകണ്ണും കാട്ടി 
ഇച്ചോദ്യമിനിയുമായാല്‍ 
വേലിപ്പടര്‍പ്പിലെ മുള്‍വാകയാകും. 

 നിന്റെ കറുപ്പുവിരലുകളിലെ 
പൂതലിപ്പിന്റെ ഭാഷ്യമുള്ള 
കവിതകള്‍. 

ചായക്കൂട്ടുകളുള്ള 
വിവാഹസമ്മാനം 
നീ വരയ്‌ക്കാറുള്ള 
പൂക്കളുടേതായിരുന്നു..

ഗാന്ധിത്തല 
 
ഈ ഗാന്ധി 
വല്ലാത്തൊരാളാ, 
എപ്പൊഴും ചിരിക്കും 
എന്തുകണ്ടാലും. 

ഞങ്ങടെ പുരയിടം 
അപ്പാടെ മാന്തിയെടുത്ത 
സുലൈമാന്‍ മൊതലാളി 
അഞ്ചു ഗാന്ധി നീട്ടി. 

പിന്നെ അവളാണ്‌, 
ഓപ്പറേഷന്‍ തീയറ്ററിനുമുമ്പില്‍ 
കരഞ്ഞുചുവന്ന്‌ 
ഒറ്റക്കെട്ടു ഗാന്ധിയെ തന്നത്‌; 
ചോദിച്ചപ്പോള്‍ 
അവള്‍ക്കുനേരെയും 
ഇതുപോലൊരാള്‍ 
ചിരിച്ചുനുണഞ്ഞ്‌ 
നീട്ടിയതാണെന്ന്‌. 

കനംകുറഞ്ഞ മാസപ്പടി 
എണ്ണിവാങ്ങുമ്പോള്‍ 
ആ ദിവസവും 
പിന്നെ ചുറ്റിലും 
കുറേ കണ്ണുകളും 
ചൂണ്ടിനില്‍ക്കും 
ഗാന്ധിയുടെ 
തല കൊയ്യാനുള്ള 
കാഞ്ചിയുമേന്തി.