പുറത്തു മഴ പെയ്യുന്നുണ്ട്‌


മഴത്തുളളികള്‍ 
ഒത്തുകൂടി. 

കുഞ്ഞുങ്ങളെ 
ഒക്കത്തുവെച്ച്‌ 
അമ്മമഴകള്‍ 
ചവിട്ടിയരച്ചുപോയ 
വണ്ടിക്കാലുകളെയും 
തെരുവിലിറക്കിയ 
ഫ്‌ളാറ്റുകൂമ്പാരത്തെയും 
അളന്നെടുത്തു. 

കാനയില്‍ 
കൂട്ടംകൂടി 
തട്ടിയും തെറുത്തുവീഴ്‌ത്തിയും 
തിങ്ങിയൊഴുകി. 

തള്ളിമാറ്റപ്പെട്ടവര്‍ 
വില്ലകള്‍ തഴച്ചുവളരുന്ന 
പാടവരമ്പുവഴി 
തോടുകളില്‍ ചാടി 
ആത്മഹത്യചെയ്‌തു. 

നിരോധിക്കപ്പെട്ട 
പ്ലാസ്റ്റിക്ക്‌ കവറുകളോടും 
ഇറച്ചി മാലിന്യങ്ങളോടും 
 വര്‍ത്തമാനം പറഞ്ഞ്‌ 
തിരസ്‌കൃത വിഭാഗത്തിന്റെ ലഹള 
പുഴയിടത്തിലേക്ക്‌ 
മാര്‍ച്ചുചെയ്‌തു. 

കറുത്ത ചെളിമണ്ണുമാറ്റി 
കൈകള്‍ കൂട്ടിപ്പിടിച്ച്‌ 
മഴയും പുഴയും 
ഒന്നിച്ചുകരഞ്ഞു. 

കടലുകാണാന്‍ പോകുമ്പോള്‍ 
നഷ്ടങ്ങളില്‍പെട്ട്‌ 
അവര്‍, 
വാതോരാതെ 
പെയ്‌തുകൊണ്ടിരുന്നു..