ഇന്ദ്രൻസിന്റെ അഭിനയക്കരുത്തിൽ ആളൊരുക്കം
ഇന്ദ്രൻസിന് മികച്ച നടനുള്ള സംസ്ഥാന അവാർഡ് നേടിക്കൊടുത്ത ആളൊരുക്കം അമ്പരപ്പിക്കുന്ന പ്രമേയം തെരഞ്ഞെടുത്ത് അവതരിപ്പിച്ചുകൊണ്ടാണ് ശ്രദ്ധേയമാകുന്നത്.  മലയാള സിനിമ വേണ്ടത്ര കൈകാര്യം ചെയ്തിട്ടില്ലാത്ത ഒരു വിഷയത്തെ മുഖ്യധാരാ സിനിമയുടെ ഭാഗമാക്കാനാണ് നവാഗതനായ വി.സി.അഭിലാഷ് ശ്രമിച്ചിരിക്കുന്നത്.        
     ഉള്ളുലയ്ക്കുകയും വ്യക്തിക്ക് സമൂഹത്തോടും തന്നോടു തന്നെയും ചില ചോദ്യങ്ങൾ ഉന്നയിക്കാൻ അവസരമൊരുക്കുകയും ചെയ്യുന്നുണ്ട് ആളൊരുക്കം. സാമൂഹിക പ്രസക്തവും വെല്ലുവിളി നിറഞ്ഞതുമായ ഒരു പ്രമേയം ആദ്യ സിനിമയ്ക്കായി കണ്ടെത്തി അവതരിപ്പിച്ചതിൽ അഭിലാഷ് അഭിനമർഹിക്കുന്നു. അഭിലാഷ് തന്നെയാണ് ചിത്രത്തിന് തിരക്കഥയും ഒരുക്കിയിട്ടുള്ളത്.                      പതിനാറു വർഷം മുമ്പ് തന്നോട് പിണങ്ങി നാട് വിട്ടുപോയ മകനെ അന്വേഷിച്ച് പപ്പു പിഷാരടി എന്ന വൃദ്ധൻ നഗരത്തിൽ എത്തുന്നതാണ് ആളൊരുക്കത്തിന്റെ അടിസ്ഥാനപ്രമേയം. എന്നാൽ അതിനുശേഷം പപ്പു  പിഷാരടിയെ തേടിയെത്തുന്ന കാഴ്ചകൾ അപ്രതീക്ഷിതങ്ങളാണ്. ഇവിടെയാണ് ആളൊരുക്കം പ്രമേയപരിസരത്തിൽ മറ്റു സിനിമകളിൽ നിന്ന് വേറിട്ടു സഞ്ചരിക്കുന്നത്.             എല്ലാത്തരം  പ്രേക്ഷകരെയും ലക്ഷ്യമിട്ടുള്ളതാണ് ആളൊരുക്കത്തിന്റെ ആഖ്യാനശൈലി.                                  
   
            ഇന്ദ്രൻസിന്റെ പപ്പു പിഷാരടിയെന്ന കേന്ദ്ര കഥാപാത്രമാണ് ആളൊരുക്കത്തിന്റെ ഹൈലൈറ്റ്. എന്തുകൊണ്ട് താൻ മികച്ച നടനായി തിരഞ്ഞെടുക്കപ്പെട്ടു എന്നത് പ്രകടനം കൊണ്ട് ശരിവയ്ക്കുന്നതാണ് ഇന്ദ്രൻസിന്റെ അഭിനയം. ആയ കാലത്ത് പേരുകേട്ട ഓട്ടൻതുള്ളൽ കലാകാരനായിരുന്നു കുന്നത്ത്കാവ് പപ്പുപിഷാരടി. യാഥാസ്ഥിതികമായ കുടുംബത്തിൽ ജനിച്ച് വളർന്ന അയാളിൽ ഗ്രാമീണമായ ചിന്തകളാണ് നിറഞ്ഞുനിന്നിരുന്നത്. ഭാര്യ സരോജിനിയും മരണപ്പെട്ടതോടെ അയാൾ ഗ്രാമത്തിലെ തറവാട് വീട്ടിൽ ഒറ്റയ്ക്കായി. അങ്ങനെയാണ് അയാൾ കൊല്ലങ്ങൾക്ക് മുമ്പ് പുറപ്പെട്ടുപോയ മകൻ സജീവനെ അന്വേഷിച്ചിറങ്ങിയത്. നഗരം അയാൾക്ക് അപരിചിതത്വം നിറഞ്ഞതും ഏറ്റുവാങ്ങേണ്ടിവന്ന കാഴ്ചകളും സംഭവങ്ങളും അപ്രതീക്ഷിതവും ഉളളുലയ്ക്കുന്നതുമായിരുന്നു. അതിശയിപ്പിക്കുന്ന മെയ്വഴക്കത്തോടെയും ഭാവപ്രകടനങ്ങളോടെയുമാണ് ഉള്ളുനീറ്റുന്ന സംഘർഷത്തിൽ ജീവിക്കേണ്ടിവരുന്ന കഥാപാത്രത്തെ ഇന്ദ്രൻസ് അവതരിപ്പിച്ചത്.      
          ഇന്ദ്രൻസിനു പുറമെ കൊച്ചിയിലെ അഭിനയ കളരിയായ ആക്ട് ലാബിൽ നിന്നുള്ള പത്തോളം കലാകാരന്മാർ ആളൊരുക്കത്തിൽ വേഷമിടുന്നു. ശ്രീകാന്ത് മേനോൻ, അലിയാർ, വിഷ്ണു അഗസ്ത്യ, സീത ബാല, എസ്, ഷാജി ജോൺ, ദീപക് ജയപ്രകാശ്, ബേബി ത്രയ,  കലാഭവൻ നാരായണൻകുട്ടി, സജിത്ത് നമ്പ്യാർ തുടങ്ങിയവരാണ് പ്രധാന അഭിനേതാക്കൾ. സാംലാൽ വർഗീസിന്റെ ക്യാമറ ആളൊരുക്കത്തിന്റെ മികവുകളിൽ ഒന്നാണ്. സംഗീത സംവിധായകൻ വിദ്യാധരൻ മാസ്റ്റർ ഇന്ദ്രൻസിന് വേണ്ടി ഈ ചിത്രത്തിൽ ഗാനമാലപിച്ചിട്ടുണ്ടൈന്നത് മറ്റൊരു സവിശേഷത. റോണി റാഫേലാണ് ചിത്രത്തിന്റെ ഗാനങ്ങളും പശ്ചാത്തല സംഗീതവും നിർവഹിച്ചിട്ടുള്ളത്. 

കേരളകൗമുദി ഓൺലൈൻ, 2018 ഏപ്രിൽ 6