നമ്മള്‍ ഐശ്വര്യാ റായിയുടെ തീവ്രാരാധകരായി തുടരുമ്പോള്‍

മണിരത്‌നത്തിന്റെ പൊന്നിയിന്‍ സെല്‍വനില്‍ വല്ലവരയ്യന്‍ വന്തിയതേവന്‍ പഴുവൂര്‍ രാജ്ഞി നന്ദിനിയെ ആദ്യമായി കാണുന്ന രംഗമുണ്ട്. പല്ലക്കിലേറിയാണ് പഴുവൂര്‍ രാജ്ഞിയുടെ യാത്ര. അകത്തിരിക്കുന്നത് ഒരു അഭൗമ സൗന്ദര്യമാണെന്ന് വന്തിയതേവന് അറിയാം. പക്ഷേ പല്ലക്കിനൊപ്പം ഓടിയിട്ടും ആ കാഴ്ച സാധ്യമാകുന്നില്ല. പല്ലക്കിന്റെ വിരി കാറ്റില്‍ തെല്ല് മാറി അകത്തിരിക്കുന്നയാളെ കാണാന്‍ അയാള്‍ ഓട്ടം തുടരുന്നുണ്ട്. വന്തിയതേവനോടൊപ്പം പ്രേക്ഷകരുടെ ആകാംക്ഷയും സഞ്ചരിക്കുന്നു. പല്ലക്കിന്റെ സഞ്ചാരം നിലച്ച് ജനാലവിരിക്കു പിറകില്‍ നിന്ന് ആ കണ്ണുകളും മുഖവും തെളിയുന്നതോടെ ഒരു നിമിഷ നേരത്തേക്ക് വന്തിയതേവന്റെയും നമ്മുടെയും ശ്വാസഗതി ഒരുപോലെ നിലയ്ക്കുന്നു. കണ്ണെടുക്കാനാകാതെ നോക്കിയിരുന്നു പോകുന്നു. ആ വശ്യ രാജസ സൗന്ദര്യത്തില്‍ ഒരിക്കല്‍കൂടി നമ്മള്‍ വിഭ്രമിച്ചു പോകുന്നു. ഒരു വേള സ്ഥലകാലമെല്ലാം നഷ്ടമായി ഒറ്റയിടത്തേക്കു മാത്രം ശ്രദ്ധ ഒതുങ്ങിയൊതുങ്ങി ചുരുങ്ങുന്നു. അതിനിടെ എത്ര കാലം കടന്നുപോയി, എത്ര മാറ്റങ്ങളുണ്ടായി, എന്നിട്ടും തെല്ലും ഒളിമങ്ങാതെ, തേജസ്സ് കെടാതെ, അനന്തമനന്തകാലത്തേക്കു കാത്തുവയ്ക്കാവുന്ന സൗന്ദര്യാരാധന.

ഇരുപത്തഞ്ചാണ്ട് പിറകിലേക്ക് സഞ്ചരിക്കുമ്പോള്‍ മറ്റൊരു മണിരത്‌നം ചിത്രം. ഇരുവര്‍. 'ഹലോ മിസ്റ്റര്‍ എതിര്‍കച്ചി' എന്ന പാട്ടിനൊപ്പം കല്‍പ്പനയുടെ നൃത്തം ആനന്ദന്‍ കാണുന്നു. ആ സൗന്ദര്യം അയാളെ മറ്റൊരു തലത്തിലേക്കും ആരാധനയിലേക്കും കൊണ്ടുപോകുന്നുണ്ട്. ആ ചുവടുകളും സൗന്ദര്യവും ആനന്ദന്റെ ജീവിതം തന്നെ മാറ്റിമറിയ്ക്കുന്നു. 

ഈ രണ്ട് മണിരത്‌നം സിനിമകള്‍ക്കിടയില്‍ ഇരുപത്തഞ്ചാണ്ട് കടന്നുപോയിരിക്കുന്നു. കല്‍പ്പനയില്‍ നിന്ന് നന്ദിനിയിലേക്കും ഇരുപത്തഞ്ചാണ്ടിന്റെ ദൂരമുണ്ട്. ഐശ്വര്യ റായിയുടെ പ്രായം അന്നത്തെ ഇരുപത്തിനാലില്‍ നിന്ന് അമ്പതിലേക്കുള്ള പ്രവേശത്തിലാണ്. പക്ഷേ പ്രായം സൗന്ദര്യത്തെ തെല്ലും ബാധിച്ചിട്ടില്ല. ഇരുപത്തിനാലിന്റെ ചെറുപ്പമായിരുന്നു ഇരുവറില്‍. പൊന്നിയിന്‍ സെല്‍വനിലേക്ക് എത്തുമ്പോള്‍ യൗവ്വനം വിട്ടുപോകാന്‍ മടിച്ച് 'ചെറുതായില്ല ചെറുപ്പം' എന്ന മട്ടില്‍ ശരീരത്തിലത് പ്രത്യക്ഷമാകുന്നു. അങ്ങനെ നമ്മള്‍ ഇരുപത്തഞ്ചാണ്ടിനിപ്പുറവും ഐശ്വര്യാ റായിയുടെ തീവ്ര സൗന്ദര്യാരാധകരായി നമ്മളും തുടര്‍ന്നു പോരുന്നു.

കടന്നുപോയ രണ്ടര പതിറ്റാണ്ടിനിടയില്‍ എത്രയധികം കഥാപാത്രങ്ങളായി അവരെ നമ്മള്‍ കണ്ടിരിക്കുന്നു. നായക കഥാപാത്രങ്ങള്‍ക്ക് ഐശ്വര്യാ റായിയുടെ നായികയോട് തോന്നിയ അതേ കൗതുകവും ആരാധനയും നമുക്കും തോന്നി. ഇക്കാലയളവില്‍ ഇന്ത്യന്‍ സിനിമയിലെയും ജീവിതത്തിലെയും സൗന്ദര്യസങ്കല്‍പ്പത്തിന്റെ അവസാനവാക്കായി ഐശ്വര്യാ റായ് മാറി. ഒരു പെണ്ണിന്റെ സൗന്ദര്യത്തെ 'ഐശ്വര്യറായിയെ പോലെ' എന്നാണ് പോയ രണ്ടര പതിറ്റാണ്ടുകള്‍ അളന്നത്. ലോകസുന്ദരി പട്ടത്തിനായുള്ള മത്സരത്തില്‍ വിജയികളായ മറ്റു പല സുന്ദരിമാരും വാര്‍ത്തയില്‍ നിന്നും സൗന്ദര്യാരാധനയില്‍ നിന്നും മോഡലിംഗ്, ചലച്ചിത്ര മേഖലകളില്‍ നിന്നും ചുരുക്കം ചില വര്‍ഷങ്ങള്‍ കൊണ്ട് പി•ാറ്റപ്പെട്ടപ്പോഴും അഴകളവുകള്‍ തുല്യം ചാര്‍ത്തിയ ഐശ്വര്യറായ് എന്ന സുന്ദരിയെ കണ്ടുമതിയാകാന്‍ ലോകം കൂട്ടാക്കിയില്ല. 

1990 കളുടെ രണ്ടാം പകുതി തൊട്ട് ഇന്ത്യന്‍ സ്ത്രീസൗന്ദര്യ സങ്കല്‍പ്പത്തിന്റെ അവസാനവാക്കെന്ന പൊന്‍തൂവല്‍ അലങ്കരിക്കുമ്പോള്‍ തന്നെയും തനതായ അഭിനയ മികവില്‍ തനിക്ക് ലഭിച്ച കഥാപാത്രങ്ങളില്‍ കൂടി മികവു കാട്ടാന്‍ ഐശ്വര്യക്കായി. ഇതിനുള്ള അംഗീകാരമാണ് രണ്ടര പതിറ്റാണ്ട് പിന്നിടുമ്പോഴും ഇന്ത്യന്‍ സിനിമാ വ്യവസായത്തിലെ വിലപിടിപ്പുള്ള താരമായി അവര്‍ തുടരുന്നത്. 

പുരാണ, ചരിത്രേതിഹാസങ്ങളിലെ രൗജകുമാരിയുടെ രൂപമാണ് ഐശ്വര്യാ റായിക്ക്. കഥകളില്‍ വായിച്ച് സങ്കല്‍പ്പിച്ചുപോന്ന രാജകുമാരിയെയാണ് നേര്‍ക്കാഴ്ചയിലും വെള്ളിത്തിരയിലും അവര്‍ പൂര്‍ണതയിലെത്തിച്ചത്. അതുകൊണ്ടാണ് സഞ്ജയ് ലീല ബന്‍സാലി ഹം ദില്‍ ദേ ചുക് ദേ സനവും ദേവദാസും, അശുതോഷ് ഗോവര്‍കര്‍ ജോധാ അക്ബറും, മണിരത്‌നം ഇരുവറും രാവണും പൊന്നിയിന്‍ സെല്‍വനും ചിന്തിക്കുമ്പോള്‍ നായികയായി ഐശ്വര്യറായ് എന്ന തെരഞ്ഞെടുപ്പിലേക്ക് എളുപ്പത്തില്‍ എത്തിച്ചേരുന്നത്. പിരീഡ് സിനിമകളെ കുറിച്ച് ആലോചിക്കുമ്പോള്‍ തന്നെ അതിലെ സുപ്രധാന കഥാപാത്രമായി സങ്കല്‍പ്പിക്കാനും അതിന് സ്വാഭാവികത നല്‍കാന്‍ കഴിയുന്ന മുഖവും ശരീരഭാഷയുമാണ് ഐശ്വര്യ റായിയുടേത്. ഐശ്വര്യയുടെ ആദ്യസിനിമയായ ഇരുവറും കരിയറില്‍ വഴിത്തിരിവായ ഹം ദില്‍ ദേ ചുക് ദേ സനവും ശ്രദ്ധേയ പ്രകടനങ്ങള്‍ നടത്തിയ ദേവദാസ്, ഗുരു, ജോധാ അക്ബര്‍ എന്നിവയെല്ലാം പിരീഡ് മൂവികളുടെയോ അതിനോട് സാമ്യപ്പെടുത്താവുന്നതോ ആയ ഈ പ്രത്യേകതകളും പശ്ചാത്തലവും പിന്തുടരുന്നവയാണ്. 

ഷങ്കറിന്റെ ജീന്‍സില്‍ നായകന്‍ സപ്താത്ഭുതങ്ങളെ കുറിച്ച് പാടി എട്ടാമത്തെ അത്ഭുതമായി കണക്കാക്കുന്നത് തന്റെ പ്രണയിനിയെ തന്നെയാണ്. ഈ പ്രണയിനിയുടെ മുഖം ഐശ്വര്യ റായിയുടേതാകുമ്പോള്‍ കാണികള്‍ക്കും അതിശയോക്തി തോന്നാനിടയില്ല. ഷങ്കറിന്റെ തന്നെ എന്തിരനില്‍ യന്ത്രമനുഷ്യനില്‍ പോലും പ്രണയമെന്ന വികാരം സൃഷ്ടിക്കാന്‍ ഐശ്വര്യയുടെ സൗന്ദര്യത്തിനാകുന്നുണ്ട്. കല്‍പ്പിതകഥയാണെങ്കില്‍ പോലും ഒരു വേള അത് വിശ്വസനീയമെന്നു തോന്നിക്കുന്നത് ഈ സൗന്ദര്യം ഒന്നു തന്നെയാണ്. സുഭാഷ് ഗായുടെ താല്‍ കരിയറിന്റെ തുടക്കത്തില്‍ ഏറെ ശ്രദ്ധിക്കപ്പെട്ട ഐശ്വര്യ ചിത്രമാണ്. ഹം ദില്‍ ദേ ചുകേ സനത്തിനു ശേഷം പാട്ടുകളില്‍ ഉള്‍പ്പെടെ ഐശ്വര്യ റായുടെ സൗന്ദര്യം ഏറ്റവുമധികം ചൂഷണം ചെയ്ത സിനിമയാണ് താല്‍. രാജീവ് മേനോന്റെ കണ്ടുകൊണ്ടേന്‍ കണ്ടുകൊണ്ടേനും മണിരത്‌നത്തിന്റെ ഗുരുവും ആണ് ഗാനങ്ങളിലുള്‍പ്പെടെ ഐശ്വര്യയുടെ സൗന്ദര്യം പുറത്തുകൊണ്ടുവന്ന മറ്റു ചിത്രങ്ങള്‍. ജോധാ അക്ബറില്‍ മഹാറാണി ജോധയും രാവണില്‍ രാമായണ കഥാപാത്രം സീതയെ അവലംബമാക്കിയുള്ള രാഗിണിയും ഐശ്വര്യയുടെ സൗന്ദര്യത്തെ ക്യാമറ സൂക്ഷ്മമായി പകര്‍ത്തിയവയാണ്. 2016 ല്‍ പുറത്തിറങ്ങിയ കരണ്‍ ജോഹറിന്റെ യേ ദില്‍ ഹേ മുഷ്‌കില്‍ ഐശ്വര്യയുടെ ചോര്‍ന്നുപോയിട്ടില്ലാത്ത സൗന്ദര്യത്തെ സാക്ഷ്യപ്പെടുത്തി അടുത്ത കാലത്ത് വന്ന സിനിമയാണ്.

25 വര്‍ഷത്തിനിടെ 5 ഭാഷകളിലായി അമ്പതോളം സിനിമകളില്‍ ഐശ്വര്യറായ് അഭിനയിച്ചു. പക്ഷേ ഈ കണക്കുകള്‍ക്കപ്പുറത്താണ് സൗന്ദര്യം കൊണ്ട് അവര്‍ തീര്‍ത്ത കരിസ്മ. കേവലം ഒരു സിനിമാ നായികാസങ്കല്‍പ്പത്തിലോ മോഡലിലോ ഒതുങ്ങിനില്‍ക്കാത്തതാണ് ഐശ്വര്യാ റായിയുടെ സൗന്ദര്യം. അതുകൊണ്ടു തന്നെ പ്രകൃതിയുടെ പരിപൂര്‍ണതയുള്ളതയുള്ള സൗന്ദര്യസൃഷ്ടിയെന്നോ കാലാന്തരങ്ങളില്‍ മാത്രം സാധ്യമായേക്കാവുന്ന വിസ്മയമെന്നോ ഐശ്വര്യ റായ് എന്ന പേരിനെ ചേര്‍ത്തു വിശേഷിപ്പിക്കുന്നതില്‍ അതിശയോക്തിയില്ല.

ദി ഫോര്‍ത്ത്, 2022 നവംബര്‍ 1

തിയേറ്ററിന്റെ കലയാണ് സിനിമ / അഭിമുഖം അടൂര്‍ ഗോപാലകൃഷ്ണന്‍/ എന്‍.പി.മുരളീകൃഷ്ണന്‍

സ്വയംവരത്തിന്റെ 50 വര്‍ഷവും അടൂരിന്റെ സിനിമാ ജീവിതവും 

സ്വയംവരത്തിന്റെ 50 വര്‍ഷം അടൂര്‍ ഗോപാലകൃഷ്ണന്‍ എന്ന ചലച്ചിത്ര സംവിധായകന്റെയും 50 വര്‍ഷമാണ്. ഈ അരനൂറ്റാണ്ട് കാലത്തെ സ്വന്തം സിനിമാ ജീവിതത്തെ എങ്ങനെ നോക്കിക്കാണുന്നു?

എന്റെ സിനിമകളെ മറ്റുള്ളവര്‍ എങ്ങനെ നോക്കിക്കാണുന്നുവെന്നതിനെക്കുറിച്ചോ അല്ലെങ്കില്‍ എന്റെ സിനിമാ ജീവിതത്തെ കുറിച്ചോ ഞാന്‍ അങ്ങനെയൊരു വിലയിരുത്തലൊന്നും നടത്താറില്ല. ഞാന്‍ സാമാന്യം ഭേദപ്പെട്ട രീതിയില്‍ പഠിച്ച ഒരു തൊഴിലാണ് ഫിലിം മേക്കിംഗ്. അത് ചെയ്യുന്നു. അല്ലാതെ വേറൊരു പ്രവര്‍ത്തനവും എനിക്കില്ല. വായനയുണ്ട്, അത്യാവശ്യത്തിന് എഴുത്തും. സിനിമ എടുക്കാത്തപ്പോഴും സിനിമയുമായി ബന്ധപ്പെട്ട് എന്തെങ്കിലും ചെയ്യുകയായിരിക്കും. അങ്ങനെ സിനിമയുമായി ചേര്‍ന്നുള്ള ഒരു യാത്രയാണ് എന്റെ ജീവിതം. വളരെ മനോഹരമായ സിനിമകളും മോശം സിനിമകളും ഒരുപോലെ നമ്മളെ പഠിപ്പിക്കുന്നുണ്ട്. നല്ല സിനിമകള്‍ നമ്മളെ പ്രചോദിപ്പിക്കും. അതുപോലെ തന്നെ ഒരു മോശം സിനിമ ഇങ്ങനെ സിനിമ എടുക്കരുത് എന്ന പാഠമാണ് നല്‍കുന്നത്. 

ഈ അമ്പത് വര്‍ഷം കൊണ്ട് മലയാള സിനിമയ്ക്ക് ഉണ്ടായ സര്‍ഗാത്മകവും സാങ്കേതികപരവുമായ വാണിജ്യപരവുമായ മാറ്റത്തെയും വളര്‍ച്ചയെയും കുറിച്ച്?

മലയാള സിനിമയില്‍ സംഭവിച്ച മാറ്റങ്ങളെക്കുറിച്ച് പറയേണ്ടത് സിനിമാ നിരൂപകരാണ്. എന്റെ സിനിമയെക്കുറിച്ചേ എനിക്ക് പറയാനാകൂ. ഈ കാലയളവില്‍ വ്യക്തമായ മാറ്റങ്ങളുണ്ടാക്കിയ സിനിമയാണ് സ്വയംവരം. ഈ സിനിമ കൊണ്ടുവന്ന മാറ്റത്തിന്റെ ഗുണമെല്ലാം മലയാള സിനിമയ്ക്കുള്ളതാണ്. മലയാള സിനിമയുടെ മുന്നോട്ടുള്ള വളര്‍ച്ചയില്‍ വലിയ സംഭാവനയാണ് സ്വയംവരം നല്‍കിയത്. 

മലയാള സിനിമയെ സൗന്ദര്യശാസ്ത്രപരമായി മാറ്റിമറിച്ച സിനിമയാണ് സ്വയംവരം. മലയാളത്തിലെ ആദ്യത്തെ ലക്ഷണയുക്തമായ പരിപൂര്‍ണ സിനിമ എന്ന രീതിയിലാണ് സ്വയംവരം വിലയിരുത്തപ്പെട്ടിട്ടുള്ളത്. ഈ സിനിമയുടെ സ്രഷ്ടാവ് എന്ന നിലയില്‍ ഇതിനെ എങ്ങനെ കാണുന്നു?

ഒരേപടി നിലനിന്നുപോന്ന ഒരു ചലച്ചിത്ര മേഖലയെ അടിമുടി ഉണര്‍ത്തുകയായിരുന്നു സ്വയംവരം. അതില്‍ പ്രധാനം പ്രമേയപരമായി ഉണ്ടാക്കിയ മാറ്റമാണ്. ഒരു പ്രണയം, അതിനെ തുടര്‍ന്നുണ്ടാകുന്ന പ്രതിബന്ധങ്ങള്‍, ഒന്നുകില്‍ അതിന് സാഫല്യമുണ്ടാകും, അല്ലെങ്കില്‍ നൈരാശ്യത്തില്‍ അവസാനിക്കും. ഇതായിരുന്നു മലയാള സിനിമയില്‍ അതുവരെ നിലനിന്ന പ്രമേയം. ഇത് തിരിച്ചും മറിച്ചും വരും. മുഴുവന്‍ സംഭാഷണമായിരിക്കും. സംസാരത്തിലൂടെയായിരിക്കും എല്ലാ കാര്യങ്ങളും അതില്‍ കടന്നുവരുന്നത്. സ്വയംവരത്തില്‍ അങ്ങനെയല്ല. നമ്മള്‍ ആ ജീവിതം അനുഭവിക്കുന്നു. ഇതു തന്നെയാണ് വലിയ വ്യത്യാസം. സിനിമയില്‍ ആരെങ്കിലും പറഞ്ഞല്ല, നമ്മള്‍ എല്ലാ കാര്യവും അറിയേണ്ടത്. അനുഭവിച്ചറിയുകയാണ് ചെയ്യേണ്ടത്. ഇനി സാങ്കേതികമായി നോക്കുകയാണെങ്കില്‍ ലൊക്കേഷനില്‍ തന്നെ ശബ്ദം റെക്കോര്‍ഡ് ചെയ്തെടുക്കുന്ന രീതി സ്വയംവരത്തിലൂടെയാണ് വരുന്നത്. ഒരുപക്ഷേ ഇന്ത്യയില്‍ തന്നെ ആദ്യമായിട്ടായിരിക്കും ഇത്. അന്ന് തിരുവനന്തപുരം വലിയ നഗരമായിരുന്നില്ല. ശാസ്തമംഗലത്ത് ഓഫീസിനു പിറകുവശത്തെ സ്ഥലത്താണ് സെറ്റിട്ടത്. ഷൂട്ടിംഗ് കാണാന്‍ വരുന്നവര്‍ പോലും ശബ്ദമുണ്ടാക്കാതെ സഹകരിച്ചിരുന്നു. അവിടെ നന്നായി ഷൂട്ട് ചെയ്യാനായി. സിനിമയില്‍ സംഭാഷണവും പശ്ചാത്തല സംഗീതവുമല്ലാത്ത ശബ്ദങ്ങള്‍ കേള്‍പ്പിക്കുന്നത് സ്വയംവരത്തിലാണ്. കൂടാതെ മറ്റ് സ്വാഭാവിക ശബ്ദങ്ങളും റെക്കോര്‍ഡ് ചെയ്ത് ചേര്‍ത്തിരുന്നു.

ഗാനങ്ങളില്ലാത്ത, നാടകീയതയും കൃത്രിമത്വവുമില്ലാത്ത, കഥാപാത്രങ്ങള്‍ അത്യാവശ്യത്തിനു മാത്രം സംസാരിക്കുന്ന, നീണ്ട ഷോട്ടുകളുള്ള, പശ്ചാത്തലശബ്ദങ്ങള്‍ക്ക് വലിയ പ്രാധാന്യം നല്‍കിയ, യഥാര്‍ഥ ലൊക്കേഷനുകളില്‍ ചിത്രീകരിച്ച സ്വയംവരം ആ കാലത്തെ ഏറ്റവും വലിയ പരീക്ഷണ സിനിമയായിരുന്നു. കച്ചവട സിനിമയുടെ ബഹളമയത്തില്‍ മലയാള സിനിമ മുങ്ങി നിന്ന ഒരു കാലമായിരുന്നു അത്. ഇതിനിടയിലാണ് സ്വയംവരം എന്ന പരീക്ഷണം രൂപപ്പെടുന്നത്. എന്തെല്ലാം വെല്ലുവിളികളായിരുന്നു ഇതിനു പിന്നില്‍ നേരിട്ടത്?

അടൂര്‍ ഭാസിയില്ലാതെ, പാട്ടുകളില്ലാതെ ഒരു സിനിമ ആലോചിക്കാന്‍ പറ്റാത്ത കാലമായിരുന്നു അത്. അപ്പോഴാണ് ഇതൊന്നുമില്ലാതെ സ്വയംവരം വരുന്നത്. ആദ്യത്തെ റിലീസില്‍ സിനിമ വേണ്ടത്ര ഓടിയില്ല. ആളുകള്‍ വന്നില്ല എന്നല്ല. കുറച്ചുപേര്‍ വന്നു. എന്നാല്‍ വലിയ രീതിയില്‍ അംഗീകരിക്കപ്പെട്ടില്ല. ഇതിന് ഒരു പരിഹാരമായി വന്നത് നാഷണല്‍ അവാര്‍ഡാണ്. നാഷണല്‍ അവാര്‍ഡ് സ്വയംവരത്തിന് വലിയ പബ്ലിസിറ്റിയായി. അതിന്റെ ഫലമായി ആള്‍ക്കാര്‍ക്ക് കാണാന്‍ താത്പര്യം വന്നു. ഞങ്ങള്‍ വീണ്ടും തിയേറ്ററില്‍ റിലീസ് ചെയ്തു. തിയേറ്ററില്‍ ഒന്നുരണ്ടു മാസം നിറഞ്ഞോടി. അങ്ങനെ പടത്തിന് ലാഭം കിട്ടി. നാഷണല്‍ അവാര്‍ഡിന്റെ ഉദ്ദേശലക്ഷ്യങ്ങളില്‍ പ്രധാനം മെച്ചപ്പെട്ട സിനിമകളെ കാഴ്ചക്കാരില്‍ എത്തിക്കുക എന്നതാണ്. ഇതാണ് ഒരു നല്ല പടം. ഇതാണ് നിങ്ങള്‍ കാണേണ്ടത് എന്ന് ജനങ്ങളെ ബോധ്യപ്പെടുത്തുകയാണ് നാഷണല്‍ അവാര്‍ഡ് ചെയ്യുന്നത്. ഇപ്പോള്‍ അതൊക്കെ മാറി. ഇപ്പോള്‍ രാഷ്ട്രീയ സ്വാധീനമുള്ളവരുടെ പടങ്ങള്‍ക്ക് അവാര്‍ഡ് കിട്ടും എന്ന രീതിയിലേക്ക് നമ്മള്‍ എത്തി. ഏറ്റവും മോശം പടങ്ങള്‍ക്കും അവാര്‍ഡ് കിട്ടും. സ്വയംവരത്തിന്റെ കാര്യത്തില്‍ ഇവിടത്തെ ജൂറി അന്ന് തീരുമാനമെടുത്തിരുന്നു. അതിന് അവാര്‍ഡൊന്നും നല്‍കരുതെന്ന്. ദേശീയ തലത്തില്‍ പരിഗണനയ്ക്ക് വരാതിരിക്കാന്‍ ഇവിടെ നിന്ന് ഇടപെടലുണ്ടായി. ദേശീയ ജൂറിക്ക് മുന്നിലേക്ക് സ്വയംവരം അയക്കപ്പെട്ടില്ല. അതിനെ പ്രാദേശിക തലത്തില്‍ തന്നെ തടഞ്ഞു. അക്കാരണത്താല്‍ ദേശീയ ജൂറി പടം കാണണമെന്ന അപേക്ഷ ഞങ്ങള്‍ കേന്ദ്രത്തിലേക്ക് അയച്ചു. പ്രഗത്ഭരായ ജൂറിയായിരുന്നു അത്. നല്ല ജൂറിയാണെങ്കില്‍ നല്ല തീരുമാനങ്ങള്‍ വരും. അവര്‍ പടം കണ്ടു. അങ്ങനെ സ്വയംവരം കാര്യമായി അംഗീകരിക്കപ്പെടുകയും ചെയ്തു. 

ഒരു വ്യത്യസ്ത സംരംഭമായിരുന്നു സ്വയംവരം. ഫണ്ടിങ്ങിന്റെ കാര്യത്തിലുള്‍പ്പെടെ. 50 വര്‍ഷത്തിനിപ്പുറം സിനിമയില്‍ വന്ന മാറ്റങ്ങളെ എങ്ങനെ കാണുന്നു?

ഫണ്ടിംഗിനായി പല ശ്രമങ്ങളും നടത്തിയിരുന്നു. സ്വകാര്യ മൂലധനം കിട്ടില്ലെന്ന് ഉറപ്പുള്ളതുകൊണ്ട് ഫിലിം ഫൈനാന്‍സ് കോര്‍പ്പറേഷനില്‍ നിന്ന് ഒന്നര ലക്ഷം കടമെടുത്താണ് സ്വയംവരം പൂര്‍ത്തിയാക്കിയത്. രണ്ടര ലക്ഷമായിരുന്നു സ്വയംവരത്തിന്റെ ബജറ്റ്. 

സ്വയംവരം എന്ന സിനിമയില്‍ അന്നത്തെ താരമൂല്യമുള്ള വാണിജ്യ സിനിമയിലെ അഭിനേതാക്കളെ അഭിനയിപ്പിച്ചിട്ടുണ്ട്. പിന്നീടും സൂപ്പര്‍താരങ്ങള്‍ താങ്കളുടെ സിനിമകളില്‍ പ്രധാന വേഷങ്ങളില്‍ വന്നു. താരമൂല്യം സിനിമയ്ക്ക് എത്രമാത്രം ഗുണകരമാണ്?

താരങ്ങള്‍ ഉള്ളതിന്റെ ഗുണം തുടക്കത്തില്‍ പടത്തിന് ആളെ കിട്ടും. സ്വയംവരത്തിനും അങ്ങനെയായിരുന്നിരിക്കണം. മധുവും ശാരദയുമായിരുന്നു അതിലെ പ്രധാന ആകര്‍ഷണം. ജനങ്ങളെ സംബന്ധിച്ച് അവര്‍ക്ക് നേരിട്ടറിയാവുന്നത് ഇവരെ രണ്ടു പേരെ മാത്രമാണ്. അല്ലാതെ മറ്റ് ആകര്‍ഷണങ്ങള്‍ ഒന്നുമില്ലല്ലോ. പക്ഷേ തുടക്കത്തില്‍ ആളെ കിട്ടാന്‍ വേണ്ടിയല്ല ഞാന്‍ ഇവരെ കാസ്റ്റ് ചെയ്തത്. അവര്‍ കഥാപാത്രത്തിന് യോജിച്ചവര്‍ ആയതുകൊണ്ടാണ്. പിന്നീട് വലിയ താരങ്ങളെ അഭിനയിപ്പിച്ചതും അവര്‍ എന്റെ കഥാപാത്രത്തിന് യോജിച്ചവരായതു കൊണ്ടാണ്. പക്ഷേ ഈ താരമൂല്യം രണ്ടോ മൂന്നോ ദിവസത്തേക്കേ ഗുണം ചെയ്യൂ. പിന്നീട് പടത്തിന്റെ ഭാവി അതിന്റെ ഉള്ളടക്കത്തെ ആശ്രയിച്ചിരിക്കും. നല്ല പടമാണെങ്കില്‍ ആളു വരും. അല്ലെങ്കില്‍ പടം തിയേറ്ററില്‍ നിന്ന് പുറത്താകും. താരങ്ങള്‍ ഇല്ലാത്ത സിനിമയായിരുന്നു കൊടിയേറ്റം. താരങ്ങളില്ലാത്ത കാരണം തിയേറ്ററുകാര്‍ താല്പര്യം കാണിച്ചില്ല. വെറും രണ്ടു തിയേറ്ററിലാണ് കൊടിയേറ്റം പ്രദര്‍ശനം തുടങ്ങിയത്. പടത്തിന് ആളു കയറാന്‍ തുടങ്ങിയതോടെ ഓരോരുത്തരും പടം ചോദിച്ചുവാങ്ങി. 14 തിയേറ്ററിലേക്ക് എത്തി. കോട്ടയത്തെ തിയേറ്ററില്‍ മാത്രം 145 ദിവസമാണ് കൊടിയേറ്റം ഓടിയത്. ഒരു താരങ്ങളുമില്ലാതെയാണ് ഈ വലിയ വിജയം. അപ്പോള്‍ പിന്നെ താരങ്ങള്‍ ഉണ്ടായാലേ പടം ഓടൂ എന്നു പറയുന്നതില്‍ അര്‍ഥമുണ്ടോ? പക്ഷേ താരങ്ങള്‍ ഉണ്ടെങ്കില്‍ ഇനിഷ്യല്‍ പുള്‍ കിട്ടും. അത് വാസ്തവമാണ്. 

സ്വയംവരത്തിന് നല്ല പരസ്യപ്രചാരണം നല്‍കിയിരുന്നു. എനിക്ക് അതിലൊക്കെ വലിയ നിര്‍ബന്ധമുണ്ടായിരുന്നു. ഒരു ആര്‍ട്ട് പടമായി ഇതിനെ കാണരുത്. എല്ലാവരും കാണേണ്ട പടമായി തന്നെയാണ് സ്വയംവരത്തിന് പരസ്യം നല്‍കിയത്. വലിയ സിനിമയ്ക്ക് നല്‍കുന്ന പ്രചാരണം തന്നെയായിരുന്നു സ്വയംവരത്തിനും. 14 തിയേറ്ററില്‍ റിലീസ് ചെയ്തു. സ്ഥിരം പബ്ലിസിറ്റി മാര്‍ഗങ്ങള്‍ വേണ്ടെന്നു വച്ചു. എംവി ദേവന്റെ നേതൃത്വത്തില്‍ നമ്പൂതിരിയും കരുണാകരനും ഉള്‍പ്പെടെ അറിയപ്പെടുന്ന ആധുനിക കലാകാരന്മാരാണ് സ്വയംവരത്തിന്റെ പോസ്റ്ററുകള്‍ വരച്ചത്. 

തൊഴിലില്ലായ്മ എന്ന പ്രശ്‌നം ചര്‍ച്ചചെയ്ത സിനിമയാണ് സ്വയംവരം. ഈ സിനിമ 50-ാം വര്‍ഷത്തിലെത്തി നില്‍ക്കുമ്പോള്‍ കേരളത്തിലെ യുവജനങ്ങളുടെ തൊഴിലില്ലായ്മ എന്ന പ്രശ്‌നം എത്രത്തോളം പരിഹരിക്കപ്പെട്ടുവെന്നാണ് സ്വയംവരത്തിന്റെ സംവിധായകന്‍ മനസ്സിലാക്കുന്നത്?

തൊഴിലില്ലായ്മയാണ് സ്വയംവരത്തിന്റെ പശ്ചാത്തലം. തൊഴിലില്ലായ്മ പഴയതു പോലെ രൂക്ഷമാണെന്നു തോന്നുന്നില്ല. ഏതെങ്കിലും തൊഴില്‍ ചെയ്തു ജീവിക്കാന്‍ തയ്യാറാണെങ്കില്‍ അതിനുള്ള സാഹചര്യം ഇപ്പോഴുണ്ട്. അന്ന് അതില്ല. അഭ്യസ്തവിദ്യരുടെ തൊഴിലില്ലായ്മ അന്ന് രൂക്ഷമായിരുന്നു. മാറിയ തൊഴില്‍ സാഹചര്യങ്ങളെയും പുതിയ തൊഴില്‍ പ്രശ്‌നങ്ങളെയും സമീക്ഷിക്കുന്ന സിനിമകള്‍ക്ക് ഇപ്പോഴും പ്രസക്തിയുണ്ട്. 

സ്വയംവരത്തിന്റെ സ്വാധീനവും തുടര്‍ച്ചയും പിന്നീടുള്ള സിനിമകളില്‍ എങ്ങനെ പ്രകടമായി എന്നാണ് കാണുന്നത്?

സിനിമ എന്ന മാധ്യമത്തെ ഗൗരവമായി കാണുന്നവര്‍ക്ക് സ്വയംവരം ആത്മവിശ്വാസം പകര്‍ന്നു എന്നു തന്നെ പറയാം. സ്വയംവരത്തിന്റെ ചുവടുപിടിച്ച് പിന്നീട് സിനിമകളും ചലച്ചിത്രകാര•ാരുമുണ്ടായി. അരവിന്ദന്‍ വന്നു, പിന്നീട് കെ ആര്‍ മോഹനന്‍, എം.പി. സുകുമാരന്‍ നായര്‍, കെ ജി ജോര്‍ജ്, ജോണ്‍ എബ്രഹാം അങ്ങനെ ഒട്ടേറെ പേര്‍ ഈ രീതിയില്‍ വന്നു. ഇതിന്റെ തുടര്‍ച്ച പിന്നീടുമുണ്ടായി. ഇടയ്‌ക്കൊരു ഇടവേള വന്നിരുന്നു. ഇപ്പോള്‍ കുറേ ചെറുപ്പക്കാര്‍ സ്ഥിരം രീതികളില്‍ നിന്ന് മാറി സിനിമ എടുക്കാന്‍ തയ്യാറാകുന്നുണ്ട്. അര ഡസനോളം ചെറുപ്പക്കാര്‍ ഇങ്ങനെ കാണുന്നുണ്ട്. ഇതെല്ലാം സ്വയംവരത്തില്‍ തുടങ്ങിയ പ്രവണതകള്‍ തന്നെയാണ്. പുതിയ ജനറേഷന് പഴയ സിനിമകള്‍ കാണാന്‍ ഇപ്പോള്‍ ഒട്ടേറെ പ്ലാറ്റ്‌ഫോമുകളും അവസരവുമുണ്ട്. പുതിയ തലമുറ സംവിധായകര്‍ പലരും എന്റെ സിനിമകളുടെ സ്വാധീനത്തെ കുറിച്ച് പറയാറുണ്ട്. അവരോട് എന്റേതിനേക്കാള്‍ മികച്ച സിനിമകളെടുക്കാനാണ് ഞാന്‍ ആവശ്യപ്പെടുന്നത്.

1972 ലെ സ്വയംവരത്തില്‍ നിന്നും 2016 ലെ പിന്നെയും  എന്ന സിനിമയിലെത്തുമ്പോഴേക്കും സിനിമയെക്കുറിച്ചുള്ള ദര്‍ശനത്തിലും സമീപനത്തിലും എന്തെങ്കിലും മാറ്റമുണ്ടായിട്ടുണ്ടോ?

ദര്‍ശനമൊന്നും മാറുന്നില്ല. പടത്തിന്റെ സ്വഭാവം ചിലപ്പോള്‍ മാറും. അത്രയേ ഉള്ളൂ. എന്റെ 76-ാം വയസ്സില്‍ ഞാന്‍ സ്വയംവരം എടുക്കില്ലല്ലോ. നമ്മുടെ ലോകപരിചയം, ജീവിതം, അന്വേഷണം, വളര്‍ച്ച, പുതിയ കണ്ടെത്തലുകള്‍ തുടങ്ങിയവയെല്ലാം സിനിമയെ സ്വാധീനിക്കും.

സെല്ലുലോയ്ഡില്‍ നിന്ന് ഡിജിറ്റല്‍ സങ്കേതത്തിലേക്കു സിനിമ മാറിയിരിക്കുന്നു. സാങ്കേതിക വിദ്യയില്‍ വലിയ തോതിലുള്ള മാറ്റങ്ങളാണ് ഉണ്ടായിരിക്കുന്നത്. ഈ മാറ്റങ്ങള്‍ നല്ല സിനിമകളുടെ സൃഷ്ടിക്ക് സഹായകമായതായി അങ്ങ് വിശ്വസിക്കുന്നുണ്ടോ?

രണ്ട് രീതിയിലാണ് ഈ മാറ്റം. കലാപരമായ മാറ്റമല്ല, സാമ്പത്തികമായ സൗകര്യം അനുസരിച്ചാണ് ഈ മാറ്റമുണ്ടായത്. ഡിജിറ്റലാകുമ്പോള്‍ ഒരേ സമയം ഒട്ടേറെ തിയേറ്ററുകളില്‍ സിനിമ പ്രദര്‍ശിപ്പിക്കാനാകും. ഡിജിറ്റലില്‍ ഷൂട്ട് ചെയ്യുമ്പോള്‍ പഴയതു പോലെയുള്ള ലൈറ്റിംഗിന്റെ ആവശ്യമില്ല. പണ്ട് ഒരു വൈകുന്നര സമയത്തെ തെരുവ് ഷൂട്ട് ചെയ്യണമെങ്കില്‍ അതിനു യോജിക്കും വിധം അത്രയും സ്ഥലവും ലൈറ്റ് അപ് ചെയ്യണമായിരുന്നു. ഡിജിറ്റലില്‍ ഇത്ര പ്രയാസമില്ല. അല്ലാതെ തന്നെ സ്വാഭാവിക ലൈറ്റിംഗ് സൗകര്യപൂര്‍വ്വം ഉപയോഗിക്കാനാകും. സാങ്കേതികവിദ്യ സൃഷ്ടിച്ച സൗകരമാണിത്.

ദോഷത്തെപ്പറ്റി പറഞ്ഞാല്‍ ഡിജിറ്റലില്‍ ആവശ്യത്തിലധികം ഷൂട്ട് ചെയ്തു കൂട്ടുകയാണ്. ചെലവ് കൂടുന്നു. ഫിലിം മേക്കിംഗില്‍ അടിസ്ഥാനമായി അറിയേണ്ട ചില കാര്യങ്ങളുണ്ട്. ഡിജിറ്റല്‍ സങ്കേതം ഉപയോഗിക്കുമ്പോള്‍ അതുപോലും അറിയേണ്ടി വരുന്നില്ല. ഈയൊരു ലാഘവത്വമാണ് ഏറ്റവും വലിയ ദോഷം. ഇത് സിനിമയുമായി കലാകാരനുള്ള സമീപനത്തെ തന്നെ ബാധിക്കും.

ഫിലിം ഫെസ്റ്റിവലുകളുടെ കാലമാണ്. മലയാള സിനിമയ്ക്ക് ഫിലിം ഫെസ്റ്റിവല്‍ എങ്ങനെയാണ് ഗുണകരമാകുന്നത്?

വലിയ വ്യത്യാസം ചെയ്തിട്ടുണ്ട്. ഫിലിം സൊസൈറ്റികളില്‍ നിന്നാണ് ആദ്യം സിനിമ കണ്ടു ശീലിക്കേണ്ടത്. ഫിലിം സൊസൈറ്റികളില്‍ നിന്ന് സിനിമ കണ്ടവരാണ് പിന്നീട് ഫിലിം ഫെസ്റ്റിവെലുകളിലേക്ക് പോകേണ്ടത്. മുമ്പൊക്കെ അങ്ങനെയായിരുന്നു. എന്തായാലും ഫിലിം ഫെസ്റ്റിവെലുകള്‍ ചലച്ചിത്രകാരന്മാരെ സ്വാധീനിക്കും. വിവിധ രാജ്യങ്ങളില്‍ നിന്നുള്ള വ്യത്യസ്തങ്ങളായ സിനിമകള്‍ കാണാനുള്ള അവസരമല്ലേ ഫെസ്റ്റിവല്‍ ഉണ്ടാക്കുന്നത്. ഫിലിം ക്രിട്ടിക്‌സുകളെയും ഫിലിം ഫെസ്റ്റിവെല്‍ സൃഷ്ടിക്കേണ്ടതാണ്.

തിയേറ്ററുകളിലാണ് സിനിമ എന്ന കലാരൂപം പൂര്‍ണത പ്രാപിക്കുന്നത് എന്ന് അങ്ങ് അഭിപ്രായപ്പെട്ടിരുന്നു. ഒടിടി പ്ലാറ്റ്‌ഫോമുകളുടെ ജനകീയത സിനിമാ തിയേറ്ററുകള്‍ക്ക് ഭീഷണിയാകില്ലെന്നു തന്നെയാണോ വിശ്വസിക്കുന്നത്?

ഇപ്പോള്‍ സിനിമ വാച്ചിലും മൊബൈല്‍ ഫോണിലുമെല്ലാം കാണാം. പക്ഷേ സിനിമ ആത്യന്തികമായി തിയേറ്ററില്‍ ഇരുന്നു കാണേണ്ട കലയാണ്. ഒടിടി പ്ലാറ്റ്‌ഫോമുകള്‍ തിയേറ്ററുകള്‍ ഭീഷണിയാകുമെന്നു തന്നെയാണ് കരുതുന്നത്. ഹോളിവുഡ് സിനിമകള്‍ പോലും തിയേറ്ററില്‍ ആളില്ലാതെ നഷ്ടം വരുന്നുണ്ട്. കോവിഡ് സമയത്ത് ആളുകള്‍ ഒടിടിയില്‍ സിനിമ കണ്ടു തുടങ്ങി. അതൊരു പോപ്പുലര്‍ കള്‍ച്ചറായി. ഇപ്പോഴും അതു തുടരുന്നു. ചെറുതായി മാറിയെന്നു പറയുന്നു. ആളുകള്‍ പതിയെ തിയേറ്ററിലേക്ക് എത്തിത്തുടങ്ങിയിട്ടുണ്ട്. എങ്കിലും അത് മടിച്ചുമടിച്ചാണ്

ചലച്ചിത്രകാരന്മാര്‍ അതത് കാലത്തെ പുതിയ പ്രവണതകള്‍ക്കും മാറ്റങ്ങള്‍ക്കുമൊപ്പം എത്താന്‍ സ്വയം നവീകരിക്കേണ്ടതുണ്ടോ? 

അങ്ങനെ തോന്നുന്നില്ല. ഒരു ചലച്ചിത്രകാരന്‍ അയാളുടെ സിനിമയാണ് എടുക്കുന്നത്. അങ്ങനെയല്ല, ഇങ്ങനെയാണ് എടുക്കേണ്ടത് എന്നു പുറത്തു നിന്നുള്ളവര്‍ക്ക് എങ്ങനെ പറയാനാകും? ട്രെന്‍ഡ് അനുസരിച്ചല്ല ഞാന്‍ പടമെടുക്കുന്നത്. ചിലപ്പോള്‍ എന്റെ പടമായിരിക്കും ട്രെന്‍ഡ് ആയി മാറുന്നത്. സിനിമയില്‍ മാറ്റം വരുത്തുന്നയാള്‍ സിനിമയെക്കുറിച്ച് ആഴത്തിലുള്ള അനുഭവവും അറിവുമുള്ളയാളായിരിക്കും. അയാള്‍ ഈ മാധ്യമത്തില്‍ വലിയ പരീക്ഷണങ്ങള്‍ നടത്തിയിട്ടുണ്ടായിരിക്കും. ഇത് ക്ലാസില്‍ പോയി പഠിക്കണമെന്നില്ല. സ്വന്തം നിലയില്‍ പഠിച്ചാലും മതി. സത്യജിത് റേ ഒക്കെ അങ്ങനെയായിരുന്നു. അദ്ദേഹം പഥേര്‍ പാഞ്ചാലി എടുക്കുന്നതിനു മുമ്പ് ആഴത്തിലുള്ള പഠനങ്ങള്‍ നടത്തിയിരുന്നു. ഈ തയ്യാറെടുപ്പുകളെല്ലാം അദ്ദേഹത്തിന്റെ സിനിമയ്ക്ക് ഗുണം ചെയ്തിട്ടുണ്ട്. ഇങ്ങനെയുള്ള സിനിമകള്‍ സൃഷ്ടിക്കുന്നവരാണ് ട്രെന്‍ഡ് സൃഷ്ടിക്കുന്നതെന്ന് പറയാനാകുന്നത്. 

പാന്‍ ഇന്ത്യന്‍ എന്നതാണ് നിലനില്‍ക്കുന്ന ഏറ്റവും പുതിയ ആസ്വാദന രീതി. ഈ ഗണത്തില്‍ വിശേഷിപ്പിക്കപ്പെടുന്ന സിനിമകള്‍ പലതും വീരാരാധനയെയും നായക ശരീരങ്ങളെയും പ്രോത്സാഹിപ്പിക്കുന്നവയാണ്. ബാഹുബലി, കെജിഎഫ്, ആര്‍ആര്‍ആര്‍, പുഷ്പ എന്നിവ ഉദാഹരണം. ഇത്തരം സിനിമാസ്വാദന രീതികളെ എങ്ങനെ കാണുന്നു?

ഹിന്ദി സിനിമകള്‍ പണ്ട് ചെയ്തിരുന്നതു തന്നെയാണ് ഇപ്പോള്‍ പാന്‍ ഇന്ത്യന്‍ എന്ന പേരില്‍ വരുന്നത്. പ്രമേയത്തിലും സ്വഭാവത്തിലുമെല്ലാം ഇതു തന്നെയാണ് തുടരുന്നത്. ഇപ്പോള്‍ സൗത്ത് ഇന്ത്യയില്‍ നിന്ന് ഇതുപോലുള്ള സിനിമകള്‍ വരുന്നു. ഹിന്ദി സിനിമയെ പോലും അത് സ്വാധീനിക്കുന്നു. കൊമേഴ്‌സ്യല്‍ സാധ്യത എങ്ങനെയാണോ അങ്ങോട്ടു പോകും. അതാണ് ഏതുകാലത്തും നിലനില്‍ക്കുന്ന രീതി.  

നരബലി പോലുള്ള ദുരാചാരങ്ങള്‍ കേരളത്തില്‍ സംഭവിക്കുന്നു. അന്ധവിശ്വാസങ്ങളും അനാചാരങ്ങളും വര്‍ധിക്കുന്ന സമൂഹമായി മാറുകയാണോ നമ്മള്‍? അന്ധവിശ്വാസങ്ങള്‍ പ്രചരിപ്പിക്കുന്നതില്‍ സിനിമയ്ക്കും പങ്കുണ്ടോ?

അങ്ങനെയില്ല. ഇതൊക്കെ ഒറ്റപ്പെട്ട സംഭവമാണ്. ഒരു സംഭവത്തിന്റെ പേരില്‍ കേരളത്തിലുള്ളവരെല്ലാം ദുര്‍മന്ത്രവാദത്തില്‍ വിശ്വസിക്കുന്നവരും അന്ധവിശ്വാസികളുമാണെന്ന് പറയാനാകുമോ? അന്ധവിശ്വാസികള്‍ അന്നും ഇന്നുമുണ്ട്. ഇത് കേരള സമൂഹത്തെ മുഴുവന്‍ ബാധിച്ചുവെന്ന് പറയാനാകില്ല. അന്ധവിശ്വാസങ്ങളെ ഉന്മൂലനം ചെയ്യുന്നത് കലകളുടെ കടമയാണ് എന്നൊന്നും പറയാനാകില്ല. ഉത്തമകല ചെയ്യുന്നത് അതതു കാലഘട്ടത്തെ അതേപോലെ പ്രതിഫലിപ്പിക്കുക എന്നതു മാത്രമല്ല. അത് എക്കാലത്തും പ്രസക്തമായിരിക്കും. ആദര്‍ശങ്ങള്‍ വിളമ്പാനുള്ള തവിയായി സിനിമയെയോ മറ്റു കലകളെയോ കാണരുത്.

അങ്ങയുടെ പുതിയ സിനിമാ പദ്ധതികള്‍?

നിലവില്‍ ഒന്നും മനസ്സിലില്ല. പുതിയ സിനിമ മനസ്സില്‍ വന്നാല്‍ ചെയ്യാം. സിനിമ കാണാന്‍ ആളുകള്‍ തിയേറ്ററില്‍ വരുന്നില്ല. ഒടിടി പ്ലാറ്റ്‌ഫോമുകളുടെ ഇടപെടല്‍ തുടങ്ങി പുതിയ സാഹചര്യങ്ങളെല്ലാം സിനിമയെടുക്കുന്നതിനെ കുറിച്ച് ചിന്തിക്കുന്നതില്‍ നിന്ന് പിന്നോട്ടടിപ്പിക്കുന്നുണ്ട്. 

സമകാലിക ജനപഥം, 2022 നവംബര്‍

മുകുന്ദന്‍ ഉണ്ണിയും നന്മയുടെ പതാകവാഹകരല്ലാത്ത നായകന്മാരും

 

നന്മ മാത്രം ചെയ്യുന്ന നായകനെ സിനിമയില്‍ കണ്ടുശീലിച്ചവരാണ് നമ്മള്‍. കുടുംബത്തിനു വേണ്ടിയും നാടിനു വേണ്ടിയും സദാ നന്മയും ത്യാഗവും ചെയ്യുന്നവരായിരിക്കും ഈ നായകന്മാര്‍. ഇനി നായകന്‍ തിന്മ ചെയ്യുന്നുവെന്ന് മറ്റു കഥാപാത്രങ്ങള്‍ തെറ്റിദ്ധരിച്ചെങ്കില്‍ തന്നെയും അതു തിരുത്തി എല്ലാവരും നായകന്റെ നന്മയെ വാനോളം പുകഴ്ത്തിക്കൊണ്ടായിരിക്കും ആ സിനിമ അവസാനിക്കുന്നത്. ഇത്തരമൊരു കാഴ്ചശീലമാണ് സിനിമ, പ്രത്യേകിച്ച് ഇന്ത്യന്‍ സിനിമ, സ്വഭാവികമായും മലയാള സിനിമ അതിന്റെ പിറവികാലം തൊട്ട് പിന്തുടര്‍ന്നു പോരുന്നത്. ഇതില്‍നിന്നുള്ള വിടുതി പ്രഖ്യാപനം അപൂര്‍വ്വം സന്ദര്‍ഭങ്ങളില്‍ മാത്രമാണ് സാധ്യമായി വന്നിട്ടുള്ളത്. ജീവിച്ചുപോരുന്ന സമൂഹത്തില്‍ എന്തെല്ലാം സാമൂഹികവിരുദ്ധ പ്രവര്‍ത്തനങ്ങള്‍ നിരന്തരം ആവര്‍ത്തിച്ചുകൊണ്ടിരുന്നാലും സിനിമ ശുദ്ധഗതി സഞ്ചരിക്കുന്നതും നായകന്‍ നന്മയുടെ പ്രതിബിംബം ആയിരിക്കണമെന്നതുമാണ് സിനിമ പുലര്‍ത്തിപ്പോരുന്ന അലിഖിത നിയമം. 

സമൂഹത്തിന്റെ പരിച്ഛേദമെന്നതിനാല്‍ സിനിമയിലെ പ്രമേയങ്ങള്‍ പലപ്പോഴും നടപ്പു വ്യവസ്ഥിതിയെ അതേപടി അനുകരിക്കുകയും തെറ്റുകളെ എതിര്‍ത്തു പോരുകയും ചെയ്യാറുണ്ട്. ഈ അവസരങ്ങളിലെല്ലാം സിനിമയിലെ നായകപക്ഷം നന്മയെ പ്രതിനിധാനം ചെയ്തുകൊണ്ടായിരിക്കും നിലകൊള്ളുക. നായകന്‍ സമൂഹം നിശ്ചയിച്ചിട്ടുള്ള നേര്‍പാതയില്‍ നിന്ന് വ്യതിചലിക്കുമ്പോള്‍ പോലും അതിനൊരു ശരി കണ്ടെത്താനും സിനിമ ശ്രമിക്കാറുണ്ട്. സ്വാഭാവികമായും പ്രേക്ഷകരും സിനിമ നിശ്ചയിച്ച ആ ശരിക്കൊപ്പം ചേരാന്‍ നിര്‍ബന്ധിതരാകുന്നു. ജീത്തു ജോസഫിന്റെ ദൃശ്യം എന്ന സിനിമയിലെ നായകന്‍ ഇവ്വിധം സ്വന്തം കുടുംബം നടത്തിയ കൊലപാതകത്തില്‍ നിന്ന് രക്ഷപ്പെടാന്‍ നിയമവ്യവസ്ഥയെ ആകെ കബളിപ്പിക്കുന്നുണ്ട്. പക്ഷേ നായകന്റെ തെറ്റ്, ശരിയെന്നു ശഠിച്ച് അതിനൊപ്പം നില്‍ക്കാനാണ് സിനിമയും പ്രേക്ഷകനും തയ്യാറാകുന്നത്. 

അനധികൃത മാര്‍ഗങ്ങളിലൂടെ സ്വത്ത് സമ്പാദനവും പ്രശസ്തിയുമുള്‍പ്പെടെ വലിയ നിലയില്‍ എത്തുന്ന ഒരുപാടു പേര്‍ ചുറ്റിലുമുണ്ട്. ഇവരൊന്നും നന്മയുടെ തോളു ചേര്‍ന്നു മാത്രമായിരിക്കില്ല സഞ്ചരിച്ചിട്ടുണ്ടാകുക. പക്ഷേ സമൂഹത്തിന്റെ മുന്നോട്ടുപോക്കില്‍ നിശ്ചിത സ്ഥാനമാനങ്ങളിലെത്തിയ ഇവരുടെ മാര്‍ഗത്തില്‍ തടസ്സം നില്‍ക്കാന്‍ ആരും തയ്യാറായേക്കില്ല. അതുകൊണ്ടുതന്നെ ഇവര്‍ തഴച്ചുവളരുകയും ചെയ്യും. 'ലോകത്തില്‍ രണ്ടു തരം മനുഷ്യരാണുള്ളത്. ചൂഷണം ചെയ്യുന്നവരും, ചൂഷണം ചെയ്യപ്പെടുന്നവരും' എന്ന സമൂഹത്തിലെ ഈ വാസ്തവത്തെയാണ് അഭിനവ് സുന്ദര്‍ നായകിന്റെ മുകുന്ദന്‍ ഉണ്ണി അസോസിയേറ്റ്‌സ് എന്ന സിനിമ തുറന്നുകാട്ടുന്നത്. നെഗറ്റീവ് ഷേഡ് എന്ന് ഒറ്റക്കാഴ്ചയില്‍ തോന്നിപ്പിച്ച് സമൂഹത്തിലെ ഒരു വിഭാഗം സര്‍വ്വപ്രതാപികളായ ചൂഷകരെയാണ് ഈ സിനിമയും അതിലെ നായകനും പ്രതിനിധാനം ചെയ്യുന്നത്. പല തരത്തില്‍ മറ്റു മനുഷ്യരെ ചൂഷണം ചെയ്ത് സ്വയം വളരുന്ന മനുഷ്യരുടെ പ്രതിനിധിയാണ് മുകുന്ദന്‍ ഉണ്ണി. തിരിച്ചടികള്‍ മാത്രം നേരിടുന്ന ഏതൊരു മനുഷ്യനും അവന്റെ നിരാശാവേളയില്‍ ആഗ്രഹിക്കുന്ന ജീവിത വിജയത്തിനു വേണ്ടി തെരഞ്ഞെടുക്കുന്ന വഴിയില്‍ ഒരുപക്ഷേ മനുഷ്യത്വത്തിന്റെ കണിക കണ്ടുകിട്ടിയേക്കില്ല. കാരണം അയാളോട് ലോകം മനുഷ്യത്വമോ ദയാദാക്ഷിണ്യമോ കാണിച്ചിട്ടുണ്ടാകില്ല. സ്വാഭാവികമായും വളരാനുള്ള വ്യഗ്രതയില്‍ അയാളും തനിക്ക് ചുറ്റുമുള്ള ലോകത്തിന് അത് തിരിച്ചു നല്‍കാന്‍ തയ്യാറാകുന്നില്ല. നന്മയുടെ പതാകവാഹകരായി അത്തരം കഥാപാത്രങ്ങള്‍ക്ക് നായക കര്‍തൃത്വം നല്‍കി വാഴിക്കുന്ന പതിവില്‍ നിന്ന് വിപരീതമായി പ്രതിനായകര്‍ കൂടി നിറഞ്ഞതാണ് ചുറ്റുമുള്ള സമൂഹം എന്ന് മുകുന്ദന്‍ ഉണ്ണി എന്ന കഥാപാത്രത്തിലൂടെ ഈ സിനിമ ഓര്‍മ്മിപ്പിക്കുന്നു. ഇങ്ങനെ ഓര്‍മ്മപ്പെടുത്താന്‍ ഭൂരിഭാഗം സിനിമകളും മെനക്കെടാറില്ലെന്നതു കൊണ്ടുതന്നെ സിനിമയിലെ മുഖ്യകഥാപാത്രങ്ങളെല്ലാം നന്മയുടെ പതാകവാഹകരായി മാറുന്നതാണ് പതിവ്.

മുകുന്ദന്‍ ഉണ്ണി തന്റെ വളര്‍ച്ചയ്ക്ക് തടസ്സമായി നില്‍ക്കുന്നവരെ ഉന്മൂലനം ചെയ്യുന്നതിനായി ചെയ്യുന്ന പല പ്രവൃത്തികളും നമ്മള്‍ ജീവിക്കുന്ന ചുറ്റുപാടില്‍ പലപ്പോഴായി നടന്ന പല സംഭവങ്ങളുമായും ചേര്‍ത്തു വായിക്കാനാകും. വ്യാജരേഖകളുണ്ടാക്കി അപകീര്‍ത്തിപ്പെടുത്തുന്നതും അതുമൂലം അധികാര സ്ഥാനങ്ങള്‍ക്ക് ഇളക്കം സംഭവിക്കുന്നതും, പാമ്പിനെക്കൊണ്ട് കൊത്തിച്ച് കൊലപ്പെടുത്തുന്നതും, സ്വയം സൃഷ്ടിക്കുന്ന വാഹനാപകടങ്ങളിലൂടെയുള്ള മരണങ്ങളുമെല്ലാം വാര്‍ത്തകള്‍പ്പുറത്തെ സാമൂഹിക യാഥാര്‍ഥ്യമാണ്. ഇത്തരം പ്രവൃത്തികള്‍ ചെയ്യാന്‍ സിനിമകള്‍ സാധാരണ പ്രതിനായക കഥാപാത്രങ്ങളെയാണ് ചുമതലയേല്‍പ്പിക്കാറ്. മുകുന്ദന്‍ ഉണ്ണിയില്‍ നായക കഥാപാത്രം തന്നെ ഇത് ചെയ്യുന്നുവെന്നുള്ള വ്യത്യാസം മാത്രം. സിനിമയില്‍ നായകനെക്കൊണ്ട് ചെയ്യിച്ചാലും പ്രതിനായകനെക്കൊണ്ട് ചെയ്യിച്ചാലും രണ്ടും നടപ്പു സമൂഹത്തിന്റെ യാഥാര്‍ഥ്യങ്ങള്‍ തന്നെയാകുന്നു.

എന്നെങ്കിലുമൊരിക്കല്‍ പിടിക്കപ്പെടുമെന്ന് ഉറപ്പുള്ള ഒരു തെറ്റ് ചെയ്തവരാണ് ജീത്തു ജോസഫ് സിനിമയിലെ കഥാപാത്രങ്ങളായ ജോര്‍ജ്കുട്ടിയും കുടുംബവും. എത്ര തന്നെ ശരികളും ന്യായീകരണങ്ങളുമുണ്ടെങ്കിലും കുറ്റം കുറ്റമായിത്തന്നെ അവശേഷിക്കും. ഇത് ഏറ്റവും നന്നായി അറിയാവുന്നയാള്‍ ജോര്‍ജ്കുട്ടി തന്നെയാണ്. പോലീസ് വീണ്ടും തന്നെ തേടിയെത്തുന്ന ആ ദിവസത്തിനായുള്ള കാത്തിരിപ്പിലാണ് അയാള്‍. അതിനെ നേരിടാനായി വര്‍ഷങ്ങളോളമെടുത്ത് അയാള്‍ ഒരു തിരക്കഥ തയ്യാറാക്കുന്നു. ആദ്യതവണ ശിക്ഷയില്‍ നിന്ന് രക്ഷപ്പെട്ടതു മുതല്‍ പിന്നീട് തന്നെ തേടിവരുന്ന നിയമത്തെ നേരിടാന്‍ അയാള്‍ തയ്യാറെടുക്കുന്നുണ്ട്. തന്റെ കുടുംബത്തെ രക്ഷിക്കാന്‍ ഏതറ്റം വരെയും പോകുമെന്നു പറയുന്ന ജോര്‍ജ്കുട്ടിയുടെ കണക്കുകൂട്ടലും ചെയ്തികളുമൊന്നും അസ്വാഭാവികമായി അനുഭവപ്പെടുന്നില്ല. ഇതു തന്നെയാണ് ജോര്‍ജ്കുട്ടിയെന്ന സാധാരണക്കാരനെക്കൊണ്ട് അസാധാരണ ക്യത്യങ്ങള്‍ ചെയ്യിപ്പിക്കാന്‍ എഴുത്തുകാരനെയും സംവിധായകനെയും പ്രേരിപ്പിക്കുന്നതും. എന്നെങ്കിലും പോലീസിന് കിഴടങ്ങേണ്ടി വരുമെന്ന് അറിയാവുന്ന ഒരാള്‍ തയ്യാറാക്കുന്ന പാതി മാത്രം വിജയ സാധ്യതയുള്ള ഒരു തിരക്കഥയാണ് ജോര്‍ജ്കുട്ടിയുടേത്. പക്ഷേ സിനിമയില്‍ സൂചിപ്പിക്കുന്നതുപോലെ നായകന്‍ വിജയിക്കുന്നതിലാണ് ജനങ്ങള്‍ക്ക് താത്പര്യം.

     ആ സത്യം എന്നോടൊപ്പം മണ്ണടിയട്ടെ എന്നാണ് ജോര്‍ജ്കുട്ടി പറയുന്നത്. എന്തു കാര്യവും ഭാര്യയോട് ആലോചിച്ചു മാത്രം ചെയ്യുന്ന ജോര്‍ജ്കുട്ടി ഭാര്യയോടു പോലും മറച്ചുവച്ച ആ സത്യത്തിനു സാക്ഷികള്‍ പ്രേക്ഷകര്‍ മാത്രമാകുന്നു. കൊല ചെയ്യപ്പെട്ട ചെറുപ്പക്കാരന്റെ മൃതദേഹം രാജാക്കാട് പോലീസ് സ്‌റ്റേഷനില്‍ തന്നെ കുഴിച്ചുമൂടുന്ന ജോര്‍ജ്കുട്ടി, എന്നെങ്കിലുമൊരിക്കല്‍ ആ സത്യം പോലീസ് തിരിച്ചറിയുമെന്ന് മനസ്സിലാക്കുന്നുണ്ട്. കൃത്യത്തില്‍ പങ്കാളികളായ വീട്ടുകാരെ പോലും അറിയിക്കാതെ സ്വയം അയാള്‍ ഒരു പദ്ധതി തയ്യാറാക്കുന്നു. ചിലപ്പോള്‍ വിജയിക്കാം, അതല്ലെങ്കില്‍ പരാജയമടയാം. പക്ഷേ തന്റെ കുടുംബത്തെ രക്ഷിക്കാന്‍ ശപഥം ചെയ്തിട്ടുള്ള ജോര്‍ജ് കുട്ടിയുടെ വഴിക്കാണ് കാര്യങ്ങള്‍ നീങ്ങുന്നത്. ഇവിടെ നിയമവ്യവസ്ഥയെ ആകെ കബളിപ്പിക്കുന്ന നായകനെയാണ് സിനിമ അവതരിപ്പിക്കുന്നത്. കുടുംബത്തിന്റെ രക്ഷകര്‍തൃത്വം എന്ന അതിവൈകാരികാംശം നായകനില്‍ ചാര്‍ത്തിനല്‍കി സിനിമയും പ്രേക്ഷകരും അയാളോടൊപ്പം ചേര്‍ന്നുനില്‍ക്കുമ്പോഴും കൊലപാതകക്കുറ്റം എന്ന നിയമത്തിന്റെ യാഥാര്‍ഥ്യം മാഞ്ഞുപോകുന്നില്ല. കൊലപാതകം ചെയ്യുകയും അത് മറച്ചുവയ്ക്കാന്‍ ശ്രമിക്കുകയും ചെയ്യുന്നവരുടെ പ്രതിനിധികള്‍ തന്നെയാകുന്നു ജോര്‍ജ്കുട്ടിയും കുടുംബവും. മുകുന്ദന്‍ ഉണ്ണി ജീവിതത്തില്‍ വിജയിച്ച ഒരാളായി മാറുന്നതിനായി തെറ്റുകള്‍ തന്നെയാണ് തന്റെ ശരികള്‍ എന്നുറപ്പിച്ച് മുന്നോട്ടുപോയി വിജയിക്കുമ്പോള്‍ ഏതു വഴിയും നിയമവ്യവസ്ഥയെ കബളിപ്പിച്ച് സ്വന്തം കുടുംബത്തിന്റെ രക്ഷകനാകുകയാണ് ജോര്‍ജ്കുട്ടി.

പനച്ചേല്‍ കുട്ടപ്പന്‍ എന്ന സമ്പന്നനും ഏകാധിപതിയുമായ മനുഷ്യനും അയാളുടെ ദുരാഗ്രഹികളായ മക്കളും അവരുടെ ജീവിതവും സംഘര്‍ഷങ്ങളും പതനവും പ്രമേയമാക്കുന്ന ദിലീഷ് പോത്തന്റെ ജോജിയിലെ കേന്ദ്ര കഥാപാത്രത്തെ മുകുന്ദന്‍ ഉണ്ണിയുടെ സ്വഭാവ വിശേഷങ്ങളുമായി ചേര്‍ത്തുവയ്ക്കാവുന്നതാണ്. പനച്ചേല്‍ കുട്ടപ്പന്റെ മക്കള്‍ വിഭിന്ന സ്വഭാവക്കാരാണ്. മൂത്തയാള്‍ക്ക് അച്ഛന്റെ അധ്വാനശേഷി കിട്ടിയിട്ടുണ്ട്. രണ്ടാമത്തെയാള്‍ക്ക് കാര്യബോധവും. ഈ വക യാതൊരു ഗുണവുമില്ലാത്തയാളാണ് മൂന്നമനായ ജോജി. എന്നാല്‍ മനുഷ്യന്റെയുള്ളിലെ ദുരയും വഞ്ചനയും അയാളില്‍ ആവോളമുണ്ട്. ജോജിയിലേക്ക് എത്തുമ്പോള്‍ ഇരട്ടമുഖമുള്ളതും സ്വാര്‍ഥതാല്‍പ്പര്യങ്ങള്‍ക്കായി ഏതറ്റം വരെയും പ്രവര്‍ത്തിക്കാന്‍ തയ്യാറാകുന്നവനുമായ ഒരുവനെയാണ് കാണാനാകുക. മെലിഞ്ഞൊട്ടി കാഴ്ചയില്‍ ഒന്നിനും പോരാത്തവന്റെ ശരീരഭാഷയാണയാള്‍ക്ക്. എന്നാല്‍ അകമേ സകല കാലുഷ്യവുമായി കുശാഗ്രബുദ്ധി പേറുന്നവന്‍. ഈ ബുദ്ധികൂര്‍മ്മത മറ്റുള്ളവര്‍ക്ക് (കൂടെ ജീവിക്കുന്നവര്‍ക്കടക്കം) എളുപ്പം പിടികിട്ടുകയുമില്ല. സ്വന്തം നിലനില്‍പ്പിനും നേട്ടത്തിനും വേണ്ടി എന്തു ചെയ്യാനും മടിക്കാത്ത അയാള്‍ക്ക് കായബലം കൊണ്ട് ഒരാളെ നേരിടാനാകില്ലെന്നുറപ്പാണ്. ഈ ബലഹീനതയെ മറികടക്കാനുതകുന്ന മനോബലവും കൂര്‍മ്മബുദ്ധിയും ഈ നായകനില്‍ ചാര്‍ത്തിനല്‍കുന്നുണ്ട്. ഏതവസ്ഥയും മറികടക്കാന്‍ ഈ വിശിഷ്ടവിശേഷം അയാളെ പ്രാപ്തനാക്കുന്നു. നേട്ടത്തിനായി സ്വപിതാവിനെയും സഹോദരങ്ങളെയും ചതിക്കാനും കൊലചെയ്യാനും മടിക്കാത്ത നായകരൂപത്തിന് ഉത്തമഗുണങ്ങള്‍ യാതൊന്നും അവകാശപ്പെടാനില്ല. പക്ഷേ നേട്ടങ്ങള്‍ക്കായി ചെയ്തുകൂട്ടുന്ന പ്രവൃത്തികള്‍ അയാളുടെ ശരികള്‍ തന്നെയാകുന്നു. അതില്‍ യാതൊരു വിട്ടുവീഴ്ചയ്ക്കും അയാള്‍ തയ്യാറാകുന്നുമില്ല. അതാണ് അവനെ നയിക്കുന്നത്. ജോജിക്കുള്ളിലെ സ്വാര്‍ഥതയും അവന്‍ തിരിച്ചറിയുന്ന ബന്ധങ്ങളിലെ നിരര്‍ഥകതയും സാധാരണ മനുഷ്യന്റെ പുറന്തോടിലൂടെയും ഉള്ളറകളിലൂടെയുമുള്ള സഞ്ചാരം തന്നെയായി മാറുന്നു. 

മജുവിന്റെ അപ്പനിലെ കേന്ദ്രകഥാപാത്രമായ ഇട്ടിച്ചന്‍ സ്വസുഖത്തിനും നേട്ടങ്ങള്‍ക്കും വേണ്ടി ഒരു മനുഷ്യന് എത്രത്തോളം സ്വാര്‍ഥനാകാമെന്നതിന് ഉദാഹരണമാണ്. കുടിച്ചും മദിച്ചും നടന്ന ഒരു മനുഷ്യന് ജീവിതത്തിലുടനീളം അവ തന്നൊകുന്നു ഏറ്റവും വലിയ ലഹരി. അതിനു വേണ്ടി ആരെയും തള്ളാനും കൊള്ളാനും അയാള്‍ തയ്യാറാകുന്നു. ശരീരം പാതി തളര്‍ന്ന് കിടക്കുമ്പോഴും പഴയപടി എഴുന്നേല്‍ക്കാനും ലഹരി തേടാനും അതിനു വേണ്ടി തന്ത്രങ്ങള്‍ മെനയാനുമുള്ള വ്യഗ്രത സദാ അയാളിലുണ്ട്. ഈ ഊര്‍ജ്ജമാണ് അയാളെ ജീവിപ്പിക്കുന്നതും മുന്നോട്ടു നയിക്കുന്നതും. ആരോടും ഒരു കടപ്പാടുമില്ലാത്ത മനുഷ്യരുടെ പ്രതിനിധിയാകുന്നു ഇട്ടിച്ചന്‍. അടൂര്‍ ഗോപാലകൃഷ്ണന്റെ വിധേയനിലെ ഭാസ്‌കര പട്ടേലരും രഞ്ജിത്തിന്റെ പാലേരിമാണിക്യം ഒരു പാതിരാക്കൊലപാതകത്തിന്റെ കഥയിലെ മുരിക്കിന്‍കുന്നത്ത് അഹമ്മദ് ഹാജിയുമെല്ലാം ഇട്ടിച്ചനു മുന്‍പേ തനടന്ന അയാളുടെ തന്നെ അപര പ്രതിനിധാനങ്ങളാണ്. 

           സ്വന്തം നേട്ടങ്ങള്‍ക്കും താത്പര്യങ്ങള്‍ക്കുമായി പണവും സ്വാധീനവും ഉപയോഗപ്പെടുത്തുകയും വഞ്ചനയ്ക്കും കൊലയ്ക്കും മടിക്കാത്തയാളുമാണ് ഉയരങ്ങളിലെ ജയരാജന്‍ എന്ന നായക കഥാപാത്രം. തന്റെ വളര്‍ച്ചയ്ക്ക് തടസ്സം നില്‍ക്കുന്ന എന്തിനെയും അപ്പപ്പോള്‍ ഒഴിവാക്കുകയെന്ന ജയരാജന്റെ തന്ത്രം തന്നെയാണ് മുകുന്ദന്‍ ഉണ്ണിയും നടപ്പാക്കുന്നത്. വിജയിയായി മുന്നോട്ടു പോകവേ ഒരിക്കലും തന്റെ തോല്‍വിയെക്കുറിച്ച് ചിന്തിക്കാന്‍ പോലും ജയരാജന് ആകുന്നില്ല. തോല്‍വി അയാളുടെ മരണത്തിനു തുല്യമാണ്. അതിനെ തന്നെയാണ് ഒടുവില്‍ അയാള്‍ സ്വയം വരിക്കുന്നതും.

മലയാളി ജീവിതത്തില്‍ വര്‍ഷങ്ങളായി പ്രതിനായകരൂപം പേറി നിലകൊള്ളുന്ന സുകുമാരക്കുറുപ്പിനെ നായകനാക്കുമ്പോള്‍ ഉത്തമപുരുഷ സങ്കല്‍പ്പങ്ങളെ കൈവെടിയാന്‍ തന്നെയാണ് സിനിമ തയ്യാറാകുന്നത്. ധനസമ്പാദനത്തിനു വേണ്ടി അപരനെ കൊന്നു കടന്നയാളാണ് സുകുമാരക്കുറുപ്പ്. അങ്ങനെയൊരാളെ ഏതു വിധേനയും വെള്ളപൂശാനാകില്ല. മരണം കൊണ്ടാണെങ്കില്‍ പോലും യഥാര്‍ഥ ജീവിതത്തില്‍ ചാക്കോയാണ് നായകസ്ഥാനത്തു നില്‍ക്കേണ്ടത്. കുറുപ്പ് എക്കാലത്തും പ്രതിസ്ഥാനത്തും പ്രതിനായക സ്ഥാനത്തുമായിരിക്കണം. ഈ പ്രതിനായകനിലെ പ്രകടനസാധ്യത കണ്ടെത്താനാണ് ശ്രീനാഥ് രാജേന്ദ്രന്‍ കുറുപ്പ് എന്ന സിനിമയിലൂടെ ശ്രമിക്കുന്നത്. കുറുപ്പിന്റെ ചെയ്തികളെ ന്യായീകരിക്കാനോ നായകസ്ഥാനത്തേക്ക് കുടിയിരുത്താനോ ശ്രമിക്കുന്നില്ല. തെറ്റു ചെയ്യുകയും ഒളിജീവിതം നയിക്കുന്നതിലൂടെ തെറ്റ് ആവര്‍ത്തിക്കുകയും ചെയ്യുന്നയാളാകുന്നു ഇവിടെ നായകന്‍. നിയമത്തിനു പിടികൊടുക്കാതെയുള്ള ഒളിച്ചോട്ടവും അതിനായി സുകുമാരക്കുറുപ്പ് നടത്തിയെന്നു കുപ്രസിദ്ധി നേടിയിട്ടുള്ള വീരസാഹസിക മുഖംമൂടിക്കഥകളും ജനത്തിനിടയില്‍ ഒരു ഹീറോ ഇമേജ് സൃഷ്ടിക്കാന്‍ പോന്നതായിരുന്നു. സിനിമയില്‍ ഉപയോഗപ്പെടുത്തുന്നതും ഇതാണ്. എന്നാലത് അയാളിലെ ഇരുണ്ട വശങ്ങള്‍ വിട്ടുകളഞ്ഞു കൊണ്ടുള്ളതല്ല.

മാതൃഭൂമി ഓണ്‍ലൈന്‍, 2023 ജനുവരി 19, ഷോ റീല്‍ 37

ജയയുടെ ജീവിതത്തിലേക്ക് തന്നെ തിരിച്ചുപോകേണ്ടി വരുന്നവര്‍

അടുത്തിടെ മലയാളി പ്രേക്ഷകര്‍ ആഘോഷമാക്കിയ സിനിമയാണ് വിപിന്‍ ദാസിന്റെ ജയ ജയ ജയ ജയഹേ. പ്രേക്ഷകര്‍  തിയേറ്ററിലേക്ക് പോകാന്‍ മടിച്ചുനില്‍ക്കുകയും ഒടിടി പ്ലാറ്റ്‌ഫോമുകള്‍ സിനിമാ വിപണിയെ നിയന്ത്രിച്ചു പോരുകയും ചെയ്ത വേളയിലാണ് ഈ സിനിമ റിലീസ് ചെയ്യുന്നത്. വന്‍ താരപ്രഭയില്ലെങ്കില്‍ പോലും നല്ല സിനിമകള്‍ ആളുകള്‍ തിരിച്ചറിയുമെന്നും അവര്‍ തിയേറ്ററിലെത്തുമെന്നുമുള്ള സന്ദേശം ഒരിക്കല്‍കൂടി പ്രതിഫലിപ്പിക്കാന്‍ ജയ ജയ ജയ ജയഹേക്കായി. ഈ സിനിമ പ്രമേയവത്കരിച്ചത് തങ്ങളുടെ ജീവിതം തന്നെയാണെന്ന ബോധ്യമായിരിക്കണം കുടുംബപ്രേക്ഷകരെ ഇതിനോട് അടുപ്പിച്ചത്. എന്നാല്‍ സിനിമ കണ്ട ശേഷം ആ ജീവിതത്തിലേക്കു തന്നെയാണ് തങ്ങള്‍ക്ക് തിരിച്ചു പോകേണ്ടതെന്ന യാഥാര്‍ഥ്യം ചിലരെയെങ്കിലും വേട്ടയാടിയിട്ടുണ്ടാകണം. അതല്ല, ഇത്രനേരം സ്‌ക്രീനില്‍ കണ്ടത് മറ്റാരുടെയോ ജീവിതത്തിന്റെ അതിശയോക്തി കലര്‍ത്തിയ സിനിമാറ്റിക് ആവിഷ്‌കാരമാണെന്നും അതുകണ്ട് രസിക്കുക മാത്രമാണ് നമ്മുടെ കര്‍ത്തവ്യമെന്നും ചിന്തിച്ചുവശായാല്‍ പിന്നെ മറ്റൊന്നും പറയുക വയ്യ.

സമൂഹത്തെയോ കുടുംബ വ്യവസ്ഥിതിയെയോ മാറ്റിമറിച്ചില്ലെങ്കില്‍ പോലും കാലത്തെയും നടപ്പു സാമൂഹിക ജീവനത്തെയും ആവിഷ്‌കരിക്കുകയെന്ന ഉത്തമകല നിര്‍വ്വഹിക്കേണ്ട കടമ തന്നെയാണ് ജനപ്രിയ ധാരയിലൂടെ ജയ ജയ ജയ ജയഹേ എന്ന സിനിമ നിര്‍വ്വഹിക്കുന്നത്. അതേസമയം അതീവ രസകരമായ അവതരണ ശൈലിയില്‍ ഈ സിനിമ മുന്നോട്ടുവയ്ക്കുന്ന യാഥാര്‍ഥ്യങ്ങള്‍ ഏതു തരത്തില്‍ സമൂഹത്തെയും കുടുംബജീവിതത്തെയും സ്പര്‍ശിക്കുകയും ചര്‍ച്ചചെയ്യുകയും ചെയ്യുന്നു എന്നത് പ്രധാനമാണ്. അടിക്ക് തിരിച്ചടി എന്നതാണ് സിനിമയിലെ നായിക പ്രയോഗിക്കുന്ന തന്ത്രം. അനുഭവ് സിന്‍ഹയുടെ ഥപ്പടില്‍ (2020) ഒറ്റയടി കൊണ്ട് ഭര്‍ത്താവുമൊത്തുള്ള ജീവിതം വേണ്ടെന്നു വയ്ക്കാന്‍ നായികയ്ക്കാകുന്നു. ജിയോ ബേബിയുടെ ദി ഗ്രേറ്റ് ഇന്ത്യന്‍ കിച്ചണില്‍ (2021) വ്യക്തിസ്വാതന്ത്ര്യമില്ലാത്ത ജീവിതത്തെ നേരത്തെ തിരിച്ചറിഞ്ഞ് അടിതടയ്ക്കു മുമ്പേ ഭര്‍തൃഗൃഹത്തില്‍ നിന്ന് രക്ഷ നേടാന്‍ നായികയ്ക്കാകുന്നുണ്ട്. ജയ ജയ ജയ ജയഹേയിലെ നായികയിലേക്ക് എത്തുമ്പോള്‍ വീട്ടില്‍ വച്ചുവിളമ്പി അലക്കിയൊതുക്കി ദിവസങ്ങള്‍ ചുരുങ്ങിത്തീരുന്നതിനൊപ്പം ഭര്‍ത്താവിന്റെ പ്രഹരം കൂടി സഹിക്കേണ്ടി വരികയാണ്. ഒരു പരിധി കഴിയുമ്പോഴാണ് അവള്‍ തിരിച്ചടിക്കുകയെന്ന തീരുമാനത്തിലേക്കെത്തുന്നത്. ഈ തിരിച്ചടി സിനിമയില്‍ മാത്രം നടക്കാവുന്നതാണെന്ന തരത്തില്‍ ആസ്വദിക്കുമ്പോഴും നേര്‍യാഥാര്‍ഥ്യത്തില്‍ രാജേഷുമാര്‍ക്കും അവരെ വളര്‍ത്തിയ മാതൃ, രക്ഷകര്‍തൃ സമൂഹത്തിനു കൂടിയുള്ളതാണ്. ആണ്‍മക്കള്‍ക്ക് പ്രത്യേക പരിഗണന നല്‍കിക്കൊണ്ട് കേരളീയ സമൂഹത്തില്‍ നിലനില്‍ക്കുന്ന പാരന്റിംഗിന്റെ സൃഷ്ടിയാണ് രാജേഷ്. തൊണ്ണൂറു ശതമാനത്തിലധികം ആണുങ്ങളും രാജേഷിന്റെ വാര്‍പ്പുമാതൃകയാണ്. അതേസമയം അടച്ചിട്ടും വരവരച്ച് അതിനകം നിര്‍ത്തിയും വളര്‍ത്തുന്ന പെണ്‍കുട്ടികളുടെ പ്രതിനിധിയാണ് ജയ. ഈ വീര്‍പ്പുമുട്ടലിന്റെ തുടര്‍ച്ചയാണ് ഭര്‍തൃഗൃഹത്തില്‍ അവള്‍ക്ക് അനുഭവിക്കേണ്ടിവരുന്നതും. രാജേഷോ ജയയോ അല്ല, ഒരു കുറവും കൂടാതെയാണ് നിന്നെ വളര്‍ത്തി വലുതാക്കിയത് എന്ന് അവസരം കിട്ടുമ്പോഴെല്ലാം പറയുന്ന മാതാപിതാക്കളാണ് ഇവിടെ പ്രതിസ്ഥാനത്ത് വരുന്നത്. ഈ വളര്‍ത്തിവലുതാക്കലിന്റെ തുടര്‍ച്ചയാണ് മക്കള്‍ ഭാവിയില്‍ അടിച്ചുപിരിയുന്ന അവസ്ഥയിലേക്ക് എത്തിക്കുന്നത്.

ദാമ്പത്യത്തില്‍ എല്ലാം സഹിച്ചു ജീവിക്കുന്നവരുടെ പ്രതിനിധികളാണ് ഏറിയ പങ്കും. കല്യാണം കഴിച്ചതിന്റെ പേരില്‍, കുട്ടികള്‍ ഉണ്ടായതിന്റെ പേരില്‍, മറ്റുള്ളവരും സമൂഹവും എന്തു വിചാരിക്കും എന്നിവയുടെയെല്ലാം പേരിലാണ് ഈ സഹനം. വേണ്ടവിധം മാനസിക വളര്‍ച്ച നേടിയിട്ടില്ലാത്ത ഒരു സമൂഹമാണ് തലമുറകളായി ഈ സഹജീവനപാത സൃഷ്ടിച്ചത്. ജയ ജയ ജയ ജയഹേയിലേക്ക് എത്തുമ്പോഴും ഇത് ഒരു സിനിമ എന്ന രീതിയില്‍ മാത്രം കണ്ടുരസിച്ച് തിരികെ ജീവിതത്തിലേക്ക് മടങ്ങാന്‍ വിധിക്കപ്പെട്ടവരാണ് സ്ത്രീകള്‍. തുല്യത, ജന്റര്‍ ഇക്വാളിറ്റി, ഫെമിനിസം തുടങ്ങിയ വാക്കുകളെല്ലാം നിശ്ചിത പങ്ക് ആളുകളുടെ പരിധിയില്‍ മാത്രം വരുന്നതും അവരെ മാത്രം ബാധിക്കുന്നതും തങ്ങളില്‍ നിന്ന് നിശ്ചിത ദൂരത്തിലുള്ളതുമായ വിഷയങ്ങളാണെന്ന ബോധ്യമാണ് ഭൂരിഭാഗം സ്ത്രീകളെയും ഭരിച്ചുപോരുന്നത്. ഈയൊരു രീതിയിലാണ് കുടുംബവും സമൂഹവും അവരെ പരിശീലിപ്പിച്ചും പരിപാലിച്ചും പോന്നിട്ടുള്ളതും. സ്വതന്ത്രജീവനം സാധ്യമാകണമെന്ന് ആഗ്രഹിക്കുന്നവര്‍ പോലും ഒട്ടളവ് ഉള്‍വലിയുന്നതും പിന്‍വാങ്ങുന്നതും അവസ്ഥകളോട് പൊരുത്തപ്പെടുന്നതും ശരിയെന്ന് സമൂഹം തെറ്റിദ്ധരിപ്പിച്ചു പോന്നിട്ടുള്ള 'പൊതുസ്വീകാര്യമായ സാമൂഹിക ധാരണകള്‍' മുന്നിട്ടു നില്‍ക്കുന്നതു കാരണമാണ്.

സ്ത്രീകളെ സ്വതന്ത്ര മനുഷ്യരായി കാണാന്‍ ശീലിച്ചിട്ടില്ലാത്ത സമൂഹമാണ് നമ്മുടേത്. പുറംമോടിയില്‍ ഏറെ മുന്നോട്ടു പോകുമ്പോഴും അകമേ അതേ അപരിഷ്‌കൃതത്വം പേറാനാണ് അതു പരിശീലിക്കുന്നത്. അതുകൊണ്ടുതന്നെ എന്താണ് ഒരു സ്ത്രീക്ക് വേണ്ടതെന്ന് കോടതിമുറിയില്‍ ജഡ്ജി ചോദിക്കുമ്പോള്‍ അതിന് ഉത്തരം നല്‍കാന്‍ രാജേഷിനോ അനിക്കോ ആകുന്നില്ല. അവിടെക്കൂടിയ മറ്റുള്ളവര്‍ക്കും (സ്ത്രീകള്‍ക്കുള്‍പ്പെടെ) അതിന് ഉത്തരം നല്‍കാന്‍ ആകുമെന്ന് തോന്നുന്നില്ല. അതുകൊണ്ടു തന്നെയാണ് ജഡ്ജി തന്നെ ഉത്തരം നല്‍കുന്നത്. വിദ്യാഭ്യാസം, ഉപരിപഠനം, തൊഴില്‍, വിവാഹം തുടങ്ങി സ്വന്തം ജീവിതത്തിലെ തെരഞ്ഞെടുപ്പുകളില്‍ സ്ത്രീക്ക് പങ്കില്ലാതെ വരികയും വിവാഹത്തോടെ അവളുടെ ജീവിതം പരിപൂര്‍ണമായി മറ്റൊരാളുടെ അധീനതയില്‍ വരികയും ശിഷ്ടകാലം അയാള്‍ക്ക് വേണ്ടി ജീവിക്കുകയും ചെയ്യേണ്ടി വരുന്നതാണ് നടപ്പു സാമൂഹിക ക്രമം. ഇത്തരമൊരു ജീവിതത്തിനുള്ള പരിശീലനമാണ് പെണ്‍കുട്ടികള്‍ക്ക് ചെറുപ്പം മുതല്‍ രക്ഷിതാക്കള്‍ നല്‍കുന്നത്. വിവാഹശേഷം ഭര്‍തൃഗൃഹമാണ് പെണ്‍കുട്ടിയുടെ വീട് എന്നാണ് ജനപ്രിയ സംസ്‌കാരം പറഞ്ഞുവയ്ക്കുന്നത്. അതുകൊണ്ടുതന്നെ ഭര്‍തൃവീട്ടില്‍ ഒരു പ്രശ്‌നമുണ്ടായാല്‍ പെണ്‍കുട്ടിക്ക് തിരിച്ചുവരാന്‍ മറ്റൊരിടമില്ല. സ്വന്തം വീട്ടില്‍ തിരിച്ചെത്തിയാല്‍ തന്നെ ക്രമേണ അത് അന്യമായ ഒരിടമായി മാറുന്നു. ജയയുടെ ജീവിതത്തിലേക്ക് നോക്കുക, ഡിഗ്രി പൂര്‍ത്തിയാക്കും മുമ്പ് അവളെ വിവാഹം കഴിപ്പിച്ചയക്കുകയാണ്. പഠിക്കണമെന്ന് അവള്‍ പറയുന്നുണ്ട്. അത് അച്ഛനോ അമ്മയോ ചെവിക്കൊള്ളുന്നില്ല. പിന്നീടൊരിക്കല്‍ അമ്മ പറയുന്നത്, 'നിന്റെ ഇഷ്ടത്തിനനുസരിച്ച് പഠിപ്പിച്ചില്ലേ' എന്നാണ്. ഈ പറച്ചിലിനെ നിസ്സഹായമായി കേട്ടിരിക്കാന്‍ മാത്രമേ ജയയ്ക്ക് സാധിക്കൂ. ഡിഗ്രി സര്‍ട്ടിഫിക്കറ്റ് പോലുമില്ലാതെ ഒരു ജോലിക്ക് അപേക്ഷിക്കാന്‍ ജയയ്ക്ക് സാധിക്കുന്നില്ല. മനസ്സു മടുക്കുമ്പോള്‍ ആത്മഹത്യയെക്കുറിച്ച് ജയ ചിന്തിക്കുന്നുണ്ട്. നമ്മുടെ സാമൂഹിക ക്രമത്തില്‍ അത്തരമൊരു അവസരത്തില്‍ മറ്റു വഴികളെല്ലാമടയുമ്പോള്‍ ഒരുപാടു പേര്‍ തെരഞ്ഞെടുക്കുന്ന വഴിയാണത്. എന്നാല്‍ സധൈര്യം ജീവിതത്തിലേക്കു തിരിച്ചുവരുന്ന ജയ സ്വീകരിക്കുന്നത് സ്വയംതൊഴിലിന്റെ വഴിയാണ്. ഈ ആത്മവിശ്വാസമാണ് ജയയ്ക്ക് സ്ത്രീകളോട് പങ്കുവയ്ക്കാനുള്ളതും.

ഒരു വഴക്കിനു ശേഷം ഒന്നു പുറത്തുപോയാലോ തിയേറ്ററില്‍ പോയി സിനിമ കണ്ടാലോ ഹോട്ടലില്‍ പോയി ഭക്ഷണം കഴിച്ചാലോ എല്ലാ പ്രശ്‌നങ്ങളും തീരുമെന്നാണ് അലിഖിത നടപ്പുരീതി. അതുകൊണ്ട് എല്ലാ പ്രശ്‌നങ്ങളും തീരുമോ എന്ന ചോദ്യത്തിനൊന്നും സാമൂഹിക ക്രമം പ്രസക്തി നല്‍കുന്നില്ല. 'ഇപ്പോ സന്തോഷമായില്ലേ' എന്നാണ് അടിക്കു ശേഷം ഹോട്ടലില്‍ ഇരുന്ന് ഭക്ഷണം കഴിക്കുമ്പോള്‍ രാജേഷ് ചോദിക്കുന്നത്. അതിന് ജയയുടെ ഉത്തരം മൗനമാണ്. ഇങ്ങനെ നിരവധി മൗനങ്ങള്‍ക്കു ശേഷമാണ് ജയ പൊട്ടിത്തെറിക്കുന്നത്. 'എന്താ കഴിക്കാന്‍ ഇഷ്ടം' എന്നു ചോദിക്കുമ്പോള്‍ ജയ പറയുന്നത് 'പൊറോട്ടയും ബീഫും' എന്നാണ്. പക്ഷേ എന്തു കഴിക്കണമെന്ന് രാജേഷ് നേരത്തെ തീരുമാനിച്ചു വച്ചിട്ടുണ്ട്. 'ഇടിയപ്പവും ചില്ലി ചിക്കനും.' ഇതാണ് രാജേഷിന് ഇഷ്ടം. അതു തന്നെയാണ് രാജേഷിന്റെ അമ്മയ്ക്കും ചേച്ചിക്കും ഇഷ്ടം. സ്വാഭാവികമായും ജയയും അതു തന്നെ ഇഷ്ടപ്പെടണം. 'ഞങ്ങള്‍ക്ക് ഇതൊക്കെ ശീലമായി' എന്നാണ് അമ്മ പറയുന്നത്. രാജേഷിന്റെയും ജയയുടെയും അമ്മമാരെ മാതൃകാ രക്ഷിതാക്കളായോ നന്മയുടെ പതിവ് പ്രതീകങ്ങളോ ആയി ഈ സിനിമ അവതരിപ്പിക്കുന്നില്ല. മറിച്ച് നമ്മുടെ സമൂഹത്തിലെ പ്രബലമായ രക്ഷകര്‍തൃ സമൂഹത്തിന്റെ പ്രതിനിധികളെന്ന നിലയ്ക്കാണ് അവരുടെ പാത്രസൃഷ്ടി നടത്തിയിരിക്കുന്നത്. ഇത് ഈ സിനിമ മുന്നോട്ടുവയ്ക്കുന്ന ഗുണപരമായ ചിന്തകളിലൊന്നാണ്. ഈ വ്യവസ്ഥാപിത പാരന്റിംഗിന്റെ സൃഷ്ടികളാണ് സ്ത്രീധനവും പുരുഷ, ഭര്‍ത്തൃ മേധാവിത്വവും കുലസ്ത്രീ ഇമേജറിയും സഹനവും ആത്മഹത്യയും വരെ.

ജയയുടേതായി കാണിച്ച ജീവിതത്തിലേക്ക് തന്നെയാണ് ജയ ജയ ജയ ജയഹേ കണ്ട് സ്ത്രീകള്‍ക്ക് തിരികെ പോകേണ്ടതെന്നാണ് ഏറ്റവും വലിയ ദുര്യോഗം. സിനിമ കണ്ട എത്ര സ്ത്രീകള്‍ തെല്ലിട സ്വന്തം ജീവിതത്തിലേക്ക് തിരിഞ്ഞുനോക്കാന്‍ തയ്യാറായിട്ടുണ്ടാകും? എത്ര പേര്‍ തിരുത്തിലിന് തയ്യാറായിട്ടുണ്ടാകും? അതല്ല ഇനിയുമെത്ര പേര്‍, ഇതൊക്കെ വെറും സിനിമയല്ലേ, ജീവിതത്തില്‍ ഇങ്ങനെയൊക്കെയാണോ എന്ന വീട്ടുമ്മറത്തെ പുരുഷച്ചിരിക്ക് പതിവു പ്രതിച്ചിരി അര്‍പ്പിച്ച് അടുക്കളയെച്ചിലിലേക്ക് തിരിച്ചു പോയിട്ടുണ്ടാകും? തീര്‍ച്ചയായും ഏറ്റവുമൊടുക്കത്തെ വാചകത്തിനു തന്നെയാകാം ആള്‍ബലമേറെ. ഇതൊക്കെ വെറും സിനിമയല്ലേ!

അക്ഷരകൈരളി, 2022 ഡിസംബര്‍ 

സേതുമാധവന്റെ രാമപുരം, ബാലന്റെ മേലൂക്കാവ്, മഹേഷിന്റെ പ്രകാശ് സിറ്റി.. മലയാള സിനിമയിലെ കവലകള്‍

'ഏതു വീട്, കയറിക്കിടക്കാന്‍ ഒരിടം പോലും ഇല്ലാത്തവനാണ് ഞാന്‍. ദാ കണ്ടോ, ആ തെരുവിലാണ് സേതുമാധവന് എല്ലാം നഷ്ടപ്പെട്ടത്. സ്വപ്‌നങ്ങളും ജീവിതവും എല്ലാം. എന്നിട്ടൊരു കിരീടവും വച്ചു തന്നു.' ജയില്‍ശിക്ഷ കഴിഞ്ഞ് തിരിച്ചെത്തിയ തന്റെ ജീവിതം ഇനി ഒരിക്കലും പഴയതു പോലെയാകില്ലെന്ന് മറ്റാരേക്കാളും നന്നായി സേതുമാധവന്‍ തിരിച്ചറിയുന്നുണ്ട്. നഷ്ടബോധത്തിന്റെ ഈ തിരിച്ചറിവിലാണ് ഉറ്റസുഹൃത്തായ കേശുവിനോട് സേതു ഇങ്ങനെ പറയുന്നത്. തനിക്ക് എല്ലാം നഷ്ടമായത് ഇവിടെ വച്ചാണെന്ന് ജനാലയിലൂടെ രാമപുരം അങ്ങാടിയിലേക്ക് നിസ്സഹായനായി നോക്കിക്കൊണ്ടാണ് സേതു പറയുന്നത്. മലയാള സിനിമയിലെ എക്കാലത്തെയും മികച്ച പാത്രസൃഷ്ടികളിലൊന്നായ സേതുമാധവനെ മെനഞ്ഞെടുത്ത കിരീടത്തിലെയും അതിന്റെ തുടര്‍ച്ചയായ ചെങ്കോലിലെയും പ്രമേയ പശ്ചാത്തലത്തില്‍ സുപ്രധാന ഇടമാണ് രാമപുരം അങ്ങാടി. സേതുമാധവന്റെ വളര്‍ച്ചയും സ്വപ്‌നങ്ങളും ഈ തെരുവ് കാണുന്നുണ്ട്. സേതുവിന്റെ സൗഹൃദത്തിനും പ്രണയത്തിനും സാക്ഷിയാണ് രാമപുരം കവല. സേതുവിനെപ്പോലെ മറ്റു കഥാപാത്രങ്ങള്‍ കണ്ടുമുട്ടുന്നതും ജീവിത വ്യവഹാരം നിവര്‍ത്തിക്കുന്നതും ഈ തെരുവില്‍ വച്ചു തന്നെയാണ്. ഒടുവില്‍ ഒറ്റനിമിഷത്തെ സ്വയംമറന്നുപോകലില്‍ കണ്ട സ്വപ്‌നങ്ങളെല്ലാം വൃഥാവിലാക്കിക്കൊണ്ട് സേതുവിന് സകലതും നഷ്ടമാകുന്നതും ഈ തെരുവില്‍ വച്ചു തന്നെ. 

ഒരു ദേശത്തിന്റെ നിര്‍ണായകമായ ഭൂമികയാണ് അതിലെ കവല/അങ്ങാടി. അതതു ദേശത്തെ ജനത ദൈനംദിന ജീവിതത്തില്‍ തങ്ങളുടെ ആവശ്യങ്ങള്‍ നിറവേറ്റുന്നതിന് എത്തിച്ചേരുന്ന ഇടമാണ് ആ ദേശത്തിന്റെ ജീവനാഡിയായ അങ്ങാടി. ഇവിടെ നിന്നായിരിക്കും അവര്‍ നിത്യവൃത്തിക്കായുള്ള ഉപാധികള്‍ കണ്ടെത്തുന്നത്. തങ്ങള്‍ കാര്‍ഷികവൃത്തിയിലൂടെയോ മറ്റു തൊഴിലുകള്‍ വഴിയോ ഉത്പാദിപ്പിച്ച സാധനങ്ങള്‍ വില്‍ക്കുന്നതും ആവശ്യമുള്ള സാധനങ്ങള്‍ വാങ്ങിക്കുന്നതും മറ്റു ക്രയവിക്രയങ്ങള്‍ നടത്തുന്നതും ഈ അങ്ങാടിയില്‍ വച്ചായിരിക്കും. അവശ്യസാധനങ്ങള്‍ വില്‍ക്കുകയും വാങ്ങുകയും ചെയ്യുന്നതിലുപരി ദേശവാസികള്‍ തമ്മിലുള്ള മാനസികമായ കൊടുക്കല്‍വാങ്ങലുകള്‍ക്ക് നിലമൊരുക്കുന്നതും ഇത്തരം കവലകളാണ്. അവിടത്തെ ചായക്കട, പലചരക്കുകട, റേഷന്‍കട, ബാര്‍ബര്‍ ഷോപ്പ് തുടങ്ങിയവയെല്ലാം ദേശവാസികളുടെയാകെ ആവശ്യങ്ങള്‍ നിവര്‍ത്തിക്കുന്നവയും അവര്‍ കണ്ടുമുട്ടുകയും ചെയ്യുന്ന ഇടമാണ്. ഇക്കൂട്ടത്തില്‍ ചായക്കടകള്‍ക്ക് സവിശേഷമായ പ്രാധാന്യമാണുള്ളത്. മറ്റുള്ളവയില്‍ കൂടിയിരിപ്പിന് വലിയ സാധ്യതയും സാവകാശവും ലഭിക്കുന്നില്ലെന്നിരിക്കേ ചായക്കടകള്‍ ദേശത്തെ വിശേഷങ്ങളെല്ലാം സമാഹരിക്കുകയും വിതരണം ചെയ്യുകയും ചെയ്യുന്ന പൊതു ഇടമാണ്. അവിടെയാണ് ചര്‍ച്ചകള്‍ രൂപംകൊള്ളുകയും പോഷിക്കപ്പെടുകയും വിതരണം ചെയ്യുകയും ചെയ്യുന്നത്. ഇക്കാരണത്താല്‍ തന്നെ ദേശത്തെ കവലയിലെ അതീവപ്രാധാന്യമുള്ള ഇടമായി ചായക്കട മാറുന്നു. ഒരു ദേശത്തിന്റെ കഥ പറയുന്ന സിനിമകളില്‍ ഇത്തരം കവലകള്‍ നിര്‍ണായക സാന്നിധ്യമായി മാറുന്നത് സാധാരണമാണ്. ദേശവാസികളുടെ വ്യവഹാര നിര്‍വഹണത്തിനും സൗഹൃദത്തിനും മാത്രമല്ല, വ്യക്തിയുടെയോ ദേശത്തിന്റെയോ കാര്യത്തില്‍ നിര്‍ണായകമായി മാറിയേക്കാവുന്ന സംഭവവികാസങ്ങള്‍ക്കും ഈ കവലകള്‍ സാക്ഷ്യം വഹിക്കുന്ന സന്ദര്‍ഭങ്ങളുമുണ്ട്. ഇത്തരത്തിലൊരു സാന്നിധ്യമാണ് സേതുമാധവന്റെ ജീവിതത്തെ മാറ്റിമറിച്ച രാമപുരം അങ്ങാടിയുടേത്. ഈ മാതൃകയില്‍ സിനിമയില്‍ കഥാപാത്രങ്ങളെപ്പോലെ കഥാഭൂമിക നിര്‍ണായക സാന്നിധ്യമായി മാറുന്ന നിരവധിയായ സന്ദര്‍ഭങ്ങളുണ്ട്. ഈ സവിശേഷ പ്രാധാന്യം കൊണ്ടുതന്നെ സിനിമയിലെ പ്രധാന കഥാപാത്രങ്ങളെപ്പോലെ പ്രേക്ഷകര്‍ ഈ ഭൂമികയും ഓര്‍ത്തുവച്ചേക്കും. കഥാപാത്രങ്ങള്‍ കണ്ടുമുട്ടുന്നതും ആശയവിനിമയം നടത്തുന്നതും കഥാവികസനം സാധ്യമാകുന്നതും നിര്‍ണായക ഗതിവിഗതികള്‍ പലതും സംഭവിക്കുന്നതും ഈ കവലയില്‍ വച്ചായിരിക്കും.

സത്യന്‍ അന്തിക്കാടിന്റെ മിക്ക സിനിമകളിലും ഇത്തരം ഒരു കവലയുടെ/അങ്ങാടിയുടെ സാന്നിധ്യമുണ്ടെന്നു കാണാനാകും. ദേശത്തെ പ്രധാനികളുടെ സുഹൃദ്‌സമ്മേളന ഇടമായിരിക്കും ഈ അങ്ങാടി. അബൂബക്കറിന്റെ ചായക്കടയിലാണ് തട്ടാന്‍ ഭാസ്‌കരനും പണിക്കരും വെളിച്ചപ്പാടും പാപ്പിയും മാധവന്‍ നായരും ഹാജ്യാരുമെല്ലാം കണ്ടുമുട്ടുന്നതും നാട്ടുവിശേഷങ്ങള്‍ പങ്കിടുന്നതും. പാര്‍വതിയുടെ നൃത്താലയവും ഈ ചായക്കട കെട്ടിടത്തില്‍ തന്നെ. ഗോളാന്തരവാര്‍ത്തയില്‍ രമേശന്‍ നായരുടെ പലചരക്കുകട
 കേന്ദ്രീകരിച്ചാണ് അങ്ങാടി വര്‍ത്തമാനത്തിന്റെ മുന്നോട്ടുപോക്ക്. സന്ദേശത്തില്‍ പ്രഭാകരന്റെയും പ്രകാശന്റെയും പാര്‍ട്ടി ഓഫീസുകള്‍ക്കും സംഘടനാ പ്രവര്‍ത്തനങ്ങള്‍ക്കും വിളനിലമാകുന്നത് സമാന മാതൃകയിലുള്ള ഒരു ഇടത്തരം അങ്ങാടിയാണ്. രണ്ടായിരത്തിനു ശേഷം ഇമ്മട്ടിലുള്ള ഗ്രാമീണ കവലകള്‍ കേരള ഭൂപ്രകൃതിയില്‍ നിന്നും സിനിമയില്‍ നിന്നും അപ്രത്യക്ഷമായിക്കൊണ്ടിരുന്നപ്പോഴും ഈ കാലയളവില്‍ പുറത്തിറങ്ങിയ നരേന്ദ്രന്‍ മകന്‍ ജയകാന്തന്‍ വക (2001), മനസ്സിനക്കരെ (2003) തുടങ്ങിയ സത്യന്‍ അന്തിക്കാട് സിനിമകളിലെല്ലാം കഥാപശ്ചാത്തലത്തിലെ നിര്‍ണായക സാന്നിധ്യമാകുന്നത് ഇത്തരം കവലകളാണ്. ഗ്രാമത്തനിമ എളുപ്പത്തില്‍ വിട്ടുകളയാന്‍ കൂട്ടാക്കാത്ത മനസ്സ് കൂടി ഇൗ വീണ്ടെടുക്കലിനു പിറകിലുണ്ടെന്നു കാണാം.

മലയാള സിനിമ സ്റ്റുഡിയോ ഫ്‌ളോര്‍ വിട്ട് പൂര്‍ണമായും തെരുവിലേക്കിറങ്ങിയ 1980 കളിലാണ് ഗ്രാമ ദേശങ്ങളും കവലകളും ഫ്രെയിമുകളില്‍ സജീവ സാന്നിധ്യമറിയിക്കുന്നത്. അക്കാലത്തെ സിനിമകളിലെ പേരുകളില്‍ പോലും ഇവ്വണ്ണം ദേശത്തിന്റെയും തെരുവുകളുടെയും സൂചനകളുണ്ട്. കമലിന്റെ പെരുവണ്ണാപുരത്തെ വിശേഷങ്ങള്‍, പ്രാദേശിക വാര്‍ത്തകള്‍ എന്നീ സിനിമകളില്‍ പെരുവണ്ണാപുരം, ചിറ്റാരിമംഗലം എന്നീ പേരുകളിലുള്ള അങ്ങാടികളാണ് കഥാപാത്രങ്ങളെപ്പോലെ സവിശേഷമായി അടയാളപ്പെടുത്തപ്പെടുന്നത്. ചിറ്റാരിമംഗലം ലക്ഷ്മി ടാക്കീസും അനുബന്ധ വ്യവഹാര സ്ഥാപനങ്ങളും ഗ്രാമത്തിന്റെ മുഖവും കൂടിയിരിപ്പിടവുമാകുമ്പോള്‍ പെരുവണ്ണാപുരം അങ്ങാടി ദേശത്തെ സര്‍വ്വസാധാരണീയരും രസികത്തം നിറഞ്ഞവരുമായ മനുഷ്യരുടെ കണ്ടുമുട്ടലിന് ഇരിപ്പിടമൊരുക്കുന്നു. മുത്താരംകുന്ന് ദേശത്ത് പുതുതായി എത്തുന്ന പോസ്റ്റ്മാന്റെ ജീവിതവുമായി വിളക്കിച്ചേര്‍ത്ത് മുന്നോട്ടുപോകുന്ന സിബിമലയിലിന്റെ മുത്താരംകുന്ന് പിഒയില്‍ തെരുവ് നിര്‍ണായക സാന്നിധ്യമാകുന്നുണ്ട്. സാജന്റെ ആമിനാ ടെയ്‌ലേഴ്‌സില്‍ കുന്നത്തങ്ങാടി എന്ന കവലയ്ക്ക് പ്രധാന കഥാപാത്രത്തോളം തന്നെ പ്രാധാന്യം കൈവരുന്നുണ്ട്. അബ്ദുള്‍ അസീസിന്റെയും വാസുവിന്റെയും തയ്യല്‍ക്കടയും നായരുടെ ചായക്കടയും മഞ്ചേരി മജീദും മലപ്പുറം മൊയ്തീനും അഭ്യാസമുറകള്‍ കാണിക്കുന്നതും വെല്ലുവിളി നടത്തുന്നതും അടിതടകള്‍ നടക്കുന്നതും കുന്നത്തങ്ങാടിയില്‍ വച്ചാണ്. 1980 കളുടെ തുടര്‍ച്ചയായി തൊണ്ണൂറുകളിലെ മിക്ക സിനിമകളിലും ഇത്തരമൊരു ഗ്രാമീണകവലയുടെ ചിത്രണമുള്ളതായി കാണാം.  ഡോ.പശുപതി, തലയണമന്ത്രം, നെറ്റിപ്പട്ടം, ഭാഗ്യവാന്‍, ആധാരം, വളയം, ഈ പുഴയും കടന്ന്, ചുരം, ചിന്താവിഷ്ടയായ ശ്യാമള തുടങ്ങിയ സിനിമകളിലെല്ലാം കവലകള്‍ കഥാഗതിയില്‍ സവിശേഷ സാന്നിധ്യമാകുന്നുണ്ട്. ഇതിന്റെ തുടര്‍ പതിറ്റാണ്ടിലെ ആദ്യവര്‍ഷങ്ങളിലെത്തുന്ന തിളക്കം, ബാലേട്ടന്‍ തുടങ്ങിയ സിനിമകളിലെ കവലകളും ഇതിനോടു ചേര്‍ത്തുവായിക്കാവുന്നതാണ്.

വേലായുധന്‍ എന്ന സാധാരണക്കാരനും എന്നാല്‍ അതിമാനുഷത്വം പേറുന്നവനുമായ മനുഷ്യന്റെ പ്രഖ്യാപനങ്ങളും പ്രവൃത്തികളുമെല്ലാം മുള്ളന്‍കൊല്ലി കവലയെ കേന്ദ്രീകരിച്ചാണ്. ദേശത്തിന്റെ പേരുകൊണ്ടു തന്നെ അറിയപ്പെടുന്ന വേലായുധന്‍ തന്റെ നിയമാവലികള്‍ നാട്ടുകാര്‍ മുമ്പാകെ പ്രഖ്യാപിക്കുന്നതും തീര്‍പ്പാക്കുന്നതും മുള്ളന്‍കൊല്ലി കവലയില്‍ വച്ചാണ്. ചീഞ്ഞ മീന്‍ മുള്ളന്‍കൊല്ലിയില്‍ വില്‍ക്കാന്‍ പാടില്ലെന്ന് പറയുന്ന വേലായുധന്‍ അത് കുഴികുത്തി മൂടാന്‍ ആവശ്യപ്പെടുന്നത് കവലയില്‍വച്ചാണ്. നല്ലനടപ്പിനായുള്ള വേലായുധന്റെ പല തീരുമാനങ്ങളും നാട്ടുകാര്‍ കൈയടിച്ച് പാസ്സാക്കുന്നതും മുള്ളന്‍കൊല്ലി കവലയില്‍ വച്ചു തന്നെ. രാജഭരണത്തിന്റെ കീഴ്വഴക്കങ്ങളും അലിഖിത നിയമാവലികളും പേറുന്ന ഒരു സ്വഭാവം ഇതിനു കൈവരുന്നുണ്ട്. പക്ഷേ തങ്ങളുടെ കവലയില്‍ വച്ച് നടക്കുന്ന നീതിനിര്‍വഹണത്തില്‍ സംതൃപ്തരും വേലായുധനില്‍ ദേശത്തിന്റെ രക്ഷകനെ തന്നെ കാണുന്നവരുമാണ് മുള്ളന്‍കൊല്ലിക്കാര്‍. 

വേലായുധനുമായും മുള്ളന്‍കൊല്ലിയുമായും സമാനത പുലര്‍ത്തുന്നില്ലെങ്കിലും പൗരുഷത്തിലും വീര്യത്തിലും ഒട്ടും പിറകിലല്ലാത്ത ആടുതോമയും (സ്ഫടികം) കുഞ്ഞച്ചനും (കോട്ടയം കുഞ്ഞച്ചന്‍) ചാണ്ടിയു(ഒരു മറവത്തൂര്‍ കനവ്)മെല്ലാം തെരുവുകളെയും ജനക്കൂട്ടത്തെയും കൈയിലെടുക്കുന്നതില്‍ പിറകിലല്ല. ഇവരുടെയെല്ലാം വീരസ്യം പുറത്തുവരുന്നതും കവലകളില്‍ വച്ചുതന്നെ. പല സിനിമകളിലും പ്രതിനായക വെല്ലുവിളികള്‍ നടക്കുന്നതും നായക-പ്രതിനായക പോരാട്ടങ്ങള്‍ക്ക് കളമൊരുക്കുന്നതും നായകന്‍ അന്തിമവിജയം നേടുന്നതും കഥയിലെ നിര്‍ണായക ഭൂമികയായ കവലയില്‍ വച്ചായിരിക്കുമെന്നത് സിനിമ നിലനിര്‍ത്തിപ്പോരുന്ന കീഴ്വഴക്കമാണ്.

എം മോഹനന്റെ കഥ പറയുമ്പോള്‍ പഴയ സത്യന്‍ അന്തിക്കാട് സിനിമകളുടെ കഥാസൂചനകളും ഗ്രാമീണ പശ്ചാത്തലവും അവലംബിക്കുന്ന സിനിമയാണ്. മേലൂക്കാവ് എന്ന മലയോര ഗ്രാമവും കവലയും ആണ് ഇവിടെ കഥാഗതിയില്‍ നിര്‍ണായക സാന്നിധ്യമാകുന്നത്. ബാലന്റെയും സരസന്റെയും ബാര്‍ബര്‍ ഷോപ്പും ദേവസ്യയുടെ ചായക്കടയുമെല്ലാം മേലൂക്കാവ് കവലയിലാണ്. ബാലന്റെ തൊഴിലിനും വിട്ടുപോകാത്ത ദാരിദ്ര്യത്തിനും ഒരിടയ്ക്ക് സ്വപ്‌നതാരം മേലൂക്കാവിന്റെ മണ്ണില്‍ വന്നിറങ്ങുമ്പോള്‍ ബാലന്റെ ജീവിതത്തില്‍ വന്നു ഭവിക്കുന്ന അവിചാരിത സംഭവങ്ങള്‍ക്കും മേലൂക്കാവ് കവലയും അവിടത്തെ മനുഷ്യരും സാക്ഷികളാകുന്നു.

ഇടക്കാലത്തിനു ശേഷം ഗ്രാമങ്ങള്‍ വീണ്ടും സിനിമയിലേക്ക് തിരിച്ചുവരാന്‍ തുടങ്ങിയപ്പോള്‍ ആര്‍ട്‌സ് ആന്റ് സ്‌പോര്‍ട്‌സ് ക്ലബ്ബുകളും ചായക്കടയും ഇടത്തരം കച്ചവട സ്ഥാപനങ്ങളുമുള്ള കവലകള്‍ വീണ്ടും സക്രീനിലെ സാന്നിധ്യങ്ങളായി. ജിബു ജേക്കബ്ബിന്റെ വെള്ളിമൂങ്ങ ഇത്തരത്തില്‍ ഒരു മലയോര ഗ്രാമ കവലയ്ക്കും സാധാരണീയ ജീവിതത്തിനും ചിരപ്രതിഷ്ഠ നല്‍കിയ സിനിമയാണ്. ഒരു ഗ്രാമീണ ദേശത്തെ മനുഷ്യര്‍ എല്ലാ ദിവസവും പരസ്പരം കാണുന്നവരും തമ്മില്‍ അറിയുന്നവരുമാണ്. അവര്‍ക്കിടയിലെ ദൈനംദിന സംസാരങ്ങളുടെയും ചര്‍ച്ചകളുടെയും വിഷയങ്ങള്‍ പ്രതീക്ഷിതമായ കാര്യങ്ങള്‍ തന്നെയായിരിക്കും. വ്യത്യസ്ത കക്ഷിരാഷ്ട്രീയത്തില്‍ ഉള്‍പ്പെടുന്നവരാണെങ്കില്‍ പോലും അവരുടെ ചര്‍ച്ചായിടം ആ കവലയിലെ ഒരു ചായക്കടയോ ബസ്‌റ്റോപ്പോ ഒക്കെയായിരിക്കും. ഈയൊരു ഗ്രാമീണ നിഷ്‌കളങ്ക സൗഹൃദം വെള്ളിമൂങ്ങയിലെ കഥാപാത്രങ്ങളിലുടനീളം കാണാനാകും. ചട്ടമ്പിനാട്, മലര്‍വാടി ആര്‍ട്‌സ് ക്ലബ്ബ്, മേരിക്കുണ്ടൊരു കുഞ്ഞാട്, കുഞ്ഞനനന്തന്റെ കട, ആമേന്‍, കോഹിനൂര്‍, രക്ഷാധികാരി ബൈജു, 1983, കവി ഉദ്ദേശിച്ചത്, ഒരു വടക്കന്‍ സെല്‍ഫി, തീവണ്ടി, ഒടിയന്‍ തുടങ്ങി മുന്‍ പതിറ്റാണ്ടിലെ പല സിനിമകളിലും ഗ്രാമദേശത്തെ കവലകള്‍ നിര്‍ണായക സാന്നിധ്യമാകുന്നുണ്ട്. ഇവയിലെല്ലാം പഴയകാല കവലകള്‍ പുന:സൃഷ്ടിക്കുന്നതിനു പകരം പുതിയ കാലത്തെ സൗകര്യങ്ങളും മാറ്റങ്ങളും ഉള്‍ക്കൊള്ളുന്ന അങ്ങാടികളെയാണ് ചിത്രീകരിക്കുന്നതെന്നത് സത്യസന്ധത നല്‍കുന്നു. 1983 പോലെ വ്യത്യസ്ത കാലങ്ങള്‍ പരാമര്‍ശവിധേയമാകുന്ന ഒരു സിനിമയില്‍ പല കാലങ്ങളില്‍ കവലകളിലും കച്ചവട സ്ഥാപനങ്ങളിലും വരുന്ന മാറ്റം ആവിഷ്‌കരിച്ചിരിക്കുന്നത് ശ്രദ്ധേയമാണ്. വര്‍ഷം പലതു കഴിയുമ്പോഴും ചില മനുഷ്യരും അവരുടെ ഉടമസ്ഥതയിലുള്ള സ്ഥാപനങ്ങളും അതേപടിയോ തീരെച്ചെറിയ മാറ്റങ്ങളെ മാത്രം ഉള്‍ക്കൊണ്ടുകൊണ്ടോ നിലനില്‍ക്കുന്നതും 1983യിലെ കവലയില്‍ കാണാം. സ്‌കൂള്‍ കാലം തൊട്ടുള്ള കൂട്ടുകാര്‍ മുതിരുമ്പോഴും അവര്‍ക്ക് കുട്ടികളാകുമ്പോഴും അതേ കവലയില്‍ വച്ച് കാണുന്നതും സൗഹൃദം പുതുക്കുന്നതും ഒരു ദേശത്തെ നേര്‍ക്കാഴ്ചകളുടെ സത്യസന്ധമായ ആവിഷ്‌കാരമായി മാറുന്നു.

ബേസില്‍ ജോസഫിന്റെ കുഞ്ഞിരാമായണത്തിലെ ദേശം, ഗോദയിലെ കണ്ണാടിക്കല്‍, മിന്നല്‍ മുരളിയിലെ കുറുക്കന്‍മൂല എന്നീ കവലകള്‍ കഥാഗതിയിലെ നിര്‍ണായക സംഭവങ്ങള്‍ക്ക് സാക്ഷ്യമാകുന്നവയും പരസ്പരബന്ധിതവുമാണ്. ഈ മൂന്നു ദേശങ്ങളും തമ്മില്‍ വലിയ അകലമില്ലെന്ന തരത്തിലാണ് ഈ സിനിമകളില്‍ അവതരിപ്പിച്ചിരിക്കുന്നത്. ഓരോ സിനിമയിലും മറുസിനിമയിലെ ദേശത്തേക്കുള്ള സൂചന നല്‍കുന്നുമുണ്ട്. ദേശം എന്ന കവലയെ കേന്ദ്രീകരിച്ചാണ് കുഞ്ഞിരാമന്റെയും കൂട്ടുകാരുടെയും ദിവസങ്ങള്‍ മുന്നോട്ടുപോകുന്നത്. മുരളിയുടെയും ഷിബുവിന്റെയും സാധാരണ ദിവസജീവിതത്തിനും പിന്നീടുള്ള അസാധാരണ പ്രവൃത്തികള്‍ക്കും സാക്ഷ്യം വഹിക്കുന്നത് കുറുക്കന്‍മൂല അങ്ങാടിയാണ്.

ദിലീഷ് പോത്തന്റെ മഹേഷിന്റെ പ്രതികാരത്തിലെ പ്രകാശ് സിറ്റി കാണികളിലേക്ക് ഏറ്റവുമെളുപ്പത്തില്‍ കയറിക്കൂടുന്ന ഒരു കവലയാണ്. ഇടുക്കിയിലെ ഒരു സിറ്റി (കവല) മാതൃകയെ പ്രകാശ് സിറ്റി എന്ന പേരില്‍ അടിമുടി പറിച്ചുനടുകയായിരുന്നു ഈ സിനിമ. സിനിമയിലെ കേന്ദ്രകഥാപാത്രമായ മഹേഷിന്റെ ഭാവന സ്റ്റുഡിയോ പ്രകാശ് സിറ്റിയിലാണുള്ളത്. ഭാവനാ സ്റ്റുഡിയോയോട് ചേര്‍ന്നാണ് ബേബിച്ചേട്ടന്റെ ഫ്‌ളെക്‌സ് പ്രിന്റിംഗ് ഷോപ്പ് ഉള്ളത്. സിനിമയില്‍ സവിശേഷ പ്രാധാന്യമുള്ള ചെരിപ്പുകട, ബസ് സ്റ്റോപ്പ് തുടങ്ങിയവയെല്ലാം ഈ കവലയിലാണ്. മഹേഷിന്റെ വിടിനേക്കാളധികം സിനിമയില്‍ സാന്നിധ്യമാകുന്നത് പ്രകാശ് സിറ്റിയാണ്. മഹേഷിന്റെ പ്രതികാരത്തിലേക്ക് വഴിവയ്ക്കുന്ന നിര്‍ണായകമായ അടിപിടി നടക്കുന്നതും മഹേഷും ജിന്‍സിയും തമ്മില്‍ കാണുന്നതുമെല്ലാം പ്രകാശ് സിറ്റിയില്‍ വച്ചാണ്. അന്‍വര്‍ സാദിക്കിന്റെ മനോഹരത്തില്‍ ചിറ്റിലഞ്ചേരി എന്ന തനി പാലക്കാടന്‍ കവലയെയാണ് പുനരാവിഷ്‌കരിക്കുന്നത്. മനോഹരന്റെയും വര്‍ഗീസേട്ടന്റെയുമെല്ലാം ഉപജീവനത്തിനും ജീവിതത്തിലെ നിര്‍ണായക സംഭവങ്ങള്‍ക്കും ചിറ്റിലഞ്ചേരി അങ്ങാടി സാക്ഷിയാകുന്നു.

കാഞ്ഞാറിലെ കൈപ്പ കവല ജീത്തു ജോസഫിന്റെ ദൃശ്യത്തിന്റെ ജനപ്രീതിക്കു ശേഷം ദൃശ്യം കവല തന്നെയായി മാറുകയായിരുന്നു. കഥാഭൂമികയായ രാജാക്കാട് കവലയും പോലീസ് സ്റ്റേഷനും ജോര്‍ജ്കുട്ടിയുടെ കേബിള്‍ ടിവി ഓഫീസും സുലൈമാന്റെ ചായക്കടയും അനുബന്ധ കെട്ടിടങ്ങളും ഒക്കെയുള്ള തെരുവാണ് സൃഷ്ടിക്കപ്പെടുന്നത്. ദൃശ്യത്തില്‍ ജോര്‍ജ്കുട്ടിയുടെ വീടിനെപ്പോലെ തന്നെ പ്രാധാന്യം കൈവരുന്നുണ്ട് ഈ കവലയ്ക്കും.

മാതൃഭൂമി ഓണ്‍ലൈന്‍, 2022 ഡിസംബര്‍ 31, ഷോ റീല്‍ 36

കമലദളം, വാനപ്രസ്ഥം, കളിയാട്ടം.. കേരളീയ കലകള്‍ക്ക് തിരക്കാഴ്ച പകര്‍ന്ന സിനിമകള്‍

കൂത്ത് കൂറയിട്ട വള്ളുവനാടന്‍ ഗ്രാമക്കാവിലെ രാത്രിനേരം. രണ്ടു നൂറ്റാണ്ട് പിറകിലാണ് കാലം. കൂത്തുമാടത്തില്‍ വലിച്ചുകെട്ടിയ വെളുത്ത തിരശ്ശീലയ്ക്കു പിറകില്‍ കത്തിച്ചുവച്ച വിളക്കുകളില്‍നിന്നുള്ള വെളിച്ചത്തില്‍ പാവകളുടെ നിഴല്‍ചലനത്തിലൂടെ രാമായണ കഥ പുരോഗമിക്കുന്നു. ഘോരമായ രാമരാവണയുദ്ധം നടക്കുകയാണ്. കണ്‍മുന്നില്‍ ദൃശ്യമാകുന്ന യുദ്ധത്തില്‍ സര്‍വ്വം മറന്നു വിലയിക്കുന്ന കാണികള്‍. ദൃശ്യകലയായ സിനിമയുടെ ആദിരൂപമെന്ന നിലയ്ക്ക് അടയാളപ്പെടുത്തിയിട്ടുള്ള തോല്‍പ്പാവക്കൂത്ത് ആണ് കാണികളുടെ സജീവശ്രദ്ധയെ ഇത്തരത്തില്‍ ആകര്‍ഷിച്ച ആ കലാരൂപം. മലയാളികള്‍ക്ക് സിനിമയെന്ന കലാരൂപത്തോടുള്ള ആദിമബന്ധം തോല്‍പ്പാവക്കൂത്തില്‍ തുടങ്ങുന്നു. വെളിച്ചത്തിന്റെയും തിരശ്ശീലയുടെയും മേളത്തിന്റെയും സാധ്യത ഉപയോഗിച്ച് കഥാവതരണം നടത്തുന്ന ഈ കലാരൂപത്തിന്റേതിന് സമാനമായി സാങ്കേതിക വിദ്യയുടെ സഹായത്തോടെ പരിഷ്‌കരിച്ച ആധുനിക രൂപം കൈവന്നേക്കാമെന്നുള്ള ചിന്തയ്ക്ക് അന്ന് പ്രസക്തിയുണ്ടായിരുന്നില്ല. 

തോല്‍പ്പാവക്കൂത്തിനു പുറമേ കഥകളിയും കൂടിയാട്ടവും പോലുള്ള ക്ഷേത്രകലകളിലെ പല അംശങ്ങളും സിനിമയെ സ്വാധീനിച്ചിട്ടുണ്ടെന്നു വേണം അനുമാനിക്കാന്‍. കലകളില്‍ പ്രായേണ ആധുനികമായ സിനിമയാണ് ഏറ്റവും ജനപ്രിയമെന്ന രീതിയില്‍ പില്‍ക്കാലത്ത് അടയാളപ്പെടുത്തപ്പെട്ടത്. മേല്‍ പരാമര്‍ശിച്ച മറ്റ് കലകള്‍ കാണികളുടെ അഭിരുചിക്കനുസരിച്ച് കാലക്രമേണ പിറകോട്ടടിക്കപ്പെട്ടപ്പോള്‍ സിനിമ ഇവയ്‌ക്കെല്ലാം മുന്നില്‍ എഴുന്നുനിന്നു. ഈ കലകളെക്കൂടി പരിഗണിച്ചുകൊണ്ടാണ് പില്‍ക്കാല മലയാള സിനിമ അതിന്റെ മുന്നേറ്റം സാധ്യമാക്കിയത്. കേരളീയ ജീവിതത്തിന്റെ ഭാഗമായ ഉത്സവങ്ങളെയും കലകളെയും സിനിമ അതിന്റെ ഭാഗമാക്കി. ഉത്സവാന്തരീക്ഷവും കലകളും മലയാള സിനിമയെ കൂടുതല്‍ കേരളീയവും പ്രാദേശികവുമാക്കുന്നതിനു സഹായിച്ചുവെന്നു വേണം പറയാന്‍. കലകളും അവയെ ഉപാസിക്കുന്ന കലാകാരന്മാരുടെ ജീവിതവും ഇടകലര്‍ത്തി അവതരിപ്പിക്കുന്ന പ്രമേയസാധ്യത പരീക്ഷിക്കാനാണ് മലയാള സിനിമ കൂടുതലും ശ്രമിച്ചിട്ടുള്ളത്. സിനിമാറ്റിക് ഘടന നഷ്ടപ്പെടുത്താതെയുള്ള ഈ ആവിഷ്‌കാരത്തില്‍ കലയുടെ ആത്മാംശം കൂടി കൊണ്ടുവരുന്നത് വെല്ലുവിളിയാണ്. ഒട്ടധികമില്ലെങ്കിലും ഇത്തരം പരിശ്രമങ്ങള്‍ക്ക് മുതിരാന്‍ വ്യത്യസ്ത കാലങ്ങളിലെ ചലച്ചിത്രകാരന്മാര്‍ തയ്യാറായിട്ടുണ്ട്.

കേരള കലാമണ്ഡലത്തിന്റെ പ്രതിനിധാനമെന്നോണം അവതരിപ്പിച്ച കേരള കലാമന്ദിരവും അവിടത്തെ കലോപാസകരായ മനുഷ്യരും പശ്ചാത്തലമായ കമലദളമാണ് (1992) ശാസ്ത്രീയകലയും സിനിമയും രണ്ടല്ലാത്ത വിധം അവതരിപ്പിച്ച് ജനപ്രീതി നേടുന്നതില്‍ ഈ ധാരയില്‍ ഏറ്റവുമധികം വിജയിച്ചത്. നന്ദഗോപന്‍ എന്ന നൃത്താധ്യാപകന്റെ ജീവിതം ഇതിവൃത്തമാക്കിയ കമലദളം ശാസ്ത്രീയ കലയെ സിനിമയുമായി ഇഴചേര്‍ത്ത് എങ്ങനെ ജനപ്രിയ ഘടനയില്‍ അവതരിപ്പിക്കാം എന്ന പരീക്ഷണത്തില്‍ വിജയം കാണുകയായിരുന്നു. കലയെ ഉപാസിക്കുമ്പോള്‍ തന്നെ ജീവിതത്തില്‍ ഇടറിവീഴുന്ന കലാകാരനെയാണ് കമലദളം അവതരിപ്പിക്കുന്നത്. നൃത്തകലകളില്‍ അതിനിപുണനെങ്കിലും മറുവശത്ത് നന്ദഗോപന്റെ ജീവിതം അത്രകണ്ട് ലാസ്യഭാവം കാണിക്കുന്നതല്ല. മദ്യം അയാളെ മറ്റൊരാളാക്കി മാറ്റുന്നുണ്ട്. ഇതിനിടയിലും തന്റെ സ്വപ്‌നമായ സീതാകല്യാണം നൃത്തശില്പം ചിട്ടപ്പെടുത്തി അരങ്ങിലെത്തിക്കാന്‍ നന്ദഗോപനാകുന്നു. ശാസ്ത്രീയമായി നൃത്തം അഭ്യസിച്ചിട്ടില്ലാത്ത മോഹന്‍ലാല്‍ എന്ന നടന്റെ മെയ്‌വഴക്കം പ്രകടമാക്കുന്നതായിരുന്നു നന്ദഗോപന്‍ എന്ന നൃത്താധ്യാപക കഥാപാത്രവും പ്രത്യേകിച്ച് സീതാകല്യാണം നൃത്തശില്പാവതരണ രംഗങ്ങളും. കലകളെയും കലാകാരന്മാരെയും അവതരിപ്പിക്കുന്ന സിനിമകള്‍ സമാന്തരധാര ചേര്‍ന്നു സഞ്ചരിക്കുന്നതായിട്ടാണ് മിക്കപ്പോഴും കാണപ്പെടുക. ഇനി അത്തരം ബോധപൂര്‍വ്വമായ ശ്രമം നടത്തിയില്ലെങ്കില്‍ പോലും ചടുലത വിട്ടുള്ള ഒരു മന്ദസ്ഥായീ ഭാവം അവയ്ക്ക് കൈവരുന്നതായി കാണാം. എന്നാല്‍ ഇതിനെ ജനപ്രിയ കാഴ്ചസംസ്‌കാരത്തിനും പ്രേക്ഷകാഭിരുചിക്കും യോജിക്കും വിധം തിരക്കഥയൊരുക്കുന്നതിലും അവതരിപ്പിക്കുന്നതിലും ലോഹിതദാസും സിബിമലയിലും കാണിച്ച മികവാണ് കമലദളത്തെ മലയാളികളുടെ പ്രിയപ്പെട്ട സിനിമകളുടെ ഗണത്തില്‍ ചേര്‍ക്കാനിടയാക്കിയത്. നിര്‍ഭാഗ്യവശാല്‍ ഇത്ര കൈയടക്കത്തോടെയുള്ള ജനപ്രിയ തുടര്‍ച്ച പിന്നീടുണ്ടായില്ലെന്നു കാണാം. അതേസമയം സമാന്തരധാരയില്‍ മലയാള സിനിമയെ ലോകശ്രദ്ധയിലെത്തിച്ച കലാസൃഷ്ടികളുണ്ടായി. ഇക്കൂട്ടത്തില്‍ മുന്‍പന്തിയിലുള്ളത് ഷാജി എന്‍. കരുണിന്റെ വാനപ്രസ്ഥമാണ് (1999).

കഥകളിയുടെ ദൃശ്യ, ശ്രവ്യസാധ്യത മിഴിവുറ്റ രീതിയില്‍ പ്രയോജനപ്പെടുത്തിയ സിനിമയാണ് വാനപ്രസ്ഥം. കഥാപാത്രത്തിന്റെയും വേഷം കെട്ടിയാടുന്ന നടന്റെയും വ്യക്തിത്വങ്ങള്‍ക്കു തമ്മില്‍ സംഭവിക്കുന്ന അസ്ഥിത്വപ്രതിസന്ധിയിലേക്ക് കണ്ണയക്കുന്ന വാനപ്രസ്ഥത്തിന്റേത് കഥകളി ഉപാസകര്‍ക്കും സാധാരണ പ്രേക്ഷകര്‍ക്കും ഒരുപോലെ വിനിമയം ചെയ്യുന്ന ഭാഷയായിരുന്നു. 'വാദ്യമാണെങ്കിലും ആരെങ്കിലുമൊന്ന് കൊട്ടിപ്പാടിയാലേ അതിന് മോക്ഷം ഉണ്ടാവൂ' എന്ന് മോഹന്‍ലാലിന്റെ കഥകളി കലാകാരനായ കുഞ്ഞികുട്ടന്‍ പറയുന്നുണ്ട്. ഇത് അയാളുടെ അസ്ഥിത്വദു:ഖത്തെ കാണിക്കുന്ന സംഭാഷണശകലമാണ്. ഈ ദു:ഖം പേറിയാണ് അയാള്‍ക്ക് ജീവിതത്തിലും അരങ്ങിലും ആടേണ്ടിവരുന്നത്. ഈ അസ്ഥിത്വദു:ഖത്തില്‍ നിന്നുള്ള കുഞ്ഞികുട്ടന്റെ വിടുതല്‍ (മോക്ഷം) പൂതനാമോക്ഷം കഥയുടെ സൂചനകള്‍ നല്‍കിക്കൊണ്ടാണ് സിനിമ അവതരിപ്പിക്കുന്നത്. ഇവിടെ കഥകളീ വേഷവും ജീവിതവേഷവും രണ്ടാകുന്നില്ല. ജീവിതത്തില്‍ തിരസ്‌കൃതനാക്കപ്പെടുന്ന കഥകളി കലാകാരനെ എംടി വാസുദേവന്‍ നായരുടെ രചനയില്‍ രൂപംകൊണ്ട രംഗം എന്ന ഐവി ശശി സിനിമയിലും കാണാനാകും. കുഞ്ഞികുട്ടന്റെ അസ്ഥിത്വദു:ഖത്തിനു സമാനമല്ലെങ്കിലും ജീവിതത്തില്‍ പ്രിയപ്പെട്ടതായി സൂക്ഷിച്ചതൊക്കെയും നഷ്ടമാകുന്ന വൈയക്തിക ദു:ഖം പേറി അരങ്ങിലാടാന്‍ വിധിക്കപ്പെട്ടയാള്‍ തന്നെയാണ് അപ്പുണ്ണിയും. 

അരങ്ങില്‍ രാജസ വേഷങ്ങള്‍ കെട്ടിയാടേണ്ടി വരുമ്പോഴും ജീവിതത്തിലെ സ്ഥായിയായ സാത്വിക ഭാവവും, വിഷാദവും, വിഷമാവസ്ഥകളും പിന്തുടര്‍ന്നു പോരേണ്ടിവരുന്ന കലാകാരന്റെ ജീവിതമാണ് കലകളെ ഉപയോഗപ്പെടുത്തുന്ന സിനിമകള്‍ എല്ലാക്കാലവും പ്രമേയമാക്കിയത്. ജയരാജിന്റെ കളിയാട്ടത്തിലേക്കു (1997) വരുമ്പോള്‍ കണ്ണന്‍ പെരുമലയന് വിധി പോലെ വന്നുചേരുന്നുണ്ട് ഈ വിഷാദവും നൈരാശ്യവും ഒടുക്കം ആത്യന്തികമായ മരണവും. ഒരു അനിവാര്യതയെന്നോണം താന്‍ കെട്ടിയാടിയ തീച്ചാമുണ്ടിക്കോലമായി പെരുമലയന്‍ കനലിലൊടുങ്ങുന്നു. തെയ്യത്തെ ദൈവമായിത്തന്നെ ദേശക്കാര്‍ കണ്ടുപോരുന്നു. തെയ്യക്കോലം കെട്ടുന്നയാളില്‍ സ്വാഭാവികമായും അവര്‍ ദൈവികാംശം കണ്ടേക്കാം. ദേശത്തെ നാടുവാഴിയുടെ മകളായ താമരയ്ക്ക് പെരുമലയനോട് തോന്നിയത് ദൈവികമായ ഈ വേഷത്തിനോടും കൂടിയുള്ള അനുരാഗമാണ്. തീവ്രമായ പ്രണയത്തില്‍ താമര ജാതിവരമ്പ് ഭേദിച്ച് പെരുമലയനോടൊപ്പം ജീവിക്കാന്‍ തയ്യാറായി സ്വഗേഹം വിട്ടിറങ്ങുകയാണ്. തെയ്യക്കോലത്തോടും അതു കെട്ടിയാടുന്ന വ്യക്തിയോടും ഒരുപോലെ പ്രണയം തോന്നിയ താമര, കുഞ്ഞികുട്ടന്റെ അര്‍ജ്ജുന വേഷത്തെ മാത്രം പ്രണയിക്കുന്ന സുഭദ്രയില്‍ നിന്നും വ്യതിരിക്തമായ വ്യക്തിത്വമാണ്. പെരുമലയന്‍ തെറ്റിദ്ധരിക്കുമ്പോഴും തന്റെയുള്ളിലെ അനുരാഗം അവള്‍ കെടാതെ സൂക്ഷിക്കുന്നു. കുഞ്ഞികുട്ടനെ പോലെ ചുറ്റുമുള്ള ആള്‍പ്പെരുക്കത്തിലും വേഷങ്ങളുടെ മേലാപ്പിനുമിടയിലും അനാഥത്വം പേറി ജീവിക്കാന്‍ വിധിക്കപ്പെട്ടവനാണ് പെരുമലയനും. താമരയാണ് അവന്റെ ജീവിതത്തില്‍ വെളിച്ചം കൊണ്ടുവരുന്നത്. ആ വെളിച്ചം കെടുന്നതോടെ പെരുമലയനു മുന്നില്‍ പിന്നെ ഇരുട്ട് മാത്രമാണ്. അതിനയാള്‍ കീഴടങ്ങുകയും ചെയ്യുന്നു. കൃത്രിമവെളിച്ചങ്ങള്‍ ഉപയോഗപ്പെടുത്താതെയായിരുന്നു എംജെ രാധാകൃഷ്ണന്‍ കളിയാട്ടക്കാവിനെയും തെയ്യക്കോലങ്ങളെയും തെളിമയുള്ള ചിത്രങ്ങളാക്കിയത്. ഇതിന്റെ തെളിമ ഈ സിനിമയുടെ ചിത്രഭാഷയ്ക്കാകെ ഗുണം ചെയ്യുന്നതിനൊപ്പം തെയ്യമെന്ന കലാരൂപത്തിന്റെ ആത്മാവ് ചോരാതെ അവതരിപ്പിക്കുന്നതിനും സാധിക്കുന്നു. 

കീഴ്ജാതിക്കാര്‍ക്ക് നിഷിദ്ധമായിരുന്ന കഥകളിയെ അവര്‍ക്കിടയിലേക്ക് കൊണ്ടുവന്ന ആറാട്ടുപുഴ വേലായുധ പണിക്കരെ അടയാളപ്പെടുത്തുന്നുണ്ട് വിനയന്റെ പത്തൊമ്പതാം നൂറ്റാണ്ട് (2022) എന്ന സിനിമയില്‍. മേല്‍ജാതിക്കാരുടെ ക്ഷേത്രമുറ്റത്ത് ആടുമ്പോഴും ചില്ലറ മാത്രം തടയുന്ന അരപ്പട്ടിണിക്കാരായ കലാകാരന്മാരുടെ ഗതികേടിലേക്ക് പ്രേക്ഷകശ്രദ്ധയെ നയിക്കുകയാണ് ഈ സിനിമ. ആട്ടത്തിന് നിലവില്‍ കിട്ടിയിരുന്നതിന്റെ പലമടങ്ങ് പണം കൂടുതല്‍ കൊടുത്താണ് വേലായുധ പണിക്കര്‍ ആ കലാകാരന്മാരെ അരങ്ങിലേക്ക് ക്ഷണിക്കുന്നത്. കലയെ അംഗീകരിക്കുന്നതിനൊപ്പം കലാകാരന്റെ ഉപജീവനത്തെക്കൂടി മാനിക്കുകയായിരുന്നു ആ പ്രവൃത്തിയിലൂടെ വേലായുധ പണിക്കര്‍.

മധുവിനെ കേന്ദ്ര കഥാപാത്രമാക്കിക്കൊണ്ടുള്ള എ.വിന്‍സെന്റിന്റെ 'ചെണ്ട' (1973) ഒരു താളവാദ്യക്കാരന്റെ ജീവിതം പ്രമേയമാക്കുന്ന മലയാളത്തിലെ ആദ്യ സിനിമയാണ്. ചെറുപ്പം മുതലേ ചെണ്ടയില്‍ ആകൃഷ്ടനായിരുന്ന അപ്പു തായമ്പകയിലാണ് പ്രാഗത്ഭ്യം തെളിയിക്കുന്നത്. താളവാദ്യത്തിലുള്ള അപ്പുവിന്റെ കഴിവുകളാണ് സുമതിയെ അവനില്‍ ആകൃഷ്ടയാക്കുന്നത്. എന്നാല്‍ വിധി മറ്റൊന്നായി അവരെ ഇരുവഴി അകറ്റുന്നുമുണ്ട്. അര്‍പ്പണബോധമുള്ള കലാകാരന്റെ ജീവിതത്തില്‍ ഇത്തരം പ്രതിബന്ധങ്ങളൊന്നും വഴിമുടക്കമാകുന്നില്ലെന്നു തായമ്പകയിലുള്ള തന്റെ പ്രാവീണ്യത്തിലൂടെ അപ്പു തെളിയിക്കുന്നു. ചോരയൊലിക്കുന്ന വിരലുകളോടെ തായമ്പക മത്സരത്തില്‍ പങ്കെടുത്ത് വിജയിക്കുന്ന അപ്പുവിനെ സംബന്ധിച്ചിടത്തോളം ചെണ്ട ഒരു സംഗീതോപകരണം മാത്രമല്ല, ജീവിതം തന്നെയായിരുന്നു. മോഹിനിയാട്ടം, കഥകളി, തായമ്പക തുടങ്ങിയ കേരളീയ കലാരൂപങ്ങളുടെ അവതരണം ഈ ചിത്രത്തിന്റെ ദൃശ്യഭാഷയെ സവിശേഷതമാക്കുന്നു. 

ചെണ്ട പല സിനിമകളിലും കഥാപാത്രങ്ങളോളം അടയാളപ്പെടുത്തല്‍ സാധ്യമാക്കിയിട്ടുള്ളതായി കാണാനാകും. പൂരപ്പറമ്പില്‍ നിന്ന് പൂരപ്പറമ്പിലേക്ക് ഗമിക്കുന്ന ചില്ലറ കച്ചവടക്കാരായ സാധാരണ മനുഷ്യരുടെ ജീവിതം പറഞ്ഞ സുന്ദര്‍ദാസിന്റെ കുടമാറ്റം (1997), വി.എം. വിനുവിന്റെ പല്ലാവൂര്‍ ദേവനാരായണന്‍ (1999) എന്നീ സിനിമകളിലെ നായകന്മാര്‍ ചെണ്ടക്കാരനാണ്. തൂവല്‍കൊട്ടാരത്തിലെ (1996) നായകനാകട്ടെ ജീവിതം മുന്നോട്ടുനീക്കാന്‍ പല ജോലികള്‍ ചെയ്യുന്നതിനിടയില്‍ ചെണ്ടയും കൈയിലെടുക്കുന്നുണ്ട്. ക്ഷേത്രത്തിലെ വാദ്യോപകരണങ്ങള്‍ കൈകാര്യം ചെയ്യുന്നതുള്‍പ്പെടെയുള്ള ജോലികള്‍ ചെയ്തുപോരുന്ന അമ്പലവാസികളായ മാരാര്‍, പൊതുവാള്‍ വിഭാഗത്തില്‍ പെടുന്നവരെയാണ് മുഖ്യ അഭിനേതാക്കളായ ജയറാം (മോഹനചന്ദ്രന്‍ പൊതുവാള്‍), ഒടുവില്‍ ഉണ്ണികൃഷ്ണന്‍ (അച്യുത മാരാര്‍) എന്നിവര്‍ അവതരിപ്പിക്കുന്നത്. ദേവാസുരത്തില്‍ (1993) ഒടുവിലിന്റെ പെരിങ്ങോട് ശങ്കര മാരാര്‍ എന്ന പെരിങ്ങോടരെ ചെറുതെങ്കിലും ഒരു സമ്പൂര്‍ണ കലാകാര കഥാപാത്രമായിട്ടാണ് സിനിമ അവതരിപ്പിക്കുന്നത്. പെരിങ്ങോടന് ഒരു ശരീരാവയവം തന്നെയാകുന്നു ഉടുക്ക്. ക്ഷേത്രങ്ങളില്‍ നിന്ന് ക്ഷേത്രങ്ങളിലേക്ക് ഊരു ചുറ്റുന്നതിനിടെ കുടുംബജീവിതം മറന്നുപോകുന്ന പെരിങ്ങോടര്‍ കലോപാസനയെയും കലോപാസകരെയും മാത്രമാണ് നെഞ്ചോടു ചേര്‍ക്കുന്നത്. അതുകൊണ്ടുതന്നെ മംഗലശ്ശേരി നീലകണ്ഠന്‍ അയാള്‍ക്ക് പ്രിയപ്പെട്ടവനാകുന്നു. എവിടെയൊക്കെയോ അലഞ്ഞുതിരിഞ്ഞ് ഇടയ്‌ക്കൊന്ന് വന്നു കയറി ഇടയ്ക്ക കൊട്ടിപ്പാടാനുള്ള ഇടമാണ് അയാള്‍ക്ക് മംഗലശ്ശേരി വീടും അവിടത്തെ നീലകണ്ഠനെന്ന സാന്നിധ്യവും. സംഗീതത്തെ മാത്രം ഉപാസിച്ച് കലയുടെ അനുഗ്രഹം മാത്രമല്ലാതെ മറ്റൊന്നും ജീവിതത്തില്‍ ആശിക്കാത്ത യഥാര്‍ഥ കലാകാരനായിരുന്ന ഞരളത്ത് രാമപ്പൊതുവാളാണ് പെരിങ്ങോടന്റെ പാത്രസൃഷ്ടിക്ക് പ്രചോദനമായതെന്ന് ദേവാസുരത്തിന്റെ രചയിതാവ് രഞ്ജിത്ത് പറയുന്നുണ്ട്. കേരളീയ കലകളുമായും വാദ്യോപകരണങ്ങളുമായും നേര്‍ബന്ധമുണ്ടായിരുന്ന ഒടുവിലിനെയും നെടുമുടി വേണുവിനെയും പോലുള്ള കലാകാരന്മാര്‍ ഇത്തരം കഥാപാത്രങ്ങളായി മാറുമ്പോഴും വാദ്യോപകരണങ്ങള്‍ പ്രയോഗിക്കുമ്പോഴും കൈവരുന്ന പൂര്‍ണത അനിതരസാധാരണമാണ്. തബലയോ മറ്റ് വാദ്യോപകരണങ്ങളോ വായിക്കുന്ന നെടുമുടി വേണുവിന്റെ കൈകളെയും മുഖഭാവത്തെയും ചെണ്ടയോ ഉടുക്കോ പ്രയോഗിക്കുമ്പോഴത്തെ ഒടുവിലിന്റെ ശരീരഭാഷയെയും ഓര്‍മ്മിക്കുക.

സൈജോ കണ്ണനായ്ക്കലിന്റെ കഥകളി (2016) പേരിലെ സൂചകം പോലെ അരങ്ങിലെ മുഴുനീള കലാസ്വാദനം സാധ്യമാക്കുകയല്ല, മറിച്ച് കീഴ്ജാതിക്കാരനായ കലാകാരന്റെ സാമൂഹിക സ്വത്വത്തെയും പ്രതിസന്ധികളെയും അടയാളപ്പെടുത്താനാണ് ഒരുമ്പെടുന്നത്. ഒടുക്കം തന്റെ കഥകളി വേഷം അഴിച്ചുമാറ്റി സമൂഹത്തിനെതിരായ പ്രതിഷേധത്തിന്റെ പ്രതീകമായി നഗ്നനായി പുഴ മുറിച്ചു നടക്കുകയാണയാള്‍. ചെണ്ടയും കമലദളവും കുടമാറ്റവും ഉള്‍പ്പെടെ കേരളീയ കലകളെ പ്രതിനിധാനം ചെയ്ത സിനിമകളെയെല്ലാം പോലെ ഈ സിനിമയ്ക്കും ഭൂമികയാകുന്നത് ഭാരതപ്പുഴയാണ്. 'കഥകളി പാവപ്പെട്ടവര്‍ക്കും അധഃസ്ഥിതര്‍ക്കും വേണ്ടിയുള്ളതല്ല' എന്ന് ഊന്നിപ്പറഞ്ഞാണ് ഈ സിനിമ അവസാനിക്കുന്നത്. കഥകളിക്ക് പശ്ചാത്തലമായി ഉപയോഗിക്കുന്ന ഉപകരണങ്ങള്‍ മാത്രം ഉപയോഗിച്ചാണ് ഈ സിനിമയുടെ പശ്ചാത്തലസംഗീതം ഒരുക്കിയിരിക്കുന്നത്. ജാതിരാഷ്ട്രീയം മലബാറിലെ കരിങ്കാളികെട്ട് എന്ന അനുഷ്ഠാന കലയുടെ പശ്ചാത്തലത്തില്‍ അവതരിപ്പിക്കുകയാണ് ഷാനവാസ് നരണിപ്പുഴ കരി (2016)യില്‍.

ഫാറൂക്ക് അബ്ദുറഹ്മാന്റെ കളിയച്ഛന്‍ (2015) പി.കുഞ്ഞിരാമന്‍ നായരുടെ കളിയച്ഛന്‍ എന്ന ശ്രദ്ധേയകാവ്യത്തിന്റെ ചലച്ചിത്രാവിഷ്‌കാരമാണ്. കളിവിളക്കിനു മുമ്പിലെ കേമപ്പെട്ട കഥകളി വേഷക്കാരനില്‍ നിന്ന് ആരുമല്ലാതെയാകുന്ന കുഞ്ഞിരാമന്റെ ദുരന്തപൂര്‍ണമായ ജീവിതത്തെ കളിയച്ഛന്‍ അടയാളപ്പെടുത്തുന്നു. മനയ്ക്കലെ കഥകളിയോഗത്തിലെ രാവുണ്ണി ആശാനാണ് കുഞ്ഞിരാമനെ കഥകളി പരിശീലിപ്പിക്കുന്നത്. കളിയോഗത്തിലെ ഏറ്റവും മികച്ച വേഷക്കാരനാകാനുള്ള ശിക്ഷണം ലഭിക്കുന്ന കുഞ്ഞിരാമന് നാട്ടുകാരുടെ പ്രിയപ്പെട്ട വേഷക്കാരനാകാനും സാധിക്കുന്നുണ്ട്. കുഞ്ഞിരാമന്‍ നായര്‍ കളിയച്ഛനില്‍ പറയുന്നതുപോലെ ജാതകത്തിന്റെ കേമത്തം കുഞ്ഞിരാമനെ അഹങ്കാരിയും മദ്യപാനിയും ആശാനോടു പോലും അനുസരണയില്ലാത്തവനുമാക്കുന്നു. കേമപ്പെട്ട കലാകാരനില്‍നിന്ന് സ്വയം വരിക്കുന്ന ദാരിദ്ര്യത്തിലേക്ക് അയാള്‍ എത്തിച്ചേരുന്നു. ആശാനോട് കലഹിച്ച് കളിയോഗം വിട്ടുപോകാന്‍ കൂടി തയ്യാറാകുന്നുണ്ട് കുഞ്ഞിരാമന്‍. ഇതോടെ നാടാലും നാട്ടാരാലും പ്രിയപ്പെട്ടവളാലും ഉപേക്ഷിക്കപ്പെട്ടവനാകുന്നു അയാള്‍. കളിയോഗത്തിലേക്ക് തിരിച്ചെത്തി പ്രധാന വേഷങ്ങള്‍ കെട്ടിയാടി പെരുമ തിരിച്ചുപിടിക്കുന്നുണ്ടെങ്കിലും തെറ്റുകളിലേക്കു തന്നെ പോകാനായിരുന്നു കുഞ്ഞിരാമന്റെ ജീവിതനിയോഗം. കളിയരങ്ങില്‍ പിഴയ്ക്കുകയും കിരീടം ചെരിഞ്ഞുവീഴുകയും ചെയ്യുന്നതോടെ മഹാനടന്റെ പതനം അനിവാര്യമായ പരിസമാപ്തിയിലേക്ക് നീങ്ങുന്നു. ആശാന്റെ മരണത്തോടെ 'ഇക്കളിയച്ചനോടൊത്തിനി കളിക്കാനാവില്ല'എന്ന നഷ്ടബോധം പേറിയലയുന്ന കുഞ്ഞിരാമനിലേക്ക് അരങ്ങില്‍ താന്‍ കെട്ടിയാടിയ വേഷങ്ങളുടെ നിഴല്‍രൂപങ്ങളോരോന്നായി കടന്നുവന്ന് തിക്കുമുട്ടിക്കുന്നു. കഥകളിപ്പദ ശൈലിയിലുള്ള സംഗീതം പാട്ടുകളില്‍ പ്രയോജനപ്പെടുത്തിയ കളിയച്ഛനില്‍ പി.കുഞ്ഞിരാമന്‍ നായരുടെ കഥകളിപ്പദങ്ങളും ഉപയോഗിച്ചു. 

വാസുദേവ ചാക്യാര്‍ (നെടുമുടി വേണു) എന്ന കലാകാരന്റെ ജീവിതത്തിലൂടെ ശശി പറവൂരിന്റെ നോട്ടം (2006) കൂടിയാട്ടത്തെയാണ് വെള്ളിത്തിരയില്‍ ആവിഷ്‌കരിക്കുന്നത്. വാസുദേവ ചാക്യാരുടെ കൂടിയാട്ടം വീഡിയോ ചിത്രീകരിക്കുന്നതിലൂടെയാണ് അദ്ദേഹത്തിന് ഇന്ത്യയിലും വിദേശത്തുമായി കൂടിയാട്ടം അവതരിപ്പിക്കാനുള്ള നിരവധി വേദികള്‍ ലഭിക്കുന്നത്.  നാടിന്റെ അഭിമാനസ്തംഭങ്ങളായ കലകള്‍ക്കും മഹാന്മാരായ കലാകാരന്മാര്‍ക്കും വേണ്ടത്ര അംഗീകാരം ലഭിക്കാതെ പോകുന്ന സാഹചര്യങ്ങളെ ഈ സിനിമ ഓര്‍മ്മിക്കുന്നുണ്ട്. കെ.ബി.മധുവിന്റെ ദീപസ്തംഭം മഹാശ്ചര്യം (1999), വി.സി. അഭിലാഷിന്റെ ആളൊരുക്കം (2018) തുടങ്ങിയ സിനിമകളില്‍ തുള്ളല്‍ കലാകാരന്മാരുടെ വേഷത്തിലാണ് പ്രധാന കഥാപാത്രങ്ങള്‍. 

സ്ത്രീകള്‍ മാത്രം കെട്ടുന്ന ദേവക്കൂത്ത് എന്ന തെയ്യത്തിന്റെ പശ്ചാത്തലത്തിലാണ് മനോജ് കാന ചായില്യം (2014) ഒരുക്കിയിരിക്കുന്നത്. സ്വേച്ഛയാലല്ലാതെ ദൈവക്കോലം കെട്ടേണ്ടിവരികയാണ് ഗൗരിക്ക്. അവള്‍ക്ക് ദൈവവിളി കിട്ടിയെന്ന് നാടും വീടും വിധിക്കുമ്പോള്‍ നിജസ്ഥിതി അതല്ലാതിരുന്നിട്ടും അതിനു പിന്നാലെ പോകേണ്ടിവരികയാണ്. കുടുംബജീവിതത്തിലേക്ക് കടക്കുമ്പോള്‍ കലോപാസനയില്‍ പെണ്ണിന് സമൂഹം നിശ്ചയിച്ചിട്ടുള്ള അതിരുകളും നിയന്ത്രണങ്ങളും സത്യന്‍ അന്തിക്കാടിന്റെ കൊച്ചുകൊച്ചു സന്തോഷങ്ങളിലും കടന്നുവരുന്നു. നൃത്തോപാസകയായ നായികയുടെ വ്യക്തിത്വം നൃത്തത്തിലൂടെയാണ് പൂര്‍ണത പ്രാപിക്കുന്നത്. എന്നാല്‍ ദാമ്പത്യജീവിതം അവളെ വീടിനുള്ളില്‍ ഒതുക്കുന്നു. ആണുങ്ങള്‍ക്ക് കലോപാസനയില്‍ കൂടുതല്‍ സ്വാതന്ത്ര്യങ്ങളും തെരഞ്ഞെടുപ്പുകളുമുണ്ട്. ഇത് പലപ്പോഴും സ്ത്രീകള്‍ക്ക് ലഭിക്കുന്നില്ല. അവളുടെ തെരഞ്ഞെടുപ്പുകള്‍ക്കും പ്രസക്തിയുണ്ടെന്ന് ഈ സിനിമ ഓര്‍മ്മിപ്പിക്കുന്നു.

മാതൃഭൂമി ഓണ്‍ലൈന്‍, 2022 ഡിസംബര്‍ 2, ഷോ റീല്‍ 35

രമണന്‍, മണവാളന്‍, ദശമൂലം ദാമു, കണ്ണന്‍ സ്രാങ്ക്... ഹീറോ അല്ലാത്ത ഹീറോസ്

സിനിമയേക്കാളും അതിലെ നായികാനായകന്മാരേക്കാളും പ്രേക്ഷകശ്രദ്ധ നേടുകയും പിന്നീട് കള്‍ട്ട് സ്റ്റാറ്റസ് പദവിയിലേക്ക് ഉയരുകയും ചെയ്ത ചില കഥാപാത്രങ്ങളുണ്ട്. ഈ സിനിമകള്‍ പില്‍ക്കാലത്ത് ഓര്‍മ്മിക്കപ്പെടുന്നതു പോലും ഈ കഥാപാത്രങ്ങളിലൂടെയായിരിക്കും. ഇത്തരം സിനിമകള്‍ ആവര്‍ത്തിച്ചുള്ള കാഴ്ചാമൂല്യം (റിപ്പീറ്റ് വാച്ച് വാല്യൂ) സാധ്യമാക്കുന്നതും ഈ കഥാപാത്രങ്ങളിലൂടെ തന്നെ. തങ്ങളെ രസിപ്പിക്കുന്ന സിനിമകള്‍ ആവര്‍ത്തിച്ച് കാണാനാണ് എപ്പോഴും ഭൂരിഭാഗം പ്രേക്ഷകരും താത്പര്യപ്പെടുന്നത്. ഈ സിനിമകളിലെ രസികന്‍ കഥാപാത്രങ്ങളായിരിക്കും ഈ ആവര്‍ത്തനമൂല്യം ഉറപ്പാക്കുന്നത്.

പഞ്ചാബിഹൗസ് എന്ന മലയാളത്തിലെ എക്കാലത്തെയും ആവര്‍ത്തന കാഴ്ചാമൂല്യമുള്ള സിനിമയുടെ പേര് കേള്‍ക്കുമ്പോഴേ പ്രേക്ഷകര്‍ ഒരു നിറഞ്ഞ ചിരിയോടെ ഓര്‍മ്മിക്കുന്നത് ഹരിശ്രീ അശോകന്റെ രമണന്‍ എന്ന കഥാപാത്രത്തെയാണ്. രമണന്‍ ഗംഗാധരന്‍ മുതലാളിക്കും ഉണ്ണികൃഷ്ണനുമൊപ്പം തീര്‍ക്കുന്ന ചിരിയാണ് ഈ സിനിമയുടെ നട്ടെല്ല്. സിനിമയിലെ നായക കഥാപാത്രത്തിന്റേ പേര് ഒരുപക്ഷേ രണ്ടാമതൊന്ന് ആലോചിച്ചാലായിരിക്കും നാവില്‍ വരിക. എന്നാല്‍ രമണനെക്കുറിച്ച് അങ്ങനെയൊരു ആലോചനയ്ക്ക് ഇടയില്ല. അത്ര സ്വാധീനവും ജനകീയവുമാണ് രമണന്‍ സൃഷ്ടിച്ച ചിരി. അത്യപൂര്‍വ്വമായി മാത്രമായിരിക്കും ഇത്തരം പാത്രസൃഷ്ടികള്‍ സംഭവിക്കാറ്. കഥാപാത്ര സൃഷ്ടി നടത്തുന്ന വേളയില്‍ തിരക്കഥാകാരന് അഭിനേതാവിന്റെ പ്രകടനസാധ്യതയെക്കുറിച്ച് പലപ്പോഴും പൂര്‍ണബോധ്യമുണ്ടാവാന്‍ ഇടയില്ല. ക്യാമറയ്ക്കു മുന്നിലായിരിക്കും തിരക്കഥാകാരന്‍ സൃഷ്ടിച്ച കഥാപാത്രം പൂര്‍ണത പ്രാപിക്കുന്നത്. രമണനിലേക്ക് ഹരിശ്രീ അശോകന്‍ പരകാശപ്രവേശം നടത്തുമ്പോഴാണ് ഇത്രയും തുറന്ന പ്രകടനം സാധ്യമാകുന്നത്. ഒരു അഭിനേതാവിന് തനിക്ക് ലഭിക്കുന്ന എല്ലാ കഥാപാത്രങ്ങളിലും ഇത്രകണ്ട് തുറന്ന ഇടപെടല്‍ സാധ്യമായേക്കില്ല. അത് സാധ്യമാകുന്നവയെ ആണ് മാസ്റ്റര്‍പീസ് ആയി പില്‍ക്കാലത്ത് വിലയിരുത്തപ്പെടുന്നത്. രമണന്‍ അത്തരത്തിലൊന്നാണ്. രമണന്‍ സ്‌ക്രീനില്‍ വരുന്ന ഓരോ നിമിഷത്തിലും ഒരു ചിരിക്ക് സാധ്യതയുണ്ടായിരുന്നു. അതിന് അത്രയേറെ ഫ്രഷ്‌നെസും ഉണ്ടായിരുന്നു. ഒരര്‍ഥത്തില്‍ രമണന്റെ പ്രകടനത്തിന് കൂട്ടു നില്‍ക്കേണ്ട ഉത്തരവാദിത്തമായിരുന്നു ഗംഗാധരന്‍ മുതലാളിക്കും ഉണ്ണികൃഷ്ണനും ഉത്തമനുമെല്ലാം ഉണ്ടായിരുന്നത്. 

രമണന്‍ മലയാളി ജീവിതത്തിലേക്ക് സംഭാവന ചെയ്ത ശൈലികളും പ്രയോഗങ്ങളും ഭാവങ്ങളുമുണ്ട്. 'മുതലാളീ' എന്ന വിളിക്ക് ഒന്നിലേറെ പ്രകടന, പ്രയോഗ സാധ്യതകള്‍ നല്‍കുന്നത് രമണനാണ്. പഞ്ചാബിഹൗസ് റിലീസ് ചെയ്ത് 24 വര്‍ഷം പിന്നിടുമ്പോള്‍ രമണന്‍ സോഷ്യല്‍ മീഡിയയിലെ ട്രോളുകളിലെയും മീമുകളിലെയും പ്രധാന മുഖമാണ്. ഈ കഥാപാത്രത്തിന്റെ അപാരമായ ജനപ്രിയതയെ തുടര്‍ന്നാണ് റാഫി തന്റെ ചിത്രമായ റോള്‍ മോഡല്‍സില്‍ (2017) രമണനെ വീണ്ടും അവതരിപ്പിക്കുന്നത്. ഈ സിനിമയുടെ പ്രദര്‍ശന വേളയില്‍ സാധാരണ ഒരു ഹരിശ്രീ അശോകന്‍ കഥാപാത്രത്തിന്റെ ഇന്‍ട്രോ സീനിന് കിട്ടാത്ത കൈയടിയാണ് പ്രേക്ഷകര്‍ നല്‍കുന്നത്. അത് ഹരിശ്രീ അശോകനുള്ളതല്ല, അദ്ദേഹത്തിന്റെ ഏറ്റവും ജനകീയ കഥാപാത്രമായ രമണനുള്ളതാണ്. ഹരിശ്രീ അശോകന്റെ സിനിമാ കരിയര്‍ രമണനു മുമ്പും ശേഷവും എന്ന് അടയാളപ്പെടുത്താവുന്നതാണ്.  

ഷാഫിയുടെ ചട്ടമ്പിനാട് തിയേറ്ററില്‍ പരാജയപ്പെട്ട സിനിമയാണ്. എന്നാല്‍ സിനിമ തിയേറ്റര്‍ വിട്ട് കുറച്ച് വര്‍ഷങ്ങള്‍ക്കു ശേഷം ടെലിവിഷനിലും ഡിവിഡിയിലും യൂ ട്യൂബിലുമായി ഈ സിനിമ വളരെയധികം പേര്‍ കാണുകയുണ്ടായി. ദശമൂലം ദാമു എന്ന സുരാജ് വെഞ്ഞാറമൂടിന്റെ കഥാപാത്രമാണ് ഈ ജനപ്രിയതയ്ക്കു കാരണം. സിനിമ കണ്ടവര്‍ നല്‍കിയ മൗത്ത് പബ്ലിസിറ്റിയിലൂടെ ദശമൂലം ദാമു എന്ന കഥാപാത്രം വളരുകയായിരുന്നു. നായകതാരമായ മമ്മൂട്ടിയെ കവച്ചുവയ്ക്കുന്ന പ്രകടനമാണ് ചട്ടമ്പിനാടില്‍ സുരാജ് നടത്തുന്നത്. ഡയലോഗ് ഡെലിവെറിയിലും സ്വാഭാവികമായ ഭാവപ്രകടനങ്ങളിലും ദാമു സുരാജിലെ നടനെ ബഹുദൂരം മുന്നോട്ട് നയിക്കുന്നുണ്ട്. സുരാജിന്റെ കരിയര്‍ ബെസ്റ്റ് പ്രകടനങ്ങളിലൊന്ന് തിയേറ്ററില്‍ അധികം പേര്‍ കാണാതെ പോയെങ്കിലും പിന്നീട് വിവിധ പ്ലാറ്റ്‌ഫോമുകള്‍ വഴി അത്രയധികം പേരാണ് ദാമുവിനെ ആഘോഷിച്ചത്. 

ദശമൂലം ദാമുവിന്റെ ജനപ്രിയത എത്രത്തോളമെന്ന് പിന്നീട് സോഷ്യല്‍ മീഡിയയിലാണ് വെളിപ്പെടുന്നത്. സോഷ്യല്‍ മീഡിയ ട്രോള്‍ മീമുകളില്‍ ഏറ്റവുമധികം ഉപയോഗിക്കപ്പെടുകയും ഷെയര്‍ ചെയ്യപ്പെടുകയും ചെയ്യുന്ന ഭാവങ്ങളിലൊന്നാണ് ദാമുവിന്റേത്. സോഷ്യല്‍ മീഡിയയിലെ ഈ ജനപ്രിയതയാണ് ദശമൂലം ദാമുവിനെ കേന്ദ്രകഥാപാത്രമാക്കി പുതിയ സിനിമയുടെ പ്രഖ്യാപനത്തിലേക്ക് വരെ എത്തിക്കുന്നത്. ഈ സുരാജ് കഥാപാത്രത്തിന്റെ സിറ്റുവേഷന്‍ കോമഡിയും കൗണ്ടറുകളും ഭാവപ്രകടനങ്ങളും അത്രകണ്ട് ജനകീയമായിരുന്നു. പഞ്ചാബിഹൗസ് പോലെ മലയാളികളുടെ റിപ്പീറ്റ് വാച്ച് ലിസ്റ്റിലുള്ള സിനിമയല്ല ചട്ടമ്പിനാട്. എന്നാല്‍ ദാമുവിന്റെ പ്രകടനം കാണാന്‍ വേണ്ടി മാത്രം ഈ സിനിമ കാണുന്നവര്‍ നിരവധിയാണ്. ഈ ജനപ്രിയത കൊണ്ട് യു ട്യൂബില്‍ ദാമു പ്രത്യക്ഷപ്പെടുന്ന സീനുകള്‍ ഒരുമിച്ചുചേര്‍ത്ത വീഡിയോകളും അപ്ലോഡ് ചെയ്യപ്പെട്ടിട്ടുണ്ട്.

ഒരു സിനിമയുടെ ഉടമസ്ഥാവകാശം പാടേ കൈക്കലാക്കിയിട്ടുള്ള മറ്റൊരു പ്രമുഖ കഥാപാത്രം പുലിവാല്‍ കല്യാണത്തിലെ മണവാളന്‍ ആണ്. ഈ സിനിമയിലെ നായികാനായകന്‍മാരെയും മറ്റു കഥാപാത്രങ്ങളെയും കേന്ദ്രപ്രമേയത്തെയും സിനിമയെത്തന്നെയും അപ്രസക്തമാക്കി ഒറ്റയാള്‍ പ്രകടനം തീര്‍ക്കുകയായിരുന്നു സലിംകുമാറിന്റെ മണവാളന്‍. മണവാളന്റെ ഓരോ സംഭാഷണവും ആംഗ്യവിക്ഷേപങ്ങളും മലയാളി പ്രേക്ഷകര്‍ക്ക് ചിരപരിചിതമാണ്. സാന്നിധ്യം കൊണ്ട് സിനിമയുടെ ആകെ ഊര്‍ജ്ജത്തെ ഇരട്ടിയാക്കാന്‍ ശേഷിയുള്ള കഥാപാത്രങ്ങളുടെ കൂട്ടത്തില്‍ മുന്‍പന്തിയിലാണ് മണവാളന്റെ സ്ഥാനം. മണവാളന്‍ വരുന്നതോടെയാണ് തീര്‍ത്തും സാധാരണമായി മുന്നോട്ടുപൊയക്കൊണ്ടിരുന്ന പശ്ചാത്തലത്തില്‍ നിന്ന് അസാധാരണമായ പൊട്ടിച്ചിരി തീര്‍ക്കുന്ന സിനിമയായി പുലിവാല്‍ കല്യാണം മാറുന്നത്. അത്ര പ്രത്യേകതകള്‍ അവകാശപ്പെടാനില്ലാത്ത ഒരു സാധാരണ ചിത്രത്തെ ഈ ഒരൊറ്റ കഥാപാത്രം ആവര്‍ത്തിച്ചുള്ള കാഴ്ചയ്ക്ക് ശേഷിയുള്ള സിനിമയാക്കി മാറ്റുകയായിരുന്നു. സിനിമയിലെ മറ്റ് കഥാപാത്രങ്ങളും പ്രകടനങ്ങളും സാധാരണത്വം പേറി മുന്നോട്ടു പോകുമ്പോഴും മണവാളന്‍ അസാധാരണ പ്രകടനം കൊണ്ട് പ്രേക്ഷകരെ കൈയിലെടുക്കുന്നു. അതിനൊപ്പം മറ്റ് അഭിനേതാക്കളെയും തന്റെ ഊര്‍ജ്ജവലയത്തില്‍ ചേര്‍ത്ത് പ്രകടനസാധ്യതയ്ക്ക് മണവാളനും സലിംകുമാറും ഇടമൊരുക്കുന്നു.

സലിംകുമാര്‍ സ്വയം സൃഷ്ടിക്കുന്ന വാക്പ്രയോഗങ്ങളും ശൈലികളും ഭാവങ്ങളും കൊണ്ട് സമ്പന്നമാണ് മണവാളന്‍ എന്ന ഈ കഥാപാത്രം. ഒരു വ്യക്തിയുടെ അല്ലെങ്കില്‍ മലയാളിയുടെ ഭിന്ന ജീവിത സന്ദര്‍ഭങ്ങളിലെ ഏതു ഭാവങ്ങളിലും എളുപ്പത്തില്‍ മണവാളനെ ഉപയോഗപ്പെടുത്താന്‍ സാധിക്കും. മണവാളന്റെ ചിരിയും കരച്ചിലും ഞെട്ടലും നോട്ടവും പുച്ഛവും ആലോചനയും ശൃംഗാരവും ഭീഷണിയും നിസ്സഹായതയുമെല്ലാം മലയാളിക്ക് എളുപ്പത്തില്‍ സമരസപ്പെടാവുന്ന തരത്തിലുള്ള ഭാവങ്ങളാണ്. ഈ ഭാവങ്ങളിലെല്ലാം ഹാസ്യത്തിന്റെ നിറവുണ്ട്. ഈ ഭാവങ്ങളാണ് സിനിമ പുറത്തിറങ്ങി ഒരു പതിറ്റാണ്ടിനു ശേഷം സോഷ്യല്‍ മീഡിയ ട്രോളുകളുടെയും മീമുകളുടെയും മുഖമായി മണവാളനെ മാറ്റുന്നത്. മണവാളന്റെ ഭാവങ്ങളെ പോലെ ഇത്രയധികം ആഘോഷിക്കപ്പെട്ട മീമുകള്‍ കുറവായിരിക്കും. ഏതെങ്കിലും വികാരത്തോട് ചേര്‍ത്ത് മറ്റൊരാള്‍ക്ക് ഒരു മീം അല്ലെങ്കില്‍ സംഭാഷണം അയക്കുന്ന മലയാളി ആദ്യം ഓര്‍ക്കുന്നതോ തിരയുന്നതോ ആയ മുഖം മണവാളന്റേതായിരിക്കും. ഒരു സിനിമയില്‍ പ്രത്യക്ഷപ്പെടുന്ന രംഗം മുതല്‍ അവസാന ഷോട്ട് വരെ ഒരു കഥാപാത്രം നിലനിര്‍ത്തുന്ന അതിയായ ഊര്‍ജ്ജമാണ് മണവാളനെ ഇത്ര ജനകീയനായി തുടരാന്‍ പ്രാപ്തനാക്കുന്നത്.

'എവിടേക്കാടാ നീ തള്ളിക്കയറി പോകുന്നത്, ആശാന്‍ മുമ്പില്‍ നടക്കും, ശിഷ്യന്‍ പിറകെ' എന്നു പറഞ്ഞ് അതിഗംഭീരമായൊരു പശ്ചാത്തല സംഗീതത്തിന്റെ അകമ്പടിയോടെ കണ്ണന്‍ സ്രാങ്ക് മഹിയെ പിറകിലാക്കി മുന്നോട്ട് നടക്കുമ്പോള്‍ അതുകണ്ട് രസിച്ച് കൈയടിച്ചു പോകുന്നു പ്രേക്ഷകര്‍. ഒരു സിനിമയിലെ നായകനെ പിറകിലാക്കി മറ്റൊരു കഥാപാത്രം മുന്നേറുന്നതിന്റെ സൂചകം കൂടിയാണീ രംഗം. ഷാഫിയുടെ മായാവി എന്ന സിനിമയിലെ കണ്ണന്‍ സ്രാങ്ക് എന്ന സലിംകുമാര്‍ കഥാപാത്രത്തിനോട് അത്രയ്ക്കുണ്ട് കാണികള്‍ക്ക് പ്രതിപത്തി. ഈ ചിത്രം ആവര്‍ത്തിച്ചുള്ള കാഴ്ച സാധ്യമാക്കുന്നതും സലിംകുമാറിന്റെ കണ്ണന്‍ സ്രാങ്ക് എന്ന കഥാപാത്രത്തിന്റെ വേറിട്ട പ്രകടനം കൊണ്ടുതന്നെയാണ്. 

ജുബ്ബയും കപ്പടാമീശയുമായി സദാ മദ്യപാനിയായ, കത്തി നീട്ടി ഗുണ്ടാസ്വഭാവം പുറത്തെടുക്കുന്ന, എന്നാല്‍ അത്രകണ്ട് ധൈര്യമില്ലാത്ത പാവത്താനായ സ്രാങ്ക് അവസരം കിട്ടുമ്പോഴെല്ലാം തന്റെ വീരസ്യം പുറത്തെടുത്ത് ആളാകും. സ്രാങ്കിന്റെ ഈ സ്വഭാവം തന്നെയാണ് ചിരി പടര്‍ത്തുന്നതും. തിരക്കഥയ്ക്കു പുറത്തേക്ക് വളരാനുള്ള സലിംകുമാറിന്റെ പാടവം ഈ കഥാപാത്രത്തിന്റെ വളര്‍ച്ചയ്ക്ക് ആക്കം കൂട്ടുന്നുണ്ട്. സലീംകുമാറിനെ എപ്പോഴും ഓര്‍മ്മിക്കുന്നത് കണ്ണന്‍ സ്രാങ്കിലൂടെയാണെന്നും മായാവിയുടെ തിരക്കഥാ രചനയുടെ സമയത്ത് തന്നെ ആ കഥാപാത്രം വലിയ വിജയമാകുമെന്ന് പ്രതീക്ഷിച്ചിരുന്നതായും തന്റെ കഥാപാത്രങ്ങളില്‍ തനിക്ക് ഏറ്റവും പ്രിയപ്പെട്ടത് സ്രാങ്കാണെന്നും ഈ കഥാപാത്രത്തിന്റെ സ്രഷ്ടാക്കളിലൊരാളായ മെക്കാര്‍ട്ടിന്‍ പറയുന്നു. വിവിധ സിനിമകളിലായി മലയാളിക്ക് സലിംകുമാര്‍ സംഭാവന ചെയ്തിട്ടുള്ള നിരവധിയായ ശൈലികളും പ്രയോഗവുമുണ്ട്. തിരക്കഥാകാരന്‍ എഴുതുന്നതാണെങ്കില്‍ പോലും സലിംകുമാറിന്റെ മനോധര്‍മ്മം അതില്‍ പ്രവര്‍ത്തിക്കുമ്പോഴാണ് ഈ ശൈലിയും സംഭാഷണവും പ്രയോഗവും എക്കാലത്തേക്കുമുള്ള ഈടുവയ്പുകളാകുന്നത്. 'ഇതെന്ത് മറിമായം എനിക്ക് പ്രാന്തായതാണോ അതോ നാട്ടാര്‍ക്ക് മൊത്തം പ്രാന്തായിപ്പോയതാണോ?', 'ഇതൊക്കെ എന്ത്', 'അയ്യോ, ചിരിക്കല്ലേ... ഇതു കഴിച്ചിട്ടു ചിരിച്ചാ പിന്നെ ചിരി നിര്‍ത്താന്‍ പറ്റൂല.', 'ഒരു കൈയബദ്ധം നാറ്റിക്കരുത്', 'ഇടം വലം നോക്കാതെ ചെയ്തിരിക്കും', 'ഏതായാലും പലഹാരത്തെപ്പറ്റി എന്ന ഓര്‍മ്മിപ്പിച്ച സ്ഥിതിക്ക് എടുത്തോളൂ രണ്ട് ബോണ്ട ഒരു സവാളവട, ഒരു സുഖിയന്‍' തുടങ്ങി മലയാളി ദിവസജീവിതത്തിലെ ചില ജനപ്രിയ ശൈലികള്‍ രൂപപ്പെടുന്നത് കണ്ണന്‍ സ്രാങ്കില്‍ നിന്നാണ്. ഈ പ്രയോഗങ്ങള്‍ നിത്യജീവിതത്തിലെ സംഭവങ്ങളോടു ചേര്‍ത്ത് പറയാത്ത മലയാളികള്‍ ചുരുക്കമായിരിക്കും. 'ആശാന്‍, ആശാന്‍', 'പേരു കിട്ടി വാ ബാലാ', 'മ്യായിന്‍കുട്ടി.വി, അതായിരുന്നു അവന്റെ പേര്, അത് ചുരുക്കി മ്യായാവി എന്ന് വിളിച്ചത് ഞ്യാനാ', ദേ ദിങ്ങട് നോക്ക്യേ അവന്റെ ഒരു കയ്യുണ്ടല്ലോ ദേ എന്റെ ഈ കാലിന്റെ അത്രേം വരും തുടങ്ങിയ പ്രയോഗങ്ങളും സ്രാങ്കിന്റേതാണ്. ഫരതനാട്യം, ഹോസ്പത്രി, നിരപരാധിനി, നിരപരാധകന്‍ തുടങ്ങി മലയാള ഭാഷാ നിഘണ്ടുവിന് കണ്ണന്‍ സ്രാങ്ക് സംഭാവന ചെയ്യുന്ന പുതിയ വാക്കുകളുമുണ്ട്. ഇത്ര വലിയ വിതാനത്തിലാണ് റാഫി മെക്കാര്‍ട്ടിനും ഷാഫിയും ചേര്‍ന്ന് ഒരു ഉപകഥാപാത്രത്തെ തങ്ങളുടെ സിനിമയില്‍ അവതരിപ്പിച്ചിട്ടുള്ളത്. സലിംകുമാറിന്റെ പ്രകടനമികവ് അതിന് പിന്നെയും വിതാനമേറ്റുമ്പോള്‍ ഒരു സിനിമയാകെ അയാളുടേതായി മാറുകയാണ്.

ഒരു ജനപ്രിയസിനിമ ചെലുത്തുന്ന സ്വാധീനത്തിനു തെളിവാണ് ഭാഷയില്‍ രൂപപ്പെടുന്ന പുതിയ ശൈലികളും പ്രയോഗങ്ങളും. കല്യാണരാമന്‍ എന്ന ഷാഫി സിനിമയ്ക്കു ശേഷമാണ് 'സവാളഗിരിഗിരി', 'എന്തിനോ വേണ്ടി തിളയ്ക്കുന്ന സാമ്പാര്‍', 'നീ എവടെ പരിപാടി അവതരിപ്പിച്ചാലും ഇത് തന്നെയാണല്ലോ സ്ഥിതി', 'തളരരുത് കലാകാരന്മാരല്ലാത്തവരെ ലോകം അംഗീകരിക്കില്ല', 'ഞാനിത് തിന്ന്വല്ലാ', 'ഉടയ്ക്കല്ലേ പുരാവസ്തുവാണ്', 'ഈ ഗ്ലാസ് ഇവിടെ ഇരിക്കട്ടെ വേസ്റ്റ് ഒഴിക്കാനാണ്', 'ചേട്ടാ, കുറച്ച് ചോറ് ഇടട്ടെ മോരും കൂട്ടി കഴിക്കാന്‍', 'നീയൊക്കെ കല്യാണക്കുറി കാണിച്ച് പോയാ മതി' 'ഓരോരുത്തന്മാര്‍ വയറ് വാടകയ്ക്ക് എടുത്ത് വന്നിരിക്കാണ്', 'അടുത്ത ഇലേന്ന് എടുത്ത് കഴിക്കടാ', 'മോനേ കന്നിമാസം വന്നോന്നറിയാന്‍ പട്ടിക്ക് കലണ്ടര്‍ നോക്കണ്ട', 'ഇംഗ്ലീഷ് അറിയില്ല എന്നിട്ടെന്നോട് സ്പീച്ചാന്‍ വന്നിരിക്കുന്നു പുവര്‍ മലയാളീസ്' , 'മെല്‍ക്കൗ', 'മദാല്‍ദസ', 'ഈ കലവറ നമുക്കൊരു മണിയറയാക്കാം' തുടങ്ങി നിരവധിയായ പ്രയോഗങ്ങള്‍ മലയാളി ജീവിതത്തിലേക്ക് വരുന്നത്. ഈ ശൈലികള്‍ ദിനംപ്രതി സാധാരണ സംഭാഷണത്തില്‍ മലയാളി ഉപയോഗിച്ചു കൊണ്ടേയിരിക്കുന്നു. കല്യാണരാമനില്‍ സലിംകുമാറിന്റെ പ്യാരിയും ഇന്നസെന്റിന്റെ പോഞ്ഞിക്കരയുമാണ് ഇത്രയും പ്രയോഗസാധ്യതകള്‍ ഒരുമിച്ച് മലയാളിക്ക് സംഭാവന ചെയ്യുന്നത്. നിറഞ്ഞ ചിരി സമ്മാനിക്കുന്ന ഈ സിനിമയെ മുന്നോട്ടു കൊണ്ടുപോകുന്നത് നായകന്‍ ഉള്‍പ്പെടെ മറ്റേതു സുപ്രധാന കഥാപാത്രങ്ങളേക്കാളും മുന്‍പന്തിയിലുള്ളത് പ്യാരിയും പോഞ്ഞിക്കരയുമാണ്. അങ്ങനെ കഥാനായകനുമായി പൊരുത്തപ്പെടുന്ന പേരുള്ള ഈ സിനിമ ഇരുപതു വര്‍ഷത്തിലെത്തുമ്പോഴും ഓര്‍മ്മിക്കപ്പെടുന്നത് പ്രകടനം കൊണ്ട് നായകനേക്കാളും കൈയടി വാങ്ങിയ ഈ രണ്ട് ഉപകഥാപാത്രങ്ങളെ കൊണ്ടാണ്.

 

ഒരു സിനിമയുടെ നട്ടെല്ലാകുകയും ആ സിനിമ ഓര്‍മ്മിക്കപ്പെടുന്നതിന് കാരണമാകുകയും ചെയ്യുന്ന മറ്റൊരു കഥാപാത്രം റാഫി മെക്കാര്‍ട്ടിന്റെ ചതിക്കാത്ത ചന്തുവിലെ ഡാന്‍സ് മാസ്റ്റര്‍ വിക്രമാണ്. ഇവിടെയും സലിംകുമാര്‍ തന്നെയാണ് യഥാര്‍ഥ നായകന്‍. കാലങ്ങളായി ഒരേ സ്‌റ്റെപ്പിലെ ഇംപ്രവൈസേഷന്‍ കൊണ്ട് സിനിമയിലെ മാസ്റ്റര്‍ ഡാന്‍സറായി നിലനില്‍ക്കുന്ന വിക്രം വേഷത്തിലും നടപ്പിലും സംസാരത്തിലും അടിമുടി പുതുമ നിറയ്ക്കുന്ന കഥാപാത്രമാണ്. തന്റെ ഡാന്‍സിന് കട്ട് പറയുന്ന സംവിധായകനോട് 'എന്തു പറ്റി സാര്‍ കൂടുതല്‍ നന്നായിപ്പോയോ' എന്നാണ് വിക്രം ചോദിക്കുന്നത്. ഈ ചോദ്യത്തിലൂടെ മലയാളി പ്രേക്ഷകരിലേക്ക് തീര്‍ത്തും പുതിയ ഒരു ശൈലിയാണ് വിക്രം മുന്നോട്ടുവയ്ക്കുന്നത്. വിക്രത്തിന്റെ ഡാന്‍സ് സ്‌റ്റെപ്പുകളിലൂടെയാണ്, 'മുദ്ര ശ്രദ്ധിക്കൂ' എന്ന ജനപ്രിയ പ്രയോഗത്തിന്റെ ജനനം. ഈ സിനിമയുടെ ക്ലൈമാക്‌സ് സീക്വന്‍സില്‍ ഒരു കഥാപാത്രത്തിന്റെ സംശയരൂപേണയുള്ള ഒരു സാധാരണ ചോദ്യത്തിന് വിക്രം നല്‍കുന്ന മറുപടി ചരിത്രമാണ്. പില്‍ക്കാലത്ത് മലയാളികള്‍ക്കിടയില്‍ 'ശശി' എന്ന ഒരു പേരിന് അതിവിശാലമായ അര്‍ഥതലങ്ങളും വ്യാഖ്യാനങ്ങളും ചിരിയും ഉടലെടുക്കുന്നതിന് കാരണമാകുന്ന ഡാന്‍സ് മാസറ്റര്‍ വിക്രത്തിന്റെ ആ മറുപടി ഇങ്ങനെയായിരുന്നു, 'മധ്യതിരുവിതാംകൂര്‍ ഭരിച്ചിരുന്ന ഒരു രാജാവിന്റേതായിരുന്നു, പേര് ശശി' ഈ മറുപടി പൊട്ടിച്ചിരി സൃഷ്ടിച്ച് തിയേറ്ററില്‍ ഒടുങ്ങുകയായിരുന്നില്ല. മറിച്ച് മലയാളി ജീവിതത്തില്‍ ശശി എന്ന പേര് മറ്റൊരു തലത്തില്‍ പുനര്‍ജനിക്കുകയായിരുന്നു. 

മിഥുന്‍ മാനുവല്‍ തോമസിന്റെ ആട് ഒരു ഭീകരജീവിയാണ് എന്ന ചിത്രത്തില്‍ ഷാജിപാപ്പന്‍ എന്ന ജയസൂര്യയുടെ കേന്ദ്രകഥാപാത്രമാണ് ട്രെന്‍ഡ് സെറ്റര്‍ ആയതെങ്കിലും ഏറെക്കുറെ സമാനമായ ജനപ്രീതി നേടുകയായിരുന്നു മറ്റു കഥാപാത്രങ്ങളായ അറയ്ക്കല്‍ അബു, ഡൂഡ്, സര്‍ബത്ത് ഷമീര്‍, സാത്താന്‍ സേവ്യര്‍, പി പി ശശി, സച്ചിന്‍ ക്ലീറ്റസ് എന്നിവരെല്ലാം. ഒരു സിനിമയില്‍ നായക കഥാപാത്രത്തിന്റേതിനു സമാനമായ പ്രാധാന്യമുള്ള ഇന്‍ട്രൊഡക്ഷന്‍ മറ്റു കഥാപാത്രങ്ങള്‍ക്കെല്ലാം നല്‍കുന്ന പുതുമയാര്‍ന്ന രീതി ആടില്‍ അവതരിപ്പിക്കപ്പെട്ടു. ഈ അവതരണവും കഥാപാത്രങ്ങളുടെ വേറിട്ട മാനറിസങ്ങളും ജനപ്രിയമായി. അതോടെ സിനിമയുടെ സീക്വലില്‍ കേന്ദ്രകഥാപാത്രത്തിനു സമാനമോ അതിന് തെല്ലുയരത്തിലോ ഉള്ള സ്വീകാര്യതയായിരുന്നു ഈ ഉപകഥാപാത്രങ്ങള്‍ക്കെല്ലാം ലഭിച്ചത്. 

സിദ്ധിഖ് ലാലിന്റെ കാബൂളിവാല എന്ന ചിത്രത്തിലെ നായികാനായകന്മാരേക്കാളും പ്രേക്ഷകര്‍ ഓര്‍മ്മിക്കുന്നത് ഇന്നസെന്റിന്റെയും ജഗതി ശ്രീകുമാറിന്റെയും കന്നാസിലൂടെയും കടലാസിലൂടെയുമാണ്. പ്രിയദര്‍ശന്റെ വെള്ളാനകളുടെ നാട് മോഹന്‍ലാല്‍-ശോഭന ജനപ്രിയ താരജോടിയുടെ സാന്നിധ്യം കൊണ്ടാണ് റിലീസ് വേളയില്‍ ശ്രദ്ധിക്കപ്പെട്ടതെങ്കിലും വര്‍ഷങ്ങള്‍ക്കിപ്പുറവും പുതിയ തലമുറ കാണികള്‍ക്കിടയിലും ഓര്‍മ്മിക്കപ്പെടുന്നത് കുതിരവട്ടം പപ്പുവിന്റെ സുലൈമാന്‍ എന്ന റോഡ് റോളര്‍ ഡ്രൈവറിലൂടെയും അയാളുടെ സാഹസിക കഥകളിലൂടെയുമാണ്. 'താമരശ്ശേരി ചുരം' എന്ന സ്ഥലവും പ്രയോഗവും ശൈലിയും അമ്മായിവണ്ടി എന്ന വാഹനവും ജനപ്രിയമാകുന്നത് ഈ കഥാപാത്രത്തിലൂടെയാണ്. 

സുഗീതിന്റെ ഓര്‍ഡിനറിയിലെ പാലക്കാട്ടുകാരന്‍ ഡ്രൈവര്‍ സുകു എന്ന ബിജുമേനോന്‍ കഥാപാത്രമാണ് നായകനായ കുഞ്ചാക്കോ ബോബനേക്കാളും കൈയടി നേടുന്നത്. ബിജുമേനോന്റെ നായക സ്ഥാനത്തേക്കുള്ള വളര്‍ച്ചയില്‍ വഴിത്തിരിവാകുന്നതും ഈ കഥാപാത്രം തന്നെ. 

റോഷന്‍ ആന്‍ഡ്രൂസിന്റെ ഉദയനാണ് താരം ഉദയന്‍ എന്ന മോഹന്‍ലാലിന്റെ കേന്ദ്രകഥാപാത്രത്തിന്റെ ജീവിതത്തെ പിന്തുടരുന്നതോടൊപ്പം ശ്രീനിവാസന്റെ തെങ്ങുംമൂട് രാജപ്പന്‍ സരോജ്കുമാറായി മാറുന്ന കഥ കൂടി പറയുകയാണ്. ഈ സിനിമയില്‍ നായകനെക്കാളേറെ പ്രേക്ഷകപ്രീതി നേടുന്നത് രസികത്തവും പ്രതിനായക സ്വഭാവവുമുള്ള സരോജ്കുമാറാണ്. ശ്രീനിവാസന്റെ ഈ കഥാപാത്രം നേടിയ വന്‍ ജനപ്രീതിയെ തുടര്‍ന്നാണ് പദ്മശ്രീ ഭരത് ഡോക്ടര്‍ സരോജ്കുമാര്‍ എന്ന സീക്വല്‍ തന്നെ ഉണ്ടാകുന്നത്.

കിലുക്കത്തിലെ ജഗതിയുടെ നിശ്ചല്‍, മീശമാധവനിലെ ജഗതിയുടെ കൃഷ്ണവിലാസം ഭഗീരഥന്‍പിള്ള, ഗോഡ്ഫാദറിലെ എന്‍ എന്‍ പിള്ളയുടെ അഞ്ഞൂറാന്‍, ലേലത്തിലെ സോമന്റെ ആനക്കാട്ടില്‍ ഈപ്പച്ചന്‍, വെനീസിലെ വ്യാപാരിയിലെ സലിംകുമാറിന്റെ അല്‍ കമലാസനന്‍, ഈ പറക്കുംതളികയിലെ ഹരിശ്രീ അശോകന്റെ സുന്ദരന്‍, കൊച്ചിന്‍ ഹനീഫയുടെ സി ഐ വീരപ്പന്‍ കുറുപ്പ്, തിളക്കത്തിലെ സലിംകുമാറിന്റെ ഓമനക്കുട്ടന്‍, വണ്‍മാന്‍ഷോയിലെ സലിംകുമാറിന്റെ ഭാസ്‌കരന്‍, തൊമ്മനും മക്കളുമിലെ രാജന്‍ പി ദേവിന്റെ തൊമ്മന്‍, സലിംകുമാറിന്റെ രാജാക്കണ്ണ്, തെങ്കാശിപ്പട്ടണത്തിലെ ദിലീപിന്റെ ശത്രുഘ്‌നന്‍, പത്രത്തിലെ എന്‍ എഫ് വര്‍ഗീസിന്റെ വിശ്വനാഥന്‍, സത്യമേവ ജയതേയിലെ സിദ്ധിഖിന്റെ ബാലുഭായ്, കന്മദത്തിലെ മഞ്ജുവാര്യരുടെ ഭാനുമതി, സമ്മര്‍ ഇന്‍ ബത്‌ലഹേമിലെ മഞ്ജു വാര്യരുടെ അഭിരാമി, മുകുന്ദേട്ടാ സുമിത്ര വിളിക്കുന്നുവിലെ ശ്രീനിവാസന്റെ വിശ്വനാഥ്, സ്ഫടികത്തിലെ തിലകന്റെ ചാക്കോ മാഷ്, മൂന്നാംപക്കത്തിലെ തിലകന്റെ തമ്പി തുടങ്ങിയ കഥാപാത്രങ്ങള്‍ ശ്രദ്ധേയമായ പ്രകടനങ്ങള്‍ കൊണ്ട് അതതു സിനിമകളില്‍ ഏറ്റവുമധികം ഓര്‍മ്മിക്കുന്ന കഥാപാത്രങ്ങളാണ്. തെങ്കാശിപ്പട്ടണത്തില്‍ നായകന്മാരായ സുരേഷ് ഗോപിയേക്കാളും ലാലിനേക്കാളും ഹാസ്യാത്മകമായ പ്രകടനത്തിലൂടെയാണ് ദിലീപിന്റെ കഥാപാത്രം പ്രേക്ഷകപ്രീതി നേടുന്നത്. ഈ കഥാപാത്രത്തിന്റെ വിജയത്തിലൂടെയാണ് ദിലീപ് മുന്‍നിര നായക സ്ഥാനത്തേക്ക് പ്രതിഷ്ഠിക്കപ്പെടുന്നതും. 

ഹാസ്യകഥാപാത്രങ്ങളോട് പ്രേക്ഷകര്‍ക്ക് എപ്പോഴും പ്രത്യേക മമതയുണ്ട്. സിനിമ കണ്ട് ചിരിക്കാന്‍ ഇഷ്ടപ്പെടുന്നവരാണ് എല്ലാവരുമെന്നതു തന്നെയാണ് ഈ പ്രതിപത്തിക്കു കാരണം. അതുകൊണ്ടു തന്നെ തങ്ങളെ ചിരിപ്പിച്ച കഥാപാത്രങ്ങളെയായിരിക്കും പ്രേക്ഷകര്‍ എപ്പോഴും പ്രത്യേകം ഓര്‍മ്മിക്കുന്നതും ആവര്‍ത്തിച്ചു കാണാന്‍ താത്പര്യപ്പെടുന്നതും. എന്നാല്‍ ചിരിപ്പിക്കാതെ ഗൗരവതരമാര്‍ന്ന അഭിനയ പ്രകടനം കൊണ്ട് കേന്ദ്രകഥാപാത്രത്തെ നിഷ്പ്രഭരാക്കുന്നതും പ്രേക്ഷകര്‍ ആ സിനിമയില്‍ ഏറ്റവുമധികം ഓര്‍ത്തിരിക്കുന്നതുമായ ചില കഥാപാത്രങ്ങളുണ്ട്. മണിച്ചിത്രത്താഴിലെ ശോഭനയുടെ ഗംഗയും നാഗവല്ലിയുമായുള്ള പകര്‍ന്നാട്ടം അത്തരത്തിലൊന്നാണ്. ഈ സിനിമയില്‍ സവിശേഷവും രസികത്തം നിറഞ്ഞതുമായ മോഹന്‍ലാലിന്റെ ഡോ.സണ്ണിയെ ഇഷ്ടപ്പെടാതിരിക്കാനാവില്ലെങ്കിലും ശോഭനയുടെ പ്രകടനം വേറിട്ടു തന്നെ നില്‍ക്കുന്നു. ഈ സിനിമയോട് പ്രേക്ഷകര്‍ ആദ്യം ചേര്‍ത്തുവയ്ക്കുന്ന പേരും നാഗവല്ലിയുടെ അല്ലെങ്കില്‍ ശോഭനയുടേതു തന്നെ.

മാതൃഭൂമി ഓണ്‍ലൈന്‍, 2022 നവംബര്‍ 7, ഷോ റീല്‍ 34