ബ്ലാക്ക് ആന്റ് വൈറ്റില്‍ ആമസോണ്‍ ജീവിതം

ബ്ലാക്ക് ആന്റ് വൈറ്റ് സങ്കേതം ഉപയോഗിച്ച് ഒരു നൂറ്റാണ്ടു മുമ്പുള്ള കഥപറഞ്ഞ് പ്രേക്ഷകന് പൂര്‍ണ്ണ സംവേദനാത്മകത പകര്‍ന്നു നല്‍കുകയാണ് കൊളംബിയന്‍ സംവിധായകനായ സിറോ ഗുവേര. കേരള രാജ്യാന്തര ചലച്ചിത്ര മേളയില്‍ ലോക സിനിമാ വിഭാഗത്തില്‍ പ്രദര്‍ശിപ്പിച്ച അര്‍ജന്റിനിയന്‍ ചിത്രം 'എംബ്രേസ് ഓഫ് സര്‍പന്റ്' ആണ് ഈ പ്രത്യേകതകൊണ്ട് ശ്രദ്ധേയമായത്. 'ദി വിന്‍ഡ് ജേര്‍ണീസി'നു ശേഷം പുറത്തിറങ്ങുന്ന ഗുവേരയുടെ ചിത്രമാണിത്. ഇതിനോടകം പത്തോളം അന്താരാഷ്ട ചലച്ചിത്രമേളകളില്‍ പ്രദര്‍ശിപ്പിക്കുകയും അത്രതന്നെ പുരസ്‌ക്കാരങ്ങള്‍ നേടുകയും ചെയ്ത എംബ്രേസ് ഓഫ് സര്‍പന്റ് ഐ.എഫ്.എഫ്.കെയുടെയും ഇഷ്ടചിത്രമായി മാറിക്കഴിഞ്ഞു.

കൊളോണിയല്‍ കാലത്തെ കൊള്ളയുടെയും അധിനിവേശങ്ങളുടെയും ഫലമായി വടക്കേ അമേരിക്കയില്‍ കരനിഴല്‍ വീഴ്ത്തിയ ജീവിതസാഹചര്യങ്ങളെ വിമര്‍ശനാത്മകമായി സമീപിച്ചിരിക്കുകയാണ് ഈ ചിത്രം. ആമസോണ്‍ നദി അതിര്‍ത്തി പങ്കിടുന്ന രാജ്യങ്ങളിലെ ജീവിതം വിഷയമാകുന്ന എംബ്രേസ് ഓഫ് സര്‍പന്റ് ഒരു കാലഘട്ടത്തെ തീവ്രമായി അടയാളപ്പെടുത്തുകയും കൊള്ളരുതായ്മകളെ ചോദ്യം ചെയ്യുകയും ചെയ്യുന്നു.

ചിത്രത്തിലെ പ്രധാന കഥാപാത്രമായ കാരമാകറ്റേ ആമസോണ്‍കാരനായ മന്ത്രവാദിയാണ്. തന്റെ വംശത്തിലെ അവസാന കണ്ണി കൂടിയാണദ്ദേഹം. കാരമാകറ്റേയുടെ ജീവിതത്തിലെ രണ്ടു കാലഘട്ടങ്ങളില്‍ നിര്‍ണ്ണായക സാന്നിധ്യമായി മാറുന്ന ആമസോണിലെത്തുന്ന ശാസ്ത്രജ്ഞന്മാരോട് ഇഴചേരുന്നതാണ് ആ ജീവിതം. മനസ്സിനും ശരീരത്തിനും ആനന്ദവും ഉന്മാദവും പകരുന്ന കണ്ടെത്താന്‍ ഏറെ പ്രയാസമുള്ള യാക്കുരാനാ ചെടിയന്വേഷിച്ച് കൊളംബിയന്‍-ആമസോണ്‍ വനങ്ങളിലൂടെയുള്ള യാത്ര കൂടിയാണ് ചിത്രം. ആമസോണ്‍ നദിയുടെ വന്യതയും സൗന്ദര്യവും ചിത്രം ആകര്‍ഷകമായി പകര്‍ത്തിവെയ്ക്കാനും ചിത്രത്തിനാകുന്നു. സിരോ ഗുവേരയുടെ മൂന്നു ചിത്രങ്ങളില്‍ കൂടുതല്‍ അംഗീകാരം നേടിയെന്നതിനപ്പുറം സംവിധായകന്‍ എന്ന നിലയില്‍ അദ്ദേഹത്തിന്റെ ക്ലാസ് എന്ന് ആസ്വാദകരെക്കൊണ്ട് പറയിപ്പിക്കാനും'എംബ്രേസ് ഓഫ് സര്‍പന്റ്ി'നാകുന്നുണ്ട്.

ഐ.എഫ്.എഫ്.കെ-2015

മാതൃഭൂമി ഓണ്‍ലൈന്‍

ഒറ്റാലിന്റെ ജീവിതപാഠം

കേരള രാജ്യാന്തര ചലച്ചിത്ര മേളയില്‍ മത്സരവിഭാഗത്തില്‍ ആസ്വാദകപ്രശംസ പിടിച്ചുപറ്റി ജയരാജിന്റെ ഒറ്റാല്‍. മേളയിലെ ലോകസിനിമകളോട് മത്സരിക്കാന്‍ എന്തുകൊണ്ടും യോഗ്യമാണെന്ന് ഒറ്റാല്‍ ആദ്യ പ്രദര്‍ശനത്തോടെ തെളിയിച്ചു. തലസ്ഥാന നഗരിയിലെ ഏറ്റവും വലിയ തീയറ്ററായ ശ്രീകുമാറിലെ നിറഞ്ഞ സദസ്സിന്റെ നിലയ്ക്കാത്ത കൈയ്യടി ഒറ്റാലിനുള്ള അംഗീകാരമായി.
ആന്റണ്‍ ചെക്കോവിന്റെ 'വാങ്കേ' എന്ന ചെറുകഥയുടെ ചലച്ചിത്രാവിഷ്‌ക്കാരമാണ് ഒറ്റാല്‍. നഗരത്തില്‍ ജോലിക്ക് വന്ന കുട്ടി അവന്റെ ദയനീയമായ ജീവിതാവസ്ഥ മുത്തച്ഛനെ കത്തിലൂടെ അറിയിക്കുന്നതിന്റെ ആവിഷ്‌ക്കാരമാണ് ചെക്കോവിന്റെ 'വാങ്കേ'. അതിനെ മറ്റൊരു കഥാപശ്ചാത്തലത്തിലേക്ക് മാറ്റുകയായിരുന്നു ജയരാജ്.
കുട്ടനാട് പശ്ചാത്തലമാകുന്ന ചിത്രം വൃദ്ധനായ താറാവു കര്‍ഷകനും പേരക്കുട്ടിയും തമ്മിലുള്ള ബന്ധമാണ് പറയുന്നത്. കുമരകം വാസുദേവന്‍ എന്ന മത്സ്യത്തൊഴിലാളിയാണ് താറാവു കര്‍ഷകനെ അവതരിപ്പിക്കുന്നത്. പരുഷമായ ജീവിത സത്യങ്ങളും വിസ്മയിപ്പിക്കുന്ന പ്രകൃതിഭംഗിയും തനിമയാര്‍ന്ന സംഗീതവും ഇഴചേര്‍ന്ന ഒറ്റാല്‍ നേര്‍ത്ത വിങ്ങലോടെ കണ്ടവസാനിപ്പിക്കാനാകില്ല.
കുട്ടനാടന്‍ പ്രകൃതിയും മാനുഷികബന്ധവും പറയുമ്പോഴും ബാലവേലയുടെ ദുരിതം പേറുന്ന കുട്ടികളെയും ചിത്രം വിഷയമാക്കുന്നു. ഭരണകൂടത്തിന്റെ ഒത്താശയില്‍ നടക്കുന്ന ശിവകാശിയിലെ പടക്കക്കമ്പനികളില്‍ ആയിരക്കണക്കിന് കുട്ടികള്‍ ജോലി ചെയ്യുന്നുണ്ട്. അകപ്പെട്ടാല്‍ രക്ഷപ്പെട്ട് പുറത്തുപോകാന്‍ കഴിയാത്ത വലയാണിത്തരം കമ്പനികളെന്നത് സാമൂഹിക യാഥാര്‍ഥ്യമാണ്. അങ്ങനൊയൊരു ലോകത്താണ് ഒറ്റാലിലെ കുട്ടപ്പായി എന്ന ബാലനും പെട്ടുപോകുന്നത്. അവന്റെ നഷ്ടമായ നല്ല ജീവിതമാണ് ചിത്രം കാണിക്കുന്നത്.
എം.ജെ. രാധാകൃഷ്ണന്റെ ഛായാഗ്രഹണവും ശ്രീവത്സന്‍.ജെ.മേനോന്റെ പശ്ചാത്തലസംഗീതവും ഒറ്റാലിന്റെ മാറ്റുകൂട്ടുന്നു. ലൈവ് സൗണ്ടില്‍ ചിത്രീകരിച്ചുവെന്നതാണ് ചിത്രത്തിന്റെ മറ്റൊരു പ്രത്യേകത.
മികച്ച പരിസ്ഥിതി ചിത്രം, മികച്ച അവലംബിത തിരക്കഥ (ജോഷി മംഗലത്ത്) എന്നിവയ്ക്കുള്ള 2014ലെ ദേശീയ പുരസ്‌കാരവും മികച്ച ചിത്രത്തിനുള്ള സംസ്ഥാന ചലച്ചിത്ര പുരസ്‌കാരവും ഒറ്റാലിന് ലഭിച്ചിരുന്നു.

മാതൃഭൂമി, ഡിസംബര്‍ 6

ജീവിതത്തിനും ദുരന്തത്തിനുമിടയില്‍

പ്രകൃതിദുരന്തത്തിന് ഇരയാക്കപ്പെട്ട മനുഷ്യരുടെ പിന്നീടുള്ള ജീവിതത്തെക്കുറിച്ച് ചിന്തിക്കുകയാണ് ഫ്രഞ്ച്-ഹെയ്ത്തിയന്‍ ചിത്രമായ 'മര്‍ഡര്‍ ഇന്‍ പാകോത്'. 2010ലെ ഭൂകമ്പത്തില്‍ തകര്‍ത്തെറിയപ്പെട്ട ഹെയ്തിയിലെ മനുഷ്യരുടെ ദുരിതജീവിതം ഒരു കുടുംബത്തിലൂടെ ആവിഷ്‌ക്കരിക്കുന്ന ചിത്രം ജനങ്ങളുടെ നിസ്സഹായതയെ ഭരണകൂടം ചൂഷണം ചെയ്യുന്നതും വിഷയമാക്കുന്നു. ദുരന്തങ്ങളുടെ പശ്ചാത്തലത്തിലുണ്ടാകേണ്ട ഉത്തരവാദിത്തങ്ങളെയും നീതിയെയും സംബന്ധിച്ച അടിസ്ഥാനചോദ്യങ്ങള്‍ ചിത്രം ഉയര്‍ത്തുന്നുണ്ട്.

കരീബിയന്‍ രാജ്യമായ ഹെയ്ത്തിയില്‍ 2010ലുണ്ടായ ഭൂകമ്പത്തെ അതിജീവിച്ചത് വളരെ വേഗത്തിലായിരുന്നു. ഹെയ്ത്തിയന്‍ ജനതയുടെ നിശ്ചയദാര്‍ഢ്യമാണ് അതില്‍ പ്രതിഫലിച്ചത്. ഹെയ്ത്തിയിലെ ഭൂകമ്പത്തിന്റെ പശ്ചാത്തലത്തില്‍ അവിടുത്തെ ജനങ്ങളുടെ ജീവിതവും സാമൂഹ്യ പശ്ചാത്തലവും അന്വേഷിക്കുകയാണ് 'മര്‍ഡര്‍ ഇന്‍ പാകോത്' എന്ന സിനിമ.

റൗള്‍ പെക് സംവിധാനം ചെയ്ത ഈ ചലച്ചിത്രം 1968ല്‍ പുറത്തിറങ്ങിയ തിയറം എന്ന ചലച്ചിത്രത്തില്‍നിന്ന് പ്രചോദനമുള്‍ക്കൊണ്ടാണ് ചിത്രീകരിച്ചിട്ടുള്ളത്. ഹെയ്ത്തിയുടെ തലസ്ഥാന നഗരമായ പോര്‍ട്ട്ഓഫ്പ്രിന്‍സില്‍ താമസിക്കുന്ന മധ്യവര്‍ഗ്ഗത്തില്‍പെട്ട ഒരു കുടുംബവുമായി ബന്ധപ്പെട്ടാണ് 'മര്‍ഡര്‍ ഇന്‍ പാകോതി'ന്റെ കഥ. ജീവിതസാഹചര്യവും വീടും രണ്ടു കാറുകളുമൊക്കെയുണ്ടായിരുന്ന കുടുംബത്തിന് ഭൂകമ്പത്തോടെ എല്ലാം നഷ്ടപ്പെടുന്നു. വലിയ വീടിന് കാര്യമായ കേടുപാട് സംഭവിക്കുന്നുണ്ടെങ്കിലും അത് ശരിയാക്കിയെടുക്കാനുള്ള പണം അവരുടെ പക്കലില്ല. വീട് ഉടന്‍ നന്നാക്കിയെടുത്തില്ലെങ്കില്‍ കെട്ടിടം പൊളിച്ചു മാറ്റുമെന്ന മുന്നറിയിപ്പ് സര്‍ക്കാരിന്റെ കെട്ടിട വകുപ്പ് നല്‍കിയിട്ടുമുണ്ട്.

വിനാശകരമായ ഭൂകമ്പം യാഥാസ്ഥിതികമായ മാമൂലുകളെ പിന്തുടരുന്ന ഒരു സമൂഹത്തിലുണ്ടാക്കുന്ന മനശാസ്ത്രപരവും സാമ്പത്തികവും ഭൂമിശാസ്ത്രപരവുമായ മാറ്റങ്ങളെ അന്വേഷിക്കുകയാണ് 'മര്‍ഡര്‍ ഇന്‍ പാകോത്'.

ഐ.എഫ്.എഫ്.കെ-2015

മാതൃഭൂമി ഓണ്‍ലൈന്‍

'ജലാല്‍സ് സ്റ്റോറി' -കാപട്യങ്ങള്‍ തുറന്നുകാട്ടുന്ന കണ്ണാടി

നദിക്കരയില്‍ രൂപപ്പെടുന്ന ജീവിതങ്ങളുടെ കഥ പറയുന്ന ബംഗ്ലാദേശി സിനിമ 'ജലാല്‍സ് സ്റ്റോറി' ബംഗ്ലാദേശിലെ മതപരവും സാമൂഹ്യവും രാഷ്ട്രീയപരവുമായ കാപട്യങ്ങള്‍ക്കു നേരെ പിടിച്ച കണ്ണാടിയാണ്. സംവിധായകന്‍ അബു ഷാഹേദ് ഇമോന്റെ ആദ്യ സിനിമയാണിത്. 

ചലച്ചിത്രോത്സവത്തിന്റെ മത്സര വിഭാഗത്തില്‍ പ്രദര്‍ശിപ്പിച്ച 'ജലാല്‍സ് സ്റ്റോറി' ബംഗ്ലാദേശി ജീവിതത്തോട് ഏറെ അടുത്തുനില്‍ക്കുന്ന സിനിമ കൂടിയാണ്. ജനിച്ചു വീണതുമുതല്‍ നദിയില്‍ ഒഴുകി നടക്കുന്ന ജലാലിന്റെ ജീവിതത്തെയാണ് സിനിമ കേന്ദ്രീകരിക്കുന്നത്. നദിയാണ് അവന്റെ എല്ലാം. അതുകൊണ്ടുതന്നെ നദി സിനിമയില്‍ ഒരു പ്രധാന കഥാപാത്രം കൂടിയാകുന്നു.

ബംഗ്ലാദേശി ജീവിതം ഇപ്പൊഴും എത്രത്തോളം യാഥാസ്ഥിതികവും പാരമ്പര്യ മാമൂലുകളില്‍ ഒതുങ്ങുന്നതുമാണെന്ന് സിനിമ തുറന്നുപറയുന്നു. അന്ധവിശ്വാസങ്ങളില്‍ കുരുങ്ങിക്കിടക്കുന്ന ബംഗ്ലാദേശി ജീവിതത്തെ രസകരവും വിമര്‍ശനാത്മകവുമായാണ് സമീപിച്ചിരിക്കുന്നത്. നദിയില്‍ നിന്നുകിട്ടുന്ന കുട്ടിയും വിശ്വാസങ്ങളുടെ ഭാഗമാകുകയാണ്. കുട്ടിക്ക് ദിവ്യശക്തിയുണ്ടെന്ന് പ്രചരിക്കപ്പെടുന്നു. വിശ്വാസം വിറ്റ് എങ്ങനെ കാശാക്കാമെന്നും ചിലര്‍ കണക്കുകൂട്ടുന്നു. 

അറബിക്കഥപോലെ രസകരമാണ് ജലാലിന്റെ ജീവിതം. ഓരോ സ്ഥലത്തുനിന്നും ഒഴിവാക്കപ്പെടുമ്പോഴും ജലാല്‍ വീണ്ടും നദിയിലെത്തുകയും പിന്നീട് വേറെയേതെങ്കിലും ഗ്രാമത്തില്‍ എത്തിച്ചേരുകയും ചെയ്യുന്നു. അന്ധവിശ്വാസങ്ങളും ക്രിമിനല്‍ സ്വഭാവും ബാധിച്ച ഒരു സമൂഹത്തിനെ തുറന്നുകാട്ടുകയാണ് സംവിധായകന്‍. 

നദിയിലൂടെയുള്ള ജലാലിന്റെ ഒഴുകിവരവിന്റെ ഇടവേളകളെ ഉപയോഗപ്പെടുത്തി ചിത്രത്തെ മൂന്നായി വിഭജിച്ചാണ് അവതരിപ്പിച്ചിട്ടുള്ളത്. വളരെ രസകരമായി കണ്ടു തീര്‍ക്കാവുന്നതും പലപ്പോഴും നമ്മുടെ ജീവിതസാഹചര്യങ്ങളില്‍ തന്നെ സംഭവിക്കന്ന കഥയാണെ് വിശ്വസിച്ചുകൊണ്ടു കാണാവുന്നതുമാണ് 'ജലാല്‍സ് സ്റ്റോറി'. 

ഐ.എഫ്.എഫ്.കെ-2015

മാതൃഭൂമി ഓണ്‍ലൈന്‍

മൂന്ന് പ്രകൃതിച്ചിത്രങ്ങള്‍

കേരള രാജ്യാന്തര ചലച്ചിത്ര മേളയില്‍ ഈ വര്‍ഷം പരിസ്ഥിതി വിഷയമാകുന്ന മൂന്നു ചിത്രങ്ങള്‍ പ്രദര്‍ശിപ്പിച്ചു. മലയാളത്തില്‍ നിന്ന് രണ്ടും ഒരു കസാഖ് ചിത്രവുമാണ് പ്രകൃതിയും മനുഷ്യനും തമ്മിലുള്ള ബന്ധത്തെ കാണിച്ച് പ്രേക്ഷകശ്രദ്ധ നേടിയത്. 

ബോപെം

ഷന്ന ഇസ്സബയേവ സംവിധാനം ചെയ്ത 'ബോപെം' 14 വയസ്സുള്ള ഒരു ബാലന്റെ കഥയാണ്. അവന്റെ സമീപ പ്രദേശത്തുള്ള കടല്‍ ഇല്ലാതാവുന്നതിനോടും സ്വന്തം അമ്മ മരിക്കുന്നതിനോടും പൊരുത്തപ്പെടാന്‍ കഴിയാതെ ക്‌ളേശിക്കുന്ന ബാലന്റെ കഥ. കസഖ്സ്ഥാനിലെ ആരല്‍ കടല്‍ ഇല്ലാതാവുന്നതാണ്  ഈ സിനിമയ്ക്കു പ്രചോദനമായത്. ആരല്‍ കടല്‍ ഇല്ലാതാകുന്ന സാഹചര്യങ്ങളും അതിനെ അശ്രയിച്ചു കഴിഞ്ഞ ജനങ്ങളുടെ കഷ്ടപ്പാടുകളും അണ് സംവിധായികയെ ഈ ചിത്രമെടുക്കാന്‍  പ്രേരിപ്പിച്ചത്.  കസഖ്സ്ഥാനെയും ഉസ്‌ബെക്കിസ്ഥാനെയും തൊട്ടുകിടന്നിരുന്ന അരാല്‍ കടല്‍ അപ്രത്യക്ഷമായത് 

മണ്‍റോതുരുത്ത്

നവസംവിധായകന്‍ മനു പി.എസിന്റെ 'മണ്‍റോതുരുത്ത്' കൊല്ലത്തിനടുത്തുള്ള ഒരു ദ്വീപില്‍ ജീവിക്കുന്ന കുടുംബത്തെ കേന്ദ്രീകരിച്ചുള്ളതാണ്. ദ്വീപ് സാവധാനം മുങ്ങുകയാണ്. അതോടൊപ്പം വ്യക്തിബന്ധങ്ങളും പ്രത്യേകിച്ച് മുതിര്‍ന്ന തലമുറയും യുവതലമുറയും തമ്മിലുള്ള ബന്ധം ഇല്ലാതാകുന്നു.

 കല്ലടയാറ്റില്‍ അണക്കെട്ടു പണിയുന്നതടക്കം പലവിധ കാരണങ്ങളാല്‍ അഷ്ടമുടിക്കായലിലെ ചെറു ദ്വീപുകളുടെ കൂട്ടമായ മണ്‍റോതുരുത്ത് ക്രമേണ മുങ്ങിക്കൊണ്ടിരിക്കുകയാണെന്നാണ് ശാസ്ത്രജ്ഞന്മാരുടെ പക്ഷം.

ഒറ്റാല്‍

ആന്റണ്‍ ചെക്കോവിന്റെ വാങ്കേ എന്ന കഥയുടെ ചല്ചചിത്രാവി,്ക്കാരമാണ് ഒര്‌റാല്‍. എന്നാല്‍ ചെക്കോവിന്റെ കഥാപരിസരം തീര്‍ത്തും വ്യത്യസ്തമാണ്. ഇതിനെ കുട്ടനാടന്‍ പ്രകൃതിയിലേക്ക് പറിച്ചുനടുകയായിരുന്ന ജയരാജ്. 'ഒറ്റാല്‍' മികച്ച പരിസ്ഥിതി ചിത്രത്തിനുള്ള ദേശീയ അവാര്‍ഡ് ഈ വര്‍ഷം നേടിയിരുന്നു.  

ഒറ്റാലില്‍ കായല്‍ ശക്തമായ ഒരു കഥാപാത്രമാണ്. പ്രകൃതിയും മനുഷ്യനും തമ്മിലുള്ള അഭേദ്യബന്ധം ഒറ്റാലില്‍ കാണാം. കുട്ടികളെ മണ്ണിലേക്കിറക്കുന്ന ചിത്രം കാടും മലയും പുഴയും അറിയാതെ വളരുന്ന തലമുറയെക്കുറിച്ചു് ചോദ്യവും ഉന്നയിക്കുന്നുണ്ട്.

പരിസ്ഥിതി ഇതിവൃത്തമാക്കിയ ജയരാജ് ചിത്രം മുന്‍പും അംഗീകരിക്കപ്പെട്ടിട്ടുണ്ട്. നോണ്‍ ഫീച്ചര്‍ വിഭാഗത്തില്‍  'വെള്ളപ്പൊക്കത്തില്‍' എന്ന ചിത്രത്തിന് ജയരാജിനു മികച്ച സംവിധായകനുള്ള ദേശീയ അവാര്‍ഡ് ലഭിച്ചിട്ടുണ്ട് . കുട്ടനാട്ടില്‍ ഉണ്ടായിട്ടുള്ള ഏറ്റവും വലിയ വെള്ളപ്പൊക്കത്തെക്കുറിച്ചാണ് ആ ചിത്രം. തകഴി ശിവശങ്കരപ്പിള്ളയുടെ ചെറുകഥയാണ് ഈ ചിത്രത്തിനു പ്രചോദനമായത്.

ഐ.എഫ്.എഫ്.കെ-2015

മാതൃഭൂമി ഓണ്‍ലൈന്‍

ആസ്വാദകപ്രശംസ നേടി കൊറിയന്‍ സിനിമകള്‍

കേരള രാജ്യാന്തര ചലച്ചിത്ര മേളയില്‍ ഇത്തവണ ദക്ഷിണ കൊറിയയില്‍നിന്നുള്ള സിനിമകളുടെ പ്രത്യേക പാക്കേജ് അവതരിപ്പിച്ചത് കൊറിയന്‍ സിനിമകളോടുള്ള മലയാളികളുടെ താല്പര്യം മുന്നില്‍ കണ്ടുകൊണ്ടാണ്. ഈ താത്പര്യം ശരിവയ്ക്കുംവിധം കൊറിയന്‍ സിനിമകള്‍ പ്രദര്‍ശിപ്പിച്ച തീയറ്ററുകളില്‍ ഡെലിഗേറ്റുകളുടെ തള്ളിക്കയറ്റമുണ്ടാവുകയും ചെയ്തു. 

ദക്ഷിണ കൊറിയന്‍ സംവിധായകരില്‍ കിം കി ഡുക്കിനാണ് ഏറ്റവുമധികം മലയാളി പ്രേക്ഷകര്‍ ഉള്ളത്. ഐ.എഫ്.എഫ്.കെയുടെ കഴിഞ്ഞ നാല് എഡിഷനുകളില്‍ പ്രദര്‍ശിപ്പിച്ച കിം കി ഡുക്ക് ചിത്രങ്ങള്‍ അത്ര മികവ് പുലര്‍ത്താതിരുന്നിട്ടും ഇത്തവണയും കിം ചിത്രം കാണാന്‍ ആരാധകര്‍ ഇടിച്ചുകയറി. 

കൊറിയന്‍ പനോരമ വിഭാഗത്തില്‍ പ്രദര്‍ശിപ്പിച്ച സ്റ്റോപ്പ് ആണ് ഇത്തവണത്തെ ഐ.എഫ്.എഫ്.കെയിലെ കിം കി ഡുക്ക് ചിത്രം. ഫുക്കുഷിമ ആണവ ദുരന്തത്തിന്റെ പശ്ചാത്തലത്തില്‍ കഥ പറയുന്ന സ്റ്റോപ്പ് ദുരന്തങ്ങളില്‍ ഇരയാക്കപ്പെടുന്ന മനുഷ്യരുടെ നിസ്സഹായവസ്ഥും ഭരണകൂടത്തിന്റെ ഇടപെടലുകളും വിഷയമാക്കുന്നു. കിം കിഡുക്കിന്റെ മാറിയ ശൈലി ഈ സിനിമയില്‍ കാണാനാകും.

വാണിജ്യ സിനിമയുടെ പരമ്പരാഗത ശൈലിയില്‍ ചിത്രീകരിച്ചിട്ടുള്ളകിം സംഗ് ജെ സംവിധാനം ചെയ്ത 'ദി അണ്‍ ഫെയര്‍' ആണ് ഇത്തവണ പ്രദര്‍ശിപ്പിച്ച മറ്റൊരു കൊറിയന്‍ ചിത്രം. കൊറിയന്‍ വാണിജ്യ സിനിമ നേരിടുന്ന വെല്ലുവിളികളും നിലനില്‍പ്പിനായുള്ള പോരാട്ടവും എത്രത്തോളമുണ്ടെന്ന ചിന്തയാണ് പ്രേക്ഷകനില്‍ സൃഷ്ടിക്കുന്നത്. സാധാരണക്കാരും പോലീസും തമ്മിലുള്ള സംഘര്‍ഷവും കുറ്റാന്വേഷണവുമെല്ലാമടങ്ങുന്ന സ്ഥിരം വാണിജ്യ സിനിമകളുടെ ചേരുവകള്‍ ചേര്‍ത്തു വച്ചൊരു സിനിമയാണിതും. എങ്കിലും പലഘട്ടത്തിലും വാണിജ്യവത്കരണത്തിന്റെ ചേരുവകളെ മറച്ചുവച്ച് 'നല്ല  സിനിമയുടെ' മുഖവും 'ദി അണ്‍ഫെയര്‍' അണിയുന്നുണ്ട്. 

ഒരു അന്വേഷണാത്മക സിനിമ പ്രേക്ഷകനുള്ളില്‍ ഉണ്ടാക്കുന്ന ജിജ്ഞാസയും അമ്പരപ്പുമൊന്നും 'ദി അണ്‍ഫെയര്‍'എന്ന സിനിമയ്ക്ക് സൃഷ്ടിക്കാന്‍ കഴിഞ്ഞിട്ടില്ലെങ്കിലും ദക്ഷിണ കൊറിയയുടെ സാമൂഹ്യ രാഷ്ട്രീയാവസ്ഥകളെ മനസ്സിലാക്കിത്തരുവാന്‍ ചിത്രത്തിനായിട്ടുണ്ട്. 

ക്ലൗണ്‍ ഓഫ് എ സെയില്‍സ്മാന്‍, മഡോണ, ഓഫീസ്, റൈറ്റ് നൗ റോങ് ദെന്‍ എന്നീ ചിത്രങ്ങളാണ് കൊറിയന്‍ പനോരമ വിഭാഗത്തില്‍ പ്രദര്‍ശിപ്പിച്ച മറ്റു ചിത്രങ്ങള്‍.

ഐ.എഫ്.എഫ്.കെ-2015

മാതൃഭൂമി ഓണ്‍ലൈന്‍

ഒറ്റ ഷോട്ടില്‍ 'ഷാഡോ ബിഹൈന്‍ഡ് ദി മൂണ്‍'

ചലച്ചിത്ര മേളയിലെ മത്സര വിഭാഗത്തില്‍ പ്രദര്‍ശിപ്പിച്ച ഫിലിപ്പീന്‍സ് ചിത്രം 'ഷാഡോ ബിഹൈന്‍ഡ് ദി മൂണ്‍' ശ്രദ്ധേയമാകുന്നത് ഒറ്റ ഷോട്ടില്‍ ചിത്രീകരണം പൂര്‍ത്തിയാക്കി എന്നതിലാണ്. ഫിലിപ്പീന്‍സിന്റെ രാഷ്ട്രീയ സാഹചര്യങ്ങളും സായുധവിപ്ലവവും പട്ടാളനടപടിയും വരുത്തിവച്ച അരക്ഷിതാവസ്ഥയും പറയുന്ന സിനിമയില്‍ മൂന്ന് കഥാപാത്രങ്ങള്‍ മാത്രമാണുള്ളത്. ഒരുവീടിന്റെ ഉള്‍മുറിയും പുറത്തെ പരിസരവുമാണ് സിനിമയില്‍ കടന്നുവരുന്നത്. രണ്ടു മണിക്കൂറിനുള്ളില്‍ ഒരിടത്തു പോലും കാഴ്ച മുറിയുന്നില്ല. ജൂണ്‍ റോബിള്‍സ് ലാനയുടെ ഈ ചിത്രം ഫിലിപ്പീന്‍സില്‍ നിന്നുള്ള സിനിമാകാഴ്ചയില്‍ ആദ്യമാണെന്ന് പറയാം. സായുധ വിപ്ലവത്തെ തുടര്‍ന്ന് കാടിനു നടുവില്‍ ഒളിച്ചുതാമസിക്കുന്ന ദമ്പതികളും വിപ്ലവം അടിച്ചമര്‍ത്താനായി നിയോഗിച്ചിട്ടുള്ള പട്ടാളക്കാരനുമാണ് കഥാപാത്രങ്ങളായി വരുന്നത്.

സായുധ വിപ്ലവം ഫിലിപ്പീന്‍സ് എന്ന ചെറു ദ്വീപുരാജ്യത്തെ പട്ടിണിയിലും അരാജകത്വത്തിലുമാണെത്തിച്ചത്. അതില്‍ പട്ടാളക്കാരും സാധാരണക്കാരും കുട്ടികളുമെല്ലാമുണ്ട്. സായുധ വിപ്ലവത്തെ അടിച്ചമര്‍ത്താന്‍ സര്‍ക്കാര്‍ തീരുമാനിച്ചപ്പോള്‍ അതിലും ഭീകരമായിരുന്നു കാര്യങ്ങള്‍. അരാജകത്വത്തില്‍ നിന്ന് അരാജകത്വത്തിലേക്കായിരുന്നു ഫിലിപ്പീന്‍ ജനതയുടെ യാത്ര സിനിമയില്‍ കടന്നുവരുന്നു. 

മത്സരവിഭാഗത്തില്‍ പ്രദര്‍ശിപ്പിച്ച ചിത്രങ്ങളില്‍ പ്രേക്ഷകരുടെ ഇഷ്ടചിത്രങ്ങളില്‍ ഇടംപിടിക്കാന്‍'ഷാഡോ ബിഹൈന്‍ഡ് ദി മൂണി'ന് സാധിച്ചിട്ടുണ്ട്. ഒരു രാത്രിയില്‍ സംഭവിക്കുന്ന സിനിമ ഫിലിപ്പീന്‍സിന്റെ ചരിത്രത്തിലൂടെയാണ് പ്രേക്ഷകനെ കൊണ്ടുപോകുന്നത്.

ഐ.എഫ്.എഫ്.കെ-2015

മാതൃഭൂമി ഓണ്‍ലൈന്‍