ബലോടെലി
കഴിഞ്ഞ യൂറോ കപ്പ് (2012) കാലത്ത് എഴുതിയ ഫുട്‌ബോള്‍ കവിത
യൂറോ സെമി കണ്ടത് ജര്‍മന്‍ആരാധകനായി...ഇറ്റലിയുടെ ആദ്യ ഗോള്‍കാര്യമാക്കിയില്ല..എന്നാല്‍
മുപ്പത്തിയാരാം മിനുട്ടില്‍ബാല്ലോട്ടെലിയുടെ ഷോട്ട്..ആ നില്‍പ്പ്.....അങ്ങനെയാണ് ഞാന്‍ അസൂരിപ്പടയ്കു പിറകെ പോയത്..അതിനു ശേഷമാണ് ടെലിയെ കൂടുതല്‍ അറിയാന്‍
ശ്രമിച്ചത്...ഒരു ഹീറോ ജനിച്ചത്.. ആ ജീവിതം അറിഞ്ഞത്....
ടെല്ലീ....
ബലോടെല്ലീ*....
കറുത്തവനേ,
വംശാവലിയില്‍
കറുപ്പുചേര്‍ത്ത്
വരകള്‍ നെയ്തവര്‍ക്ക് നേരെ
നീ തൊടുത്ത അമ്പുകള്‍.
തലകൊണ്ട് ചെത്തിയെറിഞ്ഞത്
ബുള്ളറ്റ് വേഗമറിഞ്ഞ്
വലയിലേക്ക് പാഞ്ഞുചെന്നത്...
എത്ര നിസ്സഹായനായിരുന്നു
നൊയര്‍*
പ്രതിരോധപ്പടയാകെ
ആലസ്യം വെടിഞ്ഞ
രാത്രിയിലാണ്
അതിര് പാകിയ
മൊട്ടത്തലകൊണ്ട്
നീ ജര്‍മ്മന്‍ വലയെ
ഉണര്‍ത്തി വിട്ടത്
പകുതിവേളക്കും മുന്‍പേ
രണ്ടാമതും വലക്കണ്ണികളോട്
പരിചയം പുതുക്കി ആ നില്പ്,
എത്ര വേഗമാണത്
മനസ്സുകളുടെ പോസ്റ്റുകളെല്ലാം
തകര്‍ത്ത് പാഞ്ഞുകയറിയത്!
ഇറ്റലിക്കും
യൂറോപ്പിനുമപ്പുറത്തെ
ക്യാമറ കൂടി
നിന്നെ മാത്രം
ഫോക്കസിലാക്കുമ്പോഴും
ടെല്ലീ, നീയെത്ര
നിര്‍മമനായിരുന്നു.
ഏതു വികാരവേഗത്തിലും
ഇത്ര സമചിത്തനായി
എങ്ങനെ ലോകനെറുകയില്‍
നില്‍ക്കാനാകുന്നു!
ടെല്ലീ,
ഇനി നീ ഓര്‍ക്കപ്പെടുക
ജൂണ്‍ മാസമൊടുവില്‍
ജര്‍മ്മന്‍ വലകളെ
വിറപ്പിച്ച
കരുത്തുകൊണ്ടായിരിക്കും.
ഇതുവരേക്കും കൂട്ടുകൂടാത്ത
ഗോള്‍വലകളൊക്കെയും
ഇപ്പോള്‍
നിന്റെ വലംകാലുകളിലാണ്.
നിന്റെ മൊട്ടത്തലയിലെ
രണ്ടായി പകുത്ത
മുടിയതിരിനെ
പിന്നെയും
കടമെടുക്കുന്നു.
അതിരുകള്‍ക്കപ്പുറമിപ്പുറത്തുനിന്ന്
ഇനി നിനക്ക്
കയറിച്ചെല്ലാനുള്ളത്
സ്പാനിഷ് വേഗങ്ങളിലേക്കാണ്.
മുടിയതിരില്‍ നിന്നും
വിയര്‍പ്പുചാലായി
താഴേക്കു പടര്‍ന്ന്
ചുണ്ടുകളിലെത്തി
നില്‍ക്കുമ്പോള്‍
അവിടെക്കാണും ചിരി
നിന്റേതു തന്നെയാകും ടെല്ലീ........
* ഇറ്റാലിയന്‍ ഫുട്‌ബോള്‍ സ്‌െ്രെടക്കര്‍. ഘാന വംശജനായ ടെല്ലി വംശീയാധിക്ഷേപത്തിന് നിരവധി തവണ ഇരയായിട്ടുണ്ട്. ഇറ്റാലിയന്‍ പത്രമായ 'ഗസ്‌റ്റോ ഡെല്ലോ സ്‌പോര്‍ട്ടില്‍' ഈയിടെ വന്ന കാര്‍ട്ടൂണും വിവാദമായിരുന്നു. ഇത്തവണ യൂറോ ഫൈനലിലേക്ക് ഇറ്റലിയെ നയിച്ചത് ടെല്ലി നേടിയ രണ്ട് ഗോളുകളായിരുന്നു
* ജര്‍മ്മന്‍ ഗോള്‍കീപ്പര്‍
No comments:
Post a Comment