ആള്‍ക്കൂട്ടത്തിന്റെ സാധ്യതകള്‍ തേടിയ സംവിധായകന്‍

കുടുംബബന്ധങ്ങളുടെ കഥപറച്ചിലിലും അതാവിഷ്കരിക്കാൻ സ്റ്റുഡിയോ ഫ്ളോറുകളെയും ആശ്രയിച്ച് നാടകീയതയിൽ നിലകൊണ്ടുപോന്നിരുന്ന മലയാള സിനിമ എഴുപതുകളുടെ രണ്ടാം പകുതിയോടെ അതിൽനിന്ന് മോചനം നേടിയിരുന്നെങ്കിലും പൂർണമായി ജനമധ്യത്തിലേക്ക് എത്തിയിരുന്നില്ല. നിലനിന്നുപോന്ന ശൈലികളെയെല്ലാം പിറകിലേയ്ക്കാക്കി മലയാള സിനിമയെ തെരുവിലേക്കിറക്കുകയും ക്യാമറാ ഫ്രെയിമിലേക്ക് ആൾക്കൂട്ടത്തെ കൊണ്ടുവരികയും ചെയ്തത് എെ.വി.ശശിയായിരുന്നു. എൺപതുകളിലെ കേരളത്തിലെ തെരുവുകളെയും അവിടത്തെ മനുഷ്യരെയും അടയാളപ്പെടുത്തിയ സിനിമകളാണ് എെ.വി.ശശിയെ വലിയ  സിനിമകളുടെ സംവിധായകനാക്കി മാറ്റിയത്.
               

ഒരു കസേരയിൽ ശാന്തനായി ഇരുന്ന് പതിഞ്ഞ ശബ്ദത്തിൽ  നിർദേശങ്ങൾ കൊടുക്കുമ്പൊഴും വലിയൊരാൾക്കൂട്ടത്തെ തന്റെ ഫ്രെയിമുകളിൽ ഏറ്റവും ഫലപ്രദമായി ഉപയോഗിക്കാൻ അദ്ദേഹത്തിന് കഴിഞ്ഞു. എെ.വി.ശശി-ടി.ദാമോദരൻ കൂട്ടുകെട്ടിൽ 1980ൽ പിറന്ന 'അങ്ങാടി' മുതൽ സമൂഹത്തിന്റെ നേർപരിച്ഛേദമെന്നോണമുള്ള മനുഷ്യർ കഥാപാത്രങ്ങളായുള്ള സിനിമകൾ തുടർച്ചയായി സൃഷ്ടിക്കപ്പെട്ടു. രാഷ്ട്രീയക്കാരെയും അബ്കാരി മുതലാളിമാരെയും ഫാക്ടറി തൊഴിലാളികളെയും കള്ളക്കടത്തുകാരെയും വേശ്യകളെയും കൂട്ടിക്കൊടുപ്പുകാരെയും കൂലിത്തല്ലുകാരെയുമെല്ലാം ഇൗ സിനിമകൾ മുഖ്യധാരയിൽ കൊണ്ടുവന്നു. സമൂഹത്തിലെ തിന്മകൾക്കെതിരെ ഉറച്ചുനിന്നു പൊരുതുന്ന മനുഷ്യരുടെ പ്രതിനിധികൾ അങ്ങാടിയിലെ ചുമടെടുക്കുന്നവരിൽനിന്നും കൂലിവേലക്കാരിൽനിന്നും ട്രേഡ് യൂണിയൻ നേതാക്കളിൽ നിന്നുമുണ്ടായി. സുകുമാരനും രതീഷും ജയനും മമ്മൂട്ടിയും മോഹൻലാലും സീമയും സ്ക്രീനിൽ നിറഞ്ഞുനിന്ന് അനീതിക്കെതിരെ ഉറച്ച ശബ്ദമായി മാറിയപ്പോൾ അവരിൽ തങ്ങളെ തന്നെയായിരുന്നു കേരളത്തിലെ സാധാരണക്കാരായ പ്രേക്ഷകർ കണ്ടത്.   ഇൗ സിനിമകളിൽ നായകന്മാർക്കൊപ്പം ഉപനായകന്മാരും ചെറിയ കഥാപാത്രങ്ങളും വ്യക്തിത്വമുള്ള കഥാപാത്രങ്ങളായിരുന്നു. ബാലൻ കെ.നായരും പപ്പുവും കുഞ്ചനും  കുഞ്ഞാണ്ടിയുമെല്ലാം എെ.വി.ശശി സിനിമകളിൽ ചുറ്റുമുള്ള സാധാരണക്കാരന്റെ പ്രതിനിധികളും ഉറച്ച ശബ്ദമുള്ളവരുമായി മാറി.
           

അടിയന്തരാവസ്ഥക്കാലത്തെ മൗനത്തിനുശേഷം മലയാള സിനിമ ഉറക്കെ രാഷ്ട്രീയം വിളിച്ചുപറയാൻ ധൈര്യം കാട്ടിത്തുടങ്ങിയത് ടി.ദാമോദരൻ-എെ.വി.ശശി കൂട്ടുകെട്ടിലെ സിനിമകളിലൂടെയാണ്. നിലനിന്ന രാഷ്ട്രീയ സാഹചര്യങ്ങളോടും അതിലെ പ്രശ്നകേന്ദ്രങ്ങളോടും സ്ഥിരം കലഹിക്കുകയും തിന്മയെ തെരുവിൽ വലിച്ചിഴക്കുകയും ചെയ്യുന്ന കഥാപാത്രങ്ങളായിരുന്നു ഇൗ സിനിമകളിൽ എഴുന്നുനിന്നത്. സാധാരണക്കാരന് സമൂഹത്തോട് പറയാനുള്ള ഉറച്ച ശബ്ദമായി മാറുകയായിരുന്നു ഇൗ സിനിമകൾ. നൂറോളം നടീനടന്മാരും അതിന്റെ ഇരട്ടിയിലധികം ജൂനിയർ ആർട്ടിസ്റ്റുകളും അല്ലാതെയുള്ള ജനങ്ങളും  ഇത്തരം സിനിമകളുടെ ഭാഗമായി മാറി. ഇവരെല്ലാം സ്ക്രീനിൽ പ്രത്യക്ഷപ്പെട്ടപ്പോൾ കാണികൾക്കത് പുതിയ കാഴ്ചാനുഭവമായി. ഉയർന്ന മുടക്കമുതലിൽ വന്ന ഇൗ ചിത്രങ്ങളെല്ലാം ബോക്സോഫീസിൽ അതുവരെയുള്ള റെക്കോർ‌ഡുകൾ ഭേദിക്കുന്നവയായി മാറി. അങ്ങാടി, ഇൗ നാട്, അഹിംസ, വാർത്ത, ആവനാഴി, അതിരാത്രം, അടിമകൾ ഉടമകൾ, അബ്കാരി, 1921 തുടങ്ങിയ സിനിമകളെല്ലാം ഇങ്ങനെ വലിയ ജനക്കൂട്ടത്തെ തീയേറ്ററുകളിലെത്തിച്ചവയായിരുന്നു. കരച്ചിലും ചിരിയും മാത്രമുൾക്കൊള്ളുന്ന കാഴ്ചശീലത്തിനു വിപരീതമായി തീയേറ്ററിൽനിന്ന് ഉച്ചത്തിലുള്ള കൈയ്യടികളും ആർപ്പുവിളികളും  ഉയർത്തിവിടുന്ന പുതിയ ശീലത്തിനും എൺപതുകളിൽ ഇൗ സിനിമകൾ തുടക്കമിട്ടു.    
               

കലാമൂല്യവും വാണിജ്യതന്ത്രവും ഒരുമിച്ചുചേർത്ത എെ.വി.ശശി സിനിമകൾ നിലനിന്നുപോന്ന നായക,നായികാ സങ്കൽപങ്ങളെയും മാറ്റിമറിച്ചു. കരുത്തരായ നായകന്മാർക്കൊപ്പം തന്റേടമുള്ള നായികമാരെയും എെ.വി.ശശിയുടെ സിനിമകളിൽ കണ്ടു. ഇൗ നായികമാർ പലപ്പൊഴും നായകന്മാർക്കൊപ്പവും മുകളിലും നിന്നു. മുഖാമുഖം നിന്ന് വെല്ലുവിളിക്കുകയും ദീർഘമായ ഡയലോഗുകൾ പറയുകയും ബൈക്ക് ഓടിക്കാനും വില്ലന്മാരെ ഇടിക്കാൻ പോലും തയ്യാറാവുന്ന നായികമാരെയും  ഇൗ സിനിമകളിൽ കാണാനായി. 


2017 ഒക്ടോബര്‍ 24, കേരളകൗമുദി ഓണ്‍ലൈന്‍