വില്ലന് നായകന്റെയല്ല, സംവിധായകന്റെ സിനിമ
മലയാളത്തില്‍ കണ്ടുശീലിച്ച കുറ്റാന്വേഷണ സിനിമകളുടെ കഥാവേഗമോ ചടുലതയോ സംഭാഷണമാതൃകയോ അനുശീലിക്കുന്ന സിനിമയല്ല ബി.ഉണ്ണികൃഷ്ണന്‍-മോഹന്‍ലാല്‍ ടീമിന്റെ വില്ലന്. കൃത്യമായ പ്രമേയവും അതിനു യോജിക്കുന്ന കഥാപാത്രങ്ങളും പശ്ചാത്തലവും ഒരുക്കി ഒരു സംവിധായകന്‍ മെനഞ്ഞെടുത്ത സൃഷ്ടിയാണ്. കുറ്റാന്വേഷണകഥകളില്‍ കണ്ടേക്കാവുന്ന ട്വിസ്റ്റോ സസ്‌പെന്‍സോ വില്ലനിലില്ല. ഇതൊന്നുമില്ലാതെ തന്നെ കണ്ടിരിക്കാവുന്ന സിനിമയായി വില്ലനെ മാറ്റുന്നത് മോഹന്‍ലാലിന്റെ അപാരമായ സ്‌ക്രീന്‍ പ്രസന്‍സും ബി.ഉണ്ണികൃഷ്ണനിലെ സംവിധായക മികവുകൊണ്ടുമാണ്.
'ഒരു മനുഷ്യന്‍ മറ്റൊരു മനുഷ്യനെ കൊല്ലുന്നതുപോലെ അസ്വാഭാവികമായി മറ്റൊന്നും ഈ ലോകത്തില്ല', വില്ലന്റെ ടീസര്‍ റിലീസ് ചെയ്തതുമുതല്‍ ശ്രദ്ധിക്കപ്പെട്ട മാത്യു മാഞ്ഞൂരാന്റെ ഈ സംഭാഷണം തന്നെയാണ് സിനിമ നല്‍കുന്ന സന്ദേശവും. വിശാല്‍ അവതരിപ്പിക്കുന്ന ഡോ.ശക്തിവേല്‍ സമൂഹത്തില്‍ അനീതി ചെയ്യുന്നവര്‍ക്കെതിരെ ശിക്ഷ നടപ്പാക്കാന്‍ സ്വയംവിധേയനാകുന്ന കഥാപാത്രമാണ്. അയാള്‍ക്ക് തന്റെതായ ശരികളുണ്ടെങ്കിലും കൊലപാതകികളെയും ഏകാധിപതികളെയും ആരാധിക്കുന്നത് വിഡ്ഢിത്തമാണെന്നാണ് മാഞ്ഞൂരാന്‍ ശക്തിവേലിനെ തിരുത്തുന്നത്. എല്ലാ വില്ലനിലും ഒരു നായകനുണ്ട്, അതുപോലെ തിരിച്ചും.ആരാണ് നായകന്‍, ആരാണ് പ്രതിനായകന്‍ എന്ന ചോദ്യത്തിനും സിനിമ ഉത്തരം തേടുന്നു.
പ്രായത്തിലും വേഷത്തിലും പക്വതയാര്‍ന്ന കഥാപാത്രമായി മോഹന്‍ലാല്‍ വില്ലനില്‍ മികച്ചുനില്‍ക്കുന്നു. മിതത്വം സൂക്ഷിക്കുന്ന ഭാവപ്രകടനങ്ങളും അര്‍ഥവത്തായ സംഭാഷണങ്ങളും അതിമാനുഷികമായി യാതൊന്നും ചെയ്തു കൂട്ടാതെയും മാത്യു മാഞ്ഞൂരാന്‍ എന്ന കഥാപാത്രം മോഹന്‍ലാലിന്റെ കൈയ്യില്‍ ഭദ്രമാകുന്നു. മഞ്ജുവാര്യരുടെ കഥാപാത്രത്തിന് ചിത്രത്തില്‍ വലിയൊരു പ്രാധാന്യം കിട്ടുന്നില്ല. വിശാലിന്റെ മലയാളത്തിലേക്കുള്ള പ്രവേശനം മോശമായില്ല. മോഹന്‍ലാലുമൊത്തുള്ള കോമ്പോ സീനുകളിലും വിശാലിന്റെ പ്രകടനം ശ്രദ്ധിക്കപ്പെടുന്നതായി.
മനോജ് പരമഹംസ, എന്‍.കെ.ഏകാംബരം (ക്യാമറ),സുഷിന്‍ ശ്യാം (പശ്ചാത്തലസംഗീതം), ഷമീര്‍ മുഹമ്മദ് (എഡിറ്റിംഗ്) എന്നിവരുടെ പേരുകള്‍ വില്ലന്റെ മേക്കിംഗ് മികവില്‍ പ്രത്യേക അഭിനന്ദനമര്‍ഹിക്കുന്നു.
2017 ഒക്ടോബര്‍ 27, കേരളകൗമുദി ഓണ്‍ലൈന്‍
No comments:
Post a Comment