കൊച്ചി മെട്രോ തൂണുകൾ രാവെളിച്ചത്തിൽ ഭീമാകാരൻ നിഴലു തീർത്ത് മണ്ണിൽ വീണുകിടക്കുമ്പോൾ നീയും ഞാനും നമ്മളായി അരികു ചേർന്ന് വിരൽ ചേർത്ത് നടന്നു തീർത്ത നഗരവഴികൾ. പാതിരാവിനെയും പകലാക്കിയും നട്ടുച്ചകളെ നിലാവാക്കിയും നമ്മൾ തീർത്ത വർത്തമാനങ്ങളും സ്വപ്നങ്ങളും. നടന്നുതീർത്ത വഴികളിലൊക്കെയും കണ്ടത് നിന്നെയാണ്. അണച്ചു നിന്നപ്പൊഴൊക്കെയും പത്തു വിരലുകൾ ഇഴചേർന്നിട്ടുണ്ടായിരുന്നു. ഇനി നടക്കാനുള്ള വഴികൾക്കൊക്കെയും നിന്റെ പേരാണ്.
തീരാപ്രണയത്തിനു പിറകെയുള്ള യാത്രയാണ് മായാനദി. മാത്തന്റെയും അപ്പുവിന്റെയും പ്രണയം നമ്മളിലോരോരുത്തരുടേതുമായി മാറുന്നത് അവരുടെ പ്രണയയാത്രയ്ക്കൊക്കൊപ്പം അരൂപികളായി സഞ്ചരിച്ച മറ്റു രണ്ടു പേർ നമ്മൾ തന്നെയായിരുന്നു എന്നതുകൊണ്ടായിരിക്കണം. ഇരു വഴിയായിട്ടും ഒരുവഴിയാകാൻ അവസാനവട്ട ശ്രമവും നടത്തുന്ന നായകൻ, പ്രണയത്തിനു വേണ്ടിയുള്ള അവന്റെ അലച്ചിൽ, എത്ര കണ്ടില്ലെന്നു നടിക്കാൻ തീരുമാനിച്ചിട്ടും പ്രണയത്തിലേക്കു തന്നെ തിരിച്ചെത്തുന്ന പ്രണയിനി. ഒടുവിൽ നേരത്തെ തീരുമാനിച്ചുറപ്പിച്ചിട്ടുള്ള അന്തിമവിധി മാത്തനുമേൽ നടപ്പിലാക്കപ്പെടുമ്പോൾ അപ്പുവിനെ പോലെ നമ്മളും കാത്തിരിക്കുകയാണ്, എങ്ങനെയും അവൻ തിരിച്ചെത്തുമെന്ന പ്രതീക്ഷയിൽ കണ്ണയച്ച്..
മലയാളത്തിന്റെ മുൻനിര നായകനിരയിലേക്ക് ഉയർന്നുവരുന്ന ടൊവീനോ തോമസിന് തന്റെ കരിയറിൽ ലഭിച്ച വ്യത്യസ്മതമായ കഥാപാത്രമാണ് മാത്തൻ. മിതത്വത്തോടെ മനോഹരമായി ടൊവീനോ മാത്തനെ അവതരിപ്പിക്കുകയും ചെയ്തു. അപ്പു എന്ന അപർണയായി എത്തിയ ഐശ്വര്യ ലക്ഷ്മി കരിയറിന്റെ തുടക്കത്തിൽ തന്നെ അതിശക്തമായ കഥാപാത്രത്തെ അത്രമേൽ സ്വാഭാവികമായാണ് അവതരിപ്പിച്ചിരിക്കുന്നത്.
ജയേഷ് മോഹന്റെ ഛായാഗ്രഹണവും റെക്‌സ് വിജയന്റെ സംഗീതവും മായാനദിയെ കൂടുതൽ സുന്ദരമാക്കുന്നുണ്ട്. ഷഹബാസ് അമന്റെ പ്രണയാതുരമായ ശബ്ദം പാട്ടുകളുടെ മനോഹാരിത വർധിപ്പിക്കുന്നു. ആഷിക്ക് അബു എന്ന സംവിധായകന്റെ കയ്യൊപ്പ് പതിഞ്ഞ ചിത്രമാണ് മായാനദി.
സ്ത്രീശബ്ദം, 2018 ജനുവരി
No comments:
Post a Comment