'എല്ലോ'യിലേക്കാണെല്ലാരുമിപ്പോള്‍
നവമാധ്യമ രംഗത്തെ പുതിയ സാന്നിധ്യമായ എല്ലോയിലേക്കാണ് എല്ലാവരുടെയും ശ്രദ്ധയിപ്പോള്‍. ഇക്കഴിഞ്ഞ ആഗസ്റ്റില്‍ തുടങ്ങിയെങ്കിലും ഈയടുത്താണ് എല്ലോ ജനശ്രദ്ധയാകര്‍ഷിക്കുന്നത്. അമേരിക്കയിലെ വെര്‍മണ്ടില്‍ ബൈക്ക് ഷോപ്പ് ഉടമയായ പോള്‍ ബുഡ്‌നിസാണ് എല്ലോയുടെ സ്രഷ്ടാവ്. തന്റെ പരിചയ വലയത്തിലുള്ള 90 സുഹൃത്തുക്കള്‍ക്കായി അദ്ദേഹം തുടങ്ങിയ ഇന്റര്‍നെറ്റ് കൂട്ടായ്മയാണ് ഇപ്പോള്‍ ലോകത്ത് തരംഗം തീര്‍ക്കുന്നത്.
ഈ വര്‍ഷം ആഗസ്ത് ഏഴിനായിരുന്നു തുടക്കം. മണിക്കൂറില്‍ 31000 റിക്വസ്റ്റുകളാണ് ഇപ്പോള്‍ ലഭിക്കുന്നതെന്ന്് 'എല്ലോ' സ്ഥാപകനായ പോള്‍ ബുഡ്‌നിട്‌സ് പറയുന്നു. പരസ്യം സ്വീകരിക്കില്ലെന്നും അംഗങ്ങളുടെ വിവരങ്ങള്‍ വാണിജ്യാവശ്യത്തിനായി കൈമാറില്ലെന്നുമുള്ള ബുഡ്‌നിസിന്റെ പ്രഖ്യാപനമാണ് 'എല്ലോ'യെ ഫേസ്്ബുക്കില്‍നിന്ന് വ്യത്യസ്തമാക്കുന്നത്. ആന്റി ഫേസ്്ബുക്ക് എന്ന വിശേഷണം ശരിയല്ലെന്നും ബുഡ്‌നിസ് പറയുന്നു: 'ഞങ്ങള്‍ അവരുടെ എതിരാളിയല്ല. അവര്‍ പരസ്യങ്ങളുടെ വേദിയാണ്, ഞങ്ങള്‍ കൂട്ടായ്മയുടേതും'. ഭാവിയില്‍ ചില അധികസേവനങ്ങള്‍ക്ക് ചാര്‍ജ് ഈടാക്കുമെന്ന സൂചനയും അദ്ദേഹം നല്‍കി.
നവമാധ്യമ ലോകത്തെ പുതിയ മാറ്റങ്ങള്‍ ശ്രദ്ധയോടെ വീക്ഷിക്കുന്ന മലയാളി സമൂഹത്തിലും എല്ലോ തരംഗമെത്തിയിട്ടുണ്ട്. ഫേസ്ബുക്കിനെ മടുത്തുതുടങ്ങിയവരും അല്ലാത്തവരും ഇക്കൂട്ടത്തിലുണ്ട്. നടന്‍ മമ്മൂട്ടി അക്കൗണ്ട് തുടങ്ങി എന്നതാണ് കേരളത്തില്‍ നിന്നുമുള്ള ഏറ്റവും പുതിയ എല്ലോ വാര്‍ത്ത. എല്ലോയില്‍ അക്കൗണ്ട് തുടങ്ങിയ കാര്യം ഫേസ്ബുക്കിലൂടെയാണ് മമ്മൂട്ടി അറിയിച്ചത്. എല്ലോ ഡോട്ട് കോം സ്ലാഷ് മമ്മൂട്ടിയെന്നാണ് അക്കൗണ്ട് യു ആര്‍എ ല്‍. എല്ലോയില്‍ അക്കൗണ്ട് തുടങ്ങുന്ന കേരളത്തിലെ ആദ്യത്തെ പ്രമുഖനാണ് മമ്മൂട്ടി.
വാട്‌സാപിന്റെ വരവോടുകൂടി ഫേസ്ബുക്കിന് അല്‍പ്പം ഇടിവ് വന്നിരുന്നു. വാട്‌സാപിനെ ഏറ്റെടുത്തതോടുകൂടി ഈ കുറവ് മറികടക്കാന്‍ ഫേസ്ബുക്ക് മാനേജ്‌മെന്റിനായിരുന്നു. എന്നാല്‍ എല്ലോയുടെ വരവ് ഫേസ്ബുക്ക് എങ്ങനെ ചെറുക്കും എന്ന ആകാംക്ഷയിലാണ് നവമാധ്യമ കുതുകികള്‍.
വീക്ഷണം, ഒക്ടോബര്‍ 2
No comments:
Post a Comment