മേളയിലെ മികച്ച ചിത്രങ്ങളേതൊക്കെയെന്ന് അഭിപ്രായം പരന്നതോടെ ആ സിനിമകള്‍ കാണാനുള്ള ഓട്ടത്തിലാണ് പ്രതിനിധികള്‍. ഈ സിനിമകള്‍ പ്രദര്‍ശിപ്പിക്കുന്ന തീയറ്ററുകളിലായിരുന്നു ബുധനാഴ്ച തിരക്ക് കൂടുതല്‍. മികച്ച അഭിപ്രായമുള്ള സിനിമകളുടെ തീയറ്ററുകള്‍ക്കുമുന്നില്‍ വലിയ ക്യൂവും അല്ലാത്ത തീയറ്റര്‍ പരിസരങ്ങള്‍ ആളൊഴിഞ്ഞുമിരുന്നു.
മത്സരവിഭാഗത്തില്‍ പ്രദര്‍ശിപ്പിച്ച കസാഖ് ചിത്രം 'ബൊപ'ത്തിനും ലോകസിനിമാ വിഭാഗത്തില്‍പെട്ട ത്രീഡി ചിത്രം ലൗവിനും വന്‍തിരക്കാണ് അനുഭവപ്പെട്ടത്. 'ബൊപം' പ്രദര്‍ശിപ്പിച്ച ടാഗോര്‍ തീയറ്ററില്‍ വൈകുന്നേരം മുതല്‍ നീണ്ട ക്യൂവായിരുന്നു. സീറ്റുകള്‍ നിറഞ്ഞതോടെ നിലത്തിരിക്കാനായി ഡെലിഗേറ്റുകളുടെ മത്സരം. ഇതിനിടെ ടാഗോര്‍ തീയറ്ററില്‍ അഞ്ചുമണിക്ക് സംവിധായകന്‍ ദാരുഷ് മെഹ്‌റുജിയുമായുള്ള സംവാദത്തിനുശേഷം പ്രതിനിധികളില്‍ ചിലര്‍ തീയറ്റര്‍ വിട്ടിറങ്ങാത്തത് ചെറിയ കശപിശക്കിടയാക്കി. തീയറ്ററില്‍ കയറിക്കൂടാന്‍ കഴിയാത്ത പ്രതിനിധികളില്‍ ഒരു വിഭാഗം ടാഗോര്‍ മുറ്റത്ത് വൈകുന്നേരത്തെ കലാപരിപാടികള്‍ ആസ്വദിക്കാന്‍ കൂടി. കണ്ണൂരില്‍ നിന്നുള്ള കലാകാര•ാര്‍ അവതരിപ്പിച്ച തെയ്യമായിരുന്നു ബുധനാഴ്ച അരങ്ങേറിയത്.
ടാഗോറില്‍നിന്നും ഒട്ടും വ്യത്യസ്തമായിരുന്നില്ല ഗാസ്പര്‍ നോവിന്റെ 'ലൗ' പ്രദര്‍ശിപ്പിച്ച നിശാഗന്ധിയിലെ സ്ഥിതിയും. രാത്രി 10.30നായിരുന്നു പ്രദര്‍ശനം. റിസര്‍വേഷന്‍ തുടങ്ങി മിനിറ്റുകള്‍ക്കകം തീര്‍ന്ന ലൗവിന്റെ ആദ്യപ്രദര്‍ശനത്തിന് ക്യൂനിന്ന് കയറാന്‍ വൈകിട്ട് ഏഴോടെ പ്രതിനിധികള്‍ കനകക്കുന്ന് പരിസരത്തെത്തിയിരുന്നു. നിശാഗന്ധിയില്‍ 8.30ന് 'ദ ഐഡല്‍' പ്രദര്‍ശനം തുടങ്ങുന്നതിനുമുമ്പേ ലൗവിന് ക്യൂ തുടങ്ങിയതും കൗതുകമായി. റിസര്‍വേഷന്‍ കഴിഞ്ഞ് ബാക്കിയുള്ള 40 ശതമാനം സീറ്റുകള്‍ക്ക് അതിനിരട്ടിയിലധികം ആളുകള്‍ എത്തിയതോടെ അവരെ നിയന്ത്രിക്കാന്‍ വളണ്ടിയര്‍മാര്‍ക്കും പോലീസിനും നന്നേ പണിപ്പെടേണ്ടിവന്നു. ഗോവ ഫിലിം ഫെസ്റ്റിവലില്‍ മികച്ച അഭിപ്രായം ഉണ്ടാക്കിയ ചൂടന്‍ രംഗങ്ങള്‍ നിറഞ്ഞ 'ലൗ' ഐ.എഫ്.എഫ്.കെ തുടങ്ങുന്നതിനുമുമ്പെ പ്രതിനിധികള്‍ക്കിടയില്‍ ചര്‍ച്ചയായിരുന്നു.
മത്സരവിഭാഗത്തില്‍ ബുധനാഴ്ച പ്രദര്‍ശിപ്പിച്ച 11 സിനിമകളില്‍ ദ വയലിന്‍ പ്ലേയര്‍, പ്രൊജക്ട് ഓഫ് ദി സെഞ്ച്വറി, ജലാല്‍സ് സ്റ്റോറി, ഇമ്മോര്‍ട്ടല്‍, ബൊപം, ഒറ്റാല്‍ എന്നിവ പ്രേക്ഷകപ്രീതിയില്‍ മുന്‍പന്തിയിലെത്തി. കൊറിയന്‍ പനോരമ വിഭാഗത്തിലെ ദ അണ്‍ഫെയര്‍, ഫസ്റ്റ് ലുക്ക് വിഭാഗത്തില്‍ ലാംബ് എന്നിവയും ആറാംദിനം പ്രേക്ഷക ഹൃദയത്തില്‍ ഇടം നേടിയ ചിത്രങ്ങളാണ്.
മേള അവസാനിക്കാന്‍ രണ്ടുദിവസം മാത്രം ബാക്കിയിരിക്കെ പരമാവധി നല്ല സിനിമകള്‍ കാണാനായിരിക്കും വ്യാഴാഴ്ചയും പ്രതിനിധികളുടെ തയ്യാറെടുപ്പ്. പരാതികള്‍ക്കും പ്രതിഷേധങ്ങള്‍ക്കും പ്രസക്തിയില്ലാത്ത മേളയില്‍ സിനിമ മാത്രമാണ് മുന്നില്‍ നില്‍ക്കുന്നത്. എവിടെയും ചര്‍ച്ചകള്‍ ഏതൊക്കെ സിനിമകള്‍ കണ്ടു, നല്ലതേതൊക്കെ എന്നതാണ്. ഈ പ്രത്യേകത കൊണ്ടു തന്നെയാകും 2015ലെ മേള ഓര്‍ക്കപ്പെടുക എന്നാണ് പ്രതിനിധികള്‍ക്കിടയിലെ സംസാരം.
മാതൃഭൂമി, ഡിസംബര്‍ 10- ഐ.എഫ്.എഫ്.കെ, 2015
No comments:
Post a Comment