ഗാസ്പര്‍ നോവിന്റെ ഫ്രഞ്ച്-ബെല്‍ജിയം ചിത്രം 'ലൗ'വിന്റെ രണ്ടാമത്തെ പ്രദര്‍ശനത്തിനും ഈ മേള കണ്ട വലിയ തള്ളിക്കയറ്റം. വ്യാഴാഴ്ച രാത്രി 9.30ന് രമ്യ തീയറ്ററില്‍ പ്രദര്‍ശിപ്പിച്ച ചിത്രം കാണാന്‍ വൈകുന്നേരം ഏഴോടെ തീയറ്റര്‍ മുറ്റത്ത് ആളെത്തിത്തുടങ്ങി. എട്ടോടെ തീയറ്റര്‍ പരിസരം വണ്ടികളെക്കൊണ്ടും ഡെലിഗേറ്റുകളെക്കൊണ്ടും നിറഞ്ഞു. ഇതോടെ തീയറ്ററിനു മുന്‍വശത്തെ റോഡും ബ്ലോക്കായി. തലേദിവസം ഈ സിനിമയുടെ ആദ്യപ്രദര്‍ശനത്തിന് നിശാഗന്ധിയിലുണ്ടായ തിരക്കും സംഘര്‍ഷവും മുന്നില്‍ക്കണ്ട് കൂടുതല്‍ വളണ്ടിയര്‍മാരെയും പോലീസിനെയും രമ്യ തീയറ്ററില്‍ ചുമതലപ്പെടുത്തിയിരുന്നു. എന്നിട്ടും തിരക്ക് നിയന്ത്രിക്കാന്‍ ഇവര്‍ക്ക് നന്നേ പാടുപെടേണ്ടിവന്നു. ലൗവിന്റെ ആദ്യപ്രദര്‍ശനത്തിന് മേളയിലെ ഏറ്റവും വലിയ തീയറ്ററായ നിശാഗന്ധിയില്‍ ഉള്‍ക്കൊള്ളാവുന്നതിന്റെ ഇരട്ടി ഡെലിഗേറ്റുകളായിരുന്നു സിനിമ കാണാനെത്തിയത്.
മേളയില്‍ മികച്ച അഭിപ്രായമുണ്ടാക്കിയ ചിത്രങ്ങള്‍ കാണാനുള്ള തിരക്കിലായിരുന്നു ഡെലിഗേറ്റുകള്‍. മേളയിലെ നല്ല സിനിമകള്‍ കാണാനുള്ള അവസാന അവസരം എന്ന നിലയില്‍ ആ സിനിമകള്‍ പ്രദര്‍ശിപ്പിച്ച തീയറ്ററുകളിലേക്ക് ഡെലിഗേറ്റുകളുടെ തളളിക്കയറ്റവും കണ്ടു. മത്സരവിഭാഗത്തില്‍ യോന(കൈരളി), ക്ലാരിസ് ഓഫ് സംതിങ് എബൗട്ട് അസ്, ഇമ്മോര്‍ട്ടല്‍, ഷാഡോ ബിഹൈന്‍ഡ് ദ മൂണ്‍(ശ്രീ), ദ ബ്ലാക്ക് ഹെന്‍ (കലാഭവന്‍), പ്രൊജക്ട് ഓഫ് ദ സെഞ്ച്വറി, ജലാല്‍സ് സ്റ്റോറി (ശ്രീവിശാഖ്) എന്നീ ചിത്രങ്ങളാണ് വ്യാഴാഴ്ച പ്രദര്‍ശിപ്പിച്ചത്.
മത്സരസിനിമകളേക്കാള്‍ നല്ല അഭിപ്രായം കേള്‍പ്പിച്ച ലോകസിനിമാ വിഭാഗത്തിലെ ചിത്രങ്ങളും കഴിഞ്ഞ ദിവസം കാഴ്ചക്കാരുടെ മുന്നിലെത്തി. പലസ്തീന്‍ ചിത്രം ദ ഐഡല്‍, ഇറാന്‍ ചിത്രം ടാക്‌സി, കൊളംബിയന്‍ ചിത്രം എംബ്രേസ് ഓഫ് ദ സര്‍പന്റ്, തുര്‍ക്കി ചിത്രം മുസ്താങ്, ജര്‍മ്മന്‍ ചിത്രം വിക്ടോറിയ, പലസ്തീന്‍-ഫ്രഞ്ച് ചിത്രം ഡീഗ്രേഡ്, പാക് ചിത്രം മൂര്‍, മലയാള ചിത്രം ഒഴിവുദിവസത്തെ കളി തുടങ്ങിയ സിനിമകള്‍ക്കായിരുന്നു കാണികളേറെയും.
മേള സമാപിക്കുന്ന വെള്ളിയാഴ്ച കൈരളി, ശ്രീ, നിള, കലാഭവന്‍, ടാഗോര്‍ എന്നീ സര്‍ക്കാര്‍ തീയറ്ററുകളില്‍ മാത്രമാണ് പ്രദര്‍ശനമുള്ളത്. വൈകുന്നേരം നിശാഗന്ധിയില്‍ നടക്കുന്ന പുരസ്‌കാരദാനച്ചടങ്ങുകളോടെ ഇരുപതാമത് കേരള രാജ്യാന്തര ചലച്ചിത്രമേളയ്ക്ക് തിരശ്ശീല വീഴും.
എന്‍.പി.മുരളീകൃഷ്ണന്‍
മാതൃഭൂമി, ഡിസംബര്‍ 11- ഐ.എഫ്.എഫ്.കെ 2015
No comments:
Post a Comment