പ്രകൃതിയുടെ നിഗൂഢതയും സ്വാതന്ത്ര്യവും വരച്ചുകാട്ടി വൂള്‍ഫ് ടോട്ടം
പരുക്കനും വന്യവുമായ പ്രകൃതിയുടെ നിഗൂഢതയും സ്വാതന്ത്ര്യവും കടന്നുവരുന്ന ജീന്‍ ഴാക്ക് അന്നൗഡിന്റെ വൂള്‍ഫ് ടോട്ടം ആസ്വാദകശ്രദ്ധനേടി. കേരള രാജ്യാന്തര ചലച്ചിത്ര മേളയിലെ ഉദ്ഘാടന ചിത്രമായി നിശാഗന്ധിയില്‍ പ്രദര്‍ശിപ്പിച്ച വൂള്‍ഫ് ടോട്ടം 1967 ലെ ചൈനയുടെ വനപ്രദേശങ്ങളുടെ പശ്ചാത്തലത്തില്‍ കഥ പറയുന്ന ചിത്രമാണ്. സിനിമയില്‍ വന്യത അതിന്റെ രൗദ്രതയില്‍ ആവിഷ്‌ക്കരിക്കപ്പെടുന്നു. പ്രകൃതിയുടെ മാസ്മരികത ത്രീഡി വിസ്മയത്തില്‍ കാഴ്ചക്കാരില്‍ എത്തിച്ചാണ് കേരള രാജ്യാന്തര മേളയില്‍ ഈ ചിത്രം ശ്രദ്ധ നേടിയത്.
ബീജിങില്‍ നിന്നുളള വിദ്യാര്‍ഥിയായ ചെന്‍ ഷെന്‍ ഗോത്രവര്‍ഗ ആട്ടിടയന്മാരുടെ ജീവിതം പഠിക്കുന്നതിനായാണ് മംഗോളിയയില്‍ എത്തുന്നത്. ചെന്നായ്ക്കളും ഇടയന്മാരും തമ്മിലുള്ള നിഗൂഢബന്ധത്താല്‍ വശീകരിക്കപ്പെടുന്ന ചെന്‍ ഒരു ചെന്നായ്ക്കുട്ടിയെ മെരുക്കാന്‍ ശ്രമിക്കുന്നു. സര്‍ക്കാറിന്റെ ഇടപെടലോടെ പ്രതിസന്ധിയിലാകുന്ന പ്രകൃതിയും മനുഷ്യനും തമ്മിലുള്ള ബന്ധം സിനിമ വരച്ചുകാട്ടുന്നു. ആട്ടിടയ സമൂഹത്തിന്റെ ജീവിതം, സ്വാതന്ത്ര്യം, ഉത്തരവാദിത്വവും അവരുടെ ഏറ്റവും വലിയ ശത്രുവായ പുല്‍മേട്ടിലെ ചെന്നായയുടെ വന്യതയുമെല്ലാം സിനിമയുടെ പശ്ചാത്തലമായി വരുന്നു. മനുഷ്യനും പ്രകൃതിയും തമ്മിലുളള ബന്ധവും അതിന്റെ സങ്കീര്‍ണതകളും ചിത്രത്തിന് രാഷ്ട്രീയമായ നിറവും നല്‍കുന്നു.
കേരള രാജ്യാന്തര ചലച്ചിത്ര മേളയില്‍ ആദ്യമായി പ്രദര്‍ശിപ്പിക്കുന്ന ത്രീഡി സിനിമ എന്ന നിലയില്‍ ഏറെ കൗതുകത്തോടെയാണ് ഡെലിഗേറ്റുകള്‍ ചിത്രത്തെ കണ്ടത്. ചിത്രത്തില്‍ ചെന്നായ്ക്കളുടെ വന്യത പ്രത്യക്ഷമാകുന്ന ദൃശ്യങ്ങളിലാണ് ത്രീഡി കാഴ്ച ഏറെ വിസ്മയം സമ്മാനിച്ചത്.
വോള്‍ഫ് ടോട്ടത്തിനുപുറമെ ആറു ത്രിഡി ചലച്ചിത്രങ്ങളാണ് വരുംദിവസങ്ങളില്‍ പ്രദര്‍ശനത്തിനെത്തുന്നത്. ഫാന്റസിയില്‍നിന്ന് വ്യത്യസ്തമായി ജീവിതഗന്ധിയായ ചലച്ചിത്രങ്ങള്‍ ത്രീഡിയില്‍ ഒരുക്കിയിട്ടുളളത് ചലച്ചിത്രപ്രേമികള്‍ക്ക് നവ്യാനുഭവമാകും.
രമ്യ, ന്യൂ സ്‌ക്രീന്‍-1 എന്നിവിടങ്ങളിലാണ് ത്രീഡി ചിത്രങ്ങള്‍ പ്രദര്‍ശിപ്പിക്കുന്നത്. എല്ലാ പ്രദര്‍ശനവേദികളിലും ത്രീഡി കണ്ണടകള്‍ പ്രേക്ഷകര്‍ക്ക് നല്‍കും. ആങ് ലീയുടെ ലൈഫ് ഓഫ് പൈ, റിഡ്‌ലി സ്‌കോട്ടിന്റെ ദി മാര്‍ട്ടിന്‍ എന്നിവ ഇതിനകം കേരളത്തില്‍ റിലീസ് ചെയ്തിട്ടുളളവയാണ്. ഫാന്റസി വിഭാഗത്തില്‍ പെടുന്ന മറ്റൊരു ചിത്രമായ ജോണ്‍ റൈറ്റിന്റെ പാന്‍ ആദ്യമായാണ് സംസ്ഥാനത്തെത്തുന്നത്. ലവ്, എവരിതിംഗ് വില്‍ ബി ഫൈന്‍ എന്നിവയാണ് മറ്റു ചിത്രങ്ങള്‍.
ഐ.എഫ്.എഫ്.കെ-2015
മാതൃഭൂമി ഓണ്‍ലൈന്‍
No comments:
Post a Comment