ആളുകൾ മരിക്കുമ്പോൾ എങ്ങനെ സമാധാനിക്കാനാകും

"ഏറെക്കാലം കൂടിയാണ് ഇങ്ങനെ വീട്ടിലിരിക്കുന്നത്. തിരക്കുപിടിച്ച ഷൂട്ടിംഗ് ഷെഡ്യൂളുകളില്ല, യാത്രകളില്ല. സ്വസ്ഥം. എന്നാലും ഒരു സന്തോഷം കിട്ടുന്നില്ല. ഇതൊരു അവധിക്കാലമായൊന്നും തോന്നുന്നില്ല. ലോകം ഒരു മഹാമാരിയുടെ പിടിയിലാണ്. ഒട്ടനവധി ആളുകൾ മരിച്ചു. ഇപ്പോഴും രോഗഭീതി വിട്ടൊഴിഞ്ഞിട്ടില്ല. പിന്നെങ്ങനെ സമാധാനിക്കാനാകും?" തിരുവനന്തപുരം കുമാരപുരത്തെ വീട്ടിലിരുന്ന് ഇന്ദ്രൻസ് കൊവിഡ് വൈറസ് വ്യാപനത്തെക്കുറിച്ചുള്ള തൻ്റെ ആശങ്ക പങ്കുവയ്ക്കുന്നു.

    ലോക്ക് ഡൗൺ പ്രഖ്യാപിക്കുന്നതിനു മുമ്പ് അട്ടപ്പാടിയിൽ ഷൂട്ടിംഗിലായിരുന്നു ഇന്ദ്രൻസ്. അപ്പോൾ തന്നെ കേരളത്തിൽ കൊവിഡ് ആശങ്കകൾ കേട്ടു തുടങ്ങിയിരുന്നു. അട്ടപ്പാടിയിലെ ഷൂട്ടിംഗ് തീർത്ത് തൊടുപുഴയിൽ മറ്റൊരു സിനിമയിൽ ജോയിൻ ചെയ്തു. അപ്പോഴേക്ക് കൊവിഡ് വ്യാപനം തുടങ്ങി. അതോടെ ഷൂട്ടിംഗ് പെട്ടെന്ന് നിർത്തി. അങ്ങനെ ലോക്ക് ഡൗൺ പ്രഖ്യാപനത്തിനു മുമ്പു തന്നെ ഇന്ദ്രൻസും വീട്ടിലെത്തി. പിന്നെ കഴിഞ്ഞ ഒരു മാസത്തോളമായി ഭാര്യക്കും മകനും മരുമകൾക്കുമൊപ്പം വീട്ടിൽ.

ആധി വിട്ടുപോകുന്നില്ല

ലോകം മുഴുവൻ കീഴടക്കുന്ന ഒരു മഹാവ്യാധി. കേട്ടുകേൾവി പോലുമില്ലാത്ത കാര്യമായതുകൊണ്ട് എന്താകും, എവിടെ ചെന്നവസാനിക്കും എന്നെല്ലാം ആലോചിച്ചിട്ട് ഒരെത്തും പിടിയും കിട്ടുന്നില്ല. എല്ലാം കീഴടക്കാമെന്നുള്ള മനുഷ്യൻ്റെ അഹങ്കാരം ഇത്തരമൊരു രോഗത്തിനു മുന്നിൽ തകർന്നടിയുകയാണ്. ഒന്നും ചെയ്യാൻ പറ്റാതെ നിസ്സഹായരായി പോകുന്നു. അതുകൊണ്ടു തന്നെ വീണുകിട്ടിയ വിശ്രമവേളയിൽ പോലും ഒരു കാര്യത്തിലും കൂടുതൽ ശ്രദ്ധിക്കാനോ സന്തോഷം കണ്ടെത്താനോ ആകുന്നില്ല. അവധി ദിവസങ്ങൾ എങ്ങനെ ആഘോഷിക്കുന്നു എന്നൊക്കെ പലരും ചോദിച്ചു കേൾക്കാറുണ്ട്. ആഘോഷമെന്നൊക്കെ ഈ സമയത്തെ വിളിക്കാമോ? എനിക്കങ്ങനെ ചിന്തിക്കാനേ ആകുന്നില്ല. ഒരു തരം നിസ്സംഗത വന്നു കൂടിയിട്ടുണ്ട്.

വായനയുണ്ട് ; പഴയ തയ്യൽ മെഷീൻ നേരെയാക്കി

വായന തന്നെയാണ് പ്രധാന നേരംപോക്ക്. രാവിലെ പത്രം വായിക്കും. പിന്നെ മറ്റു പുസ്തകങ്ങൾ. ഗുരുസാഗരം ഒന്നുകൂടി വായിച്ചു. എം.എൻ വിജയൻ മാഷിൻ്റെ ലേഖന സമാഹാരങ്ങൾ, അഴീക്കോട് മാഷിൻ്റെ തത്വമസി എന്നിവയുടെയും പുനർവായന കഴിഞ്ഞു. അജയ് പി. മങ്ങാട്ടിൻ്റെ സൂസന്നയുടെ ഗ്രന്ഥപ്പുരയാണ് ഒടുവിൽ വായിച്ചത്. നല്ല പുസ്തകമാണ്. പുതുമയുള്ള ആഖ്യാനം. ഇപ്പോൾ വായിക്കുന്നത് ആർ.രാജശ്രീയുടെ കല്യാണിയെന്നും ദാക്ഷായണിയെന്നും പേരായ രണ്ടു സ്ത്രീകളുടെ കത എന്ന പുസ്തകമാണ്. കണ്ണൂർ ഭാഷയായതുകൊണ്ട് ചില വാക്കുകളൊക്കെ വായിച്ചു മനസ്സിലാക്കാൻ പ്രയാസപ്പെട്ടു. പക്ഷേ നല്ല രസമാണ്. ഒഴുക്കോടെ വായിച്ചുപോകാം.

       വീട്ടിൽ പഴയ രണ്ടു തയ്യൽ മെഷീൻ ഉണ്ടായിരുന്നു. കുറേക്കാലമായി ഉപയോഗിച്ചിട്ട്. തുരുമ്പ് വന്നു. എണ്ണയിട്ട് ശരിയാക്കി. ഇപ്പോൾ അതിൽ ഇരുന്ന് അല്ലനേരം തയ്ക്കും. മാസ്ക്കാണ് തയ്ക്കുന്നത്. കൊവിഡ് വിട്ടുപോയാലും ഇനി ചിലപ്പോൾ നമ്മൾ മാസ്ക്ക് ഉപയോഗിക്കുമായിരിക്കും. തയ്ക്കുന്നത് സ്കൂൾ കുട്ടികൾക്കോ മറ്റ് ആവശ്യക്കാർക്കോ കൊടുക്കാം.

    പിന്നെ അല്പം കൃഷിയുണ്ട്. കൃഷിഭവനിൽ നിന്ന് കിട്ടിയ വെണ്ടയും പച്ചമുളകും തക്കാളിയുമൊക്കെ വളർന്നിട്ടുണ്ട്. കുറേ സമയം ചെടികൾക്കൊപ്പം പോകും.

        പാചകം ഇല്ല. വലിയ ഭക്ഷണത്തോട് വലിയ താത്പര്യമില്ലാത്തതു കൊണ്ട് പാചക പരീക്ഷണങ്ങളും ഇല്ല.

       ടീവിയിൽ സിനിമ കാണുന്നതിൽ വലിയ താത്പര്യമില്ല. തിയേറ്ററിൽ പോയി സിനിമ കാണുന്നതാണ് ഇഷ്ടം. ടീവിയിൽ വാർത്ത കാണും.

കേരളത്തിൽ ജീവിക്കുന്നതിൽ അഭിമാനം

കൊവിഡ് നിവാരണ പ്രവർത്തനങ്ങളിൽ കേരളം ലോകത്തിന് മാതൃകയാണ്. നമ്മുടെ സാമൂഹിക, ആരോഗ്യപ്രവർത്തകരോട് നന്ദി പറയണം. അത്രയും ക്ഷമയോടെയും കരുണയോടെയുമാണ് അവർ രോഗികളെ പരിചരിച്ചത്. നമ്മൾ കാത്തുസൂക്ഷിക്കുന്നൊരു മൂല്യമുണ്ട്. അതാണ് ആരോഗ്യപ്രവർത്തകർ അവരുടെ കർമ്മ മേഖലയിൽ പാലിച്ചത്. നമ്മളെല്ലാം ഇങ്ങനെ സുരക്ഷിതരായി ഇരിക്കുന്നതിനു പിന്നിൽ ആരോഗ്യ വകുപ്പിൻ്റെയും സർക്കാരിൻ്റെയും വലിയ ജാഗ്രതയുണ്ട്. വലിയൊരു പരിധി വരെ ജനങ്ങളും സർക്കാരിനോട് സഹകരിച്ചു. കേരളത്തിൽ ജീവിക്കാനായതിൽ ഈ സമയത്ത് നമ്മൾ അഭിമാനിക്കണം.

സിനിമാ ഇൻഡസ്ട്രിയെപ്പറ്റി ആശങ്കയുണ്ട്

കോടികൾ മുടക്കിയ ഒരുപാട് സിനിമകളുടെ റിലീസാണ് മുടങ്ങിയത്. ഷൂട്ടിംഗ് മുടങ്ങിയതും അതുപോലെ. മരയ്ക്കാർ -അറബിക്കടലിൻ്റെ സിംഹം, മാലിക്ക് പോലുള്ള ബിഗ് ബഡ്ജറ്റ് സിനിമകളുടെ റിലീസ് മുടങ്ങിയത് ഇൻഡസ്ട്രിയെ ശരിക്ക് ബാധിക്കും. വേറെയും കുറേ സിനിമകൾ. ഈ സിനിമകളെല്ലാം എന്ന് പുറത്തിറങ്ങും, എന്നു തൊട്ട് പഴയ പോലെ ആളുകൾ തിയേറ്ററിലെത്തി തുടങ്ങും എന്നൊന്നും ഇപ്പോൾ പറയാനാവില്ലല്ലോ. സിനിമാ മേഖല പഴയ പടിയാകാൻ ശരിക്കും സമയമെടുക്കും. ഒരുപാടാളുകൾ ഇതിനെ ആശ്രയിച്ചു ജീവിക്കുന്നുണ്ട്.

       മാലിക്ക്, ഹിഗ്വിറ്റ, മെമ്പർ ഗണേശൻ, പടവെട്ട്, അനുഗ്രഹീതൻ ആൻറണി, ജാക്ക് ആൻഡ് ജിൽ, കൊച്ചാൾ എന്നിവയാണ് ഇനി പുറത്തിറങ്ങാനുള്ള എൻ്റെ സിനിമകൾ.

എല്ലാവരും വീട്ടിലിരിക്കൂ..

വീട്ടിലിരിക്കുക എന്നതു തന്നെയാണ് ഇപ്പോൾ നമുക്ക് സമൂഹത്തോട് ചെയ്യാനുള്ള എറ്റവും വലിയ സഹായം. നമുക്കും, മറ്റാർക്കും അസുഖം വരാതിരിക്കാൻ അതുകൊണ്ടാകും. ആരോഗ്യപ്രവർത്തകരെയും പൊലിസിനെയും അനുസരിക്കാം.

       ഒരുമിച്ചിരിക്കാനും ഭക്ഷണം കഴിക്കാനും സമയമില്ലെന്നായിരുന്നല്ലോ നമ്മുടെ വലിയ പരാതി. ഇപ്പോൾ എല്ലാവർക്കും അതെല്ലാം സാധിക്കുന്നുണ്ട്. അതെല്ലാം നല്ലതിനാകും. കുറേക്കൂടി ദൃഢമായ ബന്ധങ്ങൾ ഉണ്ടാകാനും കൂടെയുള്ളവർക്ക് പരിഗണന നൽകാനും ഈ ദിവസങ്ങൾ ഉപകരിച്ചേക്കും.

വാരാന്ത്യകൗമുദി, 2020 ഏപ്രിൽ 19

സ്ത്രീവിമോചന പോരാട്ടത്തിന്റെ മുഖമായി 'മെയ്ഡ് ഇൻ ബംഗ്ലാദേശ് '

തൊഴിൽരംഗത്തെ മാനേജ്‌മെന്റ് ചൂഷണവും നീതിക്കു വേണ്ടിയുള്ള പോരാട്ടവും പ്രമേയമാകുന്ന ബംഗ്ലാദേശി ചിത്രമാണ് 'മെയ്ഡ് ഇൻ ബംഗ്ലാദേശ്  '. തൊഴിൽമേഖലയിലെ ചൂഷണം തിരിച്ചറിയാതെയും, തിരിച്ചറിഞ്ഞിട്ടും പ്രതികരിക്കാതെയും ഒതുങ്ങിക്കൂടുന്നവരാണ് ഒട്ടുമിക്ക തൊഴിലാളികളും. മെയ്ഡ് ഇൻ ബംഗ്ലാദേശിലെ പ്രധാന കഥാപാത്രങ്ങളായ നെയ്ത്തു തൊഴിലാളി സ്ത്രീകളും അങ്ങനെയുള്ളവരാണ്. തൊഴിലിടത്തിലെ തിക്താനുഭവങ്ങൾ അവരെയും സംഘടിതരാക്കുകയാണ്. ലോകത്തെവിടെയും ഏതു കാലത്തും പ്രസക്തമായ വിഷയം കൈകാര്യം ചെയ്യുന്നതിലൂടെയാണ് ബംഗ്ലാദേശി യുവ സംവിധായിക റുബായത്ത് ഹുസൈൻ്റെ ചിത്രത്തിന് ആഗോളമുഖം കൈവരുന്നത്.

      ധാക്ക നഗരത്തിലെ ഒരു തുണിനെയ്ത്ത് സ്ഥാപനവും അവിടത്തെ വനിതാ തൊഴിലാളികളുമാണ് ചിത്രത്തിലെ കേന്ദ്രം. നഗരപ്രാന്തത്തിലെ ചേരിപ്രദേശത്തുള്ളവരാണ് ഈ തൊഴിലാളികളെല്ലാം. തൊഴിലിടത്തിൽ ശമ്പളകാര്യത്തിലും കൂടുതൽ സമയം ജോലി ചെയ്യിച്ചും അതിനുള്ള വേതനം നൽകാതെയും സ്ത്രീകളെന്ന പരിഗണന നൽകാതെയും തൊഴിലെടുപ്പിക്കുകയാണ് മാനേജ്‌മെന്റ്. സഹികെട്ട് ഇതിനെതിരെ പ്രതികരിക്കുകയും യൂണിയൻ രൂപീകരിക്കുകയും ചെയ്യുകയാണ് സ്ത്രീകൾ. തൊഴിലിന്റെ മഹത്വവും ചൂഷണത്തിനെതിരെ തൊഴിലാളികൾ സംഘടിക്കേണ്ട ആവശ്യകതയും ചർച്ചചെയ്യുന്ന സിനിമ സ്ത്രീശക്തിയുടെയും അവകാശ പോരാട്ടത്തിന്റെയും വിളംബരം കൂടിയാണ്. കുടുംബത്തിൽ തളച്ചിടേണ്ടവരല്ല തങ്ങളെന്നുള്ള ബംഗ്ലാദേശി മുസ്ലീം സ്ത്രീകളുടെ പ്രഖ്യാപനം കൂടിയാണ് സിനിമ നടത്തുന്നത്. ലളിതമായ ആഖ്യാനത്തിലൂടെ നഗര ചേരീപ്രദേശത്തിന്റെ നിറമില്ലാത്ത ജീവിത ചിത്രങ്ങൾ സിനിമയിലുടനീളം വിളക്കിച്ചേർത്തിടുന്നതിലും കാണികൾക്ക് അത് അനുഭവവേദ്യമാക്കുന്നതിലും സംവിധായിക വിജയിക്കുന്നു.

ബംഗ്ലാദേശിന്റെ  വിശ്വ ചലച്ചിത്രകാരി

2011 മുതൽക്കുള്ള ഒമ്പതു വർഷത്തിനിടെ മൂന്ന് സിനിമകളാണ് റുബായത് ഹുസൈൻ സംവിധാനം ചെയ്തിട്ടുള്ളത്. ജീവിച്ചിരിക്കുന്ന സമൂഹത്തോടുള്ള തന്റെ പ്രതികരണമാണ് റുബായത്തിന്റെ സിനിമകളുടെ ഉള്ളടക്കം. ആദ്യചിത്രമായ മെഹർജാൻ ബംഗാളി യുവതിയും പാക് സൈനികനും തമ്മിലുള്ള പ്രണയമാണ് വിഷയമാക്കിയത്. റിലീസ് വേളയിൽ തന്നെ വിവാദമായ ചിത്രം ഒരാഴ്ചയ്ക്കുള്ളിൽ തിയേറ്ററിൽനിന്ന് പിൻവലിക്കേണ്ടിവന്നു. രണ്ടാമത്തെ ചിത്രമായ 'അണ്ടർ കൺസ്ട്രക്ഷൻ' മധ്യവർത്തി കുടുംബത്തിലെ അസംതൃപ്തയായ വീട്ടമ്മയെ അടയാളപ്പെടുത്തുന്നതായിരുന്നു. നിരൂപക പ്രശംസയും അംഗീകാരങ്ങളും നേടിയ ഈ ചിത്രത്തിനു ശേഷമാണ് മെയ്ഡ് ഇൻ ബംഗ്ലാദേശ് എന്ന സ്ത്രീശാക്തീകരണ ചിത്രവുമായി റുബായത്തിന്റെ വരവ്. ഈ മൂന്നു ചിത്രങ്ങളോടെ ബംഗ്ലാദേശ് അഭിമാനത്തോടെ ലോകത്തിനു മുന്നിൽ എടുത്തുയർത്തിയ ചലച്ചിത്രകാരിയായി റുബായത് മാറിക്കഴിഞ്ഞു. ടൊറോന്റോ അന്താരാഷ്ട ചലച്ചിത്രമേളയിൽ മെയ്ഡ് ഇൻ ബംഗ്ലാദേശ് പുരസ്‌കാരം നേടിയതോടെ  സംവിധായികയെ ലോകമെമ്പാടുമുള്ള ചലച്ചിത്രാസ്വാദകർ തിരിച്ചറിഞ്ഞുകഴിഞ്ഞു.

കേരളകൗമുദി, 2019 ഡിസംബർ 11

ഗുഹയ്ക്കുള്ളിൽ അകപ്പെടുന്ന 104 മിനിറ്റുകൾ

ഒന്നര വർഷം മുമ്പ് ലോകം മുഴുവൻ ആകാംക്ഷയോടെയും പ്രാർത്ഥനയോടെയും ഉറ്റുനോക്കിയ പതിനാറ് ദിവസങ്ങളെ പുനരുജ്ജീവിപ്പിക്കുകയാണ് തായ്ലാന്റ് സംവിധായകനായ ടോം വാലറും സംഘവും. കഴിഞ്ഞ വർഷം ജൂണിൽ ഉത്തര തായ്ലാന്റിൽ ഗുഹയ്ക്കുള്ളിൽ കുടുങ്ങിയ 12 കുട്ടികളെയും പരിശീലകരെയും പുറത്തെത്തിച്ച അത്യന്തം സാഹസികമായ രക്ഷാപ്രവർത്തനത്തിന്റെ സിനിമാവിഷ്‌കാരമാണ് തായ് സിനിമയായ 'ദി കേവ്'.  പ്രതിസന്ധികൾക്കു മുന്നിൽ മനുഷ്യർ ധീരമായി എടുക്കുന്ന തീരുമാനങ്ങളെയും മനുഷ്യജീവന്റെ മഹത്വത്തെയും ഓർമ്മപ്പെടുത്തുന്നു.

       ആധുനിക കാലത്തെ ഏറ്റവും വലിയ രക്ഷാപ്രവർത്തനം എന്നു വിശേഷിപ്പിക്കപ്പെട്ട തായ് സംഭവത്തിൽ നേരിട്ട് പങ്കെടുത്ത ഉദ്യോഗസ്ഥരും സൈനികരും ഡൈവർമാരും സിനിമയിൽ പ്രത്യക്ഷപ്പെടുന്നു. അതുകൊണ്ടുതന്നെ യഥാർത്ഥ അനുഭവത്തിന്റെ തീവ്രത നൽകാൻ സിനിമയ്ക്കാകുന്നു. ഗുഹയ്ക്കകത്ത് പെട്ടുപോയവരെ തിരിച്ചെത്തിക്കാനുള്ള പരിശ്രമത്തിന്റെ ചലച്ചിത്രഭാഷ്യത്തിന് 104 മിനിറ്റാണ് ദൈർഘ്യം. രക്ഷാപ്രവർത്തനവുമായി ബന്ധപ്പെട്ട എല്ലാ സംഭവ വികാസങ്ങളിലേക്കും ഈ സമയം കൊണ്ട് എത്തിപ്പെടാൻ സിനിമയ്ക്കാകുന്നു. മാത്രമല്ല, രക്ഷാപ്രവർത്തനത്തിന്റെ നിമിഷങ്ങളിലെ സകല വികാരങ്ങളെയും കാണികൾക്കു കൂടി അനുഭവവേദ്യമാക്കുന്നതിലും ടോം വാലറും സംഘവും വിജയിക്കുന്നു. ഗുഹയ്ക്കകത്തുവച്ച് ഇരുട്ടിലും വെള്ളത്തിലുമുള്ള സാഹസികമായ ചിത്രീകരണം അല്പം പോലും കൃത്രിമത്വം തോന്നാത്ത വിധം പകർത്തിയിരിക്കുന്നത് വേഡ് മുള്ളറാണ്.

     

  തായ്ലാന്റ് സംഭവത്തെ അധികരിച്ച് ആദ്യമായി പുറത്തിറങ്ങിയ സിനിമയാണ് 'ദി കേവ്. ബുസാൻ, വാൻകുവർ, ബി.എഫ്.ഐ ലണ്ടൻ അന്താരാഷ്ട്ര ചലച്ചിത്ര മേളകളിൽ പ്രദർശിപ്പിച്ച ചിത്രം നവംബർ 21ന് തായ്ലാന്റിൽ റിലീസ് ചെയ്ത ചിത്രം ബോക്‌സോഫീസിലും മികച്ച പ്രകടനമാണ് കാഴ്ചവച്ചത്.

............

'കേവി'ന്റെ ഷൂട്ട് വെല്ലുവിളി നിറഞ്ഞത്: ടോം വാലർ

ലോകം ഇമയടയ്ക്കാതെ വീക്ഷിച്ച ഒരു സംഭവത്തിന് ദൃശ്യാവിഷ്‌കാരം നൽകുന്നതിന്റെ വെല്ലുവിളി 'ദി കേവി'ന്റെ ചിത്രീകരണത്തിലുടനീളം ഉണ്ടായിരുന്നുവെന്ന് സംവിധായകൻ ടോം വാലർ കേരളകൗമുദിയോട് പറഞ്ഞു. മേളയിൽ ലോകസിനിമ വിഭാഗത്തിൽ ഉൾപ്പെട്ടിട്ടുള്ള 'ദി കേവി'ന്റെ പ്രദർശനത്തോടനുബന്ധിച്ച് തിരുവന്തപുരത്ത് എത്തിയതായിരുന്നു വാലർ.

യഥാർത്ഥ സംഭവം ആവിഷ്‌കരിക്കുന്നതിലെ വെല്ലുവിളി എത്രത്തോളമുണ്ടായിരുന്നു?

       യഥാർത്ഥ സംഭവം എന്നതിനേക്കാൾ രക്ഷാപ്രവർത്തനം സ്വാഭാവികമായി ചിത്രീകരിക്കുക എന്നതായിരുന്നു ബുദ്ധിമുട്ട്. കാരണം ഇതിന്റെ ഓരോ ഘട്ടവും പുരോഗതിയും ലോകം മുഴുവൻ ശ്രദ്ധിച്ചതാണ്. ആയിരത്തിലേറെ രക്ഷാപ്രവർത്തകരും വിവിധ രാജ്യങ്ങളും ഏജൻസികളും ഉൾപ്പെട്ട സംഭവമാണ്. പല സീനുകളും ഷൂട്ട് ചെയ്തത് തായ്ലാന്റിലെ മറ്റ് പല ഗുഹകളിൽ വച്ചാണ്.

തിരക്കഥ രൂപപ്പെടുത്തൽ എളുപ്പമായിരുന്നോ?

        സിനിമയ്ക്കായി തിരക്കഥയൊരുക്കുന്നതിലെ സാദ്ധ്യതകൾ ഉപയോഗിച്ചതല്ലാതെ യാതൊന്നും പുതുതായി കൂട്ടിച്ചേർത്തിട്ടില്ല. രക്ഷാപ്രവർത്തനം കഴിഞ്ഞ ഉടൻ തന്നെ തായ്ലാന്റ് സംഭവം സിനിമയാക്കാൻ പലരും മുന്നോട്ടുവന്നിരുന്നു. ഞങ്ങളുടെ പ്രൊഡക്ഷൻ കമ്പനി അവകാശം സ്വന്തമാക്കിയപ്പോൾ തന്നെ കൃത്രിമമായി യാതൊന്നും തിരക്കഥയിൽ ഉൾപ്പെടുത്തേണ്ട എന്നു തീരുമാനിച്ചിരുന്നു. കത്രീന ഗ്രോസും ഡോൺ ലിൻഡറും ഇതനുസരിച്ചാണ് എനിക്കൊപ്പം എഴുത്തുജോലികൾ പൂർത്തിയാക്കിയത്. രണ്ടു മാസമാണ് തിരക്കഥയ്ക്കായി ഞങ്ങൾ ചെലവിട്ടത്.

അഭിനേതാക്കൾ പലരും തായ് രക്ഷാപ്രവർത്തനത്തിൽ പങ്കെടുത്തവർ തന്നെയാണ്?

       അങ്ങനെ സംഭവിച്ചത് ഏറ്റവും നന്നായി എന്നാണ് തോന്നുന്നത്. ഒരു പക്ഷേ യഥാർത്ഥ അഭിനേതാക്കൾക്ക് ഇത്രയും സ്വാഭാവികമായി രക്ഷാപ്രവർത്തനമടക്കമുള്ള രംഗങ്ങളിൽ അഭിനയിക്കാനായേക്കില്ല. ഡൈവർമാരും സൈനികരുമടക്കമുള്ള രക്ഷാപ്രവർത്തകർ ഒരിക്കൽകൂടി ആ സംഭവം വീണ്ടും സൃഷ്ടിച്ചതായി തോന്നി. അവരില്ലായിരുന്നെങ്കിൽ സിനിമയ്ക്ക് ഇത്ര സ്വാഭാവികത അനുഭവപ്പെടില്ല.

'ദി കേവി'ന് അംഗീകാരങ്ങൾക്കൊപ്പംവിമർശനമുണ്ടായി?

         ഇത്തരമൊരു വിഷയം കൈകാര്യം ചെയ്യുമ്പോൾ സ്വാഭാവികമായി ഉണ്ടായേക്കാവുന്ന വിമർശനങ്ങളാണത്. രക്ഷാപ്രവർത്തനത്തിന്റെ മുഴുവൻ ഘട്ടങ്ങളും ഉൾപ്പെടുത്തിയില്ലെന്നും ചില വിഭാഗങ്ങൾക്ക് പ്രാധാന്യം കുറഞ്ഞുവെന്നുമായിരുന്നു പ്രധാന വിമർശനം. ഒരു വെബ് സീരിസായി പ്ലാൻ ചെയ്‌തെങ്കിൽ എല്ലാം ഉൾപ്പെടുത്താമായിരുന്നു. ഇത് 104 മിനിറ്റുള്ള സിനിമയല്ലേ, പരിമിതിയുണ്ട്.

കേരളകൗമുദി, 2019 ഡിസംബർ 8

ഇറാനിയൻ മിസ്റ്റിക് സിനിമകളെ ഓർമ്മിപ്പിക്കുന്ന ഡീപ് വെൽ

മദ്ധ്യേഷ്യൻ രാജ്യങ്ങളിൽ നിന്ന് പ്രത്യേകിച്ച് ഇറാനിൽ നിന്നും എൺപതുകളിൽ ഉണ്ടായ മിസ്റ്റിക് സിനിമകളുടെ ശൈലിയെ ഓർമ്മപ്പെടുത്തുന്ന സിനിമയാണ് ഷനാബെക് ഷെറ്റിറോവിന്റെ ഡീപ് വെൽ. പ്രകൃതിയുടെ സ്പന്ദനങ്ങൾ തിരിച്ചറിഞ്ഞ് ജീവിച്ച് പ്രകൃതിയിലേക്ക് തന്നെ മടങ്ങുന്ന മനുഷ്യജീവിതത്തിന്റെ ചാക്രിക സസഞ്ചാരമാണ് നാടോടികളുടെ ജീവിതത്തിലൂടെ ഈ കസാഖ് ചിത്രം പറയുന്നത്.

       കസാഖ് എഴുത്തുകാരനായ അഭിഷ് കകിൽബയേവിന്റെ ഡീപ് വെൽ എന്ന നോവലിനെ ആധാരമാക്കിയുള്ളതാണ് ചിത്രം. ഒരിടത്തും സ്ഥിരതാമസമാക്കാതെ താത്കാലിക കൂടാരങ്ങൾ കെട്ടി ജീവിക്കുന്ന സവിശേഷ ജീവിത ശൈലിക്കുടമകളായ കസാഖിസ്ഥാനിലെ ഒരു വിഭാഗം ഗ്രാമീണ മനുഷ്യരെ കേന്ദ്രീകരിച്ചുള്ളതാണ് സിനിമ. കസാഖിസ്ഥാൻ സമതല, തീരദേശ മേഖലകളാണ് പശ്ചാത്തലം. യെൺസെപ് എന്ന ഗ്രാമീണ കിണറുവെട്ടുകാരനെ കേന്ദ്രീകരിച്ചാണ് ഡീപ് വെലിന്റെ സഞ്ചാരം.

   

  പ്രകൃതിയുമായി ഇഴചേർന്നു ജീവിക്കുന്ന മനുഷ്യരാണ് സിനിമയിലുള്ളത്. ആധുനിക ലോകവുമായി അവർക്ക് യാതൊരു കെട്ടുപാടുകളുമില്ല. വാഹനങ്ങളോ മറ്റ് ആധുനിക സൗകര്യങ്ങളോ ഇല്ല. സിനിമ കണ്ടിരിക്കുമ്പോൾ ജീവിച്ചിരിക്കുന്ന ലോകത്തെ മറക്കുകയും മറ്റൊരു മിസ്റ്റിക് ലോകത്ത് എത്തിപ്പെട്ട അനുഭവം കൈവരുകയും ചെയ്യുന്നു. യെൺസേപിന്റെ സംസാരം പോലും പ്രകൃതിയുമായി ഇണക്കിച്ചേർത്താണ്. അത്തരം സ്വഗതാഖ്യാനങ്ങൾക്ക് സിനിമ ഏറെ പ്രാധാന്യം നൽകുന്നുമുണ്ട്. മണ്ണിൽ ചെവി ചേർത്താൽ യെൺസേപിന് ഭൂമിക്കടിയിലെ വെള്ളത്തിന്റെ ഉറവയുടെ ഒഴുക്ക് കേൾക്കാം, ആ നനവ് അയാൾക്ക് പകർന്നുകിട്ടും. ഭൂമിയുടെ ആഴങ്ങളിലേക്ക് ഇറങ്ങിച്ചെല്ലുമ്പോൾ അയാൾ പ്രകൃതിയോട് കൂടുതൽ അടുക്കുന്നു. ഒടുവിൽ ആഴങ്ങളിൽ തന്നെ അയാൾ ഇല്ലാതാകുകയും ചെയ്യുന്നു. പ്രകൃതിയിൽ നിന്നുടലെടുത്ത് പ്രകൃതിയിലേക്കു മടങ്ങുന്നുവെന്ന ആദിവചനമാണ് സിനിമയ്ക്ക് കാതലാകുന്നത്.

       മദ്ധ്യേഷ്യൻ ഭൂപ്രകൃതിയെ വരച്ചിടുന്ന ഛായാഗ്രാഹണ മികവാണ് ഡീപ് വെലിന്റെ കരുത്ത്. മിഴിവുറ്റതും സൂക്ഷ്മവുമാണ് പ്രകൃതിയിലൂടെയുള്ള കാമറയുടെ സഞ്ചാരം. കഥാപശ്ചാത്തലവുമായി കാണികളെ അടുപ്പിക്കുന്നതും റിഫ്കാത്ത് ഇബ്രാഖിമോവിന്റെ കാമറാ മികവ് തന്നെ. കഥയുമായി ഇണക്കിച്ചേർത്തുകൊണ്ടാണ് ആഴക്കിണർ, കടൽ പരിസരം, കുതിരകളുടെ സഞ്ചാരം, മണ്ണിനടിയിലെ പ്രാർത്ഥനാകേന്ദ്രം, താമസ സ്ഥലം എന്നിവ സിനിമയിൽ അടയാളപ്പെടുത്തുന്നത്. ധാക്ക ഇന്റർനാഷണൽ ഫിലിം ഫെസ്റ്റിവെലിൽ മികച്ച കാമറയ്ക്കുള്ള പുരസ്‌കാരം ഡീപ് വെൽ നേടിയിരുന്നു.

കേരളകൗമുദി, 2019 ഡിസംബർ 7

പാദങ്ങളിൽ ദൈവസ്പർശമുള്ള 'ഡീഗോ മറഡോണ'

ലോകത്ത് ഏറ്റവുമധികം ആരാധിക്കപ്പെടുന്ന ഫുട്ബാൾ ജീനിയസായ ഡീഗോ മറഡോണയുടെ ഫുട്ബാൾ ജീവിതത്തിലേക്ക് കടന്നുചെല്ലുന്ന ഡോക്യുമെന്ററിയാണ് 'ഡീഗോ മറഡോണ'. കളിമികവിനൊപ്പം വിവാദങ്ങളും കൂടപ്പിറപ്പായ മറഡോണയുടെ കളിജീവിതത്തിലേക്കുള്ള അന്വേഷണമാണിത്. നാല് തവണ ബാഫ്റ്റ പുരസ്‌കാരം ലഭിച്ചിട്ടുള്ള ബ്രിട്ടീഷ് സംവിധായകൻ ആസിഫ് കപാഡിയയാണ് ഈ ഡോക്യുമെന്ററിക്കു പിന്നിൽ.

     ഫുട്‌ബോൾ ക്ലബ്ബായ ബാഴ്സലോണയിൽ നിന്ന് നാപോളിയിലേക്ക് റെക്കാഡ് പ്രതിഫല തുകയ്ക്ക് മറഡോണ നടത്തിയ കൂടുമാറ്റത്തിന്റെ അനാവരണവും, യുവേഫ കപ്പ് വിജയത്തിന്റെ യഥാർത്ഥ രംഗങ്ങളും ചിത്രത്തിൽ ഉണ്ട്. വിജയമില്ലാതെ ഉഴറിയിരുന്ന എസ്.എസ്.സി നാപോളിയെ പ്രതിഭ കൊണ്ട് മറഡോണ വിജയത്തിന്റെ പാതയിലേക്ക് നയിച്ചു. നൂറ്റാണ്ടിന്റെ ഗോൾകൊണ്ട് തലമുറകളെ ത്രസിപ്പിച്ച ഫുട്ബാൾ ഇതിഹാസത്തിന്റെ വളർച്ചയാണ് ചിത്രത്തിന്റെ പ്രമേയം.

കേരളകൗമുദി, 2019 ഡിസംബർ 7

സൊളാനസ് മൂന്നാംലോക സിനിമയുടെ മുന്നണിപ്പോരാളി

സാമ്രാജ്യത്വ വിരുദ്ധ പോരാട്ടങ്ങൾക്ക് ക്യാമറയെ സമരായുധമാക്കിയ സംവിധായക പ്രതിഭയാണ് അർജന്റീനിയൻ സംവിധായകനായ ഫെർണാണ്ടോ സൊളാനസ്. നാടകവും സംഗീതവും നിയമവും പഠിച്ച സൊളാനസ് 1968ൽ ലാറ്റിനമേരിക്കയിലെ നവ കൊളോണിയലിസത്തെയും അക്രമത്തെയും പ്രതിപാദിച്ച് 'ലാ ഹോറ ഡി ലോസ് ഹോർനോസ്' എന്ന തന്റെ ആദ്യ ചലച്ചിത്രം രഹസ്യമായി നിർമ്മിക്കുകയും സംവിധാനം ചെയ്യുകയും ചെയ്തു. ഇതോടെയാണ് സൊളാനസ് ഹോളിവുഡിനെയും യൂറോപ്യൻ സിനിമയേയും എതിർക്കുന്ന 'മൂന്നാംലോക സിനിമ' എന്ന വിപ്ലവകരമായ ചലച്ചിത്രപ്രസ്ഥാനത്തിന്റെ ഭാഗമാകുന്നത്. പിന്നീട് ഈ പ്രസ്ഥാനത്തിന്റെ മുന്നണിപ്പോരാളിയാകുകയും ചെയ്തു. 1970കളിൽ അർജന്റീനിയൻ സിനിമയെ ഇളക്കിമറിച്ച ഗ്രൂപോ സിനി ലിബറേഷ്യൻ കൂട്ടായ്മയുടെ മുൻനിരയിൽ സോളനാസ് ഉണ്ടായിരുന്നു.

    ലാറ്റിനമേരിക്കയിലെ നവകൊളോണിയലിസത്തിനെതിരായ വിമോചനപ്പോരാട്ടങ്ങളുടെ നാൾവഴികളെ അടയാളപ്പെടുത്തുന്ന 'ദ അവർ ഒഫ് ദ ഫർണസസ്',അർജന്റീനയിലേക്കുള്ള ബഹുരാഷ്ട്ര കുത്തക കമ്പനികളുടെ അധിനിവേശവും സ്വകാര്യവത്കരണവും സമൂഹത്തെ സാമ്പത്തികമായും രാഷ്ട്രീയമായും എങ്ങനെ തകർത്തുവെന്ന് അന്വേഷിക്കുന്ന 'സോഷ്യൽ ജെനോസൈഡ്' തുടങ്ങിയ രാഷ്ട്രീയ ചിത്രങ്ങളിലൂടെ ലോകസിനിമയിലെ അതികായനായി മാറി.

     2009ൽ പുറത്തിറങ്ങിയ 'ലാ ടിയറ സുബ്ലെവാഡ'യാണ് ഒടുവിലത്തെ ചിത്രം. 1990കൾ മുതൽ അർജന്റീനിയൻ രാഷ്ട്രീയത്തിലെ സജീവ സാന്നിദ്ധ്യമാണ്. നിലവിൽ ബ്യൂണസ് അയേഴ്സ് സിറ്റി ഡെപ്യൂട്ടിയാണ് 24-ാമത് കേരള രാജ്യാന്തര ചലച്ചിത്രമേള ലൈഫ്‌ടൈം അച്ചീവ്‌മെന്റ് പുരസ്‌കാരം നൽകി ആദരിക്കുന്ന ഈ എൺപത്തിമൂന്നുകാരൻ.

കേരളകൗമുദി, ഡിസംബർ 6

ഭക്ഷണത്തിന്റെ രാഷ്ട്രീയം പറയുന്ന ആനിമാനിയും അക്സോണും

മുമ്പെങ്ങുമില്ലാത്ത വിധം ഭയവും അരക്ഷിതാവസ്ഥയും പിടികൂടിയിരിക്കുകയാണ് ഇന്ത്യൻ സമൂഹത്തെ. നടപ്പു ദശാബ്ദത്തിൽ ഇന്ത്യയിൽ ഏറ്റവുമധികം ചർച്ച ചെയ്യപ്പെട്ടതും ഈ ആശങ്കയാണ്. ഭരണകൂടവും മതവും ഭക്ഷണ സ്വാതന്ത്ര്യത്തിൽ പോലും ഇടപെടുന്ന കാലത്തെ ആശങ്കകൾ ഏറെ വലുതാണ്. വംശത്തെയും ഭക്ഷണത്തെയും ചൊല്ലിയുള്ള ആൾക്കൂട്ട അക്രമങ്ങൾ നിരന്തരം വാർത്തയായതോടെ ലോകരാജ്യങ്ങളും ഇന്ത്യയിലെ മാറ്റങ്ങൾ ശ്രദ്ധിച്ചു തുടങ്ങിയിട്ടുണ്ട്. സമൂഹത്തോടുള്ള പ്രതിബദ്ധത നിറവേറ്റാൻ ബാദ്ധ്യതയുള്ള കലാകാരന്മാരും ഈ ആശങ്കകൾ അവരുടെ കലാസൃഷ്ടിയിലേക്ക് കൊണ്ടുവരാൻ ശ്രമിച്ചു. പലതും സെൻസർ കത്രികയ്ക്കു മുന്നിൽ വികൃതരൂപങ്ങളായി. ചിലതെല്ലാം അതിജീവിച്ചു.

    2019 ൽ പുറത്തിറങ്ങിയ ഹിന്ദി ചിത്രങ്ങളായ 'ആനി മാനി'യും 'അക്‌സോണു'മാണ് ഇന്ത്യയിലെ കറുത്ത യാഥാർത്ഥ്യങ്ങൾ കാണികൾക്കു മുമ്പിലെത്തിക്കാൻ തയ്യാറായത്. രണ്ടു സിനിമകൾക്കും വിഷയമാകുന്നത് ഭക്ഷണമാണ്. തങ്ങൾക്ക് താത്പര്യമില്ലാത്ത ഭക്ഷണം രാജ്യത്ത് മറ്റാരും കഴിക്കേണ്ടന്ന് പ്രഖ്യാപിച്ച് ഒരു വിഭാഗം പ്രബലമാകുമ്പോൾ ഭക്ഷണത്തിന്റെ രാഷ്ട്രീയത്തിന് പുതിയ മാനം കൈവരുന്നു.

       ബീഫ് ഒരു രാഷ്ട്രീയ വിഷയമായ വർത്തമാന കാലത്തെയാണ് ഫർഹാൻ ഇർഷാദ് 'ആനി മാനി'യിലൂടെ അവതരിപ്പിക്കുന്നത്. ഉത്തർപ്രദേശിലെ മുസ്ലിം കുടുംബാംഗമായ ഭൂട്ടോ ഇറച്ചിക്കച്ചവടക്കാരനാണ്. രാജ്യത്ത് ബീഫ് നിരോധനം വന്നതോടെ അയാളുടെ ജീവിതമാർഗവും സന്തോഷവും നഷ്ടമാകുന്നു. ബീഫ് കൈയിൽ വച്ചെന്ന ചെയ്യാത്ത തെറ്റിന് ഭൂട്ടോ അറസ്റ്റിലാകുന്നതോടെ കുടുംബം വേട്ടയാടപ്പെടുന്നു. മതത്തെക്കാൾ വലുത് മനുഷ്യനാണെന്ന ഉദാത്ത സന്ദേശം മുന്നോട്ടുവയ്ക്കുന്ന ഈ സിനിമ സമകാലിക ഇന്ത്യൻ യാഥാർത്ഥ്യത്തിലേക്ക് തുറന്നുവച്ച കണ്ണാടിയാണ്.

    ഫർഹാൻ ഇർഷാദിന്റെ സിനിമയിൽ ബീഫാണ് വിഷയമെങ്കിൽ നിക്കോളാസ് കർകോംഗറിന്റെ 'അക്‌സോണി'ൽ പന്നിയിറച്ചിയാണ് മനുഷ്യനെ വേട്ടയാടുന്നത്. ഇന്ത്യൻ ജനതയിൽ അന്തർലീനമായിരിക്കുന്ന വംശീയതയുടെ സമകാലിക മുഖങ്ങളെ പരുഷരൂപത്തിൽ വിമർശിക്കുന്നതിനു പകരം കറുത്ത ഹാസ്യത്തിൽ പൊതിഞ്ഞ് കളിയാക്കാനാണ് അക്‌സോൺ മുതിരുന്നത്. ഒരു കല്യാണാഘോഷവുമായി ബന്ധപ്പെട്ട് ഡൽഹിയിലെ ഒരു ഫ്ളാറ്റിൽ രണ്ടു പെൺകുട്ടികൾ പന്നിയിറച്ചി പാകം ചെയ്യുകയാണ്. ഇറച്ചി വേവുന്ന മണം അലോസരപ്പെടുത്തുന്നതോടെ അയൽക്കാർ പെൺകുട്ടികളുടെ പാചകം തടയുന്നു. എന്നാൽ ലക്ഷ്യം പൂർത്തീകരിക്കാൻ പെൺകുട്ടികൾ പല വഴികളിലൂടെ ശ്രമിക്കുകയാണ്. തമാശ രൂപേണയാണ് കഥപറച്ചിലെങ്കിലും ഇന്ത്യയിലെ ഭക്ഷണത്തിന്റെ രാഷ്ട്രീയം അതിതീവ്രമായി അടയാളപ്പെടുത്തുകയാണ് 'അക്‌സോൺ'.

       ഭയമാണ് ഇന്ത്യൻ ജനതയെ പിടികൂടിയിരിക്കുന്ന അടിസ്ഥാന വികാരമെന്ന് ആനി മാനിയും അക്‌സോണും പറഞ്ഞുവയ്ക്കുന്നു. മുമ്പെങ്ങുമില്ലാത്ത വിധം ആൾക്കൂട്ടം നീതി നടപ്പിലാക്കുകയും നിരപരാധികൾ കൊല്ലപ്പെടുകയും ചെയ്യുന്നുവെന്ന യാഥാർത്ഥ്യത്തിലേക്കാണ് ഈ സിനിമകൾ ധൈര്യസമേതം കാമറ തുറന്നു വയ്ക്കുന്നത്.

കേരളകൗമുദി, 2019 ഡിസംബർ 10

അയാം മുഹമ്മദ്, നോട്ട് മാർക്കോ

* അഭയാർഥി പ്രശ്നങ്ങൾ ചർച്ച ചെയ്ത് ഡെസ്പൈറ്റ് ദി ഫോഗ്

ആഭ്യന്തര, വംശീയ കലാപങ്ങളാൽ കലുഷിതമായ പ്രദേശങ്ങളിൽനിന്ന് സുരക്ഷയും മെച്ചപ്പെട്ട ജീവിതവും തേടി കാലങ്ങളായി മനുഷ്യർ നടത്തിക്കൊണ്ടിരിക്കുന്ന പലായനത്തിന് ഇനിയും അറുതിയായിട്ടില്ല. സ്ഥിരം പ്രശ്നബാധിതദേശങ്ങളായ അറബ്, മദ്ധ്യേഷ്യൻ, ആഫ്രിക്കൻ രാജ്യങ്ങളിൽനിന്നും യൂറോപ്യൻ രാജ്യങ്ങളലേക്കാണ് നിലവിൽ ഏറ്റവുമധികം അഭയാർത്ഥി പ്രവാഹമുള്ളത്. ഐക്യരാഷ്ട്ര സംഘടനയുടെ കണക്കുകൾക്കുപോലും പിടികൊടുക്കാത്ത വിധത്തിലുള്ള ആഗോളപ്രശ്നമായി ഇതു മാറിക്കഴിഞ്ഞു.

       അഭയാർത്ഥി, പൗരത്വവിഷയങ്ങൾ ചർച്ചചെയ്യുന്ന നിരവധി സിനിമകൾക്കാണ് പ്രശ്നബാധിത ദേശങ്ങളിലെ ചലച്ചിത്രകാരന്മാർ കഴിഞ്ഞ ദശാബ്ദത്തിൽ രൂപം നൽകിയത്. അടുത്തിടെ ആഗോള ശ്രദ്ധ നേടിയ നദീൻ ലെബാക്കിയുടെ ലെബനീസ് ചിത്രം കാപർനോം ഈ നീറുന്ന പ്രശ്നമാണ് ചർച്ചചെയ്തത്. യുദ്ധത്തിന്റെയെന്ന പോലെ പലായനത്തിന്റെയും ഏറ്റവും വലിയ ഇര കുട്ടികളാണെന്ന് കാപർനോം പറഞ്ഞുവച്ച അതേ വിഷയമാണ് ഗൊരാൻ പാസ്‌ജെവികിന്റെ ഇറ്റാലിയൻ സിനിമയായ ഡെസ്‌പൈറ്റ് ദി ഫോഗ് ചർച്ചചെയ്യുന്നത്.

     

മെച്ചപ്പെട്ട ജീവിതം തേടി ഇറ്റാലിയൻ തീരത്തേക്ക് റബർ ബോട്ടിൽ രക്ഷപ്പെടുന്നതിനിടെ അലി മൂസ സർഹാൻ എന്ന എട്ടു വയസുകാരന്റെ മാതാപിതാക്കൾ മരിച്ചുപോകുന്നു. തെരുവിൽ അകപ്പെടുന്ന അലിയെ ഇറ്റാലിയൻ ദമ്പതികൾ എടുത്തുവളർത്തുന്നതിനെ തുടർന്നുള്ള വംശീയവും മതപരവും പൗരത്വത്തെ ചൊല്ലിയുമുള്ള പ്രശ്നങ്ങളുമാണ് ഡെസ്‌പൈറ്റ് ദി ഫോഗിന്റെ ഉള്ളടക്കം. ഐഡന്റിറ്റി ക്രൈസിസ് എന്ന 'പുകമഞ്ഞു'പോലെ ആശയക്കുഴപ്പമുണ്ടാക്കുന്ന പ്രശ്നത്തിന് പ്രസക്തമായ ഉത്തരം നൽകാനാകാതെയും അനേകം ചിന്തകൾ അവശേഷിപ്പിച്ചുമാണ് സിനിമ അവസാനിക്കുന്നത്. സിനിമയിൽ അലി ആവർത്തിച്ചു പറയുന്ന 'അയാം മുഹമ്മദ്, നോട്ട് മാർക്കോ 'എന്ന വാചകത്തിലാണ് സിനിമയുടെ അന്തസത്ത അടങ്ങിയിരിക്കുന്നത്. അതിസങ്കീർണമായൊരു വിഷയത്തിന് ഏറ്റവും ലളിതമായ ചലച്ചിത്രഭാഷ്യം നൽകുന്നിടത്താണ് പാസ്‌ജെവികിന്റെ സിനിമയ്ക്ക് ആഗോളമുഖം കൈവരുന്നത്.

     അലിയെപ്പോലെ ആയിരക്കണക്കിന് കുട്ടികൾ തെരുവിലുണ്ടെന്നും അവരുടെ എണ്ണം ഓരോ ദിവസവും വർദ്ധിച്ചു കൊണ്ടിരിക്കുകയാണെന്നുമുള്ള യാഥാർത്ഥ്യം ഓർമ്മപ്പെടുത്തുന്നതാണ് ഡെസ്‌പൈറ്റ് ദി ഫോഗിന്റെ ടെയ്ൽ എൻഡ് ഷോട്ട്. ആ ദൃശ്യത്തലേക്ക് ശ്രദ്ധയൂന്നുമ്പോൾ ഇത് കേവലമൊരു സിനിമാക്കഥയല്ലെന്നുള്ള ഞെട്ടലായിരിക്കും കാണികൾക്കുണ്ടാകുക. സമാധാനത്തിന്റെ ഇടം തേടിക്കൊണ്ടുള്ള അഭയാർത്ഥി പ്രവാഹം ഓരോ ദിവസവും ഓരോ നേരവും സംഭവിച്ചു കൊണ്ടേയിരിക്കുകയാണ്. അതുകൊണ്ടുതന്നെ കാപർനോമും ഡെസ്‌പൈറ്റ് ദി ഫോഗും പ്രശ്നങ്ങളലേക്ക് വിരൽചൂണ്ടുന്ന അവസാന സിനിമകളാകുകയുമില്ല.

കേരളകൗമുദി, 2019 ഡിസംബർ 12

സ്ത്രീശക്തിയുടെ ഉയിർത്തെഴുന്നേൽപ്പായി ഹെല്ലാരോ

പോയ വർഷത്തെ മികച്ച ചിത്രത്തിനുള്ള ദേശീയ പുരസ്‌കാരം ലഭിക്കുകയും ഈ വർഷം തിയേറ്ററുകളിലെത്തി മികച്ച പ്രതികരണം നേടുകയും ചെയ്ത ഗുജറാത്തി ചിത്രമായ ഹെല്ലാരോയ്ക്ക് കേരള രാജ്യാന്തര ചലച്ചിത്ര മേളയിൽ നിറഞ്ഞ കൈയടി. ദേശീയ ചലച്ചിത്ര പുരസ്‌കാര പ്രഖ്യാപന ചരിത്രത്തിൽ ആദ്യമായി ഒരു സിനിമയിൽ അഭിനയിച്ച 12 നടിമാർക്കും പ്രത്യേക ജൂറി പുരസ്‌കാരം ലഭിച്ചുവെന്ന സവിശേഷമായ അംഗീകാരത്തിനാണ് സ്ത്രീശാക്തീകരണം പ്രമേയമായിട്ടുള്ള ഹെല്ലാരോ അർഹമായത്. 24ാമത് കേരള രാജ്യാന്തര ചലച്ചിത്ര മേളയിൽ കാണികൾ ഏറ്റവും സജീവമായി ഇടപെട്ടു കണ്ട സിനിമ എന്ന സവിശേഷതയിലാണ് 'ഇന്ത്യൻ സിനിമ ഇന്ന്' എന്ന വിഭാഗത്തിൽ ഉൾപ്പെടുത്തി പ്രദർശിപ്പിച്ച ഹെല്ലാരോ ശ്രദ്ധേയമായത്. അടിമത്തം വിട്ടുണരുന്ന സ്ത്രീമുന്നേറ്റത്തെ നിലയ്ക്കാത്ത ഹർഷാരവത്തോടെയാണ് കാണികൾ ഏറ്റെടുത്തത്.
      പീരീഡ് സിനിമ കാറ്റഗറിയിൽ ഉൾപ്പെടുന്ന ഹെല്ലാരോയുടെ പ്രമേയം സ്ത്രീകൾ പൂർണമായും സ്വാതന്ത്ര്യം നേടിയിട്ടില്ലാത്ത ഇക്കാലത്തും ഏറെ പ്രസക്തമാണ്. 1975ലെ ഗുജറാത്ത് ആണ് പശ്ചാത്തലം. റാൻ ഒഫ് കച്ചിലെ ഗ്രാമപ്രദേശത്തേക്ക് മഞ്ജരിയെന്ന പെൺകുട്ടി വിവാഹം കഴിച്ചയക്കപ്പെടുന്നു. പുരുഷാധിപത്യത്തിന് പേരു കേട്ടതാണ് ഈ ഗ്രാമം. വെള്ളമെടുക്കാനായി ദൂരെയുള്ള ഒരു സ്ഥലത്തേക്ക് എന്നും രാവിലെ പോകുമ്പോൾ മാത്രമാണ് ഗ്രാമത്തിലെ സ്ത്രീകൾക്ക് നിയന്ത്രണമില്ലാത്തത്. അല്ലാത്തപ്പോൾ വീടിനു പുറത്ത് ആണുങ്ങളുടെ കൂടെ പ്രത്യക്ഷപ്പെടാനോ പരമ്പരാഗത ഉത്സവ, നൃത്താഘോഷങ്ങളിൽ പങ്കെടുക്കാനോ സ്വാതന്ത്ര്യമില്ല. ഒടുവിൽ നൃത്തം ചവിട്ടിത്തന്നെ സ്ത്രീകൾ അവരുടെ ശക്തി തെളിയിക്കുകയും അടിമത്തത്തിൽ നിന്ന് മോചനം നേടുകയും ചെയ്യുന്നിടത്താണ് സംഭവകഥയായ സിനിമ അവസാനിക്കുന്നത്.
ഗുജറാത്തിലെ പരമ്പരാഗത നൃത്തമായ ഗർഭയ്ക്ക് പ്രാധാന്യം നൽകിയാണ് ഒരു നാടോടിക്കഥയുടെ ലാളിത്യത്തോടെ ഈ ചിത്രം അഭിഷേക് ഷാ അവതരിപ്പിച്ചിരിക്കുന്നത്. അഭിഷേക് ഷായും പ്രതീക് ഗുപ്തയും ചേർന്നാണ് ഗുജറാത്തി നാടോടി ഗാനത്തിന് കടപ്പാട് രേഖപ്പെടുത്തിക്കൊണ്ടുള്ള ചിത്രത്തിന്റെ തിരക്കഥ തയ്യാറാക്കിയിരിക്കുന്നത്.
       

 സ്ത്രീകൾക്ക് നൃത്തം ചെയ്യാനോ ആഘോഷങ്ങളിൽ പങ്കെടുക്കാനോ സ്വാതന്ത്ര്യമില്ലാത്ത സാമൂഹികാവസ്ഥ തൊള്ളായിരത്തി എൺപതുകൾ വരെ പല ഗുജറാത്തി ഗ്രാമങ്ങളിലും നിലനിന്നിരുന്നുവെന്നും ഈ സ്ഥിതി ഇപ്പോൾ പൂർണമായി മാറിയെന്നും ഹെല്ലാരോയുടെ പ്രദർശനത്തിനുശേഷം സംസാരിച്ച ചിത്രത്തിന്റെ നിർമ്മാതാക്കളായ ആശിഷ് പട്ടേലും അഭിഷേക് ഷായും പറഞ്ഞു.

കേരളകൗമുദി, 2019 ഡിസംബർ 12

എഷ്യയുടെ അഭിമാനമുയർത്തിയ ഓസ്‌കർ

92-ാമത് ഓസ്‌കർ പുരസ്‌കാര അവലോകനം

ലോകത്തിൽ ഏറ്റവുമധികം ആളുകൾ വീക്ഷിക്കുന്ന ചലച്ചിത്ര അവാർഡ് ദാന ചടങ്ങായ ഓസ്‌കർ ഇക്കുറിയും അതിന്റെ മഹനീയതയും പ്രൗഢിയും കാത്തുസൂക്ഷിച്ച് ലോസാഞ്ചലസിലെ ഡോൾബി തിയേറ്ററിലെ സമ്പന്നമായ വേദിയിൽ അരങ്ങേറി. ചലച്ചിത്ര മേഖലയിലെ മികവിനെ ആദരിക്കുന്നതിനായി അക്കാഡമി ഓഫ് മോഷൻ പിക്ചർ ആർട്സ് ആൻഡ് സയൻസസ് നൽകുന്ന പുരസ്‌കാരം ഇക്കുറി ഹോളിവുഡിന്റെ മേധാവിത്വം മറികടന്ന് ഏഷ്യൻ വൻകര അഭിമാന നേട്ടം കൊയ്ത കാഴ്ചയ്ക്കു കൂടിയാണ് വേദിയായത്. ഹോളിവുഡ് ചിത്രങ്ങളുടെ ശക്തമായ പോരാട്ടത്തെ മറികടന്ന് ദക്ഷിണ കൊറിയൻ ചിത്രമായ പാരസൈറ്റ് ആണ് ഓസ്‌കറിലെ ഏഷ്യൻ സാന്നിദ്ധ്യമായി മാറിയത്.
       സമൂഹത്തിലെ ക്ലാസ് വിഭജനത്തിന്റെ രാഷ്ട്രീയം പ്രമേയമാക്കി ബോംഗ് ജൂൻ ഹോ സംവിധാനം ചെയ്ത പാരസൈറ്റ് മികച്ച സിനിമ, സംവിധായകൻ, തിരക്കഥ, വിദേശഭാഷാ ചിത്രം എന്നീ നാല് പ്രധാന പുരസ്‌കാരങ്ങളാണ് നേടിയത്. 92 വർഷത്തെ ഓസ്‌കർ ചരിത്രത്തിലാദ്യമായിട്ടാണ് ഒരു ഇംഗ്ലീഷ് ഇതരഭാഷാ ചിത്രം ഓസ്‌കർ വേദിയിൽ മികച്ച ചിത്രമായി തെരഞ്ഞെടുക്കപ്പെടുന്നത്. ആദ്യമായാണ് ഒരു കൊറിയൻ ചിത്രം നാല് ഓസ്‌കറുകൾ നേടുന്നത്. ഒരു ദക്ഷിണ കൊറിയൻ സംവിധായകൻ ഓസ്‌കർ നേടുന്നതും ഇതാദ്യമായിട്ടാണ്. മാർട്ടിൻ സ്‌കോർസിസി, ടോഡ് ഫിലിപ്സ്, സാം മെൻഡസ്, ക്വിന്റിൻ ടരന്റീനോ എന്നിവരെ പിന്തള്ളിക്കൊണ്ടാണ് കൊറിയൻ സംവിധായകന്റെ ഓസ്‌കർ നേട്ടം.
      ദക്ഷിണ കൊറിയയിൽ മനുഷ്യർക്കിടയിലെ സാമ്പത്തിക, സാമൂഹിക അന്തരത്തെ രണ്ടു കുടുംബങ്ങളിലൂടെ അവതരിപ്പിച്ച് ചിത്രത്തിന് സാർവലോക മാനം നൽകാൻ കഴിഞ്ഞതിലൂടെയാണ് ബോംഗ് ജൂൺ ഹോയുടെ പാരസൈറ്റ് ഓസ്‌കറിൽ അംഗീകരിക്കപ്പെട്ടത്. ബോംഗ് ജൂൺ ഹോയും ഹാൻ ജിൻ വണും ചേർന്നാണ് പാരസൈറ്റിന് തിരക്കഥയൊരുക്കിയത്. ചിത്രം കാനിൽ ഗോൾഡൻ ഗ്ലോബ് പുരസ്‌കാരവും നേടിയിരുന്നു.
   
       ടോഡ് ഫിലിപ്സ് സംവിധാനം ചെയ്ത ജോക്കറിലെ ആർതർ ഫ്‌ളെക് എന്ന സ്റ്റാൻഡപ് കൊമേഡിയനായി ഉള്ളുലയ്ക്കുന്ന അഭിനയപ്പകർച്ച നടത്തിയതിലൂടെ അമേരിക്കൻ നടൻ വാക്വിൻ ഫിനിക്സ് മികച്ച നടനുള്ള ഓസ്‌കർ നേടി. നാലുതവണ മികച്ച നടനുള്ള ഓസ്‌കർ നോമിനേഷൻ നേടിയിട്ടുള്ള വാക്വിൻ ഫിനിക്സിന് ഇത്തവണത്തെ പുരസ്‌കാര നേട്ടം അർഹതയ്ക്കുള്ള അംഗീകാരമായി. ലിയനാർഡോ ഡികാപ്രിയോയെയും ആദം ഡ്രൈവറെയും മറികടന്നാണ് വാക്വിൻ ഫീനിക്സ് മികച്ച നടനായത്.
      മികച്ച നടിക്കുള്ള പുരസ്‌കാരം അമേരിക്കൻ നടിയായ റെനെ സെൽവെഗറിനു ലഭിച്ചു. ജൂഡിയിലെ അഭിനയത്തിനാണ് റെനെക്ക് നടിക്കുള്ള പുരസ്‌കാരം ലഭിച്ചത്. ഇത് രണ്ടാം തവണയാണ് റെനയെത്തേടി അക്കാദമി പുരസ്‌കാരം എത്തുന്നത്.
   
         ബ്രാഡ് പിറ്റാണ് മികച്ച സഹനടൻ. വൺസ് അപ്പോൺ എ ടൈം ഇൻ ഹോളിവുഡ് എന്ന ചിത്രത്തിലെ അഭിനയത്തിനാണ് പിറ്റിന് പുരസ്‌കാരം. ബ്രാഡ് പിറ്റിന്റെ പ്രഥമ ഓസ്‌കർ പുരസ്‌കാരമാണിത്. ടോം ഹാങ്ക്സ്, ആന്റണി ഹോപ്കിൻസ്, ജോ പെസ്‌കി, അൽ പാസിനോ എന്നിവരെ പിന്തള്ളിയാണ് ബ്രാഡ് പിറ്റ് മികച്ച സഹനടനുള്ള പുരസ്‌കാരം സ്വന്തമാക്കിയത്. മികച്ച പ്രൊഡക്ഷൻ ഡിസൈനുള്ള പുരസ്‌കാരവും വൺസ് അപ്പോൺ ടൈം ഇൻ ഹോളിവുഡ് നേടി. മാര്യേജ് സ്റ്റോറിയിലെ പ്രകടനത്തിന് ലോറാ ഡേൺ മികച്ച സഹനടിക്കുള്ള പുരസ്‌കാരം നേടി.
    ടോയ് സ്റ്റോറി 4 ആണ് മികച്ച അനിമേഷൻ ചിത്രം. മികച്ച അനിമേറ്റഡ് ഷോർട്ട് ഫിലിമിനുള്ള പുരസ്‌കാരം ഹെയർ ലവ് നേടി. കേറേൻ റൂപ്പെർട്ട് ടോളിവാറാണ് ഹെയർ ലവിന്റെ സംവിധാനം നിർവഹിച്ചത്. കോസ്റ്റ്യൂം ഡിസൈനുള്ള പുരസ്‌കാരം ലിറ്റിൽ വിമനിലൂടെ ജാക്വിലിൻ ഡ്യൂറൻ നേടി. മേക്കപ്പിനും ഹെയർ െ്രസ്രലിംഗിനുമുള്ള പുരസ്‌കാരം ബോംബ് ഷെല്ലിനാണ്. മാർഷൽ ക്യൂറി ഒരുക്കിയ ദി നെയ്‌ബേർസ് വിഡോക്ക്, ലൈവ് ആക്ഷൻ ഷോർട്ട് ഫിലിം കാറ്റഗറിയിൽ പുരസ്‌കാരം നേടി.

       മാർക്ക് റഫല്ലോ സംവിധാനം ചെയ്ത അമേരിക്കൻ ഫാക്ടറിയാണ് മികച്ച ഡോക്യുമെന്ററി ഫീച്ചർ. അവലംബിത തിരക്കഥയ്ക്കുള്ള പുരസ്‌കാരം ജോജോ റാബിറ്റിനു ലഭിച്ചു. സൗണ്ട് എഡിറ്റിംഗിനുള്ള പുരസ്‌കാരം ഫോർഡ് വേഴ്സസ് ഫെറാരി നേടി. സൗണ്ട് മിക്സിംഗിനും വിഷ്വൽ എഫ്കട്സിനുമുള്ള അവാർഡ് 1917 നേടി. ഒന്നാം ലോക മഹായുദ്ധത്തിന്റെ പശ്ചാത്തലത്തിൽ കഥപറഞ്ഞ 1917 ലൂടെ ഛായാഗ്രഹണത്തിന് റോജർ ഡീക്കൻസ് പുരസ്‌കാരം നേടി. മികച്ച പ്രൊഡക്ഷൻ ഡിസൈനിന് വൺസ് അപ്പോൺ എ ടൈം ഇൻ ഹോളിവുഡും റോക്കറ്റ് മാനിലെ 'ലവ് മി എഗെയ്ൻ' മികച്ച ഗാനത്തിനും ഓസ്‌കർ നേടി.
    ജോക്കർ, ദി ഐറിഷ് മാൻ, വൺസ് അപ്പോൺ എ ടൈം ഇൻ ഹോളിവുഡ്. 1917 എന്നീ സിനിമകളാണ് ഇക്കുറി കൂടുതൽ നോമിനേഷനുകൾ നേടിയത്. മികച്ച ചിത്രത്തിനടക്കം 11 നോമിനേഷനുകൾ ജോക്കർ നേടിയപ്പോൾ മറ്റുളളവ 10 നോമിനേഷനുകളാണ് ലഭിച്ചത്. ജോക്കറിലെ അഭിനയത്തിന് വാക്വീൻ ഫീനിക്സിനും വൺസ് എ അപ്പോൺ എ ടൈം ഇൻ ഹോളിവുഡിലെ പ്രകടനത്തിന് ലിയനാർഡോ ഡിക്രാപ്രിയോയ്ക്കും നോമിനേഷനുകളുണ്ടായിരുന്നു. ബ്രാഡ് പിറ്റ് മികച്ച സഹനടനുളള നോമിനേഷൻ നേടിയപ്പോൾ സ്‌കാർലറ്റ് ജോഹാൻസൺ, സവെയ്സ റൊനാൻ എന്നിവരാണ് മികച്ച നടിമാർക്കുളള നോമിനേഷൻ നേടിയത്.
    മികച്ച സിനിമയ്ക്കുളള നോമിനേഷൻ ജോക്കറിനൊപ്പം ജോജോ റാബിറ്റ്, ദി ഐറിഷ് മെൻ, പാരസൈറ്റ്, മാര്യേജ് സ്‌റ്റോറി, വൺസ് അപ്പോൺ എ ടൈം ഇൻ ഹോളിവുഡ്, ലിറ്റിൽ വുമെൺ, ഫോർഡ് വി ഫെരാരി, 1917 എന്നീ സിനിമകൾക്കാണ് ലഭിച്ചത്. മികച്ച ചിത്രമായി തെരഞ്ഞെടുക്കപ്പെട്ട പാരസൈറ്റിന് 15 മില്യൺ ഡോളർ സമ്മാനതുകയാണ് ലഭിച്ചത്. മികച്ച സിനിമയ്ക്കുളള നോമിനേഷനുകളിൽ പാരസൈറ്റായിരുന്നു എറ്റവും കുറഞ്ഞ ബഡ്ജറ്റിൽ നിർമ്മിച്ച ചിത്രം. 11 മില്യൺ ആണ് പാരസൈറ്റിന്റെ ബഡ്ജറ്റ്.
   
        ഇത്തവണത്തെ ഓസ്‌കർ അവാർഡ് ചടങ്ങ് സംഘടിപ്പിക്കാനായി 44 മില്യൺ ഡോളറാണ് മുടക്കിയത്. മുൻവർഷങ്ങളിലേക്കാൾ കൂടിയ ബഡ്ജറ്റിലാണ് പരിപാടി സംഘടിപ്പിച്ചത്. ഗവർണേഴ്സ് അവാർഡുകൾ, ഗവർണേഴ്സ് ബോൾ, ഭക്ഷണം എന്നിവയുൾപ്പെടെ ഒന്നിലധികം ഇവന്റുകൾ ഉൾക്കൊള്ളുന്നതായിരുന്നു അവാർഡ് നിശ. 900 മണിക്കൂറുകൾ കൊണ്ട് 18 പേർ ചേർന്നാണ് ഓസ്‌കറിന്റെ റെഡ് കാർപ്പറ്റ് ഒരുക്കിയത്. 24,700 ഡോളർ മുടക്കിയാണ് റെഡ് കാർപെറ്റ് വിരിച്ചത്. 225 രാജ്യങ്ങളിൽ ഇത്തവണ ഓസ്‌കർ അവാർഡ് ചടങ്ങ് ലൈവായി സംപ്രേക്ഷണം ചെയ്തു. കഴിഞ്ഞ വർഷത്തെ മാതൃകയിൽ അവതാരകൻ ഇല്ലാതെയായിരുന്നു ഇക്കുറിയും ഓസ്‌കർ പുരസ്‌കാര വിതരണം നടന്നത്.


ആകാശവാണി, വാർത്താവീക്ഷണം, 2020 ഫെബ്രുവരി 17

അമ്പതാണ്ടിന്റെ നിറവിൽ ഗോവൻ ചലച്ചിത്രമേള

ഏഷ്യയിലെ ഏറ്റവും ശ്രദ്ധേയമായ അന്താരാഷ്ട്ര ചലച്ചിത്ര മേളകളിലൊന്നായ ഇന്ത്യയുടെ അന്താരാഷ്ട്ര ചലച്ചിത്രോത്സവമായ 'ഇഫി' ഗോവയിൽ കൊടിയിറങ്ങി. 1952ൽ ആരംഭിച്ച ഇന്ത്യയുടെ അന്താരാഷ്ട്ര ചലച്ചിത്രോത്സവത്തിന്റെ സുവർണ ജൂബിലി വർഷം കൂടിയായിരുന്നു ഇത്തവണ. സിനിമകളുടെ സെലക്ഷൻ കൊണ്ടും വിവിധ ലോകരാജ്യങ്ങളിൽ നിന്നുള്ള പ്രതിനിധികളുടെ പങ്കാളിത്തം കൊണ്ടും ശ്രദ്ധേയമായിരുന്നു മേള. ഭാരത സർക്കാരിന്റെ ഇൻഫർമേഷൻ ആന്റ് ബ്രോഡ്കാസ്റ്റിങ് മന്ത്രാലയവും ഗോവ സംസ്ഥാന സർക്കാരും ചേർന്ന് സംഘടിപ്പിച്ച മേള നവംബർ 20 മുതൽ 28 വരെ ഗോവയിലെ പനാജി നഗരത്തിലെ ഇനോക്സ് തിയേറ്റർ സമുച്ചത്തിലാണ് നടന്നത്. വിവിധ രാജ്യങ്ങളിൽനിന്നുള്ള 250 ചിത്രങ്ങളാണ് മേളയിൽ പ്രദർശിപ്പിച്ചത്. കൂടാതെ 50 വനിതാ ചലച്ചിത്ര പ്രവർത്തകരുടെ 50 സിനിമകളും ഇന്ത്യൻ പനോരമ വിഭാഗത്തിൽ ഇന്ത്യയിലെ വിവിധ ഭാഷകളിലെ തിരഞ്ഞെടുക്കപ്പെട്ട ചിത്രങ്ങളും പ്രദർശിപ്പിച്ചു.

       ഗൊരാൻ പാസ്‌ജെവികിന്റെ ഇറ്റാലിയൻ ചിത്രം ഡസ്‌പൈറ്റ് ദി ഫോഗ് ആയിരുന്നു ഗോവൻ ചലച്ചിത്ര മേളയിലെ ഉദ്ഘാടന ചിത്രം. മെച്ചപ്പെട്ട ജീവിതം തേടിയുള്ള മനുഷ്യരുടെ പലായനവും അസ്ഥിത്വ പ്രശ്നങ്ങളുമടങ്ങുന്ന പ്രസക്തമായ മാനുഷിക പ്രശ്നം കൈകാര്യം ചെയ്ത ചിത്രത്തിന് പ്രേക്ഷക പ്രശംസ നേടിയെടുക്കാനായി. ഇന്ത്യൻ പനോരമ വിഭാഗത്തിൽ ഗുജറാത്തി ചിത്രം ഹെല്ലാരുവായിരുന്നു ഉദ്ഘാടനച്ചിത്രം. നോൺ ഫീച്ചർ വിഭാഗത്തിൽ ആശിഷ് പാണ്ഡെയുടെ നൂറെയാണ് ഉദ്ഘാടനച്ചിത്രമായി. മേളയുടെ അമ്പതാം വാർഷികത്തിന്റെ ഭാഗമായി അമ്പത് വർഷം മുമ്പ് വിവിധ ഭാഷകളിൽ റിലീസ് ചെയ്ത പന്ത്രണ്ട് ചിത്രങ്ങളുടെ പ്രദർശനവും നടന്നു. ദാദാ ഫാൽക്കെ അവാർഡിന് അർഹനായ അമിതാഭ് ബച്ചന്റെ എട്ട് ചിത്രങ്ങളും മേളയിൽ പ്രദർശിപ്പിച്ചു.
        അമേരിക്കയിലെ കുടിയേറ്റ നിയമങ്ങൾ തൊഴിലെടുക്കുന്നവർക്കു സൃഷ്ടിക്കുന്ന പ്രതിസന്ധിയും അതിന്റെ ഫലമായുണ്ടാകുന്ന ചൂഷണങ്ങളും വിഷയമാക്കി ഇസബൽ സാൻഡോവൽ സംവിധാനം ചെയ്ത ലിങ്ക്വ ഫ്രാൻക, എസ്‌തോണിയൻ സംവിധായകൻ മാർട്ടി ഹെൽഡെയുടെ സ്‌കാൻഡനേവിയൻ സൈലൻസ്, ലോകത്തിൽ വളർന്നുവരുന്ന ധനിക ദാരിദ്ര്യ വ്യത്യാസത്തെ സൂക്ഷ്മമായി പ്രതിപാദിക്കുന്ന ബോങ് ജൂൻഹോ സംവിധാനം ചെയ്ത ദക്ഷിണ കൊറിയൻ സിനിമ 'പാരസൈറ്റ്', എർഡെനെബിലിഗ് ഗാൻബോൾഡിന്റെ മംഗോളിയൻ ചിത്രം ദി സ്റ്റീഡ് തുടങ്ങിയവയും അമ്പതാമത് ഗോവൻ ചലച്ചിത്ര മേളയിൽ അഭിപ്രായം നേടിയ ചിത്രങ്ങളായി. വിഖ്യാത സംവിധായകർ മൊഹ്സിൻ മക്മൽബഫിന്റെ 'മാർഗി ആൻഡ് ഹെർ മദറാ'ണ് സമാപന ചിത്രം.
   
         ഇത്തവണ മേളയിൽ സ്‌പെഷ്യൽ ഐക്കൺ പുരസ്‌കാരത്തിന് പ്രശസ്ത നടൻ രജനികാന്ത് അർഹനായി. സിനിമാ രംഗത്തെ സമഗ്ര സംഭാവനകൾ മുൻനിർത്തിയുള്ളതാണ് പുരസ്‌കാരം.  ചലച്ചിത്രോത്സവത്തിന്റെ ഉദ്ഘാടന ചടങ്ങിൽ രജനീകാന്തിന് പുരസ്‌കാരം സമ്മാനിച്ചു. വിദേശ താരത്തിനുള്ള ലൈഫ് ടൈം അച്ചീവ്‌മെന്റ് അവാർഡ് ഫ്രഞ്ച് നടി ഇസബേൽ ഹൂപെയ്ക്ക് സമ്മാനിച്ചു.
         മലയാളത്തിന് ഏറെ അഭിമാനിക്കാവുന്ന ഒരു നേട്ടം കൂടി സമ്മാനിച്ചാണ് ഗോവ രാജ്യാന്തര ചലച്ചിത്രമേളയ്ക്ക് ഇത്തവണ തിരശ്ശീല വീണത്. മലയാളി സംവിധായകൻ ലിജോ ജോസ് പെല്ലിശ്ശേരി തുടർച്ചയായ രണ്ടാം വർഷവും മികച്ച സംവിധായകനുള്ള രജത മയൂരം പുരസ്‌കാരം സ്വന്തമാക്കിയാണ് കേരളത്തിന്റെ അഭിമാനമായത്. ജല്ലിക്കട്ട് എന്ന ചിത്രമാണ് ലിജോയെ പുരസ്‌കാരത്തിന് അർഹനാക്കിയത്. കഴിഞ്ഞ വർഷം ഈ.മ.യൗവിനാണ് ലിജോയ്ക്ക് പുരസ്‌കാരം ലഭിച്ചത്. പതിനഞ്ച് ലക്ഷം രൂപയും പ്രശസ്തിപത്രവുമാണ് രജത മയൂരത്തിന് പുരസ്‌കാര തുകയായി ലഭിച്ചത്. ബ്‌ലെയ്സ് ഹാരിസൺ സംവിധാന ചെയ്ത ഫ്രഞ്ച്, സ്വിസ് ചിത്രം പാർട്ടിക്കിൾസിനാണ് മികച്ച ചിത്രത്തിനുള്ള സുവർണ മയൂരം. നാൽപത് ലക്ഷം രൂപയും പ്രശസ്തിപത്രവുമാണ് പുരസ്‌കാരം. ഗറില്ല രാഷ്ട്രീയ തടവുകാരനായ കാർലോസ് മാരിഗെല്ലയെ വെള്ളിത്തിരയിൽ അവിസ്മരണീയമാക്കിയ സ്യു ഷോർഷിയാണ് മികച്ച നടൻ. വാഗ്നർ മൗര സംവിധാനം ചെയ്ത മാരിഗെല്ല എന്ന ചിത്രത്തിലൂടെയാണ് സ്യൂ ഷോർഷിക്ക് പുരസ്‌കാരം ലഭിച്ചത്. ഉരുട്ടിക്കൊലയ്ക്ക് വിധേയനായ ഉദയകുമാറിന്റെ അമ്മ പ്രഭാവതിയമ്മയുടെ പോരാട്ടത്തിന്റെ കഥ പറഞ്ഞ മായിഘട്ട് എന്ന ചിത്രത്തിലെ അഭിനയത്തിലൂടെ ഉഷ ജാദവ് മികച്ച നടിക്കുള്ള രജത മയൂരത്തിന് അർഹയായി.  പെമ സെഡെന്റെ ബലൂൺ പ്രത്യേക ജൂറി അവാർഡും ഹെല്ലാരൊ പ്രത്യേക ജൂറി പരാമർശവും നേടി. മികച്ച നവാഗത സംവിധായകനുള്ള പുരസ്‌കാരം രണ്ടു പേർ പങ്കിട്ടു. മരിയസ് ഒട്ട്‌ലേനു സംവിധാനം ചെയ്ത മോൺസ്‌റ്റേഴ്സിനും അമിൻ സിദി ബൗമെദ്ദീൻ സംവിധാനം ചെയ്ത അബൂലൈലയ്ക്കുമാണ് പുരസ്‌കാരം. ബ്‌ലെയ്സ് ഹാരിസനാണ് ചിത്രം സംവിധാനം ചെയ്തത്. ശ്യാമപ്രദാസ് മുഖർജി സ്റ്റേഡിയത്തിൽ നടന്ന  സമാപന സമ്മേളനത്തിൽ കേന്ദ്ര വാർത്താവിതരണ പ്രക്ഷേപണ മന്ത്രി പ്രകാശ് ജാവഡേക്കർ ആണ് പുരസ്‌കാരങ്ങൾ വിതരണം ചെയ്തത്.
     
      ഇന്ത്യൻ സാംസ്‌കാരിക കലാ മേഖലയ്ക്ക് നൽകിയ സംഭാവനകളെ മാനിച്ച് സംഗീത സംവിധായകൻ ഇളയരാജ, നടൻമാരായ അരവിന്ദ് സ്വാമി, പ്രേം ചോപ്ര, കഥക് നർത്തകൻ പണ്ഡിറ്റ് ബിർജു മഹാരാജ്, അസമീസ് സംവിധാകൻ മഞ്ജു ബോറ തുടങ്ങിയവരെ മേളയിൽ ആദരിച്ചു.
      രാജ്യത്തിന്റെ സിനിമാ സംസ്‌കാരത്തിന്റെയും സംഘാടനത്തിന്റെയും മികവു കൊണ്ട് യശസ്സു നേടിയെടുത്തിട്ടുള്ള മേള വിവിധ സംസ്ഥാനങ്ങളിൽ നിന്നുള്ള ചലച്ചിത്ര പ്രേമികളുടെയും സിനിമാ പ്രവർത്തകരുടെയുടെയും പങ്കാളിത്തം കൊണ്ട് ശ്രദ്ധേയമായിരുന്നു. പന്ത്രണ്ടായിരത്തോളം  കാണികളാണ് എട്ടു ദിവസത്തെ മേളയെ സജീവമാക്കാനെത്തിയത്. പതിവുപോലെ പ്രതിനിധികളിൽ വലിയൊരു പങ്ക് കേരളത്തിൽ നിന്നുള്ളവരായിരുന്നു എന്നതും ശ്രദ്ധേയമാണ്. ചലച്ചിത്ര പഠിതാക്കളുടെ വലിയ സാന്നിധ്യവും ഇത്തവണത്തെ മേളയുടെ സവിശേഷതയായിരുന്നു.

ആകാശവാണി, വാർത്താവീക്ഷണം, 2019 ഡിസംബർ 6

പെൺസ്വപ്നങ്ങൾക്കെത്ര പരിധിയാകാം

ഇത് നമ്മൾ തന്നെയല്ലേ, ഇതു നമ്മുടെ ജീവിതം തന്നെയല്ലേ എന്ന തോന്നലുണ്ടാക്കുന്ന ചില സിനിമകളുണ്ട്. ജീവിതത്തോട് ഒട്ടും അകലെയല്ലാതെ, കഥാപാത്രങ്ങൾ ക്യാമറയ്ക്ക് മുന്നിലാണെന്നു തോന്നാത്ത സിനിമാനുഭവം. അപൂർവ്വം സിനിമകളിലാണ് ഇങ്ങനെ സംഭവിക്കാറ്. അതാകട്ടെ പരിചിത ജീവിത സ്ഥലികളോട് അത്രമാത്രം അടുത്തുനിൽക്കുന്നതുമാകും. ഇന്ത്യയുടെ ഔദ്യോഗിക ഓസ്‌കർ എൻട്രിയായിരുന്ന റീമാ ദാസിന്റെ ആസാമീസ് ചിത്രം 'വില്ലേജ് റോക്ക്സ്റ്റാർസ്' ഈ ഗണത്തിൽ പെടുന്ന സിനിമയാണ്.

വടക്കുകിഴക്കൻ ഇന്ത്യയിലെ ആസാമിലെ ചായ്‌ഗോൺ ഗ്രാമമാണ് വില്ലേജ് റോക്ക്സറ്റാർസിന്റെ പശ്ചാത്തലം. ഒട്ടും സിനിമാറ്റിക്കാകാതെ ജീവിതം പകർന്നിട്ടിരിക്കുന്ന സിനിമയിൽ ഗ്രാമീണ മനുഷ്യരുടെ നിഷ്‌കളങ്ക സ്‌നേഹവും അവരുടെ ഇത്തിരിവട്ടത്തെ കുഞ്ഞുസ്വപ്നങ്ങളും മാത്രമേയുള്ളൂ. 87 മിനിറ്റ് നേരം ആ ഗ്രാമത്തിലും മനുഷ്യർക്കിടയിലും കേന്ദ്രകഥാപാത്രങ്ങളായ കുട്ടികൾക്കുമൊപ്പം എത്തിപ്പെട്ടതു പോലെ കാണികളായ നമ്മളും. കുട്ടികളുടെ നിഷ്‌കളങ്കതയിലേക്കും കളിക്കുറുമ്പുകളിലേക്കും സ്വപ്നങ്ങളിലേക്കും തുറന്നുവച്ച ക്യാമറയാണ് വില്ലേജ് റോക്ക് സ്റ്റാറിന്റേത്.
      പത്ത് വയസ്സുകാരിയായ ധുനു വിധവയായ അമ്മയ്ക്കും ഇളയ സഹോദരനുമൊപ്പമാണ് താമസിക്കുന്നത്. ധുനുവിന്റെ ഊർജ്ജസ്വലതയും ആത്മവിശ്വാസവും അവൾ ആൺകുട്ടികൾക്ക് ഒട്ടും പിന്നിലല്ല എന്നു ഗ്രാമത്തിലെ എല്ലാവരെക്കൊണ്ടും പറയിപ്പിക്കുന്നു. ആൺകുട്ടികളാണ് അവളുടെ സന്തതസഹചാരികൾ. അവർക്കൊപ്പമാണ് സ്‌കൂളിലേക്കുള്ള പോക്കുവരവും കളികളും മത്സരവുമെല്ലാം.  ഓടിയും ചാടിയും മീൻപിടിച്ചും വെള്ളത്തിൽ കളിച്ചും ആസ്വദിക്കുന്ന ബാല്യങ്ങൾ. ഇപ്പോഴും നാട്ടിൻപുറങ്ങളിൽ അവേശഷിക്കുന്ന നന്മയുടെ ഉറവകൾ ഈ സിനിമയിലാകെ പടർന്നു പന്തലിച്ചു കാണാം.
ഒരു പെൺകുട്ടിയുടെ സ്വപ്നങ്ങൾക്കെത്ര പരിധിയാകാമെന്ന ചിന്തയാണ് സിനിമ പകർന്നുതരുന്നത്. വികസനമെത്താത്ത ഒരു ഗ്രാമീണദേശത്തെ ദരിദ്രബാലികയുടെ പ്രതിനിധിയാണ് ധുനു. ഗിറ്റാർ വാങ്ങുന്നതും കൂട്ടുകാരുമൊത്ത് ഒരു റോക്ക് ബാൻഡ് തുടങ്ങുന്നതുമാണ് ധുനുവിന്റെ സ്വപ്നം. നഗരകേന്ദ്രീകൃതമായ ഒരന്തരീക്ഷത്തിൽ ജീവിക്കുന്ന ഒരു കുട്ടിയെയും അവരുടെ സൗകര്യങ്ങളെയും സംബന്ധിച്ച് ഇതത്ര വലിയ സ്വപ്നമല്ല. എന്നാൽ ധുനു ജനിച്ച ഗ്രാമത്തിൽ ഒരാൾക്ക് കാണാനാകുന്ന സ്വപ്നങ്ങൾക്ക് യാഥാർഥ്യത്തിന്റെ വിലങ്ങുണ്ട്.

     ബാൻഡിലേക്ക് ഓരോരുത്തരും ഓരോ ഉപകരണം വീതം കണ്ടെത്തണമെന്നാണ് ധുനുവിന്റെയും കൂട്ടുകാരുടെയും ലക്ഷ്യം. അതിൽപിന്നെ ധുനുവിന്റെ ജീവിതാഭിലാഷമായി വളരുന്നത് ഒരു ഗിറ്റാറാണ്. തെർമോകോൾ ഉപയോഗിച്ച് ഒരു മാതൃക ഉണ്ടാക്കി അവൾ ആ സ്വപ്നം കാണുന്നു. അമ്മയോട് തന്റെ ആഗ്രഹം അവൾ അവൾ പറഞ്ഞു. അതിനിടയിലാണ് ഗ്രാമത്തിൽ വെള്ളപ്പൊക്കം എത്തുന്നത്. ഗ്രാമത്തിനാകെ നഷ്ടങ്ങളുടെ കണക്ക് മാത്രം. തന്റെ സ്വപ്നമായ ഗിറ്റാറിലേക്ക് ധുനു ചെറുനാണയങ്ങൾ സമ്പാദിച്ചു വയ്ക്കുന്നുണ്ട്. വീടിന്റെ തൂണിൽ ഒരു ദ്വാരമെടുത്താണ് അവളുടെ നാണ്യശേഖരത്തിന് ഇടം കണ്ടെത്തിയിരുന്നത്. വെള്ളപ്പൊക്കത്തിൽ അത് നഷ്ടപ്പെട്ടില്ലെന്നത് അവൾക്ക് വലിയ ആശ്വാസമാകുന്നു. അവളത് അമ്മയ്ക്ക് നൽകുന്നു. വെള്ളപ്പൊക്കം ഗ്രാമത്തെയും വിളകളെയും നശിപ്പിച്ചെങ്കിലും ധുനു അവളുടെ ഗിറ്റാർ വാങ്ങാനുള്ള സ്വപ്നത്തിന്റെ മുൻഗണന അപ്പൊഴും തിരുത്തുന്നില്ല.
      പ്രകൃതിയെ ചൂഷണം ചെയ്യാതെ അവയോട് സമരസപ്പെട്ട് ജീവിക്കുന്ന ജനതയും നാടുമാണ് സിനിമയിലെ ചഹായ്‌ഗോൺ ഗ്രാമം. ഗ്രാമീണ സൗഭാഗ്യങ്ങൾക്കൊപ്പം വരൾച്ചയും വെള്ളപ്പൊക്കവും കൃഷിനാശവും സംഭവിക്കാറുണ്ടെങ്കിലും അതിനുമുന്നിൽ തോൽക്കാതെ പിടിച്ചുനിൽക്കുകയും വീണ്ടും വിത്ത് വിതയ്ക്കുകയും വിളവ് സ്വപ്നം കാണുകയും ചെയ്യുന്ന ഗ്രാമവും ജനതയും. ആസാമിലെ ഈ ഗ്രാമം ഇന്ത്യയിലെ വടക്കു കിഴക്കൻ സംസ്ഥാനങ്ങളിലെ ഗ്രാമങ്ങളുടെ നേർചിത്രം തന്നെയാണ്. പരിപൂർണതയ്ക്കായി 150 ദിവസമാണ് റീമാ ദാസ് തന്റെ സിനിമ ഷൂട്ട് ചെയ്യാനെടുത്ത കാലയളവ്. ഇതിന്റെ മികവ് സിനിമയുടെ കാഴ്ചയിൽ നമുക്ക് പകർന്നു കിട്ടും. ഒരു വേള ആഢംബരവും തിരക്കും നിറഞ്ഞ നമ്മുടെ പുറം ലോകത്തെ മറന്നുപോകുന്ന നിഷ്‌കളങ്ക ഗ്രാമജീവിത കാഴ്ചയുടെ നിറവ് തന്നെയാണ് വില്ലേജ് റോക്ക് സ്റ്റാർസിന്റെ കരുത്ത്.
കുട്ടികളെ കേന്ദ്രമാക്കിയുള്ള സിനിമകളാണ് ലോക സിനിമയിൽ എക്കാലത്തും നിരൂപക, പ്രേക്ഷക പ്രശംസയ്ക്ക് പാത്രമായിട്ടുള്ളത്. ഭാഷയുടെയോ ദേശത്തിന്റേയോ അതിരുകളില്ലാതെ കാണിയോട് സംവദിക്കാൻ കുട്ടികളുടെ സ്വപ്നങ്ങൾക്കും തോന്നലുകൾക്കും സങ്കടങ്ങൾക്കുമാകും. ഈ സവിശേഷതയാണ് വില്ലേജ് റോക്ക്സ്റ്റാർസിനെ ലോക സിനിമാ ഭൂപടത്തിലേക്ക് ഉയർത്തുന്നത്.

അക്ഷരകൈരളി, 2020 ഏപ്രിൽ

ആത്മീയ കച്ചവടത്തിലേക്ക് കണ്ണുതുറന്നിടുന്ന ട്രാൻസ്

'ആടുകളുടെ രൂപത്തിൽ വരുന്ന പ്രവാചകൻമാരെ സൂക്ഷിക്കുക, അവർ ചോര കുടിക്കുന്ന ചെന്നായ്ക്കളാണ്.' 

മതവും മതബിംബങ്ങളും മറ കൂടാതെ വെളിച്ചത്തെത്തിയിരിക്കുന്ന ഒരു സാമൂഹിക പരിതസ്ഥിതിയാണ് നടപ്പുകാലത്തിന്റേത്. മതം പറയാൻ മടിയില്ലാത്തവരായി മാറിയിരിക്കുന്ന ആൾക്കൂട്ടം മതത്തിനും വിശ്വാസത്തിനും വേണ്ടി എന്തും ചെയ്യുന്ന ഘട്ടത്തിലുമെത്തിയിരിക്കുന്നു. നവോത്ഥാനം കൊണ്ട് ആർജ്ജിച്ചെടുത്തിരിക്കുന്ന എല്ലാ മൂല്യങ്ങളെയും പിറകോട്ടടിക്കുന്ന വിധത്തിൽ എളുപ്പം വ്രണപ്പെടുന്ന വികാരം മാത്രമായി മതം അധ:പതിച്ചിരിക്കുന്ന കാലത്ത് അഭിപ്രായ സ്വാതന്ത്ര്യങ്ങളെ വിലങ്ങിടുകയാണ് എളുപ്പത്തിൽ ചെയ്തു പോരുന്നത്. മനുഷ്യന്റെ അവകാശങ്ങൾക്കും സ്വാതന്ത്ര്യങ്ങൾക്കും പരിധിയും വിലക്കും നിശ്ചയിക്കപ്പെടുമ്പോൾ ഭൂരിപക്ഷത്തിന്റെ താത്പര്യങ്ങൾ മാത്രം മുന്നിട്ടു നിൽക്കുകയും ന്യൂനപക്ഷം അടിച്ചമർത്തപ്പെടുകയും ചെയ്യുന്നു.
        ഇത്തരമൊരു സാമൂഹിക പശ്ചാത്തലത്തിൽ കലയ്ക്കു പോലും അതിരുകൾ നിശ്ചയിച്ചിട്ടുണ്ട്. അതിർവരകൾ കടന്നു സഞ്ചരിക്കാനാകാതെ കല ശ്വാസം മുട്ടൽ അനുഭവിക്കുമ്പോൾ കലാകാരനും ഏറെ പരിമിതിയുണ്ട്. നിലവിലെ സാമൂഹിക സാഹചര്യത്തിൽ ആത്മീയ, മത കച്ചവടക്കാരെ വെളിച്ചത്തു കൊണ്ടുവരുന്നൊരു സിനിമയെടുക്കമോ എന്ന് തീർച്ചയായും ചലച്ചിത്രപ്രവർത്തകർ സംശയിച്ചേക്കാം. ഈ സംശയത്തെ ഒരു പരിധി വരെ ദൂരീകരിക്കുകയാണ് അൻവർ റഷീദിന്റെ ട്രാൻസ് എന്ന ചിത്രം. മനുഷ്യന്റെ ഭക്തിയെ ചൂഷണം ചെയ്ത് ആത്മീയത കച്ചവടമാക്കി മാറ്റുന്ന ഒരു വിഭാഗത്തെയാണ് ട്രാൻസ് അടയാളപ്പെടുത്തുന്നത്. പ്രാർത്ഥനയും വചന പ്രഭാഷണവും രോഗശാന്തി ശുശ്രൂഷയും വഴി ഭക്തനെ ആത്മീയതയുടെ ലഹരി പിടിപ്പിക്കുന്ന ലോകത്തിലേക്കാണ് ഈ കച്ചവടക്കാർ നയിക്കുന്നത്. മതത്തെയും ഭക്തരെയും ലക്ഷ്യം വയ്ക്കാതെ ഭക്തി കച്ചവടമാക്കുന്നവരെ മാത്രം പ്രതിസ്ഥാനത്തു നിർത്തുകയാണ് അൻവർ റഷീദിന്റെ സിനിമ ചെയ്യുന്നത്. ഇതിലൂടെ ഒരു തരം സേഫ് സോൺ സർഗാത്മകത കാത്തുസൂക്ഷിക്കാൻ സംവിധായകനാകുന്നു. സിനിമ മതത്തെ കുറ്റപ്പെടുത്തുന്നുമില്ല, എന്നാൽ മതത്തെ ആധാരമാക്കി അതിനുപിന്നിൽ നടക്കുന്ന കോടികളുടെ കച്ചവടത്തെ അടയാളപ്പെടുത്തുകയും ചെയ്യുന്നു.
       
        വിജു പ്രസാദ് എന്ന മോട്ടിവേഷണൽ സ്പീക്കറിൽ നിന്ന് ജോഷ്വ കാൾട്ടൺ എന്ന പാസ്റ്ററിലേക്കുള്ള പ്രധാന കഥാപാത്രത്തിന്റെ വളർച്ചയിലൂടെയാണ് ട്രാൻസ് സഞ്ചരിക്കുന്നത്. ഫഹദ് ഫാസിൽ അവതരിപ്പിക്കുന്ന ഈ കഥാപാത്രം തന്നെയാണ് സിനിമയുടെ ആകെ ഊർജ്ജവും. ഒരു ഗ്ലോബൽ ആക്ടർ എന്ന നിലയിലേക്കുള്ള ഫഹദിന്റെ ട്രാൻസ്ഫർമേഷൻ കൂടിയാണ് ട്രാൻസ് സാധ്യമാക്കുന്നത്. അസാമാന്യമായ ശാരീരിക വഴക്കം വേണ്ടുന്ന ഒരു കഥാപാത്രത്തെ അസാധാരണമാം വിധം ലളിതമായാണ് ഫഹദ് അവതരിപ്പിച്ചിരിക്കുന്നത്. സദനേരം ഊർജ്ജം പ്രസരിപ്പിക്കുകയും സജീവമായി ആളുകൾക്കിടയിൽ ഇടപെടലും ആവശ്യപ്പെടുന്ന ഒരു സ്‌റ്റേജ് പെർഫോർമറുടേതിന് സമാനമായ പ്രകടനമാണ് ഇതിലെ പാസ്റ്ററിൽ നിന്നുണ്ടകേണ്ടത്. ഈ കഥാപാത്രത്തിന്റെ ഉള്ളറിഞ്ഞുള്ള പ്രകടനമാണ് ഫഹദ് നടത്തുന്നതും. അതുകൊണ്ടുതന്നെ ട്രാൻസ് എന്ന സിനിമ പിൽക്കാലത്ത് ഓർക്കപ്പെടുക ഫഹദിലെ നടന്റെ ഗ്രാഫ് ഉയർത്തിയ സിനിമ എന്ന നിലയ്ക്കായിരിക്കും. ഫഹദിലെ പെർഫോമറിന് നിറഞ്ഞാടാൻ അവസരം തുറന്നിട്ടു നൽകിയിരിക്കുകയാണ് ട്രാൻസ്. 
         ഉസ്താദ് ഹോട്ടലിനു ശേഷം വരുന്ന അൻവർ റഷീദിന്റെ സിനിമ എന്നതായിരുന്നു ട്രാൻസിനെ ഏറ്റവുമധികം ശ്രദ്ധേയമാക്കിയത്. എന്നാൽ ഉസ്താദ് ഹോട്ടൽ പോലെ എല്ലാ വിഭാഗം കാണികൾക്കും പ്ലീസിംഗ് ആയൊരു സിനിമയാകാൻ ട്രാൻസിന് കഴിയുന്നില്ല. ഉസ്താദ് ഹോട്ടലിന്റെ ബലം അഞ്ജലി മേനോന്റെ പിഴവില്ലാത്ത തിരക്കഥയായിരുന്നുവെങ്കിൽ ട്രാൻസിന് ഇല്ലാതെ പോയതും അതു തന്നെ. ട്രാൻസിനു വേണ്ടി വിൻസന്റ് വടക്കൻ ഒരുക്കിയ തിരക്കഥ സിനിമയുടെ ഒരു ഘട്ടം പിന്നിട്ടാൽ തറയിലുറയ്ക്കാതെ വായുമാർഗേണ സഞ്ചരിക്കുകയാണ്. ഈ ഒരു ന്യൂനത പ്രകടമാകുന്നത് സിനിമയുടെ രണ്ടാം പാതിയിലാണ്. ആദ്യ പകുതി കണ്ട ഒഴുക്കോടെ സിനിമയുടെ തുടർന്നുള്ള ഭാഗം കാണുന്നതിൽ നിന്ന് ഇത് കാണികളെ പിന്നോട്ടു വലിക്കുന്നു. യാതൊരു ഉദ്വേഗവും ജനിപ്പിക്കാതെയാണ് രണ്ടാം പകുതിയിൽ സിനിമയുടെ സഞ്ചാരം. പ്രതീക്ഷിതമായ സംഭവ പരമ്പരകളുടെ ആവർത്തനം ക്ലൈമാക്സിൽ ചെന്നു നിൽക്കുമ്പോൾ സിനിമയുടെ ആദ്യ പകുതി തന്ന ഊർജ്ജം മാത്രം ബാക്കിയാകുന്നു.
      ചെമ്പൻ വിനോദ്, വിനായകൻ, സൗബിൻ ഷാഹിർ, ഗൗതം മേനോൻ, നസ്രിയ നസീം, ദിലീഷ് പോത്തൻ, ശ്രീനാഥ് ഭാസി തുടങ്ങി പെഫോർമാരുടെ നീണ്ട നിര ട്രാൻസിന് സ്വന്തമാണ്. എന്നാൽ ഫഹദിനും ഒരു പരിധി വരെ ശ്രീനാഥ് ഭാസിക്കും മാത്രമാണ് കാണികൾക്ക് ഓർത്തുവയ്ക്കാനുള്ള പ്രകടനം നടത്താനുള്ള സ്‌പേസ് സിനിമ നൽകുന്നത്.

      ബലം കുറഞ്ഞ തിരക്കഥയുടെ കുറവിലും റസൂൽ പൂക്കുട്ടി, അമൽ നീരദ്, അൻവർ റഷീദ് എന്നീ വലിയ പേരുകളാണ് ട്രാൻസിന് കരുത്ത് നൽകുന്നത്. ആയിരക്കണക്കിന് ആളുകൾ കൂടുന്ന ബൈബിൾ കൺവെൻഷൻ ഹാൾ സിനിമയിൽ ഏറെ പ്രാധാന്യമുള്ള ഒരു ഘടകമാണ്. ഈ പ്രാർത്ഥനാ വേളകളുടെ ഫ്രെയിമുകളും അവിടത്തെ ശബ്ദപ്രഘോഷങ്ങളും മാറ്റു പോവാതെ പിടിച്ചെടുക്കാനായതിന്റെ മികവ് സിനിമയുടെ കാഴ്ചയിലുണ്ട്. സിനിമയെ ഏറ്റവുമധികം സജീവമാക്കുന്നതും ഈ പ്രാർത്ഥനാ ഹാളിലെ പ്രകടനങ്ങൾ തന്നെ. ഇത്തരമൊരു സവിശേഷമായ ആൾക്കൂട്ടം ഒരു മണിക്കൂറിലധികം നേരമാണ് സിനിമയിൽ കടന്നുവരുന്നത്. ഈ ചിത്രീകരണം തന്നെ മലയാള സിനിമയെ സംബന്ധിച്ച് പുതുമയാണ്.
      വലിയ ബജറ്റിൽ പല ഷെഡ്യൂളികളിലായി ഏറെക്കാലമെടുത്ത് ചിത്രീകരിച്ചതിന്റെ ഗുണം സിനിമയുടെ കാഴ്ചയിൽ കാണികൾക്കു പകർന്നു കിട്ടുന്നുണ്ട്. കുറേക്കൂടി മുന കൂർപ്പിച്ച ഒരു തിരക്കഥ കൂടിയുണ്ടായിരുന്നെങ്കിൽ പറയുന്ന വിഷയത്തിന്റെ ഗൗരവം കൂടി കണക്കിലെടുത്ത് ട്രാൻസ് മലയാളത്തിലെ മികച്ച ചിത്രങ്ങളുടെ കൂട്ടത്തിലേക്ക് കടന്നേനെയെന്ന് നിസ്സംശയം പറയാം.

സ്ത്രീശബ്ദം, 2020 മാർച്ച്‌

ക്ലാസ് വിഭജനത്തിന്റെ രാഷ്ട്രീയം പ്രഖ്യാപിക്കുന്ന പാരസൈറ്റ്

ദക്ഷിണ കൊറിയയിൽ മനുഷ്യർക്കിടയിൽ നിലനിൽക്കുന്ന സാമ്പത്തിക, സാമൂഹിക അന്തരത്തെ രണ്ടു കുടുംബങ്ങളിലൂടെ അവതരിപ്പിച്ച് ആ പ്രശ്നത്തിന് സാർവലോക മാനം നൽകാൻ കഴിയുന്നതിലൂടെയാണ് ബോംഗ് ജൂൺ ഹോയുടെ പാരസൈറ്റ് ശ്രദ്ധേയമാകുന്നത്. സമൂഹത്തിലെ ക്ലാസ് വിഭജനത്തിന്റെ രാഷ്ട്രീയമുയർത്തി ഇക്കുറി ഓസ്‌കറിൽ ഏഷ്യയുടെ അഭിമാനമായി മാറിയ ബോംഗ് ജൂൺ ഹോയുടെ ചിത്രം ചർച്ചചെയ്യുന്നത് അതീവ ഗൗരവമുള്ള രാഷ്ട്രീയമാണ്.
      എത്രയൊക്കെ ആധുനികവത്കരിക്കപ്പെട്ടാലും ഭരിക്കുന്നവർ  ഭരിക്കപ്പെടുന്നവർ, ഉടമ  അടിമ, സമ്പന്നൻ  ദരിദ്രൻ, മുതലാളി തൊഴിലാളി, കോർപ്പറേറ്റ്  കോമൺ പീപ്പിൾ തുടങ്ങിയ ദ്വന്ദ്വങ്ങളിലാണ് ലോകം പിടിമുറുക്കി പോരുന്നത്. ഒരിക്കലും ഇതു വിട്ടുപോരാൻ ലോകക്രമം തയ്യാറാകുന്നില്ല. വർക്കിംഗ് ക്ലാസ് അതുപോലെ തന്നെ നിലനിൽക്കുകയും എക്കോണമി ക്ലാസ് ഭരണച്ചരട് കൈയാളുന്നവരും സാമ്പത്തിക യന്ത്രം കറക്കുന്നവരുമാകണമെന്ന് അത് അനുശീലിച്ചു വച്ചിരിക്കുന്നു.
      ആധുനിക സമൂഹത്തിന്റെ എല്ലാ മാറ്റങ്ങളും ഉൾക്കൊള്ളുകയും അതു പ്രാപ്യമാക്കുന്ന സകല സൗകര്യങ്ങളും ആസ്വദിക്കാൻ ത്രാണിയുമുള്ള ഉപരിവർഗം എന്ന സമൂഹത്തിന്റെ സമ്പത്തിന്റെയും അധികാരത്തിന്റെയും ഭാഗധേയം നിർണയിക്കുന്ന ഒരു വിഭാഗം, ആധുനികത വിരിച്ചിട്ട സുഖശീതളിമയ്ക്ക് പരിപൂർണാർഥത്തിൽ കീഴ്‌പ്പെടാൻ പാങ്ങില്ലാത്ത, എന്നാൽ തെല്ല് പ്രയാസപ്പെട്ടിട്ടായാലും ജീവിതത്തിന്റെ രണ്ടറ്റം കൂട്ടിമുട്ടിക്കുന്ന മധ്യവർഗം, ആധുനികതയുടെ യാതൊരു പളപളപ്പും തിരിച്ചറിയാതെ പാടുപെട്ടും നരകിച്ചും ദിവസജീവിതം തള്ളിനീക്കുന്ന അധോവർഗം. ഈയൊരു ക്രമത്തിൽ കാലാകാലങ്ങളായി മുന്നോട്ടു നീങ്ങിക്കൊണ്ടിരിക്കുന്ന സമൂഹത്തെയാണ് ബോംഗ് ജൂൺ ഹോ തന്റെ സിനിമയിൽ അടയാളപ്പെടുത്തുന്നത്.
       
       അന്നന്നത്തേക്കുള്ള അന്നം തേടാൻ പാടുപെടുന്ന വർക്കിഗ് ക്ലാസിനെ പ്രതിനിധീകരിക്കുന്നതാണ് കിമ്മിന്റെ കുടുംബം. ബിസിനസ് ക്ലാസിന്റെ പ്രതിനിധികളാണ് പാർക്കിന്റെ കുടുംബം. പാർക്കിന്റേത് അത്യാധുനിക സൗകര്യങ്ങളോടു കൂടിയ വീടാണ്. നഗരപ്രാന്തത്തിലെ തീരെ ഇടുങ്ങിയൊരു കെട്ടിടത്തിന്റെ പാതി ഭൂമിക്കടിയിലെന്നു പറയാവുന്നിടത്താണ് കിമ്മിന്റെ താമസം. രണ്ടു വീട്ടിലും നാലംഗങ്ങളാണുള്ളത്. മറ്റുള്ളവരുടെ കാരുണ്യത്തിലാണ് കിമ്മിന്റെയും കുടുംബത്തിന്റെയും ജീവിതം മുടന്തിനീങ്ങുന്നത്. നാലുപേരും ഒന്നു വിശാലമായി ഇരുന്നാൽ തീരാവുന്ന സ്ഥലമേ ആ വീട്ടിലുള്ളൂ. കിട്ടുന്ന ആഹാരം സന്തോഷത്തോടെ അവർ പകുത്ത് കഴിക്കുന്നു. പാർക്കിന്റെ വീട്ടിലാകട്ടെ ആഴ്ചകളോളം ഉപയോഗിക്കാനുള്ള സാധനങ്ങൾ ശേഖരിച്ചു വച്ചിട്ടുണ്ട്. ഇല്ലായ്മയെന്തെന്ന് അവർക്കറിയില്ല. വീട്ടിലെ നാലംഗങ്ങൾക്കും പ്രത്യേക മുറിയുണ്ട്. വിശാലമായ അകത്തളങ്ങളും പുല്ലുവിരിച്ച മുറ്റവുമുണ്ട്. ബെൽ മുഴക്കി അനുവാദം ചോദിച്ചതിനു ശേഷം മാത്രമേ പാർക്കിന്റെ വിശാലമായ വീടിന്റെ ഗേറ്റിനകത്തേക്ക് പ്രവേശനമുളളൂ.
       ഇങ്ങനെ അടിസ്ഥാന സൗകര്യങ്ങളിൽ തുടങ്ങി വിയർപ്പിന്റെ മണത്തിൽ പോലും രണ്ടു വിഭാഗത്തിന്റെ വ്യത്യാസം പ്രകടമാകുന്നു. ഉപരിവർഗത്തിന്റെ പ്രതിനിധിയായ പാർക്കിന് അദ്ധ്വാനിക്കുന്നവന്റെ കുപ്പായത്തിന്റെ മണം പോലും ഓക്കാനമുണ്ടാക്കുന്നുണ്ട്.
      ലോകം എത്രയൊക്കെ ആധുനികവത്കരിക്കപ്പെട്ടാലും മനുഷ്യരിൽ ഉപരിവർഗമെന്നും കീഴാളവർഗമെന്നുമുള്ള രണ്ടു വിഭാഗം ഇപ്പോഴും പ്രബലമാണെന്നും ലോകം നിയന്ത്രിക്കുന്നത് അതിസമ്പന്നരായ ഒരു കൂട്ടം മനുഷ്യരാണെന്നും പാരസൈറ്റ് പറഞ്ഞുവയ്ക്കുന്നു. ദക്ഷിണ കൊറിയയിലെ സോൾ നഗരത്തിലെ രണ്ടു കുടുംബങ്ങൾ കേന്ദ്രീകരിച്ചു കഥ പറയുന്നെങ്കിലും ഏതൊരു ദേശത്തും പ്രസക്തമായ വിഷയമാണിത്. ഇനിയും നടപ്പിലായിട്ടില്ലാത്ത സാമ്പത്തിക സോഷ്യലിസവും ഒരിടത്തേക്കു മാത്രമായുള്ള പണത്തിന്റെയും വിഭവങ്ങളുടെയും കേന്ദ്രീകരണവും പാരസൈറ്റ് ചർച്ചചെയ്യുന്നു.
      അതീവ ഗൗരവമുള്ള പ്രമേയമാണ് മുന്നോട്ടുവയ്ക്കുന്നതെങ്കിലും അവതരണത്തിലെ ലാളിത്യം കൊണ്ടാണ് പാരസൈറ്റ് ശ്രദ്ധേയമാകുന്നത്. രസകരമായ ആഖ്യാനമാണ് സിനിമ കാണികൾക്ക് സാദ്ധ്യമാക്കുന്നത്. സമൂഹത്തിലെ ക്ലാസ് ഡിഫറൻസ് എന്ന പൊള്ളുന്ന രാഷ്ട്രീയത്തെ ഹാസ്യാത്മകമായി കൈകാര്യം ചെയ്ത് പൊടുന്നനെ ഒരു ഇരുട്ടറയിലേക്ക് തള്ളിയിടുന്ന അനുഭവമാണ് സിനിമ തരിക. സിനിമയുടെ മുക്കാൽ പങ്കും ഉയരുന്ന ചിരി അതോടെ ഭയാനകമായ നിശബ്ദതയിലേക്ക് മാറുന്നു. ഈ നിശബ്ദതയിലാണ് അടിത്തട്ടിലുള്ള മനുഷ്യരെപ്പറ്റി നമ്മൾ ചിന്തിക്കുന്നത്. ജീവിതത്തിന്റെ യാതൊരു നിറങ്ങളുമറിയാതെ ഒരായുസ്സാകെ ഇരുട്ടിൽ ജീവിക്കാൻ വിധിക്കപ്പെട്ട മനുഷ്യർ. അങ്ങനെയുള്ള ഒട്ടനവധി മനുഷ്യർ നമ്മൾ ജീവിക്കുന്ന ചുറ്റുപാടിലും ഈ ലോകത്താകെയുമുണ്ടെന്നു തിരിച്ചറിയുമ്പോഴാണ് ഒരു തണുത്ത തരിപ്പ് മേലാകെ പടർന്നു കയറുക. അപ്പോഴാണ് ബോംഗ് ജൂൺ ഹോയുടെ സിനിമയ്ക്ക് ആഗോള മുഖം കൈവരുന്നതും.
    
        ബോംഗ് ജൂൺ ഹോയും ഹാൻ ജിൻ വണും ചേർന്നാണ് പാരസൈറ്റിന് തിരക്കഥയൊരുക്കിയിട്ടുള്ളത്. ആഖ്യാനത്തിലെ സവിശേഷതയും വിനോദമൂല്യവും കൊണ്ട് ദക്ഷിണ കൊറിയൻ ബോക്സ് ഓഫീസിൽ വൻവിജയമായിരുന്ന പാരസെറ്റ് ജനപ്രീതിയെ തുടർന്ന് ഒട്ടേറെ ലോക രാജ്യങ്ങളിലും റിലീസ് ചെയ്യുകയുണ്ടായി. കാനിലാണ് ആദ്യം പ്രദർശിപ്പിച്ചത്. കാനിലെ പരമോന്നത ബഹുമതിയായ ഗോൾഡൻ ഗ്ലോബും ചിത്രം നേടി. തുടർന്ന് ഗോവ, കേരള രാജ്യാന്തര മേളകളിൽ ഉൾപ്പെടെ പ്രദർശിപ്പിച്ച പാരസൈറ്റ് കാണികളുടെ സജീവശ്രദ്ധ പിടിച്ചുപറ്റി.
       92 വർഷത്തെ ഓസ്‌കർ ചരിത്രത്തിലാദ്യമായിട്ടാണ് ഒരു ഇംഗ്ലീഷ് ഇതരഭാഷാ ചിത്രം ഓസ്‌കർ വേദിയിൽ മികച്ച ചിത്രമായി തിരഞ്ഞെടുക്കപ്പെടുന്നത്. ഒരു ദക്ഷിണ കൊറിയൻ സംവിധായകൻ ഓസ്‌കർ നേടുന്നതും ആദ്യമായിട്ടാണ്. മാർട്ടിൻ സ്‌കോർസിസി, ടോഡ് ഫിലിപ്സ്, സാം മെൻഡസ്, ക്വിന്റിൻ ടരന്റീനോ എന്നിവരെ പിന്തള്ളിക്കൊണ്ടാണ് കൊറിയൻ സംവിധായകന്റെ ഓസ്‌കർ നേട്ടം. മെമ്മറീസ് ഒഫ് മർഡർ, മദർ, സ്‌നോപിയേഴ്സർ എന്നീ സിനിമകളിലൂടെ രാജ്യാന്തര ശ്രദ്ധ നേടിയ സംവിധായകനാണ് ബോംഗ് ജൂൺ ഹോ.

അക്ഷരകൈരളി, 2020 മാർച്ച്‌

ആഖ്യാന മികവിന്റെ അഞ്ചാം പാതിരാ

സീരിയൽ കൊലപാതകങ്ങളും അവയ്ക്കു പിന്നിലെ കാരണക്കാരനെ തേടിയുള്ള അന്വേഷണവും സിനിമയിൽ പുതുമയുള്ള വിഷയമല്ല. പല ഭാഷകളിലായി ഒട്ടേറെ തവണ സിനിമയ്ക്ക് പ്രമേയമായിട്ടുള്ള ഈ വിഷയം കാണികളിൽ ഉദ്വേഗം ജനിപ്പിക്കുന്ന രീതിയിൽ എങ്ങനെ അവതരിപ്പിക്കുന്നു എന്നതിൽ മാത്രമാണ് പുതുമ അവശേഷിക്കുന്നത്. മലയാളത്തിൽ ഈ വർഷമാദ്യം റിലീസ് ചെയ്ത അഞ്ചാം പാതിരാ എന്ന മിഥുൻ മാനുവൽ തോമസ് ചിത്രം ഇത്തരത്തിൽ ആഖ്യാന മികവുകൊണ്ടാണ് കാണികളുടെ സവിശേഷ ശ്രദ്ധ നേടിയെടുത്തത്.
    സെക്കോപാത്ത്, സോഷ്യോപാത്ത് കഥാപാത്രങ്ങൾ കേന്ദ്രമായിട്ടുള്ള ത്രില്ലറുകൾ മലയാളത്തിലും പലതവണ സംഭവിച്ചിട്ടുള്ളതാണ്. ഹോളിവുഡ്, കൊറിയൻ സിനിമ നന്നായി കൈകാര്യം ചെയ്തിട്ടുള്ള വിഷയത്തെ വക്രീകരിച്ചാണ് പലപ്പോഴും മലയാളത്തിൽ അവതരിപ്പിച്ചു പോന്നിട്ടുള്ളതെന്നു കാണാം. എന്നാൽ കെ.ജി.ജോർജിനെപ്പോലെയുള്ള സംവിധായകർ മൂന്നു പതിറ്റാണ്ടിനു മുമ്പേ ഇത്തരം മാനസിക വൈകൃതവും കൊലപാതക, അക്രമണ ത്വരയുള്ള കഥാപാത്രങ്ങളെ മികച്ച പാത്രസൃഷ്ടിയായി രൂപപ്പെടുത്തിയിട്ടുള്ള ചരിത്രവും മലയാള സിനിമയിലുണ്ട്.
    ത്രില്ലർ സിനിമകളിലെ ആഖ്യാന പരിസരങ്ങൾ കാണികൾക്ക് പരിചിതവും അവരുടെ ഊഹങ്ങളെയും ഇച്ഛകളെയും ശരിവയ്ക്കുകയും ചെയ്യുന്നവയായതിനാൽ അവതരണത്തിൽ എത്രമാത്രം നൂതനതയും വേഗതയും പുലർത്താമെന്നതിലാണ് സംവിധായകന്റെ മിടുക്ക്. അഞ്ചാം പാതിരയെന്ന മലയാളത്തിലെ ഏറ്റവും പുതിയ ത്രില്ലർ സിനിമ ഒരു പരിധി വരെ 'ത്രില്ലിംഗ് എക്സ്പീരിയൻസ്' കാണികളിൽ അനുഭവിപ്പിക്കുന്നതിൽ വിജയിക്കുന്നുണ്ട്.
    അഞ്ചാം പാതിരയിൽ സീരിയൽ കൊലപാതകങ്ങൾ തീർത്ത് ഭീതി പരത്തുന്ന വ്യക്തി ജീവിതത്തിലെ തിക്താനുഭങ്ങൾ കൊണ്ട് സോഷ്യോപാത്ത് ആയി മാറിയ ഒരാളാണ്. ജന്മനാ അയാളിൽ കുറ്റം ചെയ്യാനുള്ള ത്വര ഇല്ല. സമൂഹം തനിക്കും കുടുംബത്തിനും നൽകുന്ന ദുരധ്യായങ്ങൾ അയാളെ പ്രതികാരം ചെയ്യാനും ആസൂത്രിതമായി കൊല നടത്താനും പ്രേരിപ്പിക്കുന്നു. സമൂഹത്തിന് മാതൃകയാകേണ്ടവർ തന്നെയാണ് ഇവിടെ പ്രതിസ്ഥാനത്ത് വരുന്നതെന്നും ഒരാളെ സോഷ്യോപാത്ത് ആക്കി മാറ്റുന്നതെന്നുമുള്ള പ്രത്യേകതയുമുണ്ട്.
    ഒരു വേള കുറ്റവാളിയുടെ മുഖം മറ്റു ചിലരിലേക്ക് നീളുന്ന സംശയത്തിന്റെ ആനുകൂല്യം ഇവിടത്തെ കൊലപാതകിക്കും ലഭിക്കുന്നുണ്ട്. എന്നാൽ എല്ലാ കൊലപാതകങ്ങളിലും അവശേഷിക്കുന്ന 'ദൈവത്തിന്റെ കൈ' ഇവിടെയും പ്രവർത്തിക്കുകയും ഒടുക്കം യഥാർഥ കുറ്റവാളിയിലേക്കു തന്നെ അന്വേഷകർ ചെന്നെത്തുകയും ചെയ്യുന്നു.
 
   ത്രില്ലർ കാറ്റഗറി എന്നതുകൊണ്ടുതന്നെ സംവിധായകന്റെ ആഖ്യാനപാടവം അളക്കുന്ന സിനിമയാണ് അഞ്ചാം പാതിരാ. ഒരു ത്രില്ലർ സിനിമയ്ക്കു വേണ്ട പശ്ചാത്തലമൊരുക്കുന്നതിൽ മിഥുൻ മാനുവൽ തോമസ് വിജയിക്കുന്നുമുണ്ട്. ഓം ശാന്തി ഓശാനയും ആൻ മരിയയും ആടും എഴുതി വിജയിപ്പിച്ച മിഥുന്റെ പുതിയ ജോണറിലേക്കുള്ള ശൈലീമാറ്റവും ശ്രദ്ധേയം. വിരസത കൂടാതെയും പലപ്പോഴും നന്നായി ത്രില്ലടിച്ചും കണ്ടിരിക്കാവുന്ന സിനിമ തന്നെയാണ് അഞ്ചാം പാതിരാ. ത്രില്ലർ സിനിമയുടെ പരിസരം സൃഷ്ടിക്കുന്നതിൽ സുഷിൻ ശ്യാമിന്റെ പശ്ചാത്തല സംഗീതം ഏറെ സഹായിക്കുന്നു. മിസ് കാസ്റ്റിംഗും ദൈർഘ്യക്കൂടുതലും ത്രില്ലർ സിനിമകൾ സൂക്ഷിച്ചുപോരുന്ന പ്രെഡിക്ടബിൾ സീക്വൻസും സംഭാഷണങ്ങളുമാണ് പോരായ്മ. ആഖ്യാനത്തിലെ മികവുകൊണ്ടാണ് മിഥുൻ ഇതിനെ മറികടക്കുന്നത്.
     താരതമ്യേന ചെറിയ കഥാപാത്രങ്ങളായി വരുന്ന ജാഫർ ഇടുക്കി, ഇന്ദ്രൻസ്, ഷറഫുദ്ദീൻ എന്നിവരാണ് അഞ്ചാം പാതിരയിൽ പ്രകടനത്തിൽ മുമ്പിൽ നിൽക്കുന്നത്. കരിയറിന്റെ തുടക്കകാലത്ത് കൊമേഡിയന്മാർ എന്ന നിലയ്ക്ക് മാത്രം അടയാളപ്പെടുത്തപ്പെട്ട മൂന്നു നടന്മാർ തീർത്തും അനായാസമായാണ് ഉള്ളിൽ കൊളുത്തി വലിക്കുന്ന കഥാപാത്രങ്ങളായി രൂപാന്തരപ്പെടുന്നത്. അസാമാന്യ വഴക്കമാണ് അവരുടെ മുഖപേശികൾക്കും ശരീരത്തിനും.
    നിലവാരമുള്ള ത്രില്ലർ സിനിമകൾ വിരലിൽ എണ്ണാവുന്നവ മാത്രമായ മലയാളത്തെ സംബന്ധിച്ച് അഞ്ചാം പാതിരാ ആശ്വാസമാണ്. എന്നാൽ സമ്പൂർണ ത്രില്ലർ പാക്കേജ് നിരന്തരം ഉയിർകൊള്ളുന്ന ഹോളിവുഡ്, നിലവിൽ സൗത്ത് കൊറിയൻ, അതുമല്ലെങ്കിൽ തൊട്ടയൽപക്കമായ തമിഴിൽ നിന്ന് അടുത്ത കാലത്ത് വരുന്ന സിനിമകളുമായി താരതമ്യപ്പെടുത്തിയാൽ അഞ്ചാം പാതിരാ താഴേക്ക് പോകും. സൗത്ത് കൊറിയയിൽ നിന്നു വന്ന ഡോർ ലോക്ക് തന്നെ എറ്റവുമൊടുവിലത്തെ ഉദാഹരണം.

സ്ത്രീശബ്ദം, 2020 ഫെബ്രുവരി

ലോകസിനിമയുടെ ജാലകം തുറന്നിട്ട മേള

24ാമത് കേരള രാജ്യാന്തര ചലച്ചിത്ര മേള അവലോകനം

ലോക സിനിമയിലെ പുതിയ മാറ്റങ്ങളും പ്രവണതകളും കാണികൾക്ക് പകർന്നുനൽകി കേരള രാജ്യാന്തര ചലച്ചിത്ര മേളയുടെ 24ാം പതിപ്പിന് തിരശീല വീണു. സിനിമകളുടെ സെലക്ഷനിലെ മികവും കാണികളുടെ പങ്കാളിത്തവും കൊണ്ട് സജീവമായിരുന്ന മേളയുടെ പ്രതിനിധികളായി പന്ത്രണ്ടായിരത്തോളം പേരാണ് ഇക്കുറി തിരുവനന്തപുരം നഗരത്തിൽ എത്തിയത്. നിശാഗന്ധിയിൽ നടന്ന സമാപന സമ്മേളനത്തോടെയാണ് ചലച്ചിത്ര മേളയ്ക്ക് സമാപനമായത്.
ഡിസംബർ 6 മുതൽ 12 വരെ നടന്ന മേളയിൽ മത്സരവിഭാഗം, ഇന്ത്യൻ സിനിമ, ലോകസിനിമ, കൺട്രി ഫോക്കസ് തുടങ്ങി 15 വിഭാഗങ്ങളിലായി 73 രാജ്യങ്ങളിൽനിന്നുള്ള 186 സിനിമകളാണ് പ്രദർശിപ്പിച്ചത്. രണ്ടു മലയാള ചിത്രങ്ങൾ ഉൾപ്പടെ 14 ചിത്രങ്ങളാണ് അന്താരാഷ്ട്ര മത്സര വിഭാഗത്തിൽ ഉൾപ്പെടുത്തിയത്. മലയാള സിനിമ ഇന്ന് എന്ന വിഭാഗത്തിൽ 12 ചിത്രങ്ങളും ഇന്ത്യൻ സിനിമ ഇന്ന് എന്ന വിഭാഗത്തിൽ 7 സിനിമകളും പ്രദർശിപ്പിച്ചു. ലോകസിനിമാ വിഭാഗത്തിൽ 92 ചിത്രങ്ങളാണ് പ്രദർശിപ്പിച്ചത്. ആറ് സർക്കാർ തിയേറ്ററുകളടക്കം 14 തിയേറ്ററുകളിലായിട്ടാണ് സിനിമകൾ പ്രദർശിപ്പിച്ചത്.


 

പാരസൈറ്റ്, നോ ഫാദേഴ്സ് ഇൻ കാശ്മീർ..

ശരാശരി നിലവാരം പുലർത്തിയ സിനിമകളാൽ സമ്പന്നമായ മേള എന്നതാണ് ഇക്കുറി ഐ.എഫ്.എഫ്.കെയ്ക്ക് ചേരുന്ന വിശേഷണം. കൊറിയൻ ചിത്രം പാരസൈറ്റ്, ഇന്ത്യൻ ചിത്രം നോ ഫാദേ്ഴ്സ് ഇൻ കാശ്മീർ എന്നിവ ആദ്യ പ്രദർശനം കൊണ്ടു തന്നെ മേളയിൽ ഏറ്റവുമമധികം അഭിപ്രായം നേടിയ ചിത്രങ്ങളായി മാറി. ഈ സിനിമകളുടെ പ്രദർശനത്തിനായിരുന്നു ഏറ്റവുമധികം തിരക്ക് അനുഭവപ്പെട്ടതും. കാശ്മീരിലെ സമകാലിക യാഥാർത്ഥ്യവും ന്യൂനപക്ഷങ്ങൾ നേരിടുന്ന വെല്ലുവിളിയും പ്രമേയമാക്കിയ നോ ഫാദേഴ്സ് ഇൻ കാശ്മീർ തീവ്ര രാഷ്ട്രീയം പറയുന്ന സിനിമ എന്ന തരത്തിൽ ഏറെ ചർച്ച ചെയ്യപ്പെട്ടേക്കാവുന്ന സിനിമയാണ്. മനുഷ്യർക്കിടയിലെ ക്ലാസ് വിഭജനവും സമ്പന്ന, അടിസ്ഥാന വർഗങ്ങളുടെ ജീവിത വ്യത്യാസവും പ്രമേയമാക്കുന്ന പാരസൈറ്റ് വെറുതെ കണ്ട് കളയാനുള്ള സിനിമയല്ല.
ഡെസ്‌പൈറ്റ് ദി ഫോഗ്, കാമിൽ, അവർ മദേഴ്സ്, ആൾ ദിസ് വിക്ടറി, ആനി മാനി, മായിഘട്ട്, ഐഫ സ്ട്രീറ്റ്, ആദം, സൺസ് ഓഫ് ഡെൻമാർക്ക്, ഡീപ് വെൽ, ബലൂൺ, പാസ്ഡ് ബൈ സെൻസർ, ഡീഗോ മറഡോണ, ഡോർ ലോക്ക്, കേവ്, മേയ്ഡ് ഇൻ ബംഗ്ലാദേശ്, ജസ്റ്റ് 6.5, ഹെല്ലാരോ, ജല്ലിക്കട്ട്, അക്‌സോൺ, ദി പ്രൊജക്ഷനിസ്റ്റ്, ദി ക്വിൽറ്റ്, ആൾ ദിസ് വിക്ടറി, അപാർട്ട് ടുഗദർ തുടങ്ങിയ ചിത്രങ്ങൾ പ്രേക്ഷകപ്രീതിയിൽ മുമ്പിലെത്തി.
ലോകത്തെ മുൻനിര ചലച്ചിത്രമേളകളായ കാൻ, വെനീസ്, ടൊറന്റോ, ബെർലിൻ, ബുസാൻ, റോട്ടർഡാം ഫെസ്റ്റിവലുകളിൽ അംഗീകാരങ്ങൾ വാരിക്കൂട്ടിയ ചിത്രങ്ങൾ മേളയിൽ പ്രദർശനത്തിനുണ്ടായിരുന്നു. സമകാലിക ലോകസിനിമയിലെ മഹാരഥന്മാരായ പെദ്രോ അൽമോദോവർ, മുഹ്സിൻ മക്മൽബഫ്, മൈക്കേൽ ഹനേക, കെൻ ലോച്ച്, ഫത്തിഹ് അകിൻ, കോസ്റ്റ ഗാവ്രാസ്, ഏലിയ സുലൈമാൻ തുടങ്ങിയവരുടെ ഏറ്റവും പുതിയ ചിത്രങ്ങൾ മേളയിൽ ഉൾപ്പെടുത്തിയിരുന്നു. ഇന്ത്യൻ സിനിമയിലെ മൺമറഞ്ഞ പ്രതിഭകളായ മൃണാൾ സെൻ, ഗിരീഷ് കർണാട്, ലെനിൻ രാജേന്ദ്രൻ, എം.ജെ. രാധാകൃഷ്ണൻ, മിസ് കുമാരി, ടി.കെ. പരീക്കുട്ടി എന്നിവർക്ക് സ്മരണാഞ്ജലി അർപ്പിച്ച് ഇവരുടെ ഏഴ് ചിത്രങ്ങൾ പ്രദർശിപ്പിച്ചു. ദേശീയ പുരസ്‌കാര ജേതാവായ മുതിർന്ന നടി ശാരദയ്ക്ക് ആദരമർപ്പിച്ച് റേട്രോസ്‌പെക്ടീവ് വിഭാഗത്തിൽ നാലു ചിത്രങ്ങൾ പ്രദർശിപ്പിച്ചു.


 

ചർച്ച ചെയ്യപ്പെട്ട് മത്സരവിഭാഗം സിനിമകൾ

മേളയിൽ ഏറ്റവുമധികം ശ്രദ്ധനേടുന്ന മത്സരവിഭാഗത്തിൽ വ്യത്യസ്ത പ്രമേയ പരിസരങ്ങൾ കൊണ്ടും ചർച്ചചെയ്യുന്ന സവിശേഷമായ രാഷ്ട്രീയം കൊണ്ടും പ്രസക്തമായ പതിനാല് സിനിമകളാണ് പ്രദർശിപ്പിച്ചത്. ലബനനിലെ ഹിസ്ബുല്ലഇസ്രായേൽ യുദ്ധ പശ്ചാത്തലത്തിൽ തോക്കിൻകുഴലിനു മുന്നിലെ മനുഷ്യന്റെ അതീജീവനകഥ പറയുന്ന അഹമ്മദ് ഗൊസൈന്റെ ലെബനീസ് ചിത്രം ആൾ ദിസ് വിക്ടറി, ആഫ്രിക്കൻ റിപ്പബ്ലിക്കുകളിലെ ആഭ്യന്തര കലാപത്തിനിടയിൽ വനിത ഫോട്ടോഗ്രാഫറുടെ കാമറാക്കണ്ണുകളിലൂടെ കലാപ ഭൂമികയെ അടയാളപ്പെടുത്തുന്ന ബോറിസ് ലോജ്കിന്റെ ഫ്രഞ്ച് ചിത്രം കാമിൽ, ഗ്വാട്ടിമാലയിലെ ആഭ്യന്തര കലാപത്തിനുശേഷമുള്ള വിചാരണയും ഇരകളുടെ നേരനുഭവങ്ങളും വിഷയമാകുന്ന അവർ മദേഴ്സ്, അറവുകാരനിൽ നിന്ന് രക്ഷപ്പെട്ടോടുന്ന പോത്തിന്റെ പിന്നാലെയുള്ള ഓട്ടത്തിനിടയിൽ പുറത്തുവരുന്ന മനുഷ്യന്റെ ഹിംസാത്മകതയും ആദിമ ചോദനകളും പ്രമേയമാകുന്ന ലിജോ ജോസ് പെല്ലിശ്ശേരിയുടെ മലയാള ചിത്രം ജല്ലിക്കട്ട്, എലിസോ എന്ന സിനിമാ ഓപ്പറേറ്റർ സിനിമാ റീലിലെ പെൺകുട്ടിയുമായി പ്രണയത്തിലാകുന്നതിലൂടെ മനുഷ്യബന്ധത്തിന്റെ ദൃഢതയെ ഓർമ്മപ്പെടുത്തുന്ന ജോസ മരിയ കബ്രാലിന്റെ ദി പ്രൊജക്ഷനിസ്റ്റ്, ബീഫ് ഒരു രാഷ്ട്രീയ വിഷയമായ വർത്തമാനകാല ഇന്ത്യയെ അടയാളപ്പെടുത്തുന്ന ഫർഹാൻ ഇർഷാദിന്റ 'ആനി മാനി' തുടങ്ങിയ ചിത്രങ്ങൾ മത്സരവിഭാഗത്തിൽ പ്രേക്ഷകരെ ഏറെ ആകർഷിച്ചവയാണ്.

'ദേ സേ നതിംഗ് സെയ്സ് ദി സെയിമി'ന് സുവർണചകോരം

മികച്ച ചിത്രത്തിനുള്ള സുവർണചകോരം ജോ ഒഡാഗിരി സംവിധാനം ചെയ്ത ജാപ്പനീസ് ചിത്രം 'ദേ സേ നതിംഗ് സെയ്സ് ദി സെയിം' നേടി. ലിജോ ജോസ് പെല്ലിശ്ശേരിയുടെ ജല്ലിക്കട്ട് ആണ് മികച്ച ചിത്രമായി പ്രേക്ഷകർ തിരഞ്ഞെടുത്തത്. മികച്ച സംവിധായകനുള്ള രജതചകോരം പാക്കരറ്റ് എന്ന ചിത്രത്തിന്റെ സംവിധായകൻ അലൻ ഡെബേർട്ടനാണ്. മികച്ച നവാഗത സംവിധായകനുള്ള രജതചകോരം സ്പാനിഷ് ചിത്രമായ അവർ മദേഴ്സിന്റെ സംവിധായകൻ സീസർ ഡയസ് നേടി. മികച്ച ചിത്രത്തിനുള്ള ഫിപ്രസി രാജ്യാന്തര പുരസ്‌കാരത്തിന് ബോറിസ് ലോജ്‌കെയ്ൻ സംവിധാനം ചെയ്ത കാമിലും ഈ വിഭാഗത്തിലെ മികച്ച മലയാള ചിത്രമായി സന്തോഷ് മണ്ടൂർ സംവിധാനം ചെയ്ത പനിയും തിരഞ്ഞെടുക്കപ്പെട്ടു. ഇന്ത്യയിലെ മികച്ച നവാഗത സംവിധായകനുള്ള എഫ്.എഫ്എസ്.എ കെ.ആർ മോഹനൻ പുരസ്‌കാരം ആനി മാനി എന്ന ചിത്രത്തിലൂടെ ഫാഹിം ഇർഷാദ് നേടി. മികച്ച ഏഷ്യൻ ചിത്രത്തിനുള്ള നെറ്റ്പാക് പുരസ്‌കാരവും ആനി മാനിക്കാണ്. മേളയിലെ മികച്ച മലയാള ചിത്രത്തിനുള്ള നെറ്റ്പാക് പുരസ്‌കാരം ഡോ.ബിജു സംവിധാനം ചെയ്ത വെയിൽമരങ്ങൾ നേടി. നെറ്റ്പാക് പ്രത്യേക ജൂറി പരാമർശത്തിന് മധു സി.നാരായണൻ സംവിധാനം ചെയ്ത കുമ്പളങ്ങി നൈറ്റ്സ് അർഹമായി.

       നിശാഗന്ധിയിൽ നടന്ന ചലച്ചിത്ര മേളയുടെ സമാപന സമ്മേളനം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. ജനാധിപത്യ വിരുദ്ധ പ്രവർത്തനങ്ങൾക്കെതിരെ പ്രതികരിക്കുന്നവരെ നിശബ്ദരാക്കാൻ ശ്രമിക്കുന്ന സാഹചര്യങ്ങളാണ് രാജ്യത്ത് നിലനിൽക്കുന്നതെന്നും അത്തരം വെല്ലുവിളികളിൽ ഇന്ത്യ മുട്ടുകുത്തില്ലെന്നും ആരും നിശബ്ദരാകാൻ പോകുന്നില്ലെന്നും മുഖ്യമന്ത്രി പിണറായി വിജയൻ പറഞ്ഞു. അടിച്ചമർത്തപ്പെടുന്നവർക്കും മർദ്ദിതർക്കും പീഡിതർക്കുമൊപ്പമാണ് കേരളത്തിന്റെ ചലച്ചിത്രമേള എക്കാലത്തും നിലകൊണ്ടിട്ടുളളതെന്നും കേരളത്തിന്റെ സാംസ്‌ക്കാരിക പോരാട്ടമാണ് ഈ ചലച്ചിത്രമേളയെന്നും മുഖ്യമന്ത്രി പറഞ്ഞു.
      ചലച്ചിത്ര മേളയുടെ ആജീവനാന്ത പുരസ്‌കാരം വിഖ്യാത അർജന്റീനിയൻ സംവിധായകൻ ഫെർണാണ്ടോ സൊളാനസിന് മുഖ്യമന്ത്രി സമ്മാനിച്ചു. സുവർണചകോരവും രജതചകോരവുമടക്കമുള്ള മേളയിലെ മറ്റു ജേതാക്കൾക്കും മുഖ്യമന്ത്രി പുരസ്‌കാരങ്ങൾ സമ്മാനിച്ചു.  വരാനിരിക്കുന്ന രജത ജൂബിലി മേളയുടെ വിളംബരമോതി നടി റിമാ കല്ലിങ്കലിന്റെ നൃത്തത്തോടെയാണ് 24ാമത് മേളയ്ക്ക് സമാപനം കുറിച്ചത്.


അക്ഷരകൈരളി, 2020 ജനുവരി

പ്രതികൾ പൂവൻകോഴികൾ തന്നെ

ഉണ്ണി ആറിന്റെ 'സങ്കടം' എന്ന ചെറുകഥയെ ആസ്പദമാക്കി അദ്ദേഹത്തിന്റെ തന്നെ പ്രതി പൂവൻകോഴി എന്ന കഥയുടെ പേരു കടം കൊണ്ട് റോഷൻ ആൻഡ്രൂസ് സംവിധാനം ചെയ്ത ചിത്രമാണ് പ്രതി പൂവൻകോഴി. പേരിൽ നൽകുന്ന സൂചനയുടെ വഴിയെ തന്നെയാണ് സിനിമയുടെ സഞ്ചാരം. കൃത്യമായ സ്ത്രീപക്ഷ വീക്ഷണം പുലർത്തുന്ന സിനിമ പ്രശ്നങ്ങളെ സധൈര്യം നേരിടുന്ന പെണ്ണിന്റെ പ്രതിനിധിയെയാണ് അടയാളപ്പെടുത്തുന്നത്. സഹനം കൊണ്ടും മൗനം കൊണ്ടുമല്ല തുറന്ന പ്രതികരണം കൊണ്ടായിരിക്കണം പെണ്ണ് സ്വത്വം പ്രകടിപ്പിക്കേണ്ടതെന്ന് പ്രതി പൂവൻകോഴി ഓർമ്മപ്പെടുത്തുന്നു. കേരളത്തിൽ നിലനിൽക്കുന്ന ലിംഗപരമായ അനീതിയാണ് മാധുരി എന്ന സെയിൽസ് ഗേളിനെ കേന്ദ്രമാക്കി ചിത്രം പറയുന്നത്. കൊമേഴ്സ്യൽ സിനിമയുടെ പാറ്റേണിൽ സാമൂഹിക പ്രസക്തമായ ഒരു വിഷയം പറഞ്ഞതിൽ ഉണ്ണി ആർ  റോഷൻ ആൻഡ്രൂസ് കൂട്ടുകെട്ട് അഭിനന്ദനമർഹിക്കുന്നു.
        ഒരു നഗരത്തിലെ വസ്ത്രശാലയിലെ സെയിൽസ് ഗേളാണ് മാധുരി(മഞ്ജു വാര്യർ). സാധാരണക്കാരിയായ മാധുരിയുടെ വീട്ടിൽ അമ്മ മാത്രമാണുള്ളത്. സെയിൽസ് ഗേൾ ജോലിയിൽ നിന്നുമുള്ള വരുമാനവും തയ്യലും നടത്തിയാണ് മാധുരിയും അമ്മയും ജീവിക്കുന്നത്. ഒരിക്കൽ അപരിചിതനായ ഒരാൾ ബസിൽ വെച്ച് മാധുരിയെ അപമാനിക്കുന്നു. ശരീരത്തിൽ മോശമായി ഒരാൾ സ്പർശിച്ചപ്പോൾ ആദ്യം എന്ത് ചെയ്യണമെന്ന് അറിയാതെ പകച്ചു പോവുകയാണ് മാധുരി. എന്നാൽ പിന്നീട് അയാളെ തിരഞ്ഞ് മാധുരി ഇറങ്ങുന്നു. തന്നെ മോശമായി സ്പർശിച്ച ആളെ തിരിച്ച് തല്ലണമെന്നായിരുന്നു മാധുരിക്ക്. അന്വേഷണത്തിലൊടുവിൽ തന്നോട് മോശമായി പെരുമാറിയത് ഗുണ്ടയായ ആന്റപ്പൻ ആണെന്ന് മാധുരി കണ്ടെത്തുന്നതുമാണ് പ്രതി പൂവൻകോഴിയുടെ പ്ലോട്ട്.

  ഗൗരവമാർന്ന ഒരു വിഷയത്തിന്റെ തീവ്രത വിട്ടുപോകാതെ അതിൽ മാത്രം നിന്നുകൊണ്ട് അവതരിപ്പിക്കുന്ന രീതിയാണ് പ്രതി പൂവൻകോഴി സ്വീകരിച്ചിട്ടുള്ളത്. ഹൗ ഓൾഡ് ആർ യൂവിനു ശേഷം മഞ്ജു വാര്യരും റോഷൻ ആൻഡ്രൂസും ഒന്നിക്കുന്ന ചിത്രവും സ്ത്രീശാക്തീകരണത്തിന്റെ സന്ദേശം മുന്നോട്ടുവയ്ക്കുന്നു. ചിത്രത്തിൽ ഒന്നിലധികം പുരുഷ കഥാപാത്രങ്ങൾ സ്ത്രീകൾക്കെതിരെ പല തരത്തിൽ അനീതി പ്രവർത്തിക്കുന്നവരായി എത്തുന്നുണ്ട്. അവരിലൊരാൾ മാത്രമാണ് ആന്റപ്പൻ. ഈ പുരുഷ കഥാപാത്രങ്ങളെയെല്ലാം നമുക്ക് പരിചിതമായ സാമൂഹിക സാഹചര്യത്തിൽ ദിനേന കാണാൻ സാധിക്കുന്നവരാണ്. ഇഷ്ടമുള്ള വസ്ത്രം ധരിക്കാൻ പോലും സ്ത്രീകൾക്ക് സ്വാതന്ത്ര്യം നൽകാത്ത പുരുഷ പ്രജകൾ ഇപ്പൊഴും പരിഷ്‌കൃതമെന്ന് വിശേഷിപ്പിക്കപ്പെടുന്ന സമൂഹത്തിലുണ്ട്. ഇതിനോടെല്ലാം ഒരു പരിധി വരെ പൊരുത്തപ്പെട്ടു കഴിഞ്ഞ നിലയിലാണ് സ്ത്രീകൾ കഴിഞ്ഞു പോരുന്നത്. ബസ്സിൽ വച്ച് അപമാനിക്കപ്പെടുന്ന മാധുരിയോട് കൂട്ടുകാരികളും അമ്മയും വരെ 'നമ്മളെന്തു ചെയ്യാനാണ്, അതു മറന്നുകളയ്'എന്നാണ് ഉപദേശിക്കുന്നത്. കൂട്ടുകാരികളിൽ പലർക്കും ബസ്സിലും പൊതു ഇടത്തിലും വച്ച് സമാന അനുഭവം ഉണ്ടായിട്ടുണ്ട്. പ്രതികരിക്കണമെന്ന് വിചാരിച്ചെങ്കിലും സാധിച്ചില്ല. ഈ അനുഭവം കൊണ്ടാണ് അവർ മാധുരിയെ പിന്തിരിപ്പിക്കുന്നത്. എന്നാൽ മാധുരി പിന്മാറാൻ തയ്യാറാവുന്നില്ല. മഞ്ജുവിന്റേതായി അടുത്തിടെ വന്ന ചിത്രങ്ങളിൽ ശ്രദ്ധിക്കപ്പെടുന്ന കഥാപാത്രമാണ് പ്രതി പൂവൻകോഴിയിലെ മാധുരി. അനായാസമായ അഭിനയശൈലി കൊണ്ടാണ് നാട്ടിൻപുറത്തുകാരിയായ യുവതിയെ മഞ്ജു അവതരിപ്പിക്കുന്നത്. അനുശ്രീയുടെ റോസമ്മ എന്ന കഥാപാത്രവും ശ്രദ്ധിക്കപ്പെടുന്നതാണ്.
    ആന്റപ്പൻ എന്ന പ്രതിനായകനായി എത്തുന്ന റോഷൻ ആൻഡ്രൂസ് ആണ് പ്രകടനമികവിൽ മുന്നിലെത്തുന്നത്. ക്യാമറയ്ക്കു പിന്നിൽ നിന്ന് മുന്നിലെത്തുന്ന റോഷൻ ആന്റപ്പന് പുതിയ മുഖത്തിന്റെ കൗതുകം നൽകുന്നു. സിനിമ മുന്നോട്ടു പോകുന്തോറും മെയ്വഴക്കമുള്ള ഒരു അഭിനേതാവിനെ റോഷനിൽ കാണാം. നെഗറ്റീവ് ഷെയ്ഡുള്ള ഈ കഥാപാത്രത്തിന് തന്റേതായ ഒരു ശരീരഭാഷ നൽകിയിട്ടുണ്ട് റോഷൻ.

സ്ത്രീശബ്ദം, 2020 ജനുവരി